Read Pahari, Kullu मत्ती 22 Bible Online

मत्ती 22 - Pahari, Kullu bible

मत्ती 22

¹एक बार भी यीशु लोका सैंघै रै उदाहरणा न गैला केरदै लागै होर बोलू,

²“स्वर्गा रा राज्य तेई राज़ै सांही सा ज़ुणियै आपणै बेटै रै ब्याह री धाम धिनी।

³राज़ै आपणै नोकर छौंदै लाउदै लोका बै शाधदा भेज़ू ज़ुणिबै ब्याह रा छाँदा लाऊ ती पर ते नी आऐ।

⁴“फिरी तेइयै नोकर ऐ बोलिया भेज़ै, शाधेंदै लोका बै बोला, मैं धाम त्यार केरी सा, एज़ा होर मैं आपणै धाचुऐदै पशु मारिया धाम त्यार केरी सा; ब्याह री धामा न एज़ा।

⁵“पर लोकै कोई ध्यान नी धिना होर ते आपणै-आपणै कोमा नौठै।

⁶किछ़ लोकै ता राज़ै रै नोकर ढौकै होर तिन्हरा अनादर केरू होर ते मकाऐ।

⁷ज़ैबै राज़ै ऐ शुणु, तेइबै बड़ी झ़िक आई, तैबै राज़ै आपणै सिपाही भेज़ै होर तिन्हैं ते नोकरा बै मारनू आल़ै खूनी मकाऐ, होर तिन्हरै नगरा न औग लाई।

⁸“तैबै राज़ै आपणै नोकरा बै बोलू, ‘ब्याह री धाम त्यार सा पर ज़ो शाधै ती ते लोका एसा धामा काबिल सिद्ध नी हुऐ।

⁹ऐबै तुसै सड़का बै होर गली बै ज़ाआत्, ज़ो भी तुसाबै मिललै तिन्हाबै ब्याह री धामा बै आंणा।’

¹⁰तैबै ते नोकर सड़क होर गली बै नौठै। तिन्हां बै भलै-बुरै ज़ो भी लोका मिलै तिन्हैं ते शाधिया आंणै होर ब्याह रा घौर पूरा पाऊणै सैंघै भौरूआ।

¹¹“पर ज़ैबै राज़ा पाऊणै बै हेरदा आऊ; ता तौखै तेइयै एक ऐण्ढा मांहणु हेरू, ज़ुणियै ब्याह रै झिकड़ै नी ती लाऐदै।

¹²राज़ै तेइबै बोलू, ‘ओ सैंघी, ब्याह रै झिकड़ै लाऐ बगैर तू औखै आँध्रै कैण्ढै आऊ? पर तेइयै किछ़ नी बोलू।’

¹³“तैबै राज़ै आपणै नोकरा बै बोलू, ऐईरी हौथ ज़ोंघा बोनिआ बाहरै निहारै न शेटा। ज़ौखै लोका बै बोहू दु:ख सौहणा पौड़ा सा।

¹⁴“सैभ लोका परमेश्वरै हमेशा री ज़िन्दगी री तैंईंयैं शाधै सी, पर किछ़ तेइयै चुनै सी।”

¹⁵तैबै फरीसियै ज़ाइआ एक सभा रखी कि ते यीशु बै तेइरी आपणी गैला न कैण्ढै फसाई सका सी एथा रा विचार केरी सकलै।

¹⁶तिन्हैं आपणै किछ़ च़ेले हेरोदिया हागै भेज़ै। तिन्हैं लोकै यीशु बै बोलू, “ओ गुरू, आसै जाँणा सी कि तू बड़ा सच़ा सा होर एसा गैला री किछ़ भी परवाह नी केरदा कि लोका कि सोच़ा सी। किबैकि तू मांहणु रै रुतवै पैंधै ध्यान नी देंदा बल्कि परमेश्वर रै बारै न सच़ी शिक्षा देआ सा। आसाबै दस, महाराज़ै बै कर देणा सही सा कि नी?

¹⁷तू आसाबै दस तेरा विचार कि सा? महाराज़ै बै च़ुँगी देणा सही सा, कि नी?”

¹⁸यीशुऐ तिन्हरै मनै री गैल ज़ाणी होर तेइयै बोलू, “ओ कपटियो! तुसै मुँभै किबै परखणा चाहा सी?”

¹⁹मुँभै तेई सिक्के मौंझ़ै न एक सिक्का रिहात्, जुणी सैंघै लोका रोम ऋणा रा भुगतान केरा सी। तैबै तिन्हैं एक सिक्का आंणिआ रिहाऊ।

²⁰तैबै यीशुऐ तिन्हां बै बोलू, “एथा न कौसरी मोहर होर फोटू सा?”

²¹तिन्हैं तेइबै बोलू, “महाराज़ै रा।” तैबै यीशुऐ तिन्हां बै बोलू, “ठीक सा ज़ो महाराज़ै रा सा तेई महाराज़ै बै दैआत् होर ज़ो परमेश्वरा रा सा तेई परमेश्वरा बै दैआत्।”

²²ऐ शुणिया तिन्हां बै बड़ी हैरानी हुई होर ते यीशु बै छ़ौड़िआ तौखै न नौठै।

²³तेही ध्याड़ै न किछ़ सदूकी लोका तौखै आऐ ज़ो दबारा ज़िन्दै होंणै बै नी मैनदै यीशु हागै आऐ, होर तेईन पुछ़ू,

²⁴“ओ गुरू, मूसै री विधि रै मुताबक अगर कोईरी औलाद मौरा सा ता तेइरा भाई तेसा विधवा सैंघै ब्याह केरिया आपणै भाई रा वँश बढ़ाणै री तैंईंयैं औलाद पैदा केरला।

²⁵मना कि आसै सौत भाई सी। पैहलै भाई रा ब्याह हुआ होर सौ बै औलाद मूँआ। तैबै तेइरै भाइयै तेसा सैंघै ब्याह केरू।

²⁶ऐण्ढै तैरहा ते सौतै रै सौत भाई बै औलाद मूँऐ।

²⁷बादा न सौ बेटड़ी भी मूँई।

²⁸ऐबै आसै ऐ पुछ़ा सी कि आगली ज़िन्दगी न सौ तिन्हां सौत भाई मौंझ़ै कौसरी लाड़ी होंणी? किबैकि तिन्हैं सैभी भाइयै तेसा सैंघै ब्याह केरू ती।”

²⁹यीशुऐ तिन्हां बै ज़वाब धिना, “तुसै भूल केरा सी किबैकि तुसै पवित्र शास्त्र होर परमेश्वरै री शक्ति बै नी ज़ाणदै।

³⁰तुसै ऐसा गैला बै समझा कि तेसा आगली ज़िन्दगी न तिन्हां लोका ब्याह-शादी नी केरनी होर न तौखै ब्याह न देइणा। बल्कि तिन्हां स्वर्गदूता सांही होंणा।

³¹मूँऐंदै रै ज़िन्दै होंणै रै बारै न तुसै मूसै रै बिधाना न ज़ो लिखू सा पौढ़ा, तौखै परमेश्वरै कि बोलू सा,

³²‘हांऊँ अब्राहमा रा परमेश्वर सा, इसहाका रा परमेश्वर सा होर याकूबा रा परमेश्वर सा’ सौ मूँऐंदै रा नी बल्कि ज़िन्दै रा परमेश्वर सा।”

³³ज़ैबै लोकै ऐ शुणू ता ते तेइरै उपदेश शुणिया बड़ै हैरान हुऐ।

³⁴ज़ैबै फरीसियै शुणू कि यीशुऐ सदूकी लोका च़ुप कराऐ ता सैभ कठा हुऐ।

³⁵तिन्हां न एकी यहूदी शास्त्रियै यीशु बै फसाणै री सोच़ा सैंघै तेईन पुछ़ू,

³⁶“ओ गुरू, बिधाना न सैभी न बड़ा हुक्म कुण सा?”

³⁷यीशुऐ तेइबै बोलू, “तू आपणै प्रभु परमेश्वरा सैंघै आपणै पूरै मना सैंघै, पूरै प्राण सैंघै होर सारी बुद्धि सैंघै झ़ुरी केर।

³⁸ऐ सैभी न पैहला होर सैभी न बड़ा हुक्म सा।”

³⁹ऐण्ढाऐ दुजा हुक्म ऐ सा, “ज़ैण्ढा तू आपु बै झ़ुरा सा तैण्ढा तू आपणै पड़ेशी सैंघै भी झ़ुरी केर।”

⁴⁰सारै बिधान होर भविष्यवक्तै रै ग्रँथ इन्हां दूई हुक्मा पैंधै टिकै सी।

⁴¹ज़ैबै फरीसी लोका कठै ती ता यीशुऐ तिन्हां न एक सवाल पुछ़ू,

⁴²“मसीह रै बारै न तुसै कि सोच़ा सी कि सौ कौसरा बेटा सा?” तिन्हैं तेइबै बोलू, “दाऊदा रा।”

⁴³यीशुऐ तिन्हां बै बोलू, “दाऊद तैबै आत्मा न भौरूइया तेइबै प्रभु किबै बोला सा?

⁴⁴‘प्रभुऐ, मेरै प्रभु बै बोलू, मेरी दैहिणी धिरै बेश ज़ैबै तैंईंयैं कि हांऊँ तेरै दुश्मना बै तेरै ज़ौघा हेठै नी पानू।’

⁴⁵ज़ैबै दाऊदै तेइबै प्रभु बोलू ता, सौ तेइरा बेटा कैण्ढै होई सका सा?”

⁴⁶कोई भी ज़वाब नी देई सकै होर न तैदी न बाद कोई बै भी यीशु न किछ़ पुछ़णै री हिम्मत केरी सकै।