Read Pahari, Kullu मत्ती 21 Bible Online

मत्ती 21 - Pahari, Kullu bible

मत्ती 21

¹ज़ैबै यीशु होर तेइरै च़ेले यरूश्लेमा शैहरा रै नेड़े जैतून ढौगै री बैतफगै ज़ैगा न पुजै ती यीशुऐ आपणै दूई च़ेले आपु न आगै भेज़ै होर तिन्हां बै बोलू,

²“तुसै सामनै रै ऐई ग्राँ बै ज़ाआत्, होर तौखै तुसाबै गधी बोनुईदी मिलणी होर तेसा सैंघै तेसा रा बच्च़ा भी होंणा। तिन्हां बै खोलिया मूँ हागै आंणा।

³अगर तुसा न कोई किछ़ बोलला, ता तुसै बोलीत्, कि प्रभु बै इन्हरी ज़रूरत सा। तैबै तेई ते फट भेज़णै।”

⁴ताकि भविष्यवाणी केरनु आल़ै रा ऐ वचन पूरा होला,

⁵“सिय्योनै री नगरी बै बोला, ‘हेर, तेरा राज़ा तौ हागै ऐन्दा लागा सा; सौ नम्र सा होर गधै पैंधै बेठा सा।’ ”

⁶तैबै तेइरै च़ेले नौठै होर तिन्हैं तैण्ढाऐ केरू ज़ैण्ढा यीशुऐ तिन्हां बै बोलू ती।

⁷तिन्हैं गधी होर तेसरा बच्च़ा आंणु होर तिन्हां पैंधै आपणै झिकड़ै पाऐ होर यीशु तिन्हां पैंधै बेठा।

⁸भीड़ै रै बोहू सारै लोकै आपणै झिकड़ै बौता न बछ़ाऐ होर किछ़ लोकै बूटै री शांणी काटिया बौता न बछ़ाई।

⁹ज़ो लोका यीशु रै आगै-पिछ़ै च़लदै लागै ती, ते यीशु री जय-जयकार केरिया बोलदै लागै ती, “प्रभु री स्तुति हो! दाऊदै री औलाद!” स्वर्गा न प्रभु री स्तुति हो। “धन्य सा सौ ज़ुण प्रभु रै अधिकारा न एज़ा सा।”

¹⁰ज़ैबै सौ यरूश्लेम शैहरा न पुजू ता पूरै शैहरा न खलबली मची होर लोका बोलदै लागै, “ऐ कुण सा?”

¹¹लोकै री भीड़ै बोलू, “ऐ गलील ज़िलै रै नासरत ग्राँ रा भविष्यवाणी केरनु आल़ा यीशु सा।”

¹²यीशुऐ परमेश्वरै रै मन्दिरा बै ज़ाइआ ते सैभ लोका मन्दिरा न बाहरै खोलै ज़ो तौखै समान बेच़दै होर खरीददै लागै ती, ढैबुऐ रा लेन-देण केरनु आल़ै होर कबूतरा बेच़णू आल़ै री सारी चौकियाँ उलट-पुलट केरी।

¹³यीशुऐ तिन्हां बै बोलू, “पवित्र शास्त्रा न ऐ लिखु सा; ‘मेरा मन्दिर प्रार्थना रा घौर होंणा’ पर तुसै लोकै ऐ डाकू रा अड्डा बणाऊ सा।”

¹⁴मन्दिरा न किछ़ कांणै होर लँगड़ै-लूलै यीशु हागै आऐ होर तेइयै ते ठीक केरै।

¹⁵ज़ैबै मुख्यपुरोहिते होर यहूदी शास्त्रियै ते नोखै कोम हेरै ज़ो यीशुऐ केरै ती होर यीशु री जय-जयकार होर शोहरू बै मन्दिरा न शुणी कि, स्तुति हो! दाऊदै री औलाद धन्य सा, तैबै ते झ़िकुऐ।

¹⁶तिन्हैं यीशु न पुछ़ू, “तू शुणा सा ते कि बोलदै लागै सी?” यीशुऐ तिन्हां बै बोलू, “हाँ,” हांऊँ शुणा सा। कि “तुसै धर्म शास्त्रा न नी पौढ़ू, ‘तैं शोहरू होर दूध पीणू आल़ै बच्चै न अपार स्तुति कराई?’ ”

¹⁷तैबै यीशु तिन्हां बै छ़ौड़िआ नगरा रै बाहरै बैतनिय्याह शैहरा बै नौठा होर तौखै रात काटी।

¹⁸आगलै रोज़ दोतियै ज़ैबै यीशु आपणै च़ेले सैंघै यरुश्लेम वापस ऐन्दा लागा ती, तैबै यीशु बै भूख लागी।

¹⁹बौतै रै कनारै तेइयै एक फेगड़े रा बुटा हेरू होर तेई कौछ़ै नौठा पर तौखै तेइबै पौचै रै अलावा होर किछ़ नी मिलू। तैबै यीशुऐ तेई बुटै बै बोलू, “ऐबै न बाद तौ न कैधी फ़ौल़ नी लागणै होर सौ फेगड़े रा बूटा तुरन्त शुकू।”

²⁰ज़ैबै च़ेले ऐ हेरू ता तिन्हैं बड़ी हैरानी सैंघै पुछ़ू, “ऐ फेगड़े रा बूटा ऐतरी छ़ेकै कैण्ढै शुकू?”

²¹यीशुऐ तिन्हां बै ज़वाब धिना, “हांऊँ तुसाबै सच़ बोला सा अगर तुसा न भरोसा होर तुसै शक नी केरदै ता तुसै भी ज़ो मैं ऐई बुटै सैंघै केरू ऐण्ढा केरी सका सी बल्कि अगर तुसै ऐई ढौगा बै बोललै, औखै न उठ होर समुन्द्रा न जा, ता सौ तैण्ढाऐ होंणा।

²²अगर तुसाबै भरोसा ता प्रार्थना न तुसै ज़ो बी मुँगलै सौ तुसाबै मिलणा।”

²³ज़ैबै यीशु मन्दिरा न ज़ाइआ उपदेश देंदा लागा ती ता मुख्यपुरोहिते होर यहूदी स्याणै एज़िया यीशु न पुछ़ू, “ऐण्ढी गैला तू कुणी हका सैंघै केरा सा होर ऐ हक तौभै कुणिऐ धिना?”

²⁴यीशुऐ तिन्हां बै ज़वाब धिना, “हांऊँ तुसा न एक प्रश्न पुछ़ा सा, अगर तुसै मुँभै ज़वाब देलै ता मुँबी तुसाबै दैसणा कि हांऊँ इन्हां गैला कुणी हका सैंघै केरा सा।

²⁵दसा यूहन्ना बै बपतिस्मा कौखै न मिलू? परमेश्वरा न कि मांहणु न?” ते आपु न बिच़ार केरदै लागै, “अगर आसै बोला सी कि परमेश्वरा न मिलू तै ऐई आसा ऐ बोलणा कि तुसै तेइरा विश्वास किबै नी केरदै?”

²⁶होर अगर आसै बोला सी, मांहणु री धिरै न आसाबै लोकै री डौर सा, किबैकि ते यूहन्ना बै भविष्यवाणी केरनु आल़ा मैना सी।

²⁷तिन्हैं यीशु बै बोलू, “आसै नी ज़ाणदै।” तैबै यीशुऐ तिन्हां बै बोलू, “हांऊँ भी तुसाबै नी दसदा कि हांऊँ इन्हां कोमा बै कुणी हका सैंघै केरा सा।

²⁸“दसा तुसै लोका एथै रै बारै न कि सोच़ा सी? एकी मांहणु रै दूई बेटै ती, तेइयै बड़ै बेटै बै बोलू, ‘बेटैआ, औज़ तू मेरै अँगूरै रै बगीच़ै बै ज़ा होर कोम केर।’

²⁹“पर बेटै ज़वाब धिना, ‘मेरा मूढ़ नी ऑथि’, पर बादा न तेइरा मूढ़ बदलू होर सौ नौठा।

³⁰“तैबै सौ बापू दुज़ै बेटै हागै नौठा होर तेइबै भी बगीच़ै न कोम केरनै बै बोलू। तेई बेटै ज़वाब धिना, ‘ओ ज़ी, हांऊँ,’ ज़ा सा पर सौ नी नौठा।

³¹“दसा इन्हां दूई न बापू रा कोम कुणिऐ केरू?” तिन्हैं बोलू, “बड़ै बेटै।” यीशुऐ तिन्हां बै बोलू, “हांऊँ तुसाबै सच़ बोला सा, च़ुँगी लेणू आल़ै होर वैश्या परमेश्वरै रै राज्य बै तुसा न पैहलै जाँणा।”

³²किबैकि बपतिस्मै देणु आल़ा यूहन्ना तुसाबै ज़िन्दगी री सही बौत रिहाणै री तैंईंयैं आऊ होर तुसै तेइरा बशाह नी केरू। पर च़ुँगी लेणू आल़ै होर वैश्या तिन्हैं तेइरा बशाह केरू। ज़ैबै तुसै ऐ हेरू ता तुसै बादा न भी मन नैंई बदलू होर न तेइरा बशाह केरू।

³³“एक होर उदाहरण शुणा, एक ज़मींदार ती। तेइयै एक अँगूरा रा बगीच़ा लाऊ होर तेथा रै च़ोहू पासै बाड़ लाऊ। तैबै अँगूरा रा रस खोलणै री तैंईंयैं एक खाच़ कोतू; होर टापरा बणाईया किसाना बै ठेके पैंधै देइया प्रदेशा बै नौठा।

³⁴ज़ैबै अँगूर कौढणै रा बौगत आऊ ता बगीच़ै रै मालकै तिन्हां किसाना हागै आपणै नोकर भेज़ै कि ते फसला रा हिस्सा आंणलै।

³⁵“पर किसानै ते नोकर ढौकै होर ते मारै किछ़ पात्थरै लाइया मकाऐ।

³⁶तैबै तेइयै पैहलै न ज़ादा होर नोकर भेज़ै। पर ठेकैदारै ते भी मारै।

³⁷बादा न तेइयै तिन्हां हागै आपणा बेटा भेज़ू, कि तै मेरै बेटै रा आदर केरलै।

³⁸“पर ठेकैदारै ज़ैबै मालका रा बेटा हेरू ता ते आपु न बिच़ार केरिया बोलदै लागै, ‘ऐ ता तेइरा वारिस सा, एज़ा, आसा ऐ मारना होर ऐईरा हक लेणा।’

³⁹तिन्हैं सौ ढौकिया अँगूरा रै बगीच़ै न बाहरै केरू होर मारू।

⁴⁰“तुसै कि सोच़ा सी ज़ैबै अँगूरै रै बगीच़ै रा मालक एला, ता तेई तिन्हां ठेकैदारा सैंघै कि केरना?”

⁴¹तिन्हैं तेइबै बोलू, “तेई ते बड़ी बैरहमी सैंघै मारनै; होर सौ अँगूरा रा बगीच़ा होरी ठेकैदारा बै देणा ज़े फैसला रा हिस्सा तेइबै देलै।”

⁴²यीशुऐ तिन्हां बै बोलू, कि “तुसै शास्त्रा रा सौ वचन नी पौढ़ू “ ‘ज़ुण पात्थर घौर बनाणु आल़ै मिस्त्रियै बेकार समझ़ू, सौहै पात्थर कुणै रा पात्थर बणू; ऐण्ढा प्रभुऐ केरू, ज़ो आसरी नज़री न नौखा सा’

⁴³“हांऊँ तुसाबै बोला सा परमेश्वरा रा राज्य तुसा न छीनिणा; होर तिन्हां लोका बै देणा ज़ो तेइरै राज्य रै मुताबक च़ला सी।

⁴⁴ज़ुण ऐई पात्थरा पैंधै पौड़ला तेइरै टुकड़ै-टुकड़ै होंणै होर ज़ुणी पैंधै ऐ पात्थर पौड़ला तेई पिठै सांही पिशिणा।”

⁴⁵ज़ैबै मुख्यपुरोहिते होर फरीसी लोकै ऐ उदाहरण शुणु ता तिन्हैं ज़ाणू कि आसरै बारै न बोलदा लागा सा।

⁴⁶तैबै तिन्हैं तेइबै ढौकणै री कोशिश केरी पर ते लोका न डौरा ती किबैकि ते यीशु बै भविष्यवाणी केरनु आल़ा मना ती।