Read Pahari, Kullu मत्ती 28 Bible Online

मत्ती 28 - Pahari, Kullu bible

मत्ती 28

¹बशाँ रै ध्याड़ै बाद तुआरै री दोतियै मरियम मगदलीनी होर दुज़ी मरियम कब्रा हागै नौठी।

²शुणा एक बड़ी ज़ौज़री हुई, होर एक स्वर्गदूत तौखै उतरु तेइयै भेटी एज़िया सौ बड़ा पात्थर लुढ़काऊ, होर तेई पैंधै बेठा।

³तेइरा रूप बिजली सांही च़मकदा लागा ती होर तेइरै झिकड़ै हिंऊँआ सांही शेतै ती।

⁴ते पैहरैदार ज़ो कब्रा रा पैहरा देंदै लागै ती ते डौरै लाइया कोमदै लागै, होर मूँऐंदै सांही हुऐ।

⁵तैबै स्वर्गदूतै तिन्हां बेटड़ी बै बोलू, “डौरदी मता, हांऊँ जाँणा सा कि तुसै यीशु बै तोपदी लागी सी ज़ो क्रूसा पैंधै च़ढ़ाऊ ती।

⁶सौ औखै नी ऑथि, ज़ैण्ढा तेइयै बोलू ती सौ मौरै न बाद ज़िन्दा हुआ सा। एज़ा, तेसा ज़ैगा बै हेरा ज़ौखै सौ रैखू ती।

⁷तुसै तुरन्त ज़ात होर तेइरै च़ेले बै बोला, कि सौ ज़िन्दा हुआ सा होर तुसा न पैहलै गलीला बै ज़ाँदा लागा सा, तुसा सौ तौखै हेरना, ज़ो मैं बोलू तेइबै याद रखेइत्।”

⁸होर तै बेटड़ी डौर होर बड़ी खुशी सैंघै च़ेले बै दैसणै री तैंईंयैं कब्रा न दौड़िया नौठी।

⁹च़ानक यीशु तिन्हां बै मिलू होर बोलू, “ओहो तुसै सी।” ते बेटड़ी यीशु हागै आई होर तिन्हैं यीशु री ज़ोंघा ढौकिया प्रणाम केरु।

¹⁰तैबै यीशुऐ तिन्हां बै बोलू, “डौरदी मता मेरै च़ेले हागै ज़ाइआ तिन्हां बै बोला गलीला बै च़ला तुसा हांऊँ तौखै हेरना।”

¹¹ते बेटड़ी च़ेले बै ऐ खबर दसणै री तैंईंयैं हाज़ी बौता न ती, कि पौहरैदारा मौंझ़ै किछ़ तिन्हां न पैहलै ग्राँ न ज़ाइआ ऐ घटना मुख्यपुरोहिता बै दसी।

¹²तिन्हैं स्याणै यहूदी नेता सैंघै मिलिया एक तरकीब बणाई। तिन्हैं सपाई बै बोहू सारा च़ाँदी देइया बोलू,

¹³“तुसै लोका बै बोलीत् कि यीशु रै च़ेले राती ज़ैबै आसै सोंदै लागै ती, आऐ होर यीशु री लाश च़ोरिया नैंई।

¹⁴अगर तुसरी ऐ गैल राज़पाला हागै पुजा सा ता आसा सौ समझ़ाणा होर तुसाबै किछ़ नी होंणै देणा।”

¹⁵पहरैदारै तिन्हां ढैबुऐ नेइया तैण्ढाऐ केरू होर ऐ गैल यहूदी रै बिच़ा न एसा रीतिऐ फैली सा।

¹⁶तैबै ते ग्यारा च़ेले गलीला न तेसा ज़ैगा बै नौठै ज़ो ज़ैगा यीशुऐ तिन्हां बै दसी ती।

¹⁷ज़ैबै तिन्हैं यीशु हेरू ता तिन्हैं तेइबै प्रणाम केरु पर कौसी-कौसी बै शक हुआ कि सौ ज़िन्दा वापस आऊ।

¹⁸तैबै यीशुऐ तिन्हां हागै एज़िया बोलू, “स्वर्ग होर धौरती रा सारा हक मुँभै धिना सा।

¹⁹ऐबै तुसै ज़ाआत् होर सैभी ज़ाति बै मेरा च़ेला बणात् होर तिन्हां बै परमेश्वर पिता, बेटै होर पवित्र आत्मै रै नाँ न बपतिस्मा दैआत्,

²⁰तिन्हां बै तिन्हां सारै हुक्म मनणा सिखात् ज़ो मैं तुसाबै सीखाई। शुणा, हांऊँ दुनिया रै आखरी तैंईंयैं तुसा सैंघै सा।”