Read Pahari, Kullu मरकुस 6 Bible Online

मरकुस 6 - Pahari, Kullu bible

मरकुस 6

¹यीशु कफरनहूमा न निकल़िया आपणै घौरा नासरत नगरा बै आऊ, होर तेइरै च़ेले बी तेई पिछ़ै नौठै।

²बशाँ रै ध्याड़ै न यीशु आराधनालय घौरा जाईया लोका बै उपदेश देंदा लागा होर बोहू सारै लोका उपदेश शुणिया हैरान हुऐ होर बोलदै लागै, “ऐईबै ऐ गैला कौखै न आई?” तिन्हैं बोलू, “ऐ कुण ज्ञान सा ज़ो ऐईबै धिना सा? ऐईरी हौथै कैण्ढै चमत्कारा रै कोम प्रगट होआ सी?

³कि ऐ सौहै लकड़ी रै कोमा केरनु आल़ा (मिस्त्री) नी ऑथि ज़ो मरियमा रा बेटा होर याकूब, योसेस, यहूदा होर शमौना रा भाई सा? होर कि तेइरी होछ़ी बैहणिया बी आसरै बिच़ा न ऐई शैहरा न नी रौंहदी?” एसा बजहा न तिन्हैं तेइरै बारै न ठोकर खाई।

⁴यीशु जाँणा ती कि तिन्हैं तेई पैंधै बशाह केरनै न नाँह केरा सी तैबै यीशुऐ तिन्हां बै बोलू, “एक भविष्यवाणी केरनु आल़ै रा आपणै देश, आपणै परिवार होर आपणै घौरा छ़ौड़िआ हर ज़ैगा आदर होआ सा।”

⁵यीशु नासरता न कोई चमत्कारा रै कोम नी केरी सकू, तैबै तेइयै सिर्फ़ थोड़ै ज़ेही बीमार लोका पैंधै हौथ रैखिया ते ठीक केरै।

⁶यीशु बै तिन्हरै कम बशाह होंणै पैंधै हैरानी हुई, सौ होर तेइरै च़ेले तेई इलाकै रै सैभी ग्राँ न जाईया लोका बै उपदेश केरदा फिरू।

⁷एक रोज़ यीशुऐ आपणै बारा च़ेले आपु हागै शाधै होर तिन्हां बै दूई-दूई केरिया लोका बै उपदेश देणै री तैंईंयैं कई नगरा बै भेज़दा लागा; होर तिन्हां बै लोका न बुरी आत्मा बाहरै खोलणै रा हक धिना।

⁸यीशुऐ तिन्हां बै हुक्म केरू, “बौतै री तैंईंयैं शोठे रै अलावा होर किछ़ मता नेंदै, न रोटी, न झ़ोल़ा, न बटुऐ न ढैबुऐ।

⁹पर बूट लात् होर दूई-दूई कुरतै मता लाँदै।”

¹⁰यीशुऐ तिन्हां बै बोलू, “अगर तुसै कोई एक शैहरा बै ज़ा सी होर तौखलै लोका तुसाबै आपणै घौरा बै शाधा सी, होर तौखै तैबै तैंईंयैं रूकिया रौहीत ज़ैबै तैंईंयैं कि तुसै तौखै न विदा नी होलै।

¹¹ज़ुणी ज़ैगा रै लोका तुसाबै ग्रहण नी केरलै होर तुसरी नी शुणलै, तौखै न च़लदी घेरै आपणै बूटै रै धूड़ै बै ठुड़केइत्, ऐण्ढा केरिया तुसै तिन्हाबै चेताऊणी देणी कि परमेश्वरा तिन्हां बै, तुसरै संदेशा बै ग्रहण नी केरनै री तैंईंयैं सज़ा देणी।”

¹²तैबै तिन्हैं ज़ाइआ प्रचार केरू कि आपणै मना बै पाप केरनै न बदला।

¹³होर बोहू सारै लोका न बुरी आत्मा खोली होर बोहू सारै बीमार लोका तिन्हां पैंधै तेल मौल़िया ठीक केरै।

¹⁴होर हेरोदेस राज़ै यीशु रै बारै न किछ़ लोका न शुणू, किबैकि तेइरा नाँ च़ोहू पासै फैलू ती, होर तेइयै बोलू, “यूहन्ना बपतिस्मा देणु आल़ा मूँएंदै न ज़िन्दा हुआ सा, तैबै ता तेईन ऐ चमत्कारा रै कोम होंदै लागै सी।”

¹⁵होर किछ़ लोकै बोलू, “ऐ एलिय्याह भविष्यवाणी केरनु आल़ा सा।” ज़ुणिबै परमेश्वरै भेज़णै रा वायदा केरू ती, होर किछ़ लोकै बोलू, “भविष्यवक्ता मौंझ़ै कोई एकी रै बराबर सा।”

¹⁶हेरोदेस राजै़ ऐ शुणिया बोलू, “ज़ुणी यूहन्नै री मैं मुँडी काटणै द्याई ती सौहै ज़िन्दा हुआ सा।”

¹⁷ज़ैबै यूहन्ना ज़िन्दा ती तैबै हेरोदेस राज़ै आपणै भाई फिलिप्पुसै री लाड़ी हेरोदियासा सैंघै ब्याह केरू ती, पर यूहन्नै तेइबै बोलू ती, “कि आपणै भाई री लाड़ी सैंघै ब्याह केरना ठीक नी ऑथि”, एथा बजहा न हेरोदेस राज़ै री निन्दा केरी ती होर हेरोदेसै यूहन्ना लोका न ढौकणै द्याऊ होर कैदखानै न पाऊ।

¹⁸

¹⁹ऐसा बजहा न हेरोदियास तेईन दुश्मनी रैखा ती होर सौ यूहन्ना बै मरवाणा चाहा ती, पर ऐण्ढा नी हुआ।

²⁰किबैकि हेरोदेस यूहन्ना बै पवित्र होर धर्मी मांहणु मनीआ डौरा ती, होर तेइबै बच़ा ती, होर तेइरी गैला शुणिया घबरा ती, पर खुश होईया शुणा ती।

²¹होर सही बौगतै ज़ैबै हेरोदेसै आपणै जन्म ध्याड़ै न प्रधान, सेनापति होर गलीलै रै बड़ै-बड़ै लोका बै धाम धिनी।

²²होर तेसा हेरोदियासे री शोहरी भीतरै आई, होर नौच़िया हेरोदेस राज़ा होर तेइरै सैंघी खुश केरै, तैबै राजे शौहरी बै बोलू, “तू चाहे किछ़ मुँगली मूँ तौभै देणा।”

²³होर तेसा सैंघै वाईदा केरू, “कि मूँ आपणै औधै राज्य न ज़ो किछ़ तू मुँगली तौभै देणा।”

²⁴तेसै बाहरै जाईया आपणी आमा पूछ़ी, “कि हांऊँ कि मुँगनू?” तेसै बोलू, “यूहन्ना बपतिस्मा देणु आल़ै री मुँडी मुँग।”

²⁵सौ फट राज़ै हागै आँध्रै आई, होर राज़ै बै बोलू, “कि हांऊँ चाहा सा कि तुसै ऐबै यूहन्ना बपतिस्मा देणु आल़ै री मुँडी काटिया एकी थाल़ू न मेरै तैंईंयैं मुँग।”

²⁶तैबै राज़ा बड़ा उदास हुआ, पर आपणी कसमी री बजहा सैंघै होर सैंघै बेठैंदै लोका री बजहा न नाँह नी केरना चाहा ती।

²⁷होर राज़ै फट एक सपाई बै हुक्म देइया भेज़ू, कि यूहन्नै री मुँडी काटिया आंणा।

²⁸तेइयै जेला न जाईया तेइरी मुँडी काटी, होर थाल़ू न पाईआ आंणु होर शोहरी बै धिना, होर शोहरीये आपणी आमा बै धिना।

²⁹ऐ बुरी खबर शुणिया यूहन्नै रै च़ेले आऐ होर तेइरी लाश च़किया कब्रा न रैखी।

³⁰बारा प्रेरित नगरा न प्रचार केरनै न बाद यीशु हागै कठै हुऐ, होर ज़ो किछ़ तिन्हैं केरू ती, होर सिखाऊ ती, सैभ किछ़ यीशु बै दैसू।

³¹तैबै यीशुऐ तिन्हां बै बोलू, “तुसै एक सुनसान ज़ैगा न जाईया थोड़ा राम केरा।” किबैकि बोहू लोका ऐन्दै-ज़ाँदै रौहा ती, होर तिन्हां बै रोटी खाँणै रा भी मौका नी ती मिलदा।

³²तैबै ते किश्ती न बैशिया अलग सुनसान ज़ैगा बै नौठै।

³³होर बोहू लोकै ते ज़ाँदै भाल़ै होर पछ़ियाणै, होर सैभ लोका नगरा न कठै होईया पैदल दौड़दे लागै होर तिन्हां न पैहलै तौखै पूज़ै।

³⁴होर यीशुऐ किश्ती न निकल़िया बोहू बड़ी भीड़ हेरी, होर तिन्हां पैंधै दया केरी, किबैकि तै तिन्हां भेड़ा सांही ती ज़ुणिरा कोई फुआल नी होंदा, होर सौ तिन्हां बै बोहू गैला सिखाँदा लागा।

³⁵ज़ैबै ध्याड़ा ऊड़दा लागा ता तेइरै च़ेले तेई आगै एज़िया बोलदै लागे, “ऐ सुनसान ज़ैगा सा होर ध्याड़ा बी बोहू हुआ सा।”

³⁶तैबै इन्हां बै भेज़ा कि ऐ औरलै-पौरलै ग्राँ न ज़ाइआ आपु बै किछ़ खाँणै बै आंणलै।

³⁷यीशुऐ तिन्हां बै ज़वाब धिना, “कि तुसै इन्हां बै खाँणै बै देआ” तिन्हैं यीशु बै बोलू, “आसै कि दुई शौऊ रोजै़ री ध्याड़ी री रोटी आंणिआ इन्हां बै खियाणी?”

³⁸यीशुऐ तिन्हां बै बोलू, “जाईया हेरा कि तुसा आगै केतरी रोटी सा?” तिन्हैं जाईया पता लाईया बोलू कि, “आसा हागै सिर्फ़ पौंज़ रोटी होर पकाईदी दुई मैच्छ़ी सी।”

³⁹तैबै यीशुऐ च़ेले बै हुक्म धिना, कि सैभी बै होरै गाह पैंधै लाईणी न बशात्।

⁴⁰ते शोऊ-शोऊ होर पज़ाह-पज़ाह केरिया लाईणी न बेठै।

⁴¹होर यीशुऐ ते पौंज़ रोटी होर दुई मैच्छ़ी हौथा न लेई, होर स्वर्गा धिरै बै हेरिया परमेश्वरा बै धन्यवाद धिना, होर रोटीयां चोड़ी-चोड़िया च़ेले बै देंदा लागा, कि तै लोका बै बौंडै, होर ते दुई मैच्छ़ी भी तिन्हां सैभी न बौंडी।

⁴²होर सैभ रोटी खाईया रोज़ै।

⁴³होर तिन्हैं बच़ुदै खाँणै न भौरुइन्दी बारा टोकरियाँ च़की, होर किछ़ मैच्छ़ी न भौरुइन्दी भी च़की

⁴⁴ज़ुणियै रोटी खाई, ते पौंज़ हज़ार मर्द ती।

⁴⁵फिरी यीशुऐ तुरन्त आपणै च़ेले किश्ती पैंधै बशायै, कि सौ तेईन पैहलै समुन्द्रा पारै बैतसैदा शैहरा बै जालै, ज़ाँ तैंईंयैं कि यीशु लोका बै विदा केरलै।

⁴⁶होर तिन्हां बै विदा केरिया यीशु ढौगा पैंधै प्रार्थना केरदा नौठा।

⁴⁷होर ज़ैबै सौंझ़ हुई ता च़ेले री किश्ती समुन्द्रा मौंझ़ै ती, होर सौ केल्हा धौरती पैंधै ती।

⁴⁸ज़ैबै तेइयै हेरू कि सौ किश्ती चलांदै-चलांदै घबराऊऐ सी, किबैकि तेज़ बागर उल्टी धिरै बै च़ला ती, ता यीशु च़ोऊथै पौहरै रै लगभग त्रा बाज़ै समुन्द्रा न निकल़िया तिन्हां हागै आऊ, होर तिन्हां न आगै जाँणा चाहा ती।

⁴⁹पर तिन्हैं तेइबै झ़ीला पैंधै औंढदै हेरिया बुझ़ु, कि ऐ ता कोई भूत सा, होर सैभ लेरा मारदै लागे, होर घबराऊऐ।

⁵⁰पर यीशुऐ फट च़ेले सैंघै बोलू, “धीरज रखा, डौरदै मता, किबैकि हांऊँ सा।”

⁵¹तैबै सौ तिन्हां हागै किश्ती पैंधै आऊ, होर बागर भी रुकी। होर ते सैभ बड़ै हैरान हुऐ,

⁵²किबैकि ते आपणी बुद्धि री कमी री बजहा न तिन्हां रोटी रै बारै न नी ती बूझ़दै।

⁵³होर ते उतरिआ, गन्नेसरता देशा न पूज़ै, होर किश्ती बौढ़ै लाई।

⁵⁴होर ज़ैबै सौ किश्ती न उतरै, ता लोकै ते पछ़ियाणिया।

⁵⁵औरै-पौरै सैभ देशा न दौड़े, होर ज़ेतरै बीमार मांहणु ती तिन्हां सैभी बै माँज़ै पैंधै, ज़ौखै सौ ती तौखै आंणदै रौहे।

⁵⁶होर ज़ौखै-ज़ौखै सौ ग्राँ, नगरा न जा ती, ता लोका तौखै बीमारा बै बजारा न रैखिया तेईन अर्ज़ा केरा ती, कि ते तिन्हां बै आपणै झिकड़ै रा पल्लू छ़ुँगणै दै, होर ज़ेतरै तेई रै झिकड़ै छ़ुँगा ती, सैभ ठीक होआ ती।