Read Pahari, Kullu मत्ती 27 Bible Online

मत्ती 27 - Pahari, Kullu bible

मत्ती 27

¹ज़ैबै दोथ हुई ता, मुख्यपुरोहिते होर लोकै रै स्याणै यीशु बै मारनै री योजना बणाई।

²तिन्हैं सौ बोनू होर पिलातुस राज़पाला रै हवालै केरू।

³ज़ैबै तेइबै ढौकणै द्याणू आल़ै यहूदै महसूस केरू कि यीशू दोषी ठहराऊ सा ता सौ पछताऊ होर तेइयै ते तीह च़ाँदी रै सिक्कै मुख्यपुरोहित होर स्याणै हागै वापस आंणै।

⁴होर बोलू, “मैं मोरनै री तैंईंयैं एक निर्दोष मांहणु ढौकणै द्याइआ पाप केरू सा।” तिन्हैं बोलू, “आसरा कि सा? तुसै जाँणा।”

⁵तैबै तेइयै ते सिक्कै मन्दिरा रै ब्राम्दै न शेटै होर भैगू होर ज़ाइआ आपु बै फाँसी लाई।

⁶मुख्यपुरोहिता ते सिक्कै आंणै होर बोलू, “इन्हां, सिक्कै रा मन्दिरा न रखणा ठीक नी ऑथि, किबैकि ऐ आसै कोई मांहणु बै मकाणै री कीमत धिनी सा।”

⁷तैबै तिन्हैं आपु न सलाह केरिया तिन्हां सिक्कै लाइया परदेशी बै पौथणै री तैंईंयैं कुम्हारा रा एक छेत लेऊ।

⁸एसा बजहा न तेई छेता बै औज़ा तैंईंयैं लोहू रा छेत बोला सी।

⁹ऐ यिर्मयाह भविष्यवक्तै बोलूदा सौ वचन पूरा हुआ, कि “तिन्हैं ते तीह सिक्कै वापस लेऐ ज़ो इस्राइली लोकै तेइरी तैंईंयैं देणै केरै ती।

¹⁰होर ज़ैण्ढै प्रभुऐ मुँभै हुक्म केरू, तैण्ढै तिन्हैं कुम्हारै रा छेत खरीदणै री तैंईंयैं ऐ इस्तेमाल केरू।”

¹¹ज़ैबै यीशु पिलातुस राज़पाल सामनै खड़ा ती ता तेइयै यीशु न पुछ़ू, “कि तू यहूदी रा राज़ा सा?” यीशुऐ तेइबै बोलू, “तू आपुऐ लागा सा बोलदा।”

¹²ज़ैबै मुख्यपुरोहिता होर स्याणै तेई पैंधै दोष लाँदै लागै ती, ता यीशुऐ किछ़ बी ज़वाब नी धिना।

¹³तैबै पिलातुसै तेइबै बोलू, “कि तू नी शुणदा, कि ऐ लोका तेरै खिलाफ़ ऐतरी गुआही देंदै लागै सी?”

¹⁴पर यीशुऐ तेइबै एकी गैला रा बी ज़वाब नी धिना। औखै तैंईंयैं कि पिलातुस बी बड़ा हैरान हुआ।

¹⁵राज़ै रा एक नियम ती कि त्यौहारा रै ध्याड़ै न लोकै री तैंईंयैं सौ एक कैदी बै छ़ौड़ी सका ती ज़ुणिबै लोका चाहा सी।

¹⁶तेई बौगतै बरअब्बा नाँ रा एक डाकू कैद ती।

¹⁷ज़ैबै ते कठा हुऐ ता पिलातुसै तिन्हां बै बोलू, “तुसै कुणी बै चाहा सी, कि हांऊँ तुसरी तैंईंयैं छ़ौड़नू? बरअब्बा या यीशु बै ज़ो मसीह सा।”

¹⁸किबैकि सौ पिलातुस जाँणा ती कि तिन्हैं यीशु जलनै री बजहा न ढौकू ती।

¹⁹ज़ैबै पिलातुस न्याय री राज़गद्दी पैंधै बेठा ती ता तेइरी लाड़ियै तेई हागै एक सँदेशा भेज़ू, “कि तू तेई धर्मी होर सच़ै मांहणु सैंघै किछ़ मतेई केरदा; मैं तेइरै बारै न एक सुपना हेरू सा होर हांऊँ औज़ पूरी ध्याड़ी न बैचैन रौही।”

²⁰पर मुख्यपुरोहिते होर स्याणै भीड़ै रै लोका बहकाऐ कि ते पिलातुसा हागै बरअब्बा बै छ़ौड़नै होर यीशु बै मारनै री माँग केरलै।

²¹पिलातुसै तिन्हां न पुछ़ू, “इन्हां दूई न तुसै कुणी बै चाहा सी, कि तुसरी तैंईंयैं छ़ौड़नू?” तिन्हैं बोलू, “बरअब्बा बै।”

²²पिलातुसै तिन्हां न पुछ़ू, “ज़ैबै यीशु ज़ुणिबै मसीह बोला सी तेइरा कि केरना?” सैभियै तेइबै बोलू, “यीशु बै क्रूसा पैंधै च़ढ़ा।”

²³पिलातुसै बोलू, “किबै तेइयै कि बुराई केरी सा?” ते होर बी ज़ोरा सैंघै बोलदै लागै, “तेइबै क्रूसा पैंधै च़ढ़ा।”

²⁴तैबै पिलातुसै पाणियै लाइया आपणै हौथ धोऐ होर बोलू, “हांऊँ ऐई धर्मी मांहणु रै लोहू न निर्दोष सा तुसै जाँणा।”

²⁵सैभी लोकै ज़वाब धिना, “ऐईरा लोहू आसा पैंधै होर आसरी औलादा पैंधै पौड़ला!”

²⁶तैबै पिलातुसै तिन्हरी तैंईंयैं बरअब्बा छ़ौड़ू होर यीशु तिन्हरै हवालै केरू, कि ते कोड़ै मारिया तेइबै क्रूसा पैंधै च़ढ़ालै।

²⁷तैबै राज़ै रै सिपाहियै यीशु किलै आँध्रै नेऊ होर सारी पलटन तेइरै च़ोहू पासै कठा हुई।

²⁸तैबै तिन्हैं तेइरै झिकड़ै उतारै होर तेइरै लाल रँगै रै च़मकीलै झिकड़ै लाऐ होर,

²⁹तेइरै कौन्डै रा मुकट बणाईया तेइरी मुँडी पैंधै रखू। तेइरै दैहिणै हौथा न डँडा धिना होर तेई हागै टुँबड़ै पौड़िया ज़ो महाराज़ केरिया तेइरा मज़ाक उड़ांदै लागे, “हे यहूदियै रै राज़ा नमस्कार!”

³⁰होर तेई पैंधै थुकू; होर तेही डँडै लाइया तेइरी मुँडी पैंधै मारदै लागै।

³¹ज़ैबै तिन्हैं तेइरा ठठा केरू ता तिन्हैं तेइरै ते लाल झिकड़ै उतारै होर तेइरै तेही रै झिकड़ै लाऐ। तैबै तिन्हैं सौ क्रूसा पैंधै च़ढ़ाणै री तैंईंयैं नेऊ।

³²बाहरै ज़ाँदी घेरै तिन्हां बै शमौन नाँ रा एक कुरेनी मांहणु मिलू। तिन्हैं सौ बेकारा न ढौकू कि सौ यीशु रा क्रूस च़ेकला।

³³ज़ैबै ते गुलगुता नाँ री ज़ैगा न ज़ुणिबै खोपड़ी री ज़ैगा बोला सी पुजै,

³⁴ता तिन्हैं यीशु बै पित मिलूदा अँगूरा रा रस पीणै बै धिना पर यीशुऐ सौ च़खू होर पीणै न नाँह केरू

³⁵तैबै तिन्हैं सौ क्रूसा पैंधै च़ढ़ाऊ होर चिट्ठी पाईआ तेइरै झिकड़ै आपु न बोंडै।

³⁶ते तौखै बैशिया तेइरी पहरैदारी केरदै लागै।

³⁷तिन्हैं तेइरा दोषपत्र, तेइरी मुँडी उजी धिरै लाऊ, कि “ऐ यहूदी रा राज़ा यीशु सा।”

³⁸तैबै तिन्हैं तेइरी दैहिणी होर बांऊँई धिरै क्रूसा पैंधै दूई होरा डाकू बी च़ढ़ाऐ।

³⁹ऐणु-ज़ाणू आल़ै मुँडी थलाई थलाइया तेइरी निन्दा केरा ती,

⁴⁰होर बोला ती, “हे मन्दिरा बै ढाणू आल़ै होर त्रा रोज़ा न बनाणु आल़ै, आपणै-आपु बै ता बच़ा! अगर तू परमेश्वरा रा बेटा सा, ता क्रूसा पैंधै न उतर।”

⁴¹ऐण्ढी तैरहै मुख्यपुरोहिता होर शास्त्रियै होर स्याणै भी मज़ाक केरिया बोला ती, ऐईयै होरा ता बच़ाऐ पर ऐ आपु बै नी बच़ाई सकदा।

⁴²“ऐईयै दुज़ै बचाये, होर आपणै आपा बै नैंई बच़ाई सकदा ऐ तौ ‘इस्राइला रा राज़ा सा’। अगर ऐ क्रूसा पैंधै न उतरला, ता आसा विश्वास केरना।

⁴³तेइयै परमेश्वरा रा भरोसा रखू सा, अगर सौ ऐईबै चाहा सा ता, ऐबै ऐईबै छुड़ाला किबैकि ऐईयै बोलू ती, कि ‘हांऊँ परमेश्वरा रा बेटा सा।’”

⁴⁴ज़ो डाकू तेई सैंघै क्रूसा पैंधै च़ढ़ाऐ ती ते बी तेइरी निन्दा केरा ती।

⁴⁵बारा बज़ै न लेइया त्रा बज़ै तक सारै देशा न निहारा रौहू।

⁴⁶त्रीज़ै पौहरै यीशुऐ बड़ी ज़ोरा सैंघै बोलू, “एली-एली लमा शबक्तनी?” कि “हे मेरै परमेश्वर, हे मेरै परमेश्वर, तैं हांऊँ किबै छ़ौड़ू?”

⁴⁷ज़ो तौखै खड़ै ती, तिन्हैं ऐ शुणिया बोलू, “ऐ ता एलिय्याह बै पुकारदा लागा सा।”

⁴⁸तिन्हां मौंझ़ै न एक ठोर मारिया भैगू, होर स्पंज लेइया सौ सिरकै न डूबाऊ होर नगाल़ी रै डँडै पैंधै रखिया तेइबै चुशणै बै धिना।

⁴⁹होरियै बोलू, “ऐईबै केल्है रौहणै देआ, हेरदै कि, एलिय्याह ऐईबै बच़ा सा कि नी।”

⁵⁰तैबै यीशुऐ ज़ोरा सैंघै बोलिया प्राण छ़ौड़ै।

⁵¹होर शुणा मन्दिरा रा परदा ऊझै न लेइया बुनै ढौई तैंईंयैं च़िरूआ होर तेथै रै दूई टुकड़ै हुऐ होर धौरती न ज़ौज़री हुई।

⁵²औखै तैंईंयैं कि मूँऐंदै कई धर्मी लोकै री कब्रा खुली होर ते ज़िन्दै हुऐ।

⁵³ते कब्रा न निकतै होर यीशु रै ज़िन्दै होंणै न बाद शैहरा होर ग्राँ न बोहू सारै न हेरूऐ।

⁵⁴तैबै सिपाही होर ज़ो तिन्हां सैंघै ती ज़ो किछ़ हुआ तेथा हेरिया डौरै होर बोलू, “सच़िऐ ऐ मांहणु, परमेश्वरा रा बेटा ती!”

⁵⁵तौखै बोहू सारी बेटड़ी गलीला न यीशु री सेवा केरदी तेई सैंघै आई ती ते दूरा न हेरदी लागी ती।

⁵⁶तिन्हां न मरियम मगदलीनी, याकूब होर यूसुफ आमा मरियम होर जब्दी रै बेटै री आमा ती।

⁵⁷ज़ैबै सौंझ़ हुई ता यूसुफ नाँ रा अरिमतियाह ग्राँ रा रौहणु आल़ा ज़ो कि एक सेठ मांहणु ती होर यीशु रा च़ेला भी ती सौ आऊ होर पिलातुस राज़पाल हागै ज़ाइआ यीशु री लाश मुँगी।

⁵⁸पिलातुस राज़पालै लाश देणै रा हुक्मा केरू।

⁵⁹यूसुफै लाश नेइया साफ कपड़ै न लपेटी,

⁶⁰होर सौ नौंऊँईं कब्रा न रैखी, होर कब्रा बाहरै एक बड़ै पात्थर डाहिया तौखै न नौठा।

⁶¹मरियम मगदलीनी होर दुज़ी सौ मरियम तौखै कब्रा सामनै बेठी ती।

⁶²दुज़ै रोज़ै बशाँ रै ध्याड़ै किछ़ मुख्यपुरोहित होर फरीसी पिलातुस राज़पाला सैंघै मिलै होर बोलू,

⁶³“हे महाराज़, आसाबै याद डाह, तेई धोखै देणु आल़ै बोलू सा, कि मूँ मौरनै रै त्रा रोज़ा बाद फिरी ज़िन्दै होंणा।

⁶⁴तुसै हुक्म केरा कि आसै त्रा रोज़ा तैंईंयैं कब्रै री पहरैदारी केरूई लोड़ी, कोइँछ़ै तेइरै च़ेले एज़िया तेइरी लाश नी लोड़ी च़ोरी होर लोका बै बोललै कि सौ ज़िन्दा हुआ सा। तैबै ऐ दुज़ा धोखा पिछ़लै धोखै न बी बुरा होंणा।”

⁶⁵पिलातुसै तिन्हां बै बोलू, “तुसा हागै ता पहरैदार सी ज़ाआत्, होर आपणी समझ़ै रै मुताबक पहरैदारी केरा।”

⁶⁶तैबै तिन्हैं पहरैदार नेऐ, होर कब्रा न मोहर लाइया पहरैदारी केरदै लागै।