Read Pahari, Kullu मरकुस 3 Bible Online

मरकुस 3 - Pahari, Kullu bible

मरकुस 3

¹यीशु तैबै आराधनालय बै नौठा। तौखै एक शुकेंदै हौथा आल़ा मांहणु ती।

²तौखै फरीसी मौंझ़ै न किछ़ लोकै यीशु बै ध्याना सैंघै हेरू कि ऐ बशाँ रै ध्याड़ै न मांहणु बै ठीक केरा सा होर नी। तिन्हैं ऐण्ढा तैबै केरू कि अगर तेइयै ऐ मांहणु ठीक केरू कि ते पैंधै दोष लालै कि तिन्हैं मूसै धिनैदै बिधाना रा पालन नी केरू, किबैकि सौ बशाँ रै ध्याड़ै न कोम केरा ती।

³यीशुऐ शुकेंदै हौथा आल़ै मांहणु बै बोलू, “औखै सैभी रै सामनै खड़ा हो!” तैबै सौ मांहणु खड़ा हुआ।

⁴यीशुऐ शुकेंदै हौथा आल़ै मांहणु बै बोलू, “कि ज़ो बिधान मैं मूसा बै धिना कि सौ लोका बै शोभलै कोम केरनै रा हुक्म देआ सा या बुरै कोम?” कि बिधान आसाबै बशाँ रै ध्याड़ै न कोई मांहणु बै बच़ाणै रा हुक्म देआ सा होर फिरी मज़त केरनै री तैंईंयैं नाँह केरा सा? होर तिन्हां बै मौरनै देंदा? पर तिन्हैं जवाब नी धिना।

⁵तेइयै च़ोहू पासै तिन्हां बै झ़िका न हेरू होर उदास हुऐ, किबैकि ते ज़िदी ती होर मांहणु री मज़ती री तैंईंयैं त्यार नी ती ऑथि। तैबै यीशुऐ तेई मांहणु बै बोलू, “आपणा हौथ आगै केर!” ज़ैबै तेई मांहणुऐ आपणा शुकुदा हौथ आगै केरू, तैबरै सौ ठीक हुआ।

⁶तैबै फरीसी लोका आराधनालय घौरा न बाहरै एज़िया तुरन्त किछ़ यहूदी लोका सैंघै मिलै ज़ो कि राज़ा हेरोदिया रा समर्थन केरा ती, ज़ुणियै गलील ज़िलै न राज़ केरु ती, होर तिन्हां सैंघै मिलिया यीशु रै खिलाफ़ ऐ फ़ैसला केरू कि ते यीशु बै कैण्ढी तैरहा मकाई सका सी।

⁷कफरनहूमा न यीशु आपणै च़ेले सैंघै समुन्द्रा धिरै बै नौठा होर गलील ज़िलै न लोकै री एक बड़ी भीड़ तेई पिछ़ै च़ली। ज़ो कि गलीली होर यहूदिया ज़िलै न आऐ ती

⁸ऐ शुणिया कि यीशु चमत्कार केरा सा, यहूदिया ज़िलै रै नगरा न होर यरूश्लेम शैहरा होर इदुमिया ज़िला न, होर यरदन नौई पारै रै इलाकै न, होर सूर होर सैदै शैहरा रै औरै-पौरै न बोहू बड़ी भीड़ कठा हुई। किबैकि तिन्हैं तेइरै बारै न शुणु ती, सौ कि केरदा लागा सा।

⁹यीशुऐ कई लोका ठीक केरै ती, ऐण्ढै लोका ज़ुणी हागै हर किस्मै री बीमारी, तेइबै छ़ुँगणै री तैंईंयैं आगै आऐ। तिन्हरा ऐ मनणा ती कि अगर कोई बी तेइबै छ़ुँगला ता तिन्हां ठीक होंणा। तैबै तेइयै आपणै च़ेले बै बोलू कि तिन्हां बै तेइरी तैंईंयैं एक होछ़ी किश्ती त्यार केरनी चेहिऐ, ताकि लोका री भीड़ ज़ैबै तेइबै छ़ुँगली ता सौ नी लोड़ी दाबू।

¹¹होर ज़ैबै बी बुरी आत्माएँ फसैदै लोका यीशु बै हेरा ती, तेई हागै लोमै पौड़ा ती होर ज़ोरा सैंघै क्रींजा मारिया बोला ती, “तू परमेश्वरा रा बेटा सा।”

¹²होर यीशुऐ आत्मा बै बोहू घेरै बोलू, कि मेरै बारै न कोई बै मता दैसदै।

¹³तैबै यीशु बोहू लोका सैंघै ढौगा पैंधै नौठा होर ज़ुणिबै सौ चाहा ती ते आपु हागै शाधै होर ते तेई हागै आऐ।

¹⁴तैबै यीशुऐ बारा लोका छाँटै ज़ो कि तेई सैंघै रौहलै होर सौ तिन्हाबै प्रचार केरनै री तैंईंयैं भेज़ला। ज़ुणिबै तेइयै प्रेरित बोलू।

¹⁵होर तिन्हां बै यीशुऐ बुरी आत्मा खोलणै रा भी हक धिना।

¹⁶होर ते बारा च़ेले ऐ सी, शमौन ज़ुणिरा नाँ यीशुऐ पतरस रैखू।

¹⁷जब्दी रा बेटा याकूब, होर याकूबा रा होछ़ा भाई यूहन्ना, ज़ुणिरा नाँ तेइयै बुअनरगिस, मतलब बादला रै गर्जना सांही मांहणु रैखु।

¹⁸होर अन्द्रियास, फिलिप्पुस, बरतुल्मै, मती, थोमा, हलफई रा बेटा याकूब, तद्दै होर शमौन कनानी।

¹⁹होर यहूदा इस्करियोती, ज़ुणियै यीशु बै धोखा देइया ढौकणै द्याऊ।

²⁰तैबै यीशु आपणै च़ेले सैंघै कफरनहूम ज़ौखै सौ रौहा ती नौठै। फिरी लोकै री एक भीड़ ज़ौखै सौ ती कठा हुई, ज़ुणी बजहा तेइबै रोटी खाँणै रा भी मौका नी मिलू।

²¹ज़ैबै तेइरै रिश्तैदारै ऐ गैला शुणी ता ते यीशु बै घौरा आंणनै री तैंईंयैं निकतै किबैकि ते बोला ती कि, “ऐईरा दिमाग खराब हुआ सा।”

²²होर ज़ुणा शास्त्री यरूश्लेम शैहरा न आऐ ती, ते ऐण्ढा बोला ती कि, “तेई आँध्रै शैतान सा होर सौ बुरी आत्मा बै शैताना री मज़ती सैंघै बुरी आत्मा बै खोला सा।”

²³यीशुऐ ते आपु हागै शाधै, होर उदाहरण देइया तिन्हां बै बोलू, “शैतान कैण्ढै शैताना बै खोली सकदा?”

²⁴अगर एकी देशा न रौहणु आल़ै लोका आपु न लड़दै रौहलै ता, तिन्हरा देश एक मजबूत देश नी रौहणा।

²⁵होर अगर एकी घौरा न रौहणु आल़ै लोका एकी दुज़ै न लड़ाई केरा सी ता ऐ पक्का सा कि ते कैधी भी एक टबरा मौंझ़ै नी रौही सकदै।

²⁶होर ऐण्ढी तैरहा शैतान होर तेइरी बुरी आत्मा एकी दुज़ै लड़दै ता तिन्हां तकड़ै होंणै रै बजायै कमज़ोर होंणा।

²⁷“कोई भी मांहणु कोई तकड़ै शैताना सांही मांहणु रै घौरा न जाईया च़ोरी नी केरी सकदा, ज़ैबै तैंईंयैं कि सौ तेई मांहणु बै बोनिआ नी रखला, होर तैबै सौ तेइबै लूटी सका सा।

²⁸“हांऊँ तुसाबै सच़ बोला सा, कि लोका रै सैभ पाप होर परमेश्वरा री निन्दा ज़ो ते केरा सी माफ केरिनै, अगर ते पश्चाताप केरलै।

²⁹पर ज़ो कोई पवित्र आत्मै री निन्दा केरला, सौ कैधी भी माफ नी केरिना, बल्कि सौ हमेशै रै पापा रा दोषी ठहरा सा।”

³⁰किबैकि यीशुऐ तिन्हां बै एथा री तैंईंयैं बोलू ती, “कि तेई आँध्रै बुरी आत्मा सा।”

³¹तैबै तेइरी आमा होर तेइरा होछ़ा भाई आऐ, होर बाहरै खड़ै होईया सौ शधाऊ।

³²होर भीड़ यीशु रै आसै-पासै बेठी ती, होर तिन्हां मौंझ़ै एकियै बोलू, “हेर, तेरी आमा होर तेरै भाई, बैहण तौ सैंघै बाहरै मिलना चाहा सी।”

³³यीशुऐ तिन्हां बै ज़वाब धिना कि, “मेरी आमा होर भाई, बैहण कुणा सी?”

³⁴होर ज़ुणा लोका तेइरै आसै-पासै बेठै ती तिन्हां धिरै हेरिया बोलू, “हेरा, मेरी आमा होर भाई, बैहण ऐ सी।

³⁵किबैकि ज़ुण परमेश्वरै री इच्छा पैंधै च़ला सा सौऐ मेरा भाई, बैहण होर आमा सी।”