Read Pahari, Kullu मरकुस 16 Bible Online

मरकुस 16 - Pahari, Kullu bible

मरकुस 16

¹ज़ैबै बशाँ रा ध्याड़ा निभु, तैबै मरियम मगदलीनी, होर याकूबा री आमा मरियम, होर सलोमीऐ किछ़ खुशबूदार च़ीज़ा लेइया आंणी, कि एज़िया तेइरै शरीरा पैंधै तेल मौल़ली।

²हफ्ते रै पैहलै ध्याड़ै (तुआरा बै) दोथियै, ज़ैबै सूर्य निकता ती, ते कब्रा पैंधै आई,

³होर आपु न बोला ती, “आसरी तैंईंयैं कब्रा रै द्वारा पैंधै पात्थर कुणिऐ लुढ़काणा?”

⁴ज़ैबै तिन्हैं हेरू, कि पात्थर लुढ़कुदा सा! सौ बड़ा पात्थर ती।

⁵होर कब्रा आँध्रै जाईया, तिन्हैं एक ज़ुआन मांहणु शेतै झिकड़ै लाईया दैहिणै बेठादा हेरु, होर बोहू हेरान हुई।

⁶तेइयै तेइबै बोलू, “हैरान मता होंदै, तुसै यीशु नासरी बै, ज़ो क्रूसा पैंधै च़ढ़ाऊ ती, तोपा सी। सौ ज़िन्दा हुआ, औखै नैंई ऑथि, ऐ सौ ज़ैगा सा, ज़ौखै तिन्हैं सौ रैखु ती।

⁷पर तुसै ज़ाआत्, होर तेइरै च़ेले होर पतरसा सैंघै बोला, कि तेई तुसा न पैहलै गलील ज़िलै बै जाँणा; ज़ैण्ढा तेइयै तुसा सैंघै बोलू ती, तेई तुसाबै तौखै मिलणा।”

⁸होर तै निकल़िया कब्रा न भैगी; किबैकि कोमणी होर घबराहट तिन्हां मौंझ़ै छाई ती, होर तिन्हैं कोई सैंघै किछ़ नैंई बोलू, किबैकि तै डौरा ती।

⁹हफ्ते रै पैहलै ध्याड़ै (तुआरा बै) दोथ होंदेआ सौ ज़िन्दै होईया पैहलै-पैहलै मरियम मगदलीनी बै, ज़ुणी मौंझ़ै न तेइयै सौत बुरी आत्माएँ खोली ती, हेरूई।

¹⁰तेइयै जाईया तिन्हरै सैंघी बै ज़ो दुःखा न डूबै ती होर रोंदै लागै ती, समाद धिना।

¹¹होर तिन्हैं ऐ शुणु कि सौ ज़िन्दा सा होर मरियमै सौ हेरू सा, बशाह नैंई केरु।

¹²एथा न बाद सौ दुज़ै रूपा न तिन्हां मौंझ़ै दुई च़ेले बै ज़ैबै ते ग्राँ धिरै बै जाँदै लागै ती, हेरूआ।

¹³तिन्हैं बी जाईया होरी बै ऐ समाद धिना, पर तिन्हैं तिन्हरा बी बशाह नी केरू।

¹⁴बादा न सौ तिन्हां ग्यारा बै भी, ज़ैबै ते रोटी खाँदै बेठै ती हेरूआ, होर तिन्हरै कम बशाह होर कठोर मना री तैंईंयैं सौ झिड़कै किबैकि ज़ुणियै सौ ज़िन्दै होंणै न बाद हेरू ती, तिन्हैं तेइरा बशाह नैंई केरु।

¹⁵होर तेइयै तिन्हां सैंघै बोलू, “तुसै सारै दुनिया न जाईया सारी दुनिया रै लोका बै खुशी रै समादा रा प्रचार केरा।

¹⁶ज़ो कोई बशाह केरला होर बपतिस्मा लेला तेई, मुक्ति पाणी, पर ज़ो कोई बिश्वास नैंई केरला, तेई दोषी बैणना।

¹⁷होर बशाह केरनु आल़ै री तैंईंयैं ऐ नशाण कि तिन्हां मेरै नाँ न बुरी आत्माएँ खोलणी; नोंऊँई-नोंऊँई भाषा बोलणी।

¹⁸तिन्हां कीड़ै च़कणै, होर अगर तै जेहरली च़ीज़ा पीलै तैबै भी तिन्हां रा कोई नुकसान नैंई होंणा; तिन्हां बीमारा पैंधै हौथ रखणै, होर तिन्हां ठीक होंणा।”

¹⁹तैबै प्रभु यीशु तिन्हां सैंघै गैला ढूणनै न बाद स्वर्गा पैंधै च़किया नेऊ, होर परमेश्वरा रै दैहिणै धिरै बेठा (1 पतरस 3:22)।

²⁰होर तिन्हैं निकल़िया हर ज़ैगा प्रचार केरू, होर प्रभु तिन्हां सैंघै कोम केरदा रौहु, होर तिन्हैं चमत्कारा रै द्वारा रिहाऊ कि वचना सच़ा सा। आमीन।