Read Pahari, Kullu मरकुस 1 Bible Online

मरकुस 1 - Pahari, Kullu bible

मरकुस 1

¹ऐ परमेश्वरा रै बेटै यीशु मसीह री खुशी रै समादै री गैला री शुरूआत।

²ज़ैण्ढा यशायाह भविष्यवाणी री कताबा न लिखूंदा सा “हेर, हांऊँ मेरा संदेशा देणै आल़ै बै तेरै आगै भेज़ा सा, ज़ुण तेरै ऐणै री तैंईंयैं लोका बै त्यार केरला।”

³“सुनसान ज़ैगा न एक मांहणु री हाक्क शुणदी लागी सा कि, प्रभु रा स्वागत केरनै री तैंईंयैं आपणै आपा बै त्यार केरा।”

⁴तैबै यूहन्ना बपतिस्मा देणु आल़ा आऊ, ज़ुण सुनसान ज़ैगा न बपतिस्मा देआ ती, होर पापै री माफी री तैंईंयैं मन बदलनै री तैंईंयैं बपतिस्मा रा प्रचार केरा ती।

⁵यहूदिया ज़िलै रै, होर यरूश्लेम शैहरा रै बोहू सारै लोका निकल़िया तेई हागै बै नौठै होर आपणै पापा बै मनिया यरदन नौई न यूहन्ना द्वारा बपतिस्मा लेऊ।

⁶यूहन्ना ऊँटा रै ऊना रै बणाऐदै झिकड़ै लाइया होर आपणै चेकै न च़ंबड़ै री गाच़ी बौनिया डाह ती होर टिट्ड़ै होर बौणै रा मखीर खाया केरा ती।

⁷होर ऐ प्रचार केरा ती, “मेरै बाद सौ छे़कै ऐणु आल़ा सा, ज़ुण मूँ न भी बड़ा शक्तिशाली सा। हांऊँ ता एथा रै काबिल भी नी टुँबड़ै पौड़िया एक नोकरा सांही तेइरै बूटा रै तस्मै खोलनू।

⁸हांऊँ ता पाणी लाईया बपतिस्मा देआ सा पर तेई तुसाबै पवित्र आत्मा रा बपतिस्मा देणा।”

⁹तिन्हां रोजा न यीशु गलील ज़िलै रै नासरता शैहरा न एज़िया यरदन नौई न यूहन्ना रै ज़रियै बपतिस्मा लेऊ।

¹⁰होर ज़ैबै यीशु ज़ैण्ढै पाणी न निकल़िया बाहरै आऊ तैबै तुरन्त तेइयै स्वर्ग खुलदा होर कबूतरा रै रूपा न पवित्र आत्मा आपु पैंधै उतरदा हेरू।

¹¹होर स्वर्गा न एक आवाज़ हुई, “तू मेरा प्यारा बेटा सा हांऊँ तौ न खुश सा।”

¹²तैबै पवित्र आत्मै यीशु सुनसान ज़ैगा धिरै बै भेज़ू।

¹³होर सुनसान ज़ैगा न चाल़ी ध्याड़ी तैंईंयैं शैतानै यीशु री परीक्षा लेई; होर सौ बौणा रै पशु सैंघै रौहु, होर स्वर्गदूतै तेइरी जरूरता बै पूरा केरू।

¹⁴यूहन्नै रै ढौकिणै धियाणै न बाद यीशुऐ गलील ज़िलै न एज़िया परमेश्वरै रै राज्य रै खुशी रै समादा बै दसदै लागै।

¹⁵होर बोलू, “बौगत पूरा हुआ सा, होर परमेश्वरा रा राज्य नेड़ आऊ सा, पापा न मन बदला होर खुशी रै समादा पैंधै बशाह केरा।”

¹⁶एक रोज़ ज़ैबै गलीलै री समुन्द्रा रै कनारै-कनारै ज़ाँदी घेरै, यीशुऐ शमौन होर तेइरा होछ़ा भाई अन्द्रियासा बै समुन्द्रा न जाल शेटदै हेरै किबैकि ते मैच्छ़ी ढौकणु आल़ै ती।

¹⁷तैबै यीशुऐ तिन्हां बै बोलू, “मूँ पिछ़ै एज़ा, ज़ैण्ढै तुसै मैच्छ़ी ढौका सी, तैण्ढै मूँ तुसै मांहणु बै मेरा च़ेला बनाणा सिखाणै।”

¹⁸ते तुरन्त जाला बै छ़ौड़िआ, यीशु पिछ़ै औंढदै लागै।

¹⁹थोड़ी आगै ज़ेही ज़ाइआ, यीशुऐ जब्दी रै दुई बेटै याकूब होर तेइरै होछ़ै भाई यूहन्ना बै किश्ती पैंधै आपणै-आपणै ज़ाल ठीक केरदै हेरै।

²⁰यीशुऐ ते हेरदैआऐ शाधै होर ते आपणै बापू जब्दी रै नोकरा सैंघै किश्ती छ़ौड़िआ, यीशु रै पिछ़ै औंढदै लागै।

²¹तैबै यीशु होर तेइरै च़ेले कफरनहूम शैहरा बै आऐ, होर यीशु बशाँ रै ध्याड़ै आराधनालय न जाईया लोका बै उपदेश शुणादै लागै

²²होर लोका यीशु रै उपदेश शुणिया हैरान हुऐ किबैकि यीशु तिन्हां शास्त्री सांही नी, पर अधिकारा सैंघै उपदेश देआ ती।

²³च़ानक, ज़ैबै यीशु शिक्षा देंदा लागा ती तिन्हरै आराधनालय न एक मांहणु ती ज़ुणीन बुरी आत्मा ती सौ ज़ोरा सैंघै क्रींजा मारिया बोलदा लागा,

²⁴तेइयै ज़ोरा सैंघै बोलू, “ओ यीशु नासरी आसाबै तौ सैंघै कि कोम? कि तू आसाबै मारणै री तैंईंयैं आऊ सा? हांऊँ तुसाबै जाँणा सा, तू कुण सा! परमेश्वरा रा पवित्र मांहणु!”

²⁵यीशुऐ तेइबै झिड़काईया बोलू, “च़ुप रौह; होर ऐई मांहणु न फ़ेटै निकल़।”

²⁶तैबै बुरी आत्मा तेइबै मरोड़ीया होर बड़ा फियाड़ा बोलिया लेरा पाईआ तेईन निकती।

²⁷एथा पैंधै सारै लोका हैरान होईया एकी होरा बै बोलदै लागै, “ऐ कि गैल सा? ऐ ता कोई नोंऊँआं उपदेश सा ऐ अधिकारा सैंघै बुरी आत्मा बै भी हुक्म देआ सा, होर ते तेइरी हुक्म बै मैना सी।”

²⁸होर यीशु रा नाँ तैबै गलीलै रै औरलै पौरलै सारै ज़िलै न फैलू।

²⁹यीशु तैबै आराधनालय घौरा न निकल़िया सीधै याकूब होर यूहन्नै सैंघै शमौन होर आंद्रियासा रै घौरा बै आऊ।

³⁰शमौने री शौशु जौरे लाईया बीमार ती, होर तैबै तेसरै बारै न यीशु आगै दैसू।

³¹तैबै यीशुऐ तेसा हागै जाईया तेसरा हौथ ढौकु होर सौ च़की होर तेसरा जौर उतरु, होर तिन्हरा आदर-खातर केरदी लागी।

³²सौंझ़की घेरै ज़ैबै ध्याड़ा डूबू ता मांहणुए सैभ बीमार होर तिन्हां न ज़ुणीन बुरी आत्मा ती यीशु आगै बै आंणै।

³³होर नगरा रै बोहू सारै लोका शमौना रै दुआरा पैंधै कठा हुऐ।

³⁴यीशुऐ ज़ो मांहणु बोहू किस्मै री बीमारी आल़ै ती ठीक केरै, बोहू बुरी आत्मा खोली, होर बुरी आत्मा बोलणै बी नी धिनी, किबैकि ते जाँणा ती कि सौ परमेश्वरा धिरै न सा।

³⁵दोथी झिशा, यीशु उठिया निकतै, होर एक सुनसान ज़ैगा बै नौठै होर तौखै प्रार्थना केरदै लागै।

³⁶तैबै शमौन होर तेई रै साथी यीशु बै तोपणै री तैंईंयैं निकतै।

³⁷ज़ैबै यीशु मीलै, ता तेइबै बोलू, आसा सैंघै शैहरा बै वापस एज़ा “किबैकि बोहू सारै लोका कफरनहूमा न तुसाबै तोपदै लागै सी।”

³⁸यीशुऐ तिन्हां बै बोलू, “एज़ा आसा होर कोइँछ़ै औरलै-पोरलै ग्राँ न जाँणा कि हांऊँ तौखै भी प्रचार केरनु, किबैकि हांऊँ प्रचार केरनै री तैंईंयैं आऊ सा।”

³⁹तैबै यीशु होर तेइरै च़ेले पूरै गलील ज़िलै न जाईया, आराधनालय न प्रचार केरा ती होर बुरी आत्मा बै बाहरै खोलदै रौहा ती।

⁴⁰तैबै एक कोढ़ी यीशु हागै बै आऊ, यीशु हागै अर्ज़ा केरी, होर यीशु रै सामनै ज़ानू टेकिआ तेइबै बोलू, “अगर तुसै च़ाहलै ता मुँभै ठीक केरी सका सी।”

⁴¹यीशुऐ तेई पैंधै रैहम रिहाइया हौथ बढ़ाऊ, होर तेइबै छ़ुँगिया बोलू, “हांऊँ चाहा सा कि, तू ऐबरै ठीक लोड़ी हुआ।”

⁴²होर तुरन्त तेइरा कोढ़ साफ़ हुआ होर सौ ठीक हुआ।

⁴³तैबै यीशुऐ सौ चेताऊणी देइया भेज़ू।

⁴⁴होर तेइबै बोलू, “हेर, कौसी बै किछ़ हेरी दैसदा, पर यरुश्लेम जाईया आपणै आपा बै पुरोहिता बै रिहाई, होर आपु बै च़ोखै होंणै रै बारै न ज़ो किछ़ बिधाना न मूसै ठहराऊ ती, तेई भेंट च़ढ़ा कि तिन्हां लोका बै पता च़लला कि तू कोढ़ा न ठीक हुआ सा।”

⁴⁵तैबै कोढ़ी मन्दिरा बै नौठा होर आपणै-आपा बै पुरोहिता बै रिहाऊ, पर सौ बाहरै जाईया ऐसा गैला बै दैसदा लागा, पर होर औखै तैंईंयैं फैलांदा लागा कि फिरी यीशु दुज़ी घेरै खुलेआम लोका री भीड़ा री बजहा न कोई बी शैहरा न एज़ी न सकू, होर तेइबै बाहरै सुनसान ज़ैगा न रौहणा पौड़ू, पर तेसा ज़ैगा न च़ोहू धिरै न लोका यीशु हागै बै ऐन्दै रौहे।