Read Pahari, Kullu मरकुस 14 Bible Online

मरकुस 14 - Pahari, Kullu bible

मरकुस 14

¹फसह होर अखमीरी रोटी रै त्यौहारा न दूई रोज़ पैहलकी गैल सा कि मुख्यपुरोहिता होर शास्त्री कोई ऐण्ढी तरकीब तोपदै लागै ती कि ते बड़ी च़लाकी सैंघै यीशु बै बन्दी बणालै होर तेइबै मारलै।

²ते बोलदै लागै ती, “पर ऐण्ढा आसाबै त्यौहार रै ध्याड़ै न नी केरना चेहिऐ, होई सका सा कि लोका किछ़ हँगामा खड़ा केरलै।”

³ज़ैबै यीशु बैतनिय्याह शैहरा न शमौन ज़ुणिबै कोढ़ ती तेइरै घौरा न रोटी खाँदा बेठा ती, तैबै एक बाँकी बेटड़ी संगमरमरा री शीशी न जटामांसी रा बोहू कीमती खुशबूदार तेल लेइया आई, होर शीशी चोड़िया सारा तेल यीशु रै च़ोहढ़ै पैंधै पेरू।

⁴तैबै तौखै बेठैंदै किछ़ लोका आपु न बोलदै लागै, “कीमती खुशबूदार तेला री ऐण्ढी बर्बादी किबै केरूई?

⁵किबैकि ऐ खुशबूदार तेल ता लगभग त्राई शौऊ रोज़ा री ध्याड़ी न ज़ादा रा बैचिया गरीब मांहणु बै बोंडी सका ती।” होर ते तेसा बै झ़िड़कदे लागे।

⁶यीशुऐ बोलू, “ऐसा बै छ़ौड़ा, ऐसा बै किबै परेशान केरा सी? ऐसै ता मूँ सैंघै भलाई केरी सा।

⁷गरीब तुसा सैंघै हमेशा रौहा सी, होर ज़ैबै तुसै च़ाहलै तिन्हरी भलाई केरी सका सी, पर मूँ तुसा सैंघै हमेशा नी रोहणा।[1]

⁸एसा बेटड़ियै सौहै केरू ज़ो ऐ केरी सका ती, एसै ता बौगता न पैहलै मेरै पौथिणै री तैंईंयैं मेरी देही न खुशबूदार तेल मौल़िया सौ त्यार केरी सा।

⁹हांऊँ तुसाबै सच़ बोला सा: सारै दुनिया न ज़ौखै बी खुशी रै समादा रा प्रचार केरिला, तौखै एसरी यादी न ज़ो एसै केरू सा, एसरी चर्चा होंणी।”

¹⁰तैबै यहूदा इस्करियोती ज़ो बारा च़ेले न एक ती, मुख्यपुरोहिता हागै यीशु बै धोखै न पकड़वाणै री तैंईंयैं नौठा।

¹¹ते तेइरी गैल शुणिया बड़ै खुश हुऐ, तिन्हैं तेइबै ढैबुऐ देणै रा वचन धिना। तैबै यहूदा यीशु बै धोखै न पकड़वाणै रा मौका तोपदा लागा।

¹²अखमीरी रोटी रै त्यौहारा न पैहलै रोज़, ज़ैबै फसह रै मेमणै री बलि देआ ती, यीशु रै च़ेले तेईन पुछ़ू, “तू कि चाहा सा कि आसै कौखै ज़ाइआ तेरी तैंईंयैं रोटी खाँणै बै तैंईंयैं त्यारी केरलै?”

¹³तैबै तेइयै आपणै दूई च़ेले भेज़िआ होर बोलू, “यरुश्लेम नगरा बै ज़ात्, तौखै तुसाबै पाणी रै घड़ै पाईआ एक मांहणु मिलणा, तेई पिछ़ै ज़ाईत्।

¹⁴तैबै ज़ौखै बी सौ भितरै ज़ाला, तेई घौरा रै मालका बै बोलीत्, गुरू पुछ़ू सा, मेरी रोटी खाँणै रा सौ कमरा कौखै सा ज़ौखै हांऊँ आपणै च़ेले सैंघै फसह री रोटी खाई सकनू।

¹⁵तैबै तेई तौभै ऊझै धिरै एक सज़ाऊदा होर त्यार केरूदा कमरा रिहाणा, तौखै आसरी तैंईंयैं त्यारी केरा।”

¹⁶तैबै तेइरै च़ेले तौखै न नगरा बै आऐ होर तिन्हैं तौखै हर गैल तैण्ढी हेरी ज़ैण्ढी यीशुऐ तिन्हां बै बोली ती। तैबै तिन्हैं फसह रा भोजन त्यार केरू।

¹⁷सौंझ़की घेरै यीशु आपणै बारा च़ेले सैंघै तौखै पुजू।

¹⁸ज़ैबै ते बैशिया रोटी खाँदै लागै ती, तैबै यीशुऐ बोलू, “हांऊँ सच़ बोला सा, तुसा न एकी, ज़ो मूँ सैंघै रोटी खाँदा लागा सा, तेई हांऊँ ढौकणै द्याणा।”

¹⁹तैबै ते च़ेले दु:खी होईया एकी दुज़ै बै बोलदै लागै, “कि हांऊँ सौ नी ऑथि!”

²⁰यीशुऐ तिन्हां बै बोलू, “बारा मौंझ़ै न सौहै एक सा, ज़ो मूँ सैंघै एकी थाल़ी न खा सा।

²¹मांहणु रै बेटै रा जाँणा ता ज़रूरी सा, ज़ैण्ढा कि तेइरै बारै पवित्र शास्त्र न लिखू सा, पर हाय सा तेई मांहणु पैंधै ज़ौसरी बजहा न मांहणु रै बेटै ढौकिणा। अगर तेई मांहणु री तैंईंयैं केतरा भला होंदा कि सौ पैदा नी ती होंदा।”

²²ज़ैबै ते रोटी खाँदै लागै ती, यीशुऐ रोटी लेई होर परमेश्वरा रा धन्यवाद केरिया चोड़ी होर तिन्हां बै देंदी घेरै बोलू, “खात् लेआ, ऐ मेरी देह सा।”

²³तैबै तेइयै अँगूरा रै रसा रा कटोरा च़कू होर परमेश्वरा रा धन्यवाद केरिया तिन्हां बै धिना होर तिन्हां सैभियै सौ पीऊ।

²⁴तैबै यीशुऐ बोलू, “ऐ मेरा लोहू सा, ज़ो एक नोंऊँऐं वायदा री शुरूआत सा, ज़ो कि परमेश्वर होर तिन्हरै लोकै सैंघै केरी ती। ऐ बोहू री तैंईंयैं बहाणा लाऊ सा।

²⁵हांऊँ तुसाबै सच़ बोला सा कि ऐबै मूँ तेई ध्याड़ै तैंईंयैं अँगूरा रा रस नैंई च़खणा, ज़ैबै तैंईंयैं परमेश्वरै रै राज्य न नोंऊँआं अँगूरा रा रस नी पीनू।”

²⁶तैबै ते एक भजन गाईया जैतून ढौगा पैंधै बै नौठै।

²⁷बौता न यीशुऐ तिन्हां बै बोलू, “तुसा सैभी रा बशाह कम होंणा किबैकि लिखू सा: मूँ फुआल मारना होर भेड़ा तितर-बितर होंणी।

²⁸पर दबारा ज़िन्दै होंणै न बाद मूँ तुसा न पैहलै गलीला बै जाँणा।”

²⁹तैबै पतरसै बोलू, “चाहे सैभै आपणा विश्वास खोलै पर मूँ नी खोणा।”

³⁰यीशुऐ तेइबै बोलू, “हांऊँ तौभै सच़ बोला सा, औज़ एसा राती न तौ मुर्गै रै दूई बार बाँग देणै न पैहलै त्रीजी बार मेरा नाँह केरना।”

³¹पतरसै भी बोलू, “अगर मुँभै तौ सैंघै मौरना बी पौड़ला, तैबै बी मूँ तेरा नाँह नी केरना!” तैबै बाकि च़ेले बी ऐण्ढाऐ बोलू।

³²फिरी ते गतसमनी ज़ैगा बै आऐ। तौखै यीशुऐ आपणै च़ेले बै बोलू, “मेरै प्रार्थना केरनै तक तुसै औखै रूका।”

³³पतरस, याकूब होर यूहन्ना यीशुऐ आपु सैंघै नेऐ। यीशु बोहू दु:खी होर व्याकुल होंदा लागा ती।

³⁴होर तिन्हां बै बोलू, “मेरा मन बड़ा उदास हुआ सा, औखै तैंईंयैं कि हांऊँ मौरनु आल़ा सा, तुसै औखै बेशा, होर बिऊदै रौहा।”

³⁵तैबै थोड़ा आगै ज़ाइआ सौ ज़मीना पैंधै टुँबड़ै पौड़िया प्रार्थना केरदा लागा कि, ओ परमेश्वर अगर होई सका सा ता ऐ दु:खै री घड़ी मूँ पैंधै न दूर केर।

³⁶यीशुऐ बोलू, “ओ पिता ओ पिता! तेरी तैंईंयैं सैभ किछ़ सान सा। एसा दु:खै री घड़ी बै मूँ न दूर केर। तैबै भी ज़ो किछ़ हांऊँ चाहा सा, सौ नी बल्कि ज़ो तू चाहा सा सौऐ केर।”

³⁷ज़ैबै यीशु वापस आऊ ता तेइयै आपणै च़ेले बै सोंदै हेरिया, “शमौन” पतरसा बै बोलू, “कि तू सोंदा लागा सा? कि तू एक घड़ी बी बिऊदा नी रौही सकू?

³⁸बिऊदै रौहा होर प्रार्थना केरा कि तुसै परीक्षा न नी पौड़लै। मन ता त्यार सा पर देह कमज़ोर सा।”

³⁹यीशु भी प्रार्थना केरदा नौठा होर तैण्ढै वचन बोलिया प्रार्थना केरी।

⁴⁰ज़ैबै सौ दबारा वापस आऊ ता तेइयै दबारा आपणै च़ेले सोंदै हेरै। तिन्हरी औछ़ी नींज़ै लाइया भौरूइदी ती। तिन्हां बै पता निसी च़ली कि आसा यीशु बै कि ज़वाब देणा।

⁴¹सौ प्रार्थना केरिया त्रीजी बार भी वापस आऊ होर तिन्हां बै बोलू, “तुसै कि हाज़ी बी आरामा सैंघै सोंदै लागै सी?” रज़ हुआ, सौ बौगत आऊ सा, ज़ैबै मांहणु रा बेटा पापी रै हौथा ढौकिणा।

⁴²खड़ै होआ! होर च़ला, हेरा, मुँभै धोखै सैंघै ढौकणै द्याणू आल़ा मांहणु ऐन्दा लागा सा।

⁴³यीशु बोलदा लागा ती कि तेइरै बारा च़ेले मौंझ़ै न एक च़ेला यहूदा इस्करियोती तौखै हेरूआ। तेई सैंघै डँडै होर तलवारी लेइया लोकै री एक बड़ी भीड़ ती होर सौ भीड़ मुख्यपुरोहिता, शास्त्री होर स्याणै भेज़ी ती।

⁴⁴यहूदा इस्करियोतीयै तिन्हां बै दैसू ती कि ज़ुणिबै हांऊँ माँकी देनू सौहै यीशु सा, तेइबै ढौकेइत् होर होशियारी सैंघै नेईत्।

⁴⁵ज़ैबै यहूदा तौखै आऊ, तुरन्त तेइयै यीशु हागै ज़ाइआ बोलू, “ओ गुरू!” होर तेइबै माँकी धिनी।

⁴⁶तैबै तुरन्त तिन्हैं सौ ढौकू होर आपणी हिरासता न लेऊ।

⁴⁷यीशु रै एकी च़ेले ज़ो कि तौखै खड़ा ती, तेइयै आपणी तलवारियै लाइया महापुरोहित रै नोकर रा एक कोन काटू।

⁴⁸तैबै यीशुऐ बोलू, “हांऊँ कि कोई अपराधी सा ज़ो तुसै मुँभै ढौकणै री तैंईंयैं डँडै होर तलवारी लेइया आऐ सी?”

⁴⁹हांऊँ हर रोज़ मन्दिरा न तुसा सैंघै उपदेश देआ ती पर तुसै हांऊँ नी ढौकू। ऐबै ऐ एथै री तैंईंयैं तुसै हांऊँ ढौकू कि शास्त्रा रा वचन पूरा होला।

⁵⁰तैबै यीशु रै सारै च़ेले तेइबै केल्है छ़ौड़िआ भगै।

⁵¹एक नोऊज़ुआन आपणी नाँगी देही न एक च़ादर लपेटिया तेई पिछ़ै ऐन्दा लागा ती। तिन्हैं सौ ढौकणा चाहू।

⁵²पर सौ आपणी च़ादर छ़ौड़िआ नाँगा भैगू।

⁵³तिन्हैं यीशु महापुरोहित हागै नेऊ। तैबै सारै मुख्यपुरोहित, स्याणै होर शास्त्री कठा हुऐ।

⁵⁴पतरस तेईन दूर-दूर च़लदै-च़लदै महापुरोहित रै ब्राम्दै आँध्रै तैंईंयैं नौठा होर तौखै पौहरैदारा सैंघै औगी छिपदा लागा।

⁵⁵सारी यहूदी सभा होर मुख्यपुरोहित यीशु बै मौऊत री सज़ा देणै री तैंईंयैं कोई सबूत तोपदै लागै ती पर तिन्हां बै कोई सबूत नी मिलू।

⁵⁶बोहू सारै लोकै यीशु रै बारै न झ़ूठी गुआही धिनी पर ते गुआही एक ज़ेही नैंई ती।

⁵⁷तैबै किछ़ लोका खड़ै हुऐ होर तेइरै खिलाफ़ झ़ूठी गुआही देइया बोलदै लागै,

⁵⁸“आसै ऐ ऐण्ढा बोलदा शुणू सा कि मैं मांहणु रै हौथै बैणूदा ऐ मन्दिर मूँ नाश केरना होर त्रा रोज़ा भीतरै मूँ दुज़ा मन्दिर बनाणा, ज़ो कि हौथै लाइया बैणूदा नी होंणा।”

⁵⁹पर एथा न भी तिन्हरी गुआही एक नी ती ऑथि।

⁶⁰तैबै तिन्हां सामनै महापुरोहित खड़ै होईया यीशु न पुछ़ू, “ऐ लोका तेरै खिलाफ़ कि गुआही देंदै लागै सी? कि तौ इन्हां बै किछ़ ज़वाब नी देणा?”

⁶¹पर यीशु च़ुप रौहू, होर किछ़ ज़वाब नी धिना, महापुरोहितै सौ फिरी पुछ़ू, तू कि तेई परमेश्वरा रा बेटा मसीह सा?

⁶²यीशुऐ बोलू, “हांऊँ सा, होर तुसा मांहणु रै बेटै बै सर्वशक्तिमाना री दैहिणी धिरै बेठादा होर स्वर्गा न बादला सैंघै ऐन्दा हेरना।”

⁶³महापुरोहितै आपणा चोल़ा च़िरिया बोलू, “आसाबै होरी गुआही री कि ज़रूरत सा?”

⁶⁴तुसै ऐ निन्दा आल़ी गैला बोलदा शुणू, ऐबै तुसरा कि विचार सा? तिन्हैं सैभियै बोलू, ऐईबै मौऊत री सज़ा मिलणी चेहिऐ।

⁶⁵तैबै किछ़ लोकै तेई पैंधै थुकू, किछ़ लोका तेइरा मुँह खौटा ती होर मुक्कै लाइया मारा ती। किछ़ मज़ाक केरिया बोलदै लागै, “भविष्यवाणी केरिया पता ला कि कुणिऐ मारू!” होर पौहरैदारै सौ ढौकिया मारू।

⁶⁶पतरस हाज़ी ब्राम्दै न बेठा ती होर तौखै महापुरोहितै री एक नोकराणी आई।

⁶⁷ज़ैबै तेसै पतरस तौखै औगी छिपदा हेरू ता बड़ै ध्याना सैंघै तेइबै पछ़ियाणिया बोलू, “तू बी ता तेई यीशु नासरी सैंघै ती।”

⁶⁸पर पतरसै नाँह केरू होर बोलदा लागा, “हांऊँ नी ज़ाणदा कि तू कि लागी सा बोलदी।” ऐण्ढा बोलिया सौ डेवढ़ी तैंईंयैं नौठा, होर मुर्गै बाँग धिनी।

⁶⁹तेसै नोकराणियै ज़ैबै सौ दबारा हेरू ता सौ भी लोका बै बोलदी लागी, “ऐ मांहणु बी तिन्हां न एक सा।”

⁷⁰पतरसै फिरी नाँह केरू। तैबै थोड़ी देरा बाद तौखै खड़ै हुऐदै लोकै पतरस हेरू होर बोलू, “पक्का तू बी तिन्हां न एक सा किबैकि तू बी गलीला रा सा।”

⁷¹तैबै पतरस आपणै आपा बै कोसदा लागा होर कसमा खाँदा लागा, “ज़ौसरै बारै न तुसै बोलदै लागै सी, हांऊँ तेई मांहणु बै नी ज़ाणदा।”

⁷²तेसा घड़ियै मुर्गै दुज़ी बार बाँग धिनी। पतरसा बै तुरन्त तेई बौगतै सौ गैल याद आई ज़ो यीशुऐ तेइबै बोली ती कि “मुर्गै री दूई बार बाँग देणै न पैहलै तौ मेरा त्रा बार नाँह केरना।” तैबै पतरसा रा ज़ीऊ चुटा होर सौ दु:खी होईया लेरा मारिया रोंदा लागा।