Read Pahari, Kullu मत्ती 8 Bible Online

मत्ती 8 - Pahari, Kullu bible

मत्ती 8

¹ज़ैबै सौ ढौगा पैंधै न भ्याँऊ आऊ ता लोकै री बोहू बड़ी भीड़ तेई पिछ़ै च़लदी लागी।

²होर हेरा, एकी कोढ़ियै एज़िया तेइबै प्रणाम केरू होर बोलू, “ओ प्रभु, अगर तुसै च़ाहलै ता, मुँभै ठीक केरी सका सी।”

³यीशुऐ आपणै हौथै लाइया सौ छ़ुँगू, होर बोलू, “हांऊँ च़ाहा सा, तू ऐबरै ठीक लोड़ी हुआ।” होर सौ तुरन्त आपणै कोढ़ा न ठीक हुआ।

⁴यीशुऐ तेइबै बोलू, “हेरा, कौसी बै हेरीत् बोलदा, पर ज़ाइआ पुरोहिता बै रिहा होर मूसै री बिधाना रै मुताबक बलि च़ढ़ा, ताकि तिन्हरी तैंईंयैं गुआही होली।”

⁵ज़ैबै यीशु कफरनहूम शैहरा बै आऊ ता एकी सुबैदारै एज़िया तेई हागै अर्ज़ा केरी,

⁶“हे प्रभु, मेरै घौरा न मेरा नोकर ध्रँगै री बीमारी लाइया दु:खी सा।”

⁷यीशुऐ तेइबै बोलू, “मूँ एज़िया सौ ठीक केरना।”

⁸सूबैदारै ज़वाब धिना, “ओ प्रभु हांऊँ एस काबिल नी ऑथि कि तुसै मेरै घौरा एलै। तुसै सिर्फ़ वचन बोललै ता मेरै नोकरा ठीक होंणा।

⁹किबैकि हांऊँ भी कौसी रै अधीन सा होर सपाई मेरै अधीन सी। ज़ैबै हांऊँ एकी बै ज़ाणै बै बोला सा ता सौ ज़ा सा होर दुज़ै बै ऐणै बै बोला सा ता सौ एज़ा सा होर आपणै नोकरा बै बोला सा कि ऐण्ढा केर ता सौ केरा सा।”

¹⁰ऐ शुणिया यीशु बै हैरानी हुई, होर ज़ो तेई पिछ़ै ऐन्दै लागै ती तिन्हां बै बोलू, “हांऊँ तुसाबै सच बोला सा, ऐण्ढा बशाह केरनु आल़ै मुँभै इस्राइला न भी नी मिलै।

¹¹हांऊँ तुसाबै बोला सा, कि पूर्व होर पश्चिमा न बोहू सारै होरी जाति रै लोका एज़िया अब्राहम, इसहाक होर याकूबा सैंघै स्वर्ग रै राज्य न बेशणा।

¹²पर राज्य री औलाद (यहूदी होर इस्राइली) बाहरै निहारै न पाइणै : होर तौखै रोणां होर दौंद पिशणा होंणा।”

¹³यीशुऐ सुबैदारा बै बोलू, “घौरा ज़ा, ज़ैण्ढा तेरा बशाह सा तैण्ढा तेरी तैंईंयैं लोड़ी हुआ।” होर तेइरा नोकर तेसा घड़ियै ठीक हुआ।

¹⁴ज़ैबै यीशु पतरसै रै घौरा बै आऊ ता तेइयै तौखै पतरसै री शौशु हेरी ज़ुण कि बीमार ती।

¹⁵यीशुऐ तेसरा हौथ छ़ुँगू होर सौ तेसरा जौर ठीक हुआ होर तिन्हरा आदर-खातर केरदी लागी।

¹⁶ज़ैबै सौंझ़की घेरै तिन्हैं बोहू सैभ बीमार लोका यीशु हागै आंणै ज़ुणीन बुरी आत्मा फसी ती होर यीशुऐ ते आत्मा आपणै वचना सैंघै खोली होर सारै बीमार मांहणु ठीक केरै

¹⁷ताकि यशायाह भविष्यवक्तै बोलूदा वचन पूरा लोड़ी हुआ कि “तेइयै आपु आसरी कमज़ोरी होर बीमारी च़की।”

¹⁸यीशुऐ आपणै च़ोहू पासै लोकै री भीड़ हेरिया समुन्द्रा रै पौरै च़ेले बै ज़ाणै रा हुक्म धिना।

¹⁹तैबै एकी शास्त्रियै यीशु हागै एज़िया तेइबै बोलू, “ओ गुरू ज़ी, ज़ौखै भी तू ज़ाला मूँ तेरै पिछ़ै ऐणा।”

²⁰यीशुऐ तेइबै बोलू, “गीदड़ै रै रौहणै री ज़ैगा होर आसमाना रै च़ीड़ू री बी ज़ैगा होआ सा; पर मांहणु रै बेटै होईया भी मूँ हागै सोणै री तैंईंयैं आपणा घौर नी ऑथि।”

²¹एकी होरी च़ेले तेइबै बोलू, “ओ प्रभु, पैहलै मुँभै घौरा ज़ाणै देआत्, मेरा बापू मौरनै न बाद हांऊँ तेइबै पौथिया एनु होर फिरी तुसा पिछ़ै च़लनु।”

²²यीशुऐ तेइबै बोलू, “तू मूँ पिछ़ै एज़ होर ज़ो परमेश्वरै री नज़री न आत्मिक रूपा न मूँऐंदै सी तिन्हां आपणै मुर्दै पौथणै दै।”

²³ज़ैबै सौ किश्ती पैंधै च़ढ़ू, ता तेइरै च़ेले भी तेई पिछ़ै च़लै।

²⁴शुणा, समुन्द्रा न एक बड़ा बागर ब्याना आऊ होर किश्ती पाणी न डुबदी लागी होर यीशु सुतादा ती।

²⁵तैबै तिन्हैं भेटी एज़िया सौ बझ़ेऊ होर बोलू, “ओ प्रभु, आसाबै बच़ा, आसै नाश होंदै लागै सी।”

²⁶तेइयै तिन्हां बै बोलू, “तुसै आपणा बशाह कम केरिया किबै लागै सी डौरदै? तैबै तेइयै उठिया औढ़ा होर पाणी बै शान्त होंणै रा हुक्म केरू होर सौ शान्त हुआ।”

²⁷तैबै लोका हैरान होईया बोलदै लागै, “ऐ कैण्ढा मांहणु सा, औढ़ा होर पाणी भी ऐईरी हुक्मा बै मना सी।”

²⁸ज़ैबै सौ समुन्द्रा पौरै गदरेनियै रै देशा न पुजू, ता तौखै तेइबै बुरी आत्मा फसैदै दूई मांहणु मिलै। तिन्हरी डौरै तेसा बौतै आगै कोई भी नी ती ज़ान्दा।

²⁹तिन्हैं ज़ोरा सैंघै तेइबै बोलू, “ओ परमेश्वरै रै बेटैआ, आसाबै तौ सैंघै कि कोम? कि तू बौगता न पैहलै आसाबै दु:ख देणै री तैंईंयैं औखै आऊ सा?”

³⁰तिन्हां न थोड़ी दूर सूँगरा रा एक बड़ा छ़ुण्ड च़ौरदा लागा ती।

³¹बुरी आत्मै तेई हागै अर्ज़ा केरी कि, “अगर तू आसाबै खोला सा, ता सूँगरै रै छ़ुण्डा बै भेज़।”

³²यीशुऐ तिन्हां बुरी आत्मा बै बोलू, “ज़ाआत्!” ते निकल़िया सूँगरा बै फ़सै होर सारा छ़ुण्ड पाणी न डुबिया मूँआ।

³³सूँगर च़ारनू आल़ै भैगै होर ग्राँ न ज़ाइआ सैभी बै ऐ गैला दसी।

³⁴होर हेरा, सारै नगरा न लोका यीशु सैंघै मिलदै आऐ होर तेई हेरिया अर्ज़ा केरदै लागै कि आसरै इलाकै न फ़ेटै ज़ा।