Read Pahari, Kullu मरकुस 7 Bible Online

मरकुस 7 - Pahari, Kullu bible

मरकुस 7

¹एक रोज़ तैबै किछ़ फरीसी लोका होर शास्त्री ज़ो कि यरूश्लेम शैहरा न आऐ ती, यीशु हागै कठा हुऐ।

²तिन्हैं हेरू कि तेइरै च़ेले हौथ धोऐ बगैर रोटी खाँदै लागै सी।

³किबैकि आपणै बुज़ुर्ग री रीति रै मुताबक फरीसी लोका होर यहूदी शोभली तैरहा हौथ धोऐ बगैर रोटी नी ती खाँदै।

⁴होर बज़ारा न एज़िया, ज़ैबै तैंईंयैं नैंई नहांदे, तैबै तैंईंयैं नैंई खा ती, होर बोहू सारी ऐण्ढी गैला सी, ज़ो तिन्हां हागै मनणै री तैंईंयैं पजेरी सा, ज़ैण्ढै कटोरै, होर लोटे होर ताँबै रै भाँडै बै धोणा होर माँजणा।

⁵तेई रोज़ इन्हैं फरीसी होर शास्त्रियै यीशु न पुछ़ू, “तेरै च़ेले बुज़ुर्ग री रीति बै किबै नी मँनदै? बल्कि हौथ धोऐ बगैर रोटी खा सी।”

⁶यीशुऐ तिन्हां बै बोलू, “कि यशायाहे तुसा कपटी रै बारै न ठीक भविष्यवाणी केरी, ज़ैण्ढा पवित्र शास्त्रा न लिखू सा, ‘ऐ लोका मुँहा न ता मेरा आदर केरा सी, पर इन्हरै मन मूँ न दूर सी।

⁷होर ऐ मेरी पूजा बेकार केरा सी, किबैकि ऐ लोका बै मांहणुऐ बणाईदी रीति री शिक्षा सिखा सी।’

⁸“तुसै परमेश्वरै रै हुक्मा छ़ौड़िआ मांहणुऐ बणाईदी रीति बै मैनदै लागै सी।”

⁹यीशुऐ तिन्हां बै बोलू, “तुसै परमेश्वरै रै हुक्मा बै चोड़नै न बड़ै माहिर हुऐ सी ताकि तुसै आपणी रीति बै मनलै।

¹⁰उदाहरणै री तैंईंयैं मूसै बोलू, ‘आपणै आमा-बापू रा आदर केरा,’ होर ‘ज़ुण आपणै आमा-बापू बै बुरा बोलला, सौ मौऊत री सज़ा रा हकदार सा।’

¹¹पर तुसै बोला सी कि अगर कोई मांहणु आपणै आमा-बापू बै बोला सा कि, ‘मेरी ज़ुणी च़ीज़ा न तुसाबै फायदा होई सका ती सौ मैं परमेश्वरा बै भेंट केरी सा,’

¹²ता तेई बौगता न बाद तुसै तेइबै आपणै आमा होर बापू री किछ़ भी सेवा नी केरनै देंदै।

¹³ऐण्ढी तैरहै तुसै आपणै बणाऐदै रीति रुआज़ा री बजहा न। परमेश्वरा रै हुक्म बै टाल़ा सी, होर भी ऐण्ढै बोहू कोम केरा सी।”

¹⁴होर यीशुऐ भीड़ै रै लोक आपु हागै शाधै होर तिन्हां बै बोलू, “तुसै सैभ मेरी शुणा, होर समझा।

¹⁵ऐण्ढी कोई च़ीज़ नी ऑथि ज़ो बाहरै न मांहणु भीतरै ज़ाइआ तेइबै छ़ोत लागली, बल्कि ज़ो च़ीज़ा मांहणु रै भीतरै न बाहरै एज़ा सी, तेइन मांहणु बै छ़ोत लागा सा।

¹⁶ज़ुण शुणना चाहा सी ते ध्याना सैंघै शुणा।”

¹⁷ज़ैबै यीशु भीड़ै रै लोका बै छ़ौड़िआ घौरा भीतरै नौठा, ता तेइरै च़ेले यीशु न ऐई उदाहरणा रा मतलब पुछ़ू।

¹⁸तैबै यीशुऐ च़ेले बै बोलू, “कि तुसै किछ़ भी नी समझ़ै?” कि तुसै नी हेरदै कि कोई बी च़ीज़ ज़ो किछ़ मांहणु भीतरै ज़ा सा सौ तेइन मांहणु बै छ़ोत नी लागी सकदी। तैबै यीशुऐ च़ेले बै बोलू, कि तुसै किछ़ बी नी समझ़ै? कि तुसै नी हेरदै कि कोई बी खाँणै री च़ीज़ ज़ो मांहणु भीतरै ज़ा सा तेइन मांहणु बै छ़ोत नी लागी सकदी।

¹⁹किबैकि सौ तेइरै दिला नी बल्कि तेइरै पेटा बै ज़ा सा होर शरीरा न होईया बाहरै निकल़ा सा। ऐ बोलिया यीशुऐ सैभ खाँणै री च़ीज़ा च़ोखी ठहराई।

²⁰यीशुऐ बोलू, “मांहणु रै भीतरा न ज़ो बुरी गैला निकल़ा सा, तेइन मांहणु बै छ़ोत लागा सा।

²¹किबैकि मांहणु रै दिला आँध्रै न बुरै विचार, बुरै कोम, च़ोरी केरना, लोहू केरना,

²²व्यभिचार, लालच, दुष्टता, छल कपट, बुरी नज़र, निन्दा, चुगलखोरी, घमण्ड होर मुर्खता रै विचार बाहरै एज़ा सी।

²³ऐ सारी बुरी गैला भीतरै न एज़ा सी होर मांहणु बै छ़ोत लागा सा।”

²⁴तैबै यीशुऐ होर तेइरै च़ेले तेसा ज़ैगा छ़ौड़िआ सूर होर सैदा शैहरा रै औरलै-पौरलै देशा बै नौठा, तौखै सौ एकी घौरा बै नौठा, सौ नी ती च़ाँहदा कि तेइरै ऐणै रा कौसी बै पता च़लला। पर सौ आपु बै छुपाई नी सकू।

²⁵एक बेटड़ी ज़ुणी री शोहरी बै बुरी आत्मा फ़ैसी ती यीशु हागै आई होर तेइरी ज़ोंघा पैंधै पौई।

²⁶सौ बेटड़ी होरी ज़ाति री ती होर सीरिया ज़िला री फिनीकि नाँ री नगरा न पैदा हुई ती। तेसै आपणी बेटी न बुरी आत्मा खोलणै री तैंईंयैं यीशु हागै अर्ज़ा केरी।

²⁷यीशुऐ तेसा बै बोलू, “पैहलै शोहरू बै रौज़णै दै किबैकि शोहरू री रोटी लेइया कुतै बै देणा ठीक नी ऑथि।”

²⁸तेसै तेइबै ज़वाब धिना, “ऐ ता सच़ सा प्रभु, तैबै भी कुतै शोहरू रै मेजा हेठै रा चूरा खा सी।”

²⁹यीशुऐ तेसा बै बोलू, “ऐसा गैला री बजहा न जा, तेरी शोहरी न बुरी आत्मा निकती ऐबै घौरा बै ज़ा।”

³⁰होर तेसै आपणै घौरा एज़िया हेरू, कि शौहरी माँज़ै पैंधै सा, होर बुरी आत्मा तेसा आँध्रै न नौठी सा।

³¹सौ सूर होर सैदा रै नगरा न बाहरै निकल़िया दिकपुलिस ज़िला न होईया गलीला रै समुन्द्रा हागै पुजू।

³²होर लोकै एक टाऊँणै बै ज़ुण हकला भी ती, यीशु हागै आंणिआ अर्ज़ा केरी, कि आपणै हौथ ऐई पैंधै रख होर ठीक केर।

³³तैबै यीशुऐ सौ भिड़ा न अलग नेऊ, होर तेइरी कोना न गुठी भौरी होर थूक लाईया तेइरी ज़ीभ छ़ुँगी।

³⁴होर स्वर्गा बै हेरिया आह भौरी, होर तेई आपणी भाषा न बोलू, “इफ्फतह!” मतलब “खुल!”

³⁵सौ शुणदा लागा, होर सौ ऐबै ज़ीभा सैंघै साफ बोलदा लागा।

³⁶तैबै यीशुऐ तिन्हां बै हुक्म केरू कि कौसी बै किछ़ हेरीत् दसदै पर तेइयै लोका बै ज़ेतरा रोकणा चाहू तिन्हैं ऐ गैल तेतरी ज़ादा फैलाई।

³⁷लोका हैरान होईया बोलदै लागै, “यीशु ज़ो किछ़ केरा सा, भला केरा सा। औखै तैंईंयैं कि सौ टाऊँणै बै शुणनै री शक्ति देआ सा होर गूंगे बै बोलणै री।”