Read Pahari, Kullu मरकुस 15 Bible Online

मरकुस 15 - Pahari, Kullu bible

मरकुस 15

¹होर दोथ होंदैआ तुरन्त मुख्यपुरोहिते, स्याणै, होर शास्त्रियै बल्कि सैभी महासभा रै लोकै यीशु बोनणै धियाऊ, होर सौ नेइया पिलातुस राज़पाला रै हौथा न धिना।

²होर राज़ा पिलातुसै यीशु न पुछ़ू, “तुसै कि यहूदी लोका रै राज़ा सी?” यीशुऐ ज़वाब धिना, “कि तू आपुऐ ता बोलदा लागा सा।”

³होर मुख्यपुरोहित तेई पैंधै बोहू गैला रा दोष लांदै लागे ती।

⁴पिलातुसै यीशु फिरी पुछ़ू, “तू कि कोई ज़वाब नी देंदा, हेर ऐ लोका तौ पैंधै केतरी गैला रा दोष ला सी?”

⁵यीशुऐ फिरी भी कोई ज़वाब नी धिना, औखै तैंईंयैं कि पिलातुसा बै भी हेरानी हुई।

⁶होर सौ ऐसा फसह रै त्यौहारा न कोई भी एक कैदी बै ज़ुणिबै लोक चाहा ती, तिन्हरी तैंईंयैं छ़ौड़ा ती।

⁷तेई बौगता बरअब्बा नाँ रा एक डाकू किछ़ लोका सैंघै कैदखानै न रखु ती, ज़ुणियै हत्या केरी ती, ज़ैबै तिन्हैं रोमी सरकारा रै बरोधा न बलवा केरू ती।

⁸होर सैभी री भीड़ ऊझै जाईया अर्ज़ा केरदी लागी, कि आसरी तैंईंयैं ज़ैण्ढा तू केरदा आऊ सा तैण्ढा केर।

⁹पिलातुसै तिन्हां बै ज़वाब धिना, “तुसै चाहा सी कि हांऊँ तुसा री तैंईंयैं यहूदी रै राज़ा बै छ़ौड़नू?”

¹⁰किबैकि सौ जाँणा ती, कि मुख्यपुरोहिते सौ जलन केरिया ढौकणै धियाऊ सा।

¹¹पर मुख्यपुरोहिते लोका भड़काए ती, कि बरअब्बा बै आसरी तैंईंयैं छ़ौड़।

¹²ऐ शुणिया पिलातुसै तिन्हां लोका न फिरी पुछ़ू, “कि ज़ुणिबै तुसै यहूदी रा राज़ा बोला सी, तेई सैंघै हांऊँ कि केरनु?” ते लेरा मारिया बोलदै लागे कि तेइबै क्रूसा पैंधै च़ढ़ा।

¹³पर ते होर ज़ोरा सैंघै लेरा मारदै लागे, “कि तेइबै क्रूसा पैंधै च़ढ़ा।”

¹⁴पिलातुसै तिन्हां बै बोलू, “किबै, ऐईयै कि बुरा कोम केरू सा?” पर तै होर भी जौरे सैंघै चीखे, “तेइबै क्रूसा पैंधै च़ढ़ा।”

¹⁵तैबै पिलातुसै भिड़ा बै खुश रैखणै री तैंईंयैं, बरअब्बा डाकू तिन्हरी तैंईंयैं छ़ौड़ू, होर यीशु बै कोड़ै लाईया तिन्हरै हवालै केरू कि क्रूसा पैंधै च़ढ़ा।

¹⁶होर सपाहिये सौ किलै रै आँध्रलै ब्राम्दै बै नेऊ ज़ुण न्याय री ज़ैगा ती होर सारी सैना री पलटन तौखै कठा केरिया शाधी।

¹⁷होर तिन्हैं तेइबै बैंगनी रंगा रा झिकड़ा लाऊ, होर कौन्डै रा मुकट बणाईया तेइरी मुँडी न लाऊ।

¹⁸होर ऐ बोलिया तेइबै नमस्कार केरदै लागै, “कि ओ यहूदी रै राज़ा, नमस्कार!”

¹⁹होर ते तेइरी मुँडी न नगाल़ी रै डँडै सैंघै मारदै, होर तेई पैंधै थूकदे, होर घुटनै पैंधै बैशिया तेइबै नमस्कार केरदै लागे।

²⁰होर ते ज़ैबै तेइरा मज़ाक उड़ाइया बेठै, ता तेई पैंधै न बैंगनी झिकड़ै खोलिया तेइरै झिकड़ै लायै, होर सौ क्रूसा पैंधै च़ढ़ाणै री तैंईंयैं बाहरै नेऊ।

²¹होर सिकंदर होर रुफुस रा बापू, शमौन नाँ रा एक कुरेनी नगरा रा मांहणु ज़ुण छेता न बापिस ऐन्दा लागा ती, तिन्हैं सौ बिना मतलबै ढौकू कि यीशु रा क्रूस च़कला।

²²होर ते तेइबै गुलगुता नाँ री ज़ैगा पैंधै, ज़ुणिरा मतलब खोपड़ी री ज़ैगा सा आंणु।

²³होर ते यीशु बै गन्धरस मिलूदा अँगूरा रा रस पियांदे लागे, पर तेइयै नैंई पिऊ।

²⁴तैबै तिन्हैं सौ क्रूसा पैंधै च़ढ़ाऊ, होर तेइरै झिकड़ै पैंधै चिट्ठी पाईआ, कि कुणी बै कि मिलला, होर बोंडै।

²⁵ज़ैबै तिन्हैं सौ क्रूसा पैंधै च़ढ़ाऊ ती, तैबै दोथकै नौऊ बज़ै ती।

²⁶होर तेइरा दोषपत्र तेई पैंधै लाऊ कि “यहूदी रा राज़ा।”

²⁷होर तिन्हैं तेई सैंघै दुई डाकू, एक दैहिणै धिरै ता दुज़ा बांऊँई धिरै क्रूसा पैंधै च़ढ़ाये।

²⁸तैबै पवित्र शास्त्रा न लिखूदा सौ वचन पूरा हुआ, कि अपराधी सैंघै तेइरी गिणती हुई।

²⁹होर बौता न ज़ाणू आल़ै मुँडी थलाई-थलाइया ऐ बोलिया तेइरी निन्दा केरा ती, “कि वाह! मन्दिरा बै चोड़िया, त्रा रोजा न बनाणु आल़ै!

³⁰क्रूसा पैंधै न उतरिआ आपणै आपा बै बच़ाई लेया।”

³¹ऐण्ढी तैरहा मुख्यपुरोहिता भी, शास्त्रियै समेत, आपु न मज़ाक केरिया बोला ती, “कि ऐईयै होर लोका बच़ाए सी, पर आपु बै नैंई बच़ाई सकदा।

³²अगर इस्राइला रा राज़ा, मसीह, ऐबै क्रूसा न उतरला, ता आसा हेरिया बशाह केरना।” होर ज़ुण क्रूसा पैंधै तेई सैंघै च़ढ़ाये ती, ते भी तेइरी बुराई केरा ती।

³³होर ध्याड़ा च़ढ़ने पैंधै सारै देशा न निहारा हुआ, लगभग त्राई बाज़ै तक रौहू।

³⁴त्राई बाज़ै न बाद यीशुऐ ज़ोरै री आवाज़ा न बोलू, “इलोई, इलोई, लमा शबक्तनी?” ज़ुणिरा मतलब सा, “ओ मेरै परमेश्वर, ओ मेरै परमेश्वर, तैं हांऊँ किबै छ़ौड़ू?”

³⁵ज़ो लोका सैंघै खड़ै ती, तिन्हां मौंझ़ै केतरै ऐ शुणिया बोलदै लागे, “हेरा, ऐ एलिय्याह बै पुकारदा लागा सा।”

³⁶होर एकियै ठोर मारिया स्पंज सिरकै न चौकू होर नगाल़ी रै डँडै न रखिया तेइबै चुसाऊ होर बोलू, “रुका; हेरणा, कि एलिय्याह ऐईबै उतारने री तैंईंयैं एज़ा सा कि नैंई।”

³⁷तैबै यीशुऐ बड़ी ज़ोरै री आवाज़ केरिया प्राण छ़ौड़ै।

³⁸तैबरै मन्दिरा रा पर्दा ऊझै न बुनै ढौई च़िरूआ होर दुई टुकड़ै हुऐ।

³⁹ज़ुण सूबैदार तेई सामनै खड़ा ती, ज़ैबै यीशु ऐण्ढा प्राण छ़ौड़दा हेरू, ता तेइयै बोलू, “कि सच़िऐ ऐ मांहणु, परमेश्वरा रा बेटा सा!”

⁴⁰कई बेटड़ी बी दूरा न हेरदी लागी ती तिन्हां मौंझ़ै मरियम मगदलीनी होर होछ़ै याकूब होर योसेसा री आमा मरियम होर सलोमी ती।

⁴¹ज़ैबै यीशु गलीला न ती, ता यीशु पिछ़ै औंढा ती होर तेइरी सेवा केरा ती, होर भी बोहू बेटड़ी ती ज़ुण तेई सैंघै यरूश्लेम शैहरा बै आई ती।

⁴²ज़ैबै सौंझ़ होणु आल़ी ती, तैबै बशाँ रा ध्याड़ा लगभग ऐणु आल़ा ती।

⁴³अरिमतिया ग्राँ रा रौहणु आल़ै युसूफ आऊ, ज़ुण एक मशहूर मंत्री होर आपु भी परमेश्वरा रै राज्य री गैला केरदै रौहा ती, सौ हिम्मत केरिया राज़ा पिलातुसा आगै नौठा होर यीशु री लाश मोंगी।

⁴⁴पिलातुस ऐ शुणिया हैरान हुआ कि यीशु मूँआ सा, तैबै तेइयै सुबैदार शाधाऐ ज़ुणियै यीशु क्रूसा पैंधै च़ढ़ा ती होर तिन्हां न पूछू़, “कि यीशु पैहलै न मूँआ सा?”

⁴⁵ज़ैबै सूबैदारै बै पुछ़िया सारा हाल पता केरू, तैबै लाश यूसुफा बै धिनी।

⁴⁶तैबै तेइयै एक मलमलै रा कफन लेइया आंणु, होर लाश उतारिआ तेसा कफना न लपेटी, होर एक कब्रा न ज़ुण पात्थरा न कोती ती रखी, होर कब्रा रै दुआरा न एक बड़ा पात्थर रखु।

⁴⁷होर मरियम मगदलीनी होर योसेसा री आमा मरियम हेरदी लागी ती, कि सौ कौखै रैखू।