Read Pahari, Kullu मत्ती 2 Bible Online

मत्ती 2 - Pahari, Kullu bible

मत्ती 2

¹ज़ैबै हेरोदेस राज़ा यहूदिया प्रदेशा न राज़ केरदा लागा ती, तैबै बैतलैहम नगरा न यीशु रा जन्म हुआ। यीशु रै पैदा होंणै न किछ़ बौगता बाद पूर्व दिशा न कई ज्योतिषी लोका यरूश्लेम शैहरा न एज़िया पुछ़दै लागै।

²“यहूदी रा राज़ा ज़ौसरा जन्म हुआ, सा कौखै सा? किबैकि आसै पूर्व दिशा न तेइरै जन्मा रा तारा हेरू सा होर आसै तेइरी आराधना केरदै आऐ सी।”

³ऐ शुणिया हेरोदेस राज़ा होर यरूश्लेम शैहरा रै बोहू सारै लोका डौरै।

⁴तैबै तेइयै यरूश्लेम शैहरा रै सारै मुख्यपुरोहिता होर शास्त्रियै न कठै केरिया पुछ़ू, “मसीह रा जन्म कौखै होंणा चेहिऐ ती?”

⁵तिन्हैं तेइबै बोलू, “तेई बैतलैहमा शैहरा न पैदा होंणा,” ज़ो यहूदिया प्रदेशा न सा, “किबैकि भविष्यवाणी केरनु आल़ै मिकै बोहू पैहलै पवित्र शास्त्रा न लिखू सा:

⁶“ ‘ओ बैतलैहमा रै लोको, ज़ो यहूदा देशा न सी, तू कौसी भी रीतियै यहूदै रै अधिकारी न होछ़ा नी ऑथि; किबैकि तो न एक राज़ा निकल़णा होर तेई मेरी प्रजा इस्राइलै री हेर शुण केरिया तिन्हरी अगुवाई केरनी।’ ”

⁷तैबै हेरोदेस राज़ै च़ुप केरदै ज्योतिषी लोका शाधिया तिन्हां न पुछ़ू, कि तारा ठीक कैबै कुणी बौगतै पैहली बार हेरूआदा ती।

⁸तैबै तेइयै ते ऐण्ढै बोलिया बैतलैहम नगरा बै भेज़ै कि, “ज़ाईया तेई शोहरू रै बारै न ठीक-ठीक पता केरा होर ज़ैबै सौ मिलला ता मुँभै खबर देइत् ताकि हांऊँ भी ज़ाइआ तेइबै प्रणाम केरनु।”

⁹तैबै ज्योतिषी राज़ै री गैल शुणिया बैतलैहम शैहरा बै नौठै होर हेरा, ज़ो तारा तिन्हैं पूर्व दिशा न हेरू ती सौ फिरी तिन्हां आगै-आगै च़लू; होर ज़ौखै सौ शोहरू ती तेई घौरा हागै पुजिआ रुकु।

¹⁰तेई तारै बै फिरी हेरिया ते बोहू खुश हुऐ, होर तारै रा पिछ़ा केरू। (लूका 2:20)

¹¹होर तेई घौरा न पुजिआ सौ शोहरू तेइरी आमा मरियमा सैंघै हेरू, होर टुँबड़ै पौड़िया तेइबै प्रणाम केरु होर आपणै-आपणै झोल़ै खोलिया तेइबै सूना, लोबान होर गन्धरसै री भेंट च़ढ़ाई।

¹²होर सुपनै न ऐ च़िताऊणी पाईआ कि हेरोदेसा हागै बापस हेरीत् ज़ाँदै, ते होरी बौतै आपणै देशा बै नौठै।

¹³ज्योतिषी ज़ाणै न बाद हेरा परमेश्वरा रै एकी स्वर्गदूतै सुपनै न यूसुफा बै हेरूइया बोलू, “उठ, तेई शोहरू होर तेइरी आमा बै लेइया मिस्र देशा बै भग; होर ज़ैबै तैंईंयैं हांऊँ तौभै नी बोलनू, तू तौखै रौही; किबैकि हेरोदेस ऐई शोहरू बै तोपणू आल़ा सा कि ऐईबै मारिया खत्म केरला।”

¹⁴तैबै यूसुफ रातियै उठिया शोहरू होर तेइरी आमा लेइया मिस्र देशा बै नौठा।

¹⁵होर हेरोदेस मौरनै ढौई तौखै रौहू कि सौ वचन ज़ो प्रभुऐ भविष्यवाणी केरनु आल़ै होशे द्वारा बोलू ती कि “मैं आपणा बेटा मिस्रा न शाधु सौ पूरा होला।”

¹⁶ज़ैबै हेरोदेसै ऐ हेरू, कि ज्योतषियै मूँ सैंघै धोखा केरू, तैबै सौ झ़िका सैंघै भौरूआ होर सपाई बै भेज़िआ ज्योतिषी न पुछ़ूऐदै ठीक-ठीक बौगता रै मुताबक बैतलैहम होर औरलै पौरलै सारै शोहरू ज़ो दूई बौर्षै रै ती, होर एथा न होछ़ै ती मारनै द्याऐ।

¹⁷तैबै ज़ो वचन यिर्मयाह भविष्यवाणी केरनु आल़ै बोलू ती सौ पूरा हुआ।

¹⁸“रामाह नगरा न एक बड़ी आवाज़ शुणुई, बड़ा विलाप होर रोणां शुणुआ, राहेल आपणै शोहरू री तैंईंयैं रोंदी लागी ती होर शान्त नी ती होंणा च़ाँहदी, किबैकि ते मूँऐ ती।”

¹⁹हेरोदेसै रै मौरनै न बाद प्रभु रै स्वर्गदूतै मिस्रा न यूसुफा बै सुपने न हेरूइया बोलू,

²⁰कि “उठ, शोहरू होर तेइरी आमा बै लेइया इस्राइलै रै देशा बै ज़ा; किबैकि ज़ो शोहरू रै प्राण लेणा चाहा ती, ते मूँऐ।”

²¹यूसुफ उठु, शोहरू होर तेइरी आमा लेइया इस्राइलै रै देशा बै आऊ।

²²पर ऐ शुणिया कि अरखिलाउस आपणै बापू हेरोदेसै री ज़ैगा यहूदिया पैंधै राज़ केरदा लागा सा सौ तौखै ज़ाणै न डौरू होर सुपनै न च़िताऊणी पाईआ गलील ज़िलै बै नौठा।

²³होर नासरत नगरा न रौंहदा लागा, ताकि सौ वचन पूरा होला, ज़ो भविष्यवाणी केरनु आल़ै रै ज़रियै बोलूआ ती, “तेई यीशु नासरी कहलाइणा।”