Read Pahari, Kullu मत्ती 4 Bible Online

मत्ती 4 - Pahari, Kullu bible

मत्ती 4

¹तैबै तेई बौगतै पवित्र-आत्मै यीशु सुनसान ज़ैगा बै नेऊ ताकि शैतानै रै द्वारा यीशु री परीक्षा होली।

²सौ चाल़ी ध्याड़ी, होर चाल़ी राती न भूखा होर शोखा रौहू, तैबै तेइबै भूख लागी।

³तैबै शैतानै तेइबै नेड़ एज़िया बोलू, “अगर तू परमेश्वरा रा बेटा सा, ता बोल, कि इन्हां पात्थरै री रोटी बणली।”

⁴यीशुऐ ज़वाब धिना, “पवित्र शास्त्रा न ऐ लिखू सा, ‘मांहणु सिर्फ़ रोटियै लाइया केल्हा नी, बल्कि परमेश्वरै रै मुँहा न निकलणू आल़ै हर एकी वचनै लाइया ज़िन्दै रौहणा।’ ”

⁵तैबै शैतानै सौ पवित्र यरूश्लेम शैहरा बै नेऊ होर मन्दिरै री सैभी न उथड़ी ज़ैगा पैंधै खड़ा केरू।

⁶होर तेइबै बोलू, “अगर तू परमेश्वरा रा बेटा सा, ता आपणै आपु बै औखै न भ्याँऊ शेट; किबैकि पवित्र शास्त्रा न लिखू सा कि, “ ‘तेई तेरै बारै न आपणै स्वर्गदूता बै आदेश देणा, होर तिन्हां तू हौथा हौथ च़कणा, ताकि तेरी ज़ोंघा न पात्थरै लाइया ठोकर नी लोड़ी लागी।’ ”

⁷यीशुऐ तेइबै बोलू, “पवित्र शास्त्रा न ऐ बी लिखू सा, कि ‘तू आपणै प्रभु परमेश्वरै री परख मत केरदा।’ ”

⁸तैबै शैतानै यीशु बोहू उथड़ै ढौगा पैंधै नेऊ होर सारी दुनियै रा राज़पाठ रिहाईया,

⁹होर तेइबै बोलू, “अगर तू टुँबड़ै पौड़िया मुँभै प्रणाम केरला, ता मूँ इन्हां सैभी राज़पाठा रा हक तौभै देणा।”

¹⁰तैबै यीशुऐ तेइबै बोलू, “ओ शैतान दूर हो, किबैकि पवित्र शास्त्रा न लिखू सा: ‘तू सिर्फ़ आपणै प्रभु परमेश्वरा बै प्रणाम केर, होर तेइरी भक्ति केर।’ ”

¹¹तैबै शैतान तेई हागै न भैगू होर स्वर्गदूत एज़िया यीशु री जरूरता बै पूरा केरदै लागै।

¹²ज़ैबै तेइयै ऐ शुणू कि यूहन्ना ढौकणै द्याऊ सा, ता सौ यहूदा ज़िलै बै छ़ौड़िआ गलील ज़िलै बै नौठा।

¹³होर नासरत नगरा बै छ़ौड़िआ कफरनहूम शैहरा न ज़ो समुन्द्रा रै कनारै ज़बूलून होर नपताली रै इलाकै न ज़ाइआ रौंहदा लागा।

¹⁴ताकि ज़ो यशायाह भविष्यवाणी केरनै रै द्वारा बोलू ती, सौ पूरा होला।

¹⁵“ज़बूलून होर नपताली रै इलाकै, समुन्द्रा री बौता न यरदना नौई हागै होरी ज़ाति रा गलील,

¹⁶ज़ो लोका निहारै न बेठै ती, तिन्हैं बड़ा प्याशा हेरू; होर ज़ो मौऊती रै नेड़ बेठै ती, तिन्हां पैंधै प्याशा च़मकू।”

¹⁷तेई बौगता यीशुऐ प्रचार केरना होर ऐण्ढा बोलणा शुरू केरू कि, “पापा न मन बदला किबैकि स्वर्गा रा राज्य नेड़ आऊ सा।”

¹⁸तेइयै गलीलै रै समुन्द्रा रै कनारै दूई भाई शमौन ज़ुणिबै पतरस बोला सी, होर तेइरा भाई अन्द्रियास समुन्द्रा न ज़ाल पाँदै हेरै; किबैकि ते मैच्छ़ी ढौकणु आल़ै ती।

¹⁹तैबै यीशुऐ तिन्हां बै बोलू, “मूँ पिछ़ै एज़ा, ज़ैण्ढै तुसै मैच्छ़ी ढौका सी, तैण्ढै मूँ तुसै मांहणु बै ढौकणु आल़ै परमेश्वरा रा च़ेला बनाणा सिखाणै।”

²⁰ते तुरन्त जाला बै छ़ौड़िआ यीशु पिछ़ै औंढदै लागै।

²¹होर तौखै न आगै ज़ेही ज़ाइआ तेइयै दूई भाई जब्दी रै बेटै याकूब होर तेइरा भाई यूहन्ना हेरू। ते आपणै बापू जब्दी सैंघै किश्ती न आपणै ज़ाल ठीक केरदै हेरै। तेइयै ते भी शाधै।

²²ते तुरन्त आपणी किश्ती होर आपणै बापू बै छ़ौड़िआ यीशु रै पिछ़ै औंढदै लागै।

²³यीशु सारै गलील ज़िलै न घूँमदा तिन्हरै आराधनालय न उपदेश देंदा, होर परमेश्वरै रै राज्य रा खुशी रा समाद प्रचार केरदा रौहू, होर लोकै री हर किस्मा री बीमारी होर कमज़ोरी बै दूर केरदा रौहू।

²⁴सारै सीरिया देशा न तेइरा यश फैलदा रौहू; लोका सैभ बीमारा बै, ज़ो कई किस्मै री बीमारी होर दु:खा न डूबै ती होर ज़ुणिबै बुरी आत्मा फ़सी ती, ज़ुणिबै मिर्गी एज़ा ती होर ज़ुणिबै ध्रँग हुआ ती तेई हागै आंणै होर तेइयै ते सैभ ठीक केरै।

²⁵गलील ज़िलै होर दिकापुलिस (दस शैहरा) होर यरूश्लेम शैहरा होर यहूदिया ज़िलै होर यरदन नौई रै ओरै पौरै री ज़ैगा न भीड़ै री भीड़ तेई पिछ़ै च़ली।