Read Pahari, Kullu मरकुस 10 Bible Online

मरकुस 10 - Pahari, Kullu bible

मरकुस 10

¹तैबै यीशु उठिया यहूदिया रै देशा न होर यरदन नौई पारै बै आऊ, होर भीड़ यीशु हागै फिरी कठा हुई, होर सौ आपणै तरीकै न तिन्हां बै शिक्षा देंदा लागा।

²तैबै किछ़ फरीसी यीशु हागै एज़िया तेइरी परीक्षा केरनै री तैंईंयैं तेईन पुछ़दै लागै, “लाड़ै रा लाड़ी बै छ़ौड़णा ठीक सा कि नैंई?”

³यीशुऐ तिन्हां बै ज़वाब धिना कि, “मूसै तुसाबै कि हुक्म धिना सा?”

⁴तिन्हैं बोलू, “मूसै ता तलाक लिखणै होर छ़ौड़णै री तैंईंयैं हुक्म धिना सा।”

⁵यीशुऐ तिन्हां बै बोलू, “ऐण्ढा ता नी कि तुसरै कठोर मना री बजहा न मूसै तुसाबै ऐ हुक्म धिना।”

⁶“पर ऐसा सृष्टि री शुरूआता न परमेश्वरै मर्द-बेटड़ी केरिया बणायै सी।

⁷ऐसा बजहा न मांहणु आपणै आमा-बापू बै छ़ौड़िआ आपणी लाड़ी सैंघै रोहणा, होर तिन्हां दुई एक जान होंणा।

⁸होर तिन्हां दुई एक शरीर होंणा; तैबै ते दूई नैंई, पर ऐकै जान सी।

⁹ज़ुण परमेश्वरै ज़ोड़ै सी, तिन्हां बै मांहणु अलग मता केरा।”

¹⁰होर घौरा वापस ऐज़िया च़ेले इन्हां गैला रै बारै न भी पुछ़ू।

¹¹यीशुऐ तिन्हां बै बोलू, “ज़ुण कोई आपणी लाड़ी बै छ़ौड़िआ होरी सैंघै ब्याह केरला ता सौ, पहली लाड़ी रै बरखलाप व्यभिचार केरा सा।

¹²होर अगर लाड़ी आपणै लाड़ै बै छ़ौड़िआ, कोई होरी सैंघै ब्याह केरा सा, ता सौ व्यभिचार केरा सा।”

¹³फिरी लौका शोहरु बै तेई आगै आंणदै लागे, कि तिन्हां पैंधै हौथ रैखिया आशीर्वाद दै, पर च़ेले तिन्हां बै झिड़कदै लागै।

¹⁴ज़ैबै यीशुऐ हेरू कि सौ झ़िकुआ। तेइयै च़ेले बै बोलू, “शोहरू बै मूँ हागै ऐणै रा हुक्म देआ! किबैकि परमेश्वरा रा राज्य ऐण्ढै लोका रा सा ज़ो शोहरू सांही सी।

¹⁵हांऊँ तुसाबै सच़ बोला सा, कि ज़ो कोई परमेश्वरा रै राज्य बै शोहरू सांही नैंई अपनाला, सौ कैधी भी परमेश्वरा रै राज्य न नैंई जाई सकदा।”

¹⁶होर तेइयै सौ फाह्ड़ै न च़कै, होर तिन्हां पैंधै आपणा हौथ रखिया तिन्हां बै आशीष धिनी।

¹⁷होर ज़ैबै यीशु बौता न औंढदा लागा ती, ता एक मांहणु ठोर मारदा आऊ, होर ज़ानू न बैशिया पुछ़दा लागा, “ओ शोभलै गुरू जी, हमेशा री ज़िन्दगी पाणै री तैंईंयैं हांऊँ कि केरनु?”

¹⁸“तू मुँभै शोभला किबै बोला सा?” यीशुऐ तेइबै बोलू, “कोई शोभला नैंई ऑथि, ऐकै सा, परमेश्वरा रै अलावा कोई शोभला नी ऑथि।

¹⁹तू हुक्मा बै ता जाँणा सा, ‘लोहू नी केरना, व्यभिचार नी केरना, च़ोरी नी केरनी, झ़ूठी गुआही नी देणी, धोखा नी देणा, आपणै आमा बापू रा आदर केरना।’”

²⁰तेइयै यीशु बै बोलू, “ओ गुरू, इन्हां गैला बै ता ज़ैबै हांऊँ शोहरू ती तैबै न ओरु मैनदा लागा सा।”

²¹यीशुऐ तेई पैंधै आपणी नज़रा फेरी, होर तेइबै झ़ुरी केरी होर बोलू, “तो न एकी गैला री कमी सा, जा, ज़ो किछ़ तेरा सा तेइबै बैचिया गरीबा न बौंड, होर तौभै स्वर्गा न धन मिलणा, होर एज़िया मूँ पिछ़ै औंढ।”

²²ऐसा गैला बै शुणनै न बाद सौ उदास हुआ, होर सौ बड़ा दुःखी होईया नौठा, किबैकि सौ बोहू सेठ ती।

²³यीशुऐ च़ोहू पासै हेरिया आपणै च़ेले बै बोलू, “सेठ मांहणु रा परमेश्वरा रै राज्य न जाँणा कैण्ढा मुश्किल सा!”

²⁴च़ेले तेइरी गैला न बड़ै हैरान हुऐ, एथा पैंधै यीशुऐ तिन्हां बै भी ज़वाब धिना, “ओ मेरै शोहरूओ, ज़ुण धन दौलता पैंधै बशाह केरा सा, तेइरा परमेश्वरा रै राज्य बै जाँणा केतरा मुश्किल सा।

²⁵हांऊँ तुसाबै बोला सा, कि ज़ैण्ढा एक ऊँटा रा सिऊँणियै फ़ेटै निकल़णा ऐतरा मुश्किल सा, तेथा न भी ज़ादा एक सेठ मांहणु रै स्वर्ग राज्य बै जाँणा मुश्किल सा।”

²⁶च़ेले हैरान होईया आपु न ढुणिदै लागे, “तैबै कुण मुक्ति पाई सका सा?”

²⁷यीशुऐ तिन्हां बै हेरिया बोलू, “मांहणु न ता ऐ होई नी सकदा, पर परमेश्वरा न सैभ किछ़ होई सका सा।”

²⁸पतरस यीशु बै बोलदा लागा, “हेर, आसै ता सैभ किछ़ छ़ौड़िआ तो पिछ़ै च़लै सी।”

²⁹यीशुऐ बोलू, “हांऊँ तुसाबै सच़ बोला सा, कि कोई ऐण्ढा नी ऑथि, ज़ुणियै मेरै होर खुशी रै समाद री तैंईंयैं घौर या भाई होर बैहण होर आमा या बापू होर बाल-बच्चे या छेत छ़ौड़ै होलै।

³⁰तिन्हैं एसा ज़िन्दगी न एक शौऊ बार ज़ेतरा पिछ़ै छ़ौड़ू सा, तेतरा बोहू पाणा। घौर होर भाई होर बैहण होर आमा होर बापू होर बाल-बच्चे होर छेत, एथा रै अलावा, हालांकि लोका ते धौरती न सताणै किबैकि ते मूँ पैंधै बशाह केरा सी, पर ऐणु आल़ै बौगता न तिन्हां बै हमेशा री ज़िन्दगी मिलणी।

³¹पर ज़ो ऐबरै आपणै आपा बै बड़ै बैणा सी, काल रोज़ ते होछ़ै केरिनै, होर ज़ो होछ़ै सी, ते काल रोज़ बड़ै केरिनै।”

³²होर ते यरूश्लेम शैहरा बै ज़ाँदेआ बौता न ती, होर यीशु तिन्हां न आगै-आगै औंढदा लागा ती, होर सौ हैरान ती होर तेई पिछ़ै-पिछ़ै औंढदैआ डौरदै लागे ती, तैबै भी सौ तिन्हां बारा च़ेले सैंघै सौहै गैला ढूणदा लागा, ज़ुण यीशु पैंधै ऐणु आई ती।

³³“हेरा, आसै यरूश्लेम शैहरा बै जा सी, होर मांहणु रा बेटा मुख्यपुरोहिता होर शास्त्री रै हौथा ढौकिणा, होर तिन्हां मुँभै मौऊती री सज़ा शुनाणी, होर दुज़ी ज़ाति रै हौथा न देणा।

³⁴तिन्हां तेइरा मज़ाक उड़ाणा, होर तेई पैंधै थूकणा, होर तेइबै कोड़ै मारणै, होर सौ मकाणा, होर त्रीज़ै ध्याड़ी ज़िन्दै होंणा।”

³⁵तैबै जब्दी रै बेटै याकूब होर यूहन्नै यीशु हागै एज़िया बोलू, “ओ गुरू, आसै चाहा सी, कि ज़ो किछ़ आसै तो न मुँगलै, सौऐ तू आसरी तैंईंयैं केर।”

³⁶यीशुऐ तिन्हां बै बोलू, “तुसै कि चाहा सी कि हांऊँ तुसा री तैंईंयैं केरनु?”

³⁷तिन्हैं तेइबै बोलू, “आसाबै ऐ दै, कि आसै तेरै राज्य री महिमा केरनै री तैंईंयैं एक दैहिणी धिरै होर एक बांऊँई धिरै बैशलै।”

³⁸यीशुऐ तिन्हां बै बोलू, तुसै नी ज़ाणदै कि तुसै कि लागे सी मुँगदै? ज़ो दुःख हांऊँ सौहणु आल़ा सा कि सौ दुःख तुसै बी सौही सका सी? होर ज़ैण्ढै हांऊँ मकाइणा तैण्ढै कि तुसै मकाणै रै दुःख सौही सका सी?

³⁹तिन्हैं तेइबै बोलू, “आसै केरी सका सी।” यीशुऐ तिन्हां बै बोलू, “ज़ुण दुःख हांऊँ सौहणु आल़ा सा कि तुसै सौही सका सी होर ज़ैण्ढै हांऊँ मकाइणा तैण्ढै कि तुसै मकाणै रै दुःख सौही सका सी।

⁴⁰पर परमेश्वरै ज़ुणिरी तैंईंयैं ज़ैगा त्यार केरी सा, तिन्हां बै छ़ौड़िआ, होरी कोई बै आपणै दैहिणै होर बांऊँऐ हौथै बशाणा मेरा कोम नी ऑथि।”

⁴¹ऐ शुणिया दस च़ेले याकूब होर यूहन्ना री झ़िक केरदै लागै।

⁴²होर यीशुऐ सौ आपु आगै शाधिया बोलू, “तुसै जाँणा सी कि, ज़ुण दुज़ी ज़ाति रै अधिकारी बुझ़िया सी, तै तिन्हां पैंधै आपणा अधिकार चला सी, होर तिन्हां मौंझ़ै ज़ुण बड़ै सी, तिन्हां पैंधै अधिकार रखा सी।

⁴³पर तुसा न ऐण्ढा नी ऑथि, पर ज़ो कोई तुसा मौंझ़ै बड़ा होंणा चाहा सा, सौ आपणै आपा बै तुसरा सेवक बैणला।

⁴⁴होर ज़ो कोई बड़ा बैणना चाहा सा, सौ सैभी रा नोकर बैणला।

⁴⁵किबैकि मांहणु रा बेटा तैबै नी आऊ, कि तेइरी सेवा केरी लोड़ी, पर तैबै आऊ कि सैभी री सेवा केरनी, होर बोहू लौका बै छ़ुड़ाणै री तैंईंयैं आपणा प्राण बलिदान केरनै आऊ सा।”

⁴⁶तैबै यरूश्लेमा रै बौता न यीशु होर तेइरै च़ेले यरीहो नगरा न आऐ, सौ होर तेइरै च़ेले, होर एक बड़ी भीड़ यरीहो न निकती ती, ता तिमाई रा बेटा बरतिमाई एक कांणा भिखारी, सड़का रै कनारै बेठा ती।

⁴⁷ऐ शुणिया कि नासरता रा यीशु सा, लेरा मारी-मारिया ज़ोरा सैंघै बोलदा लागा, “ओ दाऊदै राज़ै री औलाद, यीशु मूँ पैंधै दया केर।”

⁴⁸बोहू लौके तेइबै बोलू कि च़ुप रौह, पर सौ होर भी बोलदा लागा कि, “ओ दाऊदा राज़ै री औलाद, मूँ पैंधै दया केर।”

⁴⁹तैबै यीशुऐ रुकिया बोलू, “ऐईबै शाधा।” तैबै तिन्हैं तेई कांणै बै शाधिया बोलू, “हौंसला रख, खड़ा हो, यीशु तौभै शाधा सा।”

⁵⁰तेइयै आपणी शौल शेटी तुरन्त उठु, होर यीशु हागै आऊ।

⁵¹तैबै यीशुऐ तेइबै बोलू, “तू कि चाहा सा कि हांऊँ तेरै तैंईंयैं केरनु?” कांणै मांहणुऐ तेइबै बोलू, “ओ गुरू, ऐ कि हांऊँ हेरणू।”

⁵²यीशुऐ तेइबै बोलू, “जा,” तेरै बशाहे तू ठीक केरू, होर सौ एकदम हेरदा लागा, होर बौता न यीशु पिछ़ै औंढदा लागा।