Read Pahari, Kullu लूका 11 Bible Online

लूका 11 - Pahari, Kullu bible

लूका 11

¹एक रोज़ यीशु कौसी ज़ैगा न प्रार्थना केरदै लागै ती। ज़ैबै यीशुऐ प्रार्थना केरी ता तिन्हरै च़ेले न एकियै यीशु बै बोलू, “प्रभु जी ज़ैण्ढै यूहन्नै आपणै च़ेले बै प्रार्थना केरनी सिखाई तैण्ढै तुसै बी आसाबै प्रार्थना केरना सिखात्।”

²यीशुऐ च़ेले बै बोलू, तुसै प्रार्थना एसा रीतिऐ केरीत्, “ओ आसरै पिता ज़ी, ज़ो तू स्वर्गा न सा; तेरा नाँ पवित्र मनुआ लोड़ी, एसा धौरती न तेरा राज्य लोड़ी आऊ;

³आसरी ज़रूरती री हर रोज़की रोटी आसाबै देंदै रौहात्।

⁴होर आसरै पापा बै माफ केरा, किबैकि आसै बी आसै आपणै अपराधी बै माफ केरा सी। आसाबै परीक्षा न मता पाँदै।”

⁵तैबै यीशुऐ च़ेले बै बोलू, “मैना कि तुसरा एक सैंघी सा, होर तुसै औधी रातियै तेइरै घौरा ज़ाइआ बोला सी, ‘ओ सैंघी मुँभै त्रा रोटी उधार दै।

⁶किबैकि सफर केरदै-केरदै मेरा एक होर सैंघी मेरै घौरा बै आऊदा सा, होर मूँ हागै तेइबै देणै बै किछ़ बी नी ऑथि।’

⁷होर सौ सैंघी भीतरा न बोलला, मुँभै परेशान मत केरदा, ऐबै दरवाज़ा बन्द सा, होर मेरै शोहरू मूँ सैंघै साथरै न सी। ऐबै हांऊँ उठिया तौभै किछ़ बी नी देई सकदा।

⁸हांऊँ तुसाबै बोला सा, तेइरा सैंघी होंणै रै बजहा तेई उठिया शायद तुसाबै नीती देंणा, पर तुसरै शर्म छ़ौड़िआ मुँगणै री बजहा न तेई ज़रूर उठिया तुसरी ज़रूरतै रै मुताबक तुसाबै देंणा।

⁹हांऊँ तुसाबै बोला सा, मुँगलै ता तुसाबै देणा; तोपलै ता तुसाबै मिलणा, खटखटालै ता, तुसरी तैंईंयैं दुआर खोलिणा।

¹⁰किबैकि परमेश्वरा न ज़ुण मुँगदा रौहा सा तेइबै मिला सा ज़ुण आशा लाइया तोपदा रौहा सा तेइबै मिला सा ज़ुण खटखटाँदा रौहा सा परमेश्वर तेइरी तैंईंयैं दुआर खोलिया सा।

¹¹तुसा मोंझ़ै ऐण्ढा कुण बापू सा, कि ज़ैबै तेइरा बेटा रोटी मुँगला ता पात्थर देला, मैच्छ़ी मुँगला ता कीड़ा देला?

¹²होर आंण्डै मुँगला ता तेइबै बिच्च़ु देला?

¹³ज़ैबै तुसै बुरै होईया बी आपणै शोहरू बै शोभली च़ीज़ा देणा जाँणा सी ता तुसरा स्वर्गा रा बापू आपणै मुँगणु आऐ बै पवित्र आत्मा किबै नी देणी?”

¹⁴एक बार यीशुऐ एकी मांहणु न गूंगा बुरी आत्मा खोली ज़ुणियै सौ गूंगा बणाऊ ती। ज़ैबै तेई मांहणु न सौ गूंगी बुरी आत्मा निकती ता सौ मांहणु ढूणिदा लागा होर कई लोका एसा गैला न बड़ै हैरान हुऐ।

¹⁵पर तिन्हां न किछ़ लोकै बोलू, “ऐ ता बुरी आत्मा रै प्रधान शैतान नाँ री मज़ती सैंघै बुरी आत्मा खोला सा।”

¹⁶होरियै यीशु री जाँच केरनै री तैंईंयैं तेईन एक नशाणी मुँगू ज़ुण एसा गैला बै साबित केरला कि यीशु स्वर्गा न मतलब परमेश्वरा न आऊ सा।

¹⁷पर यीशुऐ तिन्हरै मनै री गैल ज़ाणिया तिन्हां लोका बै बोलू, “ज़ुणी राज्य न फूट पौड़ा सा सौ राज्य नष्ट होआ सा होर ज़ुणी घौरा न फूट पौड़ा सा सौ घौर भी नष्ट होआ सा।”

¹⁸होर ऐण्ढा तैरहा शैतान होर तेइरी बुरी आत्मा एकी दुज़ै लड़दै ता तिन्हां तकड़ै होंणै रै बजायै कमज़ोर होंणा। किबैकि तुसै मेरै बारै न बोला सी कि हांऊँ शैतानै री मज़ती सैंघै दुष्ट आत्मा खोला सा।

¹⁹अगर हांऊँ शैताना री मज़ती सैंघै बुरी आत्मा खोला सा, ता तुसरै च़ेले कौसरी मज़ती सैंघै बुरी आत्मा बै खोला सी? तैबै तिन्हाऐ तुसरा न्याय केरना।

²⁰लेकिन हांऊँ ता परमेश्वरै री सामर्था सैंघै बुरी आत्मा बै खोला सा। एथा लाईया हांऊँ रिहा सा कि परमेश्वरा रा राज्य तुसा हागै पुजू सा।

²¹ज़ैबै तकड़ै मांहणु पुरी रीतीयै हथियार बोनिआ आपणै घौरै रा पौहरा केरा सा ता तेइरी सारी ज़ायज़ाद बच़ी रौहा सा।

²²पर ज़ैबै तेई मांहणु न ज़ादा तकड़ा मांहणु तेई सैंघै लड़ाई केरिया ज़ीता सा तैबै सौ मांहणु तिन्हां हथियारा बै च़टेरी सका सा ज़ुणी पैंधै तेई मांहणु बै बोहू बशाह ती होर तेइरी ज़ायज़ादा बै लूटिया बोंडी सका सा।

²³मूँ सैंघै नी ऑथि सौ मेरा बरोधी सा होर ज़ुण लोका बै कठा केरनै री तैंईंयैं मेरी मज़त नी केरदा सौ तिन्हां बै बिखेरा सा।

²⁴“ज़ैबै बुरी आत्मा मांहणु न निकल़ा सा ता सौ सुनसान ज़ैगा न बशाँ तोपा सा; पर ज़ैबै तेसा बै बशाँ नी मिलदा ता सौ बोला सा, मूँ तेई मांहणु हागै वापस जाँणा ज़ुणी आँध्रै हांऊँ रौहै केरा ती।

²⁵ऐण्ढै बोलिईया सौ बुरी आत्मा वापस एज़ा सा होर तेसा बुरी आत्मा बै सौ मांहणु साफ-सुथरा होर सज़ाऊदा खाली घौरा सांही मिला सा।

²⁶तैबै सौ बुरी आत्मा ज़ाइआ आपु न भी सौत बुरी आत्मा बै आपु सैंघै आंणा सा, होर ते सैभ बुरी आत्मा तेई मांहणु आँध्रै रोंहदी लागा सी। ऐबै तेई मांहणु री दशा पहिलै न भी ज़ादा बुरी होआ सा।”

²⁷ज़ैबै यीशु इन्हां गैला बै केरदा लागा दा ती ता भीड़ा ज़ोंदरै न कौसी बेटड़ियै ज़ोरा सैंघै बोलू, “धन्य सा सौ बेटड़ी ज़ुणियै तुसाबै जन्म धिना होर धाचै सी।”

²⁸तैबै यीशुऐ बोलू, “पर धन्य ता ते सी ज़ुणा परमेश्वरा रा वचन शुणा सी होर तेइरा पालन केरा सी।”

²⁹ज़ैबै बड़ी भीड़ कठी होंदै लागी ती ता यीशु बोलदा लागा, “ऐई ज़ुगै रै तुसै लोका बुरै सी। ते नशाणी तोपा सी; पर योना रै नशाणी बै कोई होर नशाणी तिन्हां बै नेइ देइणा।

³⁰ज़ो योनै री ज़िन्दगी न हुआ, सौ महानगर नीनवै रै लोकै री तैंईंयैं चिन्ह ठहरू, तैण्ढाऐ हांऊँ मांहणु रा बेटा भी एसा जुगा रै लोका री तैंईंयैं ठहरीणा।

³¹दक्षिणै री राणी शेबा बोहू दूरा न सुलैमान राज़ै रा ज्ञान शुणनै री तैंईंयैं आई ती। होर हेरा औखै ज़ो सा, सुलैमाना न बी बड़ा सा। ऐई ज़ुगै रै तुसै लोका मेरी गैला शुणनै रा नाँह केरा सी। न्याय रै रोज़ा न राणी शेबा तौखलै लोका सैंघै खड़ै होईया तुसा पैंधै दोष लाणा।

³²नीनवै शहरै रै लोकै योना रा प्रचार शुणिया आपणै पाप छ़ौड़ै। पर ऐबै ज़ो हांऊँ औखै सा, योना न भी बड़ा सा। तैबै बी तुसै लोकै मेरी गैला शुणिया बी आपणै पाप नी छ़ौड़ै। न्याय रै रोज़ा न नीनवै शहरै रै लोका ऐई जुगै रै तुसा लोका सैंघै खड़ै होईया तुसै दोषी ठराणै।

³³“कोई बी मांहणु दीयै पकाइया गुप्त ज़ैगा न नी रखदा होर न भाँडै लाइया खौटदा। बल्कि तेइबै उथड़ी ज़ैगा पैंधै रखा सी ताकि ज़ुणा भीतरै एलै तिन्हरी तैंईंयैं प्याशा होला।

³⁴तेरी देहा रा दिऊआ तेरी औछ़ी सा, तैबै अगर तेरी औछ़ी साफ सी ता तेरी सारी देह प्याशी होंणी। अगर तेरी औछ़ी बुरी सी ता तेरी सारी देही न निहारा होंणा।

³⁵होशियार रौहा, ज़ो प्याशा तुसा भीतरै सा सौ कोइँछ़ै निहारा नी लोड़ी हुआ।

³⁶अगर तुसरी देही भीतरै प्याशा भौरूआ सा होर देही रै कौसी भी हिस्सै न निहारा नी ऑथि ता तुसरी पूरी देह प्याशै लाईया ऐण्ढी च़मकणी ज़ैण्ढी दीयै लाइया सौ ज़ैगा च़मका सा ज़ौखै सौ पकेइया रखू सा।”

³⁷ज़ैबै यीशुऐ ऐ गैला पूरी बोली, तैबै कौसी फरीसी मांहणुऐ तेई हागै विनती केरी कि यीशु मेरी हागै एज़िया रोटी खाला ता यीशु तेइरै घौरा ज़ाइआ तेई सैंघै रोटी खाँणै री तैंईंयैं बेठा।

³⁸फरीसियै हेरिया हैरान हुआ कि बिधाना रै मुताबक यीशुऐ रोटी खाँणै न पैहलै हौथ नैंई धोऐ।

³⁹तैबै प्रभुऐ तेइबै बोलू, “ओ फरीसी लोको, तुसै कटोरै होर थाल़ी बै बाहरै-बाहरै न ता माँज़ा सी, पर तुसरै भीतरै लालच होर बुराई भौरूइदी सा।”

⁴⁰ओ मूर्ख लोको! परमेश्वरा बै बाहरली च़ीज़ा पैंधै बी चिंता सा ता भीतरली च़ीज़ा पैंधै भी चिंता सा।

⁴¹तुसरै मना आँध्रलै विचारै रै मुताबक गरीबा बै दान दैआ तैबै तुसाबै लागणा कि परमेश्वरा तुसै स्वीकार केरनै।

⁴²“ओ फरीसी लोको, तुसा पैंधै हाय सा! तुसै पदीनै, होर जीरा सब भांति रै शाग पोचा रा, मतलब आपणी होछ़ी-होछ़ी कमाई रा भी दसवाँ हिस्सा देआ सी, पर तुसै न्याय सैंघै व्यवहार केरना होर परमेश्वरै री झ़ुरी रै बारै न बिसरा सी। दसवाँ हिस्सा देणा सही सा पर ज़ो गैला एथा न बी ज़रूरी ऐसा कि तुसै तिन्हां गैला बै बी पूरी केरदै होर तिन्हां बै भी नैंई छ़ौड़दै।

⁴³ओ फरीसीयो, तुसाबै भयानक शिक्षा मिलणी। होर बजारा न नमस्कार, होर आराधनालय न खास-खास ज़ैगा होर धामा न बी खास-खास ज़ैगा तौपा सी।

⁴⁴हाय सा! तुसा पैंधै किबैकि तुसै तिन्हां पौथुइदी कब्रा सांही सी ज़ुणी पैंधै निशाण नी ऑथि। लोका तिन्हां पैंधै च़ला सी पर ते तिन्हां कब्रै रै बारै न नी ज़ाणदै होर छ़ोत लागा सा।”

⁴⁵तैबै एकी शास्त्रियै यीशु बै उतर धिना, “ओ गुरू जी, ऐण्ढी गैला केरिया तुसै आसरी बी निंदा केरदै लागै सी।”

⁴⁶यीशुऐ तिन्हां बै बोलू, “शास्त्री लोको, तुसाबै हाय! किबैकि तुसरै धर्मै री माँग ज़ो मुश्किल सा तैसा बै ऐतरा गरका बोझ़ा पा सी कि ते तेथा बै च़किआ च़ली नी सकदै पर तुसै तिन्हां बोझ़ा बै एक गुठियै लाईया भी नैंई छूँगदै।

⁴⁷तुसाबै भयानक शिक्षा मिलणी। किबैकि तुसै तिन्हां भविष्यवाणी केरनु आल़ै री तैंईंयैं कब्रा बणा सी, ज़ुणा तुसरै बुज़ुर्ग मारैदै ती।

⁴⁸ऐण्ढा केरिया तुसै रिहा सी कि तुसै आपणै बुज़ुर्गा रै कोमा न शामल सी किबैकि तिन्हैं ते मारै होर तुसै तिन्हरी तैंईंयैं कब्रा बणा सी।

⁴⁹परमेश्वरै आपणी बुद्धि सैंघै तुसरी तैंईंयैं ऐ बोलू सा, कि मूँ तिन्हां हागै भविष्यवाणी केरनु आल़ा होर प्रेरित भेज़णै। तिन्हां किछ़ ते मारनै होर कौसी पैंधै ज़ुल्म केरना।

⁵⁰दुनिया री शुरूआती दौरा न लेइया ज़ेतरै बी भविष्यवक्तै रै लोहू हुऐ सी, तिन्हरी तैंईंयैं ऐई जुगै रै लोका न लेखा लेइणा।

⁵¹हाबिलै रै लोहू न लेइया जकर्याह रै खूना तैंईंयैं ज़ेतरै बी लोहू वेदी होर मन्दिरै रै बिच़ा न हुऐ सी, हांऊँ तुसा बै सच़ बोला सा, इन्हां सैभी री तैंईंयैं ऐई ज़ुगै रै लोका न लेखा लेणा सा।

⁵²हाय सा तुसा शास्त्री पैंधै किबैकि तुसै लोका परमेश्वरा बै ज़ाणनै न रोकै। तुसै न ता आपु तेई दुआरै हागै ज़ाँदै न तिन्हां मांहणु बै ज़ाणै देंदै।”

⁵³ज़ैबै यीशुऐ आपणी गैला पूरी केरी, ता शास्त्री होर फरीसी लोके तेईन झ़िकुऐ। तिन्हैं तेई बौगतै यीशु न बोहू सारै सवाल पुछ़ै।

⁵⁴ते यीशु रै मुँहै री गैला, तिन्हरै खिलाफ़ इस्तेमाल केरिया यीशु बै फसाणै री कोशिश केरदै लागैदै ती।