Read Pahari, Kullu लूका 10 Bible Online

लूका 10 - Pahari, Kullu bible

लूका 10

¹एथा न बाद प्रभु यीशुऐ सत्तर होर च़ेले चुनै होर ज़ुणी-ज़ुणी ज़ैगा बै यीशु आपु ज़ाणू आल़ै ती तिन्हां ज़ैगा बै ते दुई-दुई केरिया आपु न आगै-आगै भेज़ै।

²यीशुऐ तिन्हां बै बोलू, “पौकी दी फसल ता बोहू सा पर काटणू आल़ै मज़दूर थोड़ै सी, ऐबै छेतै रै मालका हागै अर्ज़ा केरा कि सौ आपणी फसल काटणै री तैंईंयैं मज़दूर भेज़ला।”

³ऐबै ज़ाआत् पर याद रखा, कि हांऊँ तुसाबै भेड़ियै रै बिच़ा न भेड़ा सांही भेज़ा सा।

⁴तुसै ज़ांदी घेरै आपु सैंघै न ढैबुऐ, न झोल़ा किछ़ मतेईत् पांदै औखै तैंईंयैं कि बूटै री भी दुई ज़ोड़ी मतेइत् पांदै। बौता न ज़ांदी घेरै कौसी बै नमस्कार हेरेईत केरदै।

⁵ज़ुणी भी घौरा बै तुसै ज़ालै, ता सैभी न पैहलै बोलेइत, ऐई घौरै रै लोका पैंधै परमेश्वरै री शान्ति लोड़ी बैंणी रौही।

⁶तेई घौरा न अगर परमेश्वरै री शान्ति पाणै लायक कोई मांहणु होला ता शान्ति तेई पैंधै ठैहरनी नैंई ता सौ शान्ति तुसा हागै वापस ऐणी।

⁷होर तेही घौरा न रौहित्, ज़ो किछ़ बी तुसाबै देलै तेई खाईत्, किबैकि मज़दूरा बै तेइरी मज़दूरी मिलणी ज़रूरी सा।

⁸ज़ुणी भी शैहरा बै तुसै जालै होर तौखलै लोका तुसरा स्वागत केरलै ता ज़ो किछ़ बी ते तुसा सामनै खाँणै री तैंईंयैं रखलै ता तुसै तेई खाईत्।

⁹तौखै ज़ो बीमार मांहणु होलै तिन्हां बै ठीक केरेइत् होर तिन्हां बै बोलेइत्, परमेश्वरा रा राज्य तुसरै नेड़ आई पुजू सा।

¹⁰पर ज़ुणी शहरै रै लोका तुसाबै ग्रहण नी केरलै ता तेई शहरै रै बज़ारा न ज़ाइआ बोलेइत्,

¹¹आसरी ज़ोंघा न तुसरै शहरा रा ज़ो धूड़ा लागा सा, आसै तेइबै ठुड़का सी पर तैबै बी तुसै ज़ाणी लेआ, कि परमेश्वरा रा राज्य तुसरै नेड़ आई पुजू सा।

¹²हांऊँ तुसाबै बोला सा कि न्याय रै रोज़ा न परमेश्वरा सदोम शैहरा बै ज़ो सज़ा देणी तेथा न भी ज़ादा सज़ा परमेश्वरा ऐई शैहरा रै लोका बै देणी।

¹³“हाय खुराज़ीन नगरा! होर हाय बैतसैदा नगरा! न रौहणु आल़ै लोको तुसाबै भयानक सज़ा मिलणु आई सा किबैकि ज़ो च़मत्कार मैं तुसा बिच़ा न केरै ते चमत्कार अगर मैं सूर होर सैदा नगरा न केरै होंदै ता, ते लोका केबकै टाटै लाइया खौटुइया होर आपु पैंधै छ़ार मौइया आपणै पापा बै छ़ौड़दै।

¹⁴पर न्याय रै रोज़ा न परमेश्वर सूर होर सैदा रै लोका बै ज़ो सज़ा देणी तेथा न भी ज़ादा सज़ा परमेश्वरा तुसाबै देणी।

¹⁵हे कफरनहूम शैहरा न रौहणु आल़ै लोको तुसा कि स्वर्गा ढौई उथड़ै केरिना? तुसा ता नरका ढौई निश्टै केरिना।

¹⁶“ज़ुण भी तुसरी गैला बै शुणा सा, सौ मेरी गैला बै शुणा सा, होर ज़ुण भी तुसाबै तुच्छ जाँणा सा, सौ मुँभै तुच्छ जाँणा सा, होर ज़ुण मुँभै तुच्छ जाँणा सा, सौ मेरै भेज़णु आल़ै बै तुच्छ जाँणा सा।”

¹⁷ते सत्तर च़ेले खुशी मनांदै-मनांदै वापस आऐ होर बोलदै लागै, “ओ प्रभु जी, ज़ैबै आसै तुसरा नाँ लेआ ती ता बुरी आत्मा भी आसरी मनी।”

¹⁸तैबै यीशुऐ तिन्हां बोलू, “मैं ता हारूदा शैतान स्वर्गा न बिजली सांही औल़दा हेरू।

¹⁹शुणा, मैं तुसाबै शैतानै री सारी शक्ति पैंधै हक धिना सा; कि तुसा बिच्च़ु होर कीड़ै आपणी ज़ोंघै लाइया दबाणै होर दुश्मना री सारी शक्ति पैंधै हक धिना सा; कौसी च़ीज़ै लाइया तुसरा किछ़ नुकसान नी होंणा।

²⁰बुरी आत्मा तुसरै हुक्मा बै मना सी एसा गैला न तुसै खुश मता होंदै, तुसै एसा गैला न खुश होआ कि तुसरै नाँ स्वर्गा न लिखुऐ सी।”

²¹तेई बौगतै सौ पवित्र आत्मा न भौरुईया खुश हुऐ होर बोलू, “ओ पिता ज़ी, आसमान होर धौरती रै प्रभु; हांऊँ तुसरा धन्यवाद केरा सा, कि तुसै ऐ गैला समझ़दार होर ज्योतिषी मांहणु न छुपाईया रखी, ज़ो होछे़ शोहरू सी तिन्हरी तैंईंयैं प्रगट केरी। ओ पिता ज़ी, किबैकि तुसाबै ऐ शोभला लागा सा।

²²“मेरै स्वर्गीय पितै, इन्हां सारी गैला रा अधिकार मुँभै धिना सा। एसा गैला बै कोई नी ज़ाणदा कि बापू कुण सा, सिर्फ़ बेटा जाँणा सा होर एसा गैला बै भी कोई नी ज़ाणदा कि बेटा कुण सा सिर्फ़ बापू जाँणा सा। बेटा ज़ुणी पैंधै बापू बै प्रगट केरना च़ाहला केरी सका सा।”

²³ज़ैबै यीशु रै च़ेले तेई सैंघै ती ता यीशुऐ च़ेले धिराबै फिरिया बोलू, “धन्य सी ते औछ़ी, ज़ो इन्हां गैला बै हेरा सी ज़ुणिबै तुसै हेरा सी।

²⁴किबैकि हांऊँ तुसाबै बोला सा, बोहू भविष्यवाणी केरनु आल़ै होर राज़ै ऐ गैला हेरनी चाही, ज़ो तुसै हेरी पर ते हेरी नी सकै, होर शुणनी चाही पर शुणी नी सकै।”

²⁵एक रोज़ यहूदी शास्त्रियै यीशु री जाँच केरनै री तैंईंयैं खड़ा हुआ होर बोलू, “ओ गुरू जी, हमेशा री ज़िन्दगी री तैंईंयैं हांऊँ कि केरनु?”

²⁶यीशुऐ तेई नियम सिखाणु आल़ै बै बोलू, “मूसै रै बिधाना न कि लिखूदा सा? तुसै तेइबै कैण्ढै पौढ़ा सी?”

²⁷तेइयै ज़वाब धिना, “पवित्र शास्त्रा न ऐ लिखू सा तुसै आपणै प्रभु परमेश्वरा बै पूरै मना सैंघै, आपणै सारै प्राण, आपणी सारी शक्ति होर आपणी सारी बुद्धि सैंघै झ़ुरी केरा होर आपणै पड़ेशी बै आपु सांही झ़ुरी केरा।”

²⁸यीशुऐ तेई नियम सिखाणु आल़ै बै बोलू, “तुसै ठीक बोलू, ऐण्ढा केरलै ता तुसा हमेशा ज़िंदै रौहणा।”

²⁹पर तेइयै आपणै-आपु बै धर्मी सोच़िया यीशु न पुछ़ू, “मेरा पड़ेशी कुण सा?”

³⁰यीशुऐ ऐ उदाहरण बोलिया तेइबै ज़वाब धिना, “एक यहूदी मांहणु यरूश्लेम शैहरा न यरीहो शैहरा बै ज़ाँन्दा लागा ती। बौता न डाकूऐ तेई पैंधै हमला केरू। तिन्हैं तेइरै झिकड़ै खोलै होर सौ मारी कुटिया, नाँगा केरिया तेइबै अधमुँऐ छ़ौड़िआ तौखै न भैगै।

³¹तैबै एक यहूदी पुरोहित तेसा बौतै आऊ। ज़ैबै तेइयै सौ डाकुऐ मारूदा मांहणु हेरू ता सौ बौता न दुज़ी धिरिये मुड़िया भैगू।

³²थोड़ी देरी बाद यरूश्लेम शैहरा मन्दिरा न कोम केरनु आल़ा एक लेवी तेसा बौतै आऊ होर सौ बी तेई हेरिया तेसा बौता न आगै बै भैगू।

³³किछ़ देरी बाद सामरी ज़िलै रा एक मांहणु तेसा बौतै आऊ। ज़ैबै तेइयै डाकुऐ मारूदा सौ मांहणु हेरू ता तेइबै तेई पैंधै दया आई।

³⁴तेई सामरी मांहणुऐ तेई मारूदै मांहणु हागै जाईया अँगूरा रा रसा सैंघै तेइरै ज़ख्म धोऐ होर पट्टी बोनी। तैबै तेई सामरिऐ सौ आपणै गधै पैंधै बशाईया एकी सराय बै नेऊ होर तेइरी सेवा केरी।

³⁵दुज़ै रोज़ै तेई सामरियै सराय रै मालका बै दूई च़ाँदी रै सिक्कै धिनै होर बोलू, ऐईरी सेवा-टहल केरेइत् ज़ो किछ़ तेरा होर खर्च़ा होला हांऊँ तौभै वापस एज़िया देनू।

³⁶“तैबै यीशुऐ पुछ़ू, तुसरी समझ़ै रै मुताबक डाकुऐ मारूदै मांहणु सैंघै तिन्हां त्राई न कुणिऐ शोभलै पड़ेशी रा फर्ज़ निभाऊ?”

³⁷तेइयै बोलू, “ज़ुणियै तेई पैंधै दया केरी।” यीशुऐ तेई पँडता बै बोलू, “तुसै बी ज़ाइआ ऐण्ढाऐ केरा।”

³⁸यीशु होर तिन्हरै च़ेले सफर केरदै-केरदै यरूश्लेम शैहरा रै एकी ग्राँ बै नौठै। तेई ग्राँ री मार्था नाँ री एकी बेटड़ियै आपणै घौरा न तिन्हरा स्वागत केरू।

³⁹तेसरी एक बैंहण भी ती ज़ुणिरा नाँ मरियम ती। सौ यीशु री ज़ोंघा हागै बैशिया तिन्हरी शिक्षा शुणदी लागी।

⁴⁰पर मार्था खाँणा बणादी लागी रौही। सौ यीशु हागै एज़िया बोलदी लागी, “ओ प्रभु, मेरी बैंहणिऐ सारा कोम मूँ हागै छ़ौड़ू सा, कि तुसाबै मेरी किछ़ बी फ़िक्र नी ऑथि?” एसा बै मेरी मज़ती केरनै री तैंईंयैं बोलात्।

⁴¹प्रभु यीशुऐ मार्था बै बोलू, “मार्था, ओ मार्था; तू बोहू सारी गैलै री तैंईंयैं फिक्रिया सा होर परेशान होआ सा।

⁴²पर एक गैल सच़ सा मरियमै ता सौ शोभला भाग चुनू सा तेतै री तैंईंयैं तेसा बै ज़ो आर्शीवाद मिलणा तेइबै कोई बी एसा न नी छिनी सकदा।”