Read Pahari, Kullu लूका 12 Bible Online

लूका 12 - Pahari, Kullu bible

लूका 12

¹तैबै तौखै लोकै री ऐतरी भीड़ कठा हुई, कि लोका एकी होरी पैंधै पौड़दै लागै। यीशुऐ पैहलै आपणै च़ेले धिरै हेरू होर बोलू, “फरीसी लोकै रै कपटरूपी मलेड़े न साबधान रौहा

²किछ़ बी गैला छुपीदी ती, एक रोज सैभी लोका ते गैला ज़ाणनी, होर ज़ो किछ़ छुपीदी सा एक रोज़ सैभ लोका ते पूरै प्याशै न हेरणा।

³ज़ो गैला तुसै निहारै न केरी सी ते प्याशै न दैसिणी, होर ज़ो गैला तुसै बन्द दुआरा पिछ़ै केरी सी, ते उथड़ी ज़ैगा पैंधै खड़ै होईया दैसिणी, ताकि सारै लोका शुणलै।

⁴“झ़ुरी सैंघियो, तिन्हां न मता डौरदै ज़ो देही बै ज़ख्म देआ सी। ते सिर्फ़ तुसरी देही बै नष्ट केरी सका सी होर तेथा न बाद किछ़ नी केरी सकदै।

⁵पर हांऊँ तुसाबै बोला सा परमेश्वरा न डौरा, ज़ौस हागै लोका बै मारनै होर तिन्हां बै नरका न पाणै री शक्ति सा।

⁶कि दुई ढैबुऐ न पौंज़ च़िड़ू नी बिकदै? तैबै बी परमेश्वर तिन्हां न एकी बै बी नी बिसरदा।

⁷तुसरै च़ोह्ढ़ै रै बाल़ बी गिणुऐ दसी। तुसै मता डौरदै, किबैकि तुसै परमेश्वरै री तैंईंयैं तिन्हां च़िड़ू न ज़ादा कीमती सी।

⁸“हांऊँ तुसाबै सच़ बोला सा ज़ुण बोहू मांहणु सामनै मुँभै मैना सा हांऊँ तुसाबै बोला सा परमेश्वरै रै स्वर्गदूता सामनै मुँबी ते मनणै।

⁹पर ज़ो मांहणु रै सामनै ऐसा धौरती पैंधै मेरा नाँह केरा सी परमेश्वरै रै स्वर्गदूता सामनै मुँबी तिन्हरा नाँह केरना।

¹⁰“अगर कोई मांहणु रै बेटै रै खिलाफ़ बोला सा ता तेइरै अपराध माफ केरिनै पर ज़ुणा पवित्र आत्मै री निन्दा केरलै, ता तिन्हरै अपराध कैधी बी माफ नी केरिनै।

¹¹“ज़ैबै तुसाबै लोक आराधनालय न शासक होर अधिकारी सामनै तुसा पैंधै मुकदमा च़लाणै री तैंईंयैं आंणलै ता चिन्ता हेरित् केरदै कि आसा आपणै बच़णै री तैंईंयैं कि ज़वाब देणा।

¹²किबैकि ज़ैबै तुसै तौखै खड़ै होलै ता, तेई बौगतै पवित्र आत्मा तुसाबै दैसणा कि तुसा कि ज़वाब देणा।”

¹³भीड़ै रै बिच़ा न एकी मांहणुऐ यीशु बै बोलू, “ओ गुरू जी, मेरै भाई बै बापू री ज़ायज़ाद मूँ सैंघै बोंडणै री तैंईंयैं बोला।”

¹⁴यीशुऐ बोलू, “ओ मांहणु, कुणिऐ तुसरा न्यायी होर ज़ायज़ाद बौंडणु आल़ा चुनु सा?”

¹⁵यीशुऐ भी लोका बै बोलू, “होशियार रौहा तेसा च़ीज़ा रा लालच मता केरदै ज़ो तुसा हागै नी ऑथि। हर किस्मै रै लोभ लालचा न आपु बै बच़ाइया डाहत्; किबैकि कौसी री ज़िन्दगी तेई हागै बोहू ज़ायज़ाद होंणै सैंघै नी बँणदी।”

¹⁶यीशुऐ तिन्हां बै एक उदाहरण दसू, “एकी सेठ मांहणु री ज़मीना न बड़ी भारी फसल हुई।

¹⁷तैबै सौ सेठ मांहणु विच़ार केरदा लागा कि ऐबै मूँ कि केरना किबैकि मूँ हागै ऐतरी ज़ैगा नी ऑथि कि हांऊँ आपणी फसला बै रखनू।

¹⁸तेई सेठ मांहणुऐ आपणै मना न बोलू, मूँ ऐण्ढा केरना, मूँ आपणी सारी कोठड़ी चोड़नी होर एथा न बड़ी कोठड़ी बनाणी; होर मूँ आपणा सारा नाज़ होर ढबुयै तेथा न रखणै;

¹⁹तैबै मूँ आपणै आपा बै बोलणा, ऐबै मूँ हागै बोहू किछ़ सा ज़ो बोहू बौर्षा ढौई होंणा; ऐबै मूँ चैना सैंघै खाँणा, पीणा, होर मोऊज़-मस्ती केरनी।”

²⁰“पर परमेश्वरै तेई सेठा बै बोलू, ‘ऐई मूर्खा! औज़ राती तौ मौरना, तैबै ज़ो किछ़ तैं कठा केरू सा, सौ कौसरा होंणा?’

²¹“सौ मांहणु बी ऐण्ढा सा ज़ो आपणी तैंईंयैं धन-दौलत कठा केरा सा पर परमेश्वरै री नज़री न सौ सेठ नी ऑथि।”

²²तेथा न बाद यीशुऐ आपणै च़ेले धिराबै फिरिया बोलू “हांऊँ तुसाबै बोला सा आपणै प्राणै री तैंईंयैं फिक्र मता केरदै, कि आसा कि खाँणा, न आपणी देही री तैंईंयैं कि आसा कि लाणा।”

²³किबैकि प्राण रोटी न होर देह झिकड़ै न ज़ादा कीमती सा।

²⁴काऊड़ै पैंधै ध्यान देआत् ते न बाँहदै न काटदै होर न तिन्हां हागै कोई भण्डार घौर होंदा किबैकि परमेश्वर तिन्हां बै धाचा सा। तुसै ता परमेश्वरै री तैंईंयैं इन्हां च़ीड़ू-च़कारू न ज़ादा कीमती सी।

²⁵कि तुसै फिक्र केरिया आपणी उम्रा रा एक पल भी बढ़ाई सका सी?

²⁶ज़ैबै तुसै फिक्र केरिया सैभी न होछ़ा ज़ेही कोम नी केरी सकदै ता होरी गैलै री तैंईंयैं किबै फिक्रिया सी?

²⁷बौणा रै फूला पैंधै ध्यान केरा ते कैण्ढै बढ़ा सी। ते न मेहनत केरदै न आपणी तैंईंयैं झिकड़ै बुणदै। पर हांऊँ तुसाबै बोला सा सुलैमान राज़ै बी आपणै सारै राज़पाठा न तिन्हां न बढ़िया झिकड़ै नी लायै।

²⁸अगर परमेश्वर मैदानै रै गाह बै सज़ाई सका सा ज़ो औज़ ता सा पर काल तेसा औगी न फुकिणा, ओ थोड़ै बशाह केरनु आल़ै लोको तेई परमेश्वरा तुसाबै लाणै रै झिकड़ै किबै नी देणै।

²⁹शक मता केरदै होर ऐसा गैलै री फिक्र मता केरदै कि आसा कि खाँणा होर कि पीणा।

³⁰ज़ुणा परमेश्वरा बै नी ज़ाणदै ते लोका इन्हां च़ीज़ै रै बारै न सोच़दै रौहा सी पर तुसरा परमेश्वर बापू जाँणा सा कि तुसाबै इन्हां च़ीज़ै री ज़रूरत सा।

³¹पर तेई रै राज्य री खोजा न रौहा, ता ऐ सारी च़ीज़ा बी तुसाबै मिलणी।

³²“हे होछ़ै छ़ुण्डा, मत डौरदा; किबैकि परमेश्वर बापू ज़ो स्वर्गा न सा सौ तौभै राज्य देणा चाहा सा।”

³³आपणी ज़ायज़ाद बैच़िया गरीबा बै दान केरात् होर आपणी तैंईंयैं ऐण्ढै बटुऐ बणात् ज़ो कैदी बी पराणैं नी होंदै। स्वर्गा न धन कठा केरा ता तुसरा धन तौखै बैच़ी रौंहणा। तेइबै न ता कोई च़ोर-च़ोरी सकदा होर न ता तेथा बै कीड़ा बगाड़ी सकदा।

³⁴किबैकि ज़ौखै तुसरा धन होला, तौखै तुसरा मन भी लागी रौहणा।

³⁵“परमेश्वरै रै कोमै री तैंईंयैं हमेशा दीयै पकेइया त्यार रौहात्।

³⁶तुसै तिन्हां नोकरा सांही बणा ज़ो ब्याह न ऐणु आल़ै मालका रा इंतज़ार केरदै लागैदै होआ सी, ताकि ज़ैबै सौ एज़िया दरवाज़ा खटखटाला ता ते उठिया दरवाज़ा खोललै।

³⁷ज़ुणी नोकरा बै मालक बिऊदा हेरा सा सौ धन्य सा। हांऊँ तुसाबै सच़ बोला सा तेई मालका त्यार होईया आपु नोकरै रै झिकड़ै लाणै होर ते नोकर रोटी खाँणै री तैंईंयैं बशाँणै।

³⁸सौ मालक औधा राती या दोथी हौंणै न पैहलै कैबै बी एला ता तेई तिन्हां नोकरा न खुश होंणा ज़ो बिऊदै होर त्यार रौहा सी।

³⁹पर तुसै एसा गैला पैंधै ध्यान दैआत् अगर घौरा रा मालक ज़ाणदा कि च़ोर कुणी बौगतै ऐणा ता सौ ज़ागदा रौहँदा होर आपणै घौरा न च़ोरी नी ती होंणै देंणी।

⁴⁰तुसै मेरै वापस ऐणै री तैंईंयैं त्यार हुऐ लोड़ी; किबैकि हांऊँ मांहणु रा बेटा स्वर्गा न तेई बौगतै ऐणै ज़ैबै तुसै मेरै ऐणै री आश बी नी रखदै।”

⁴¹तैबै पतरसै बोलू, “प्रभु जी, ऐ उदाहरण सिर्फ़ आसरी तैंईंयैं सा कि सैभी री तैंईंयैं सा?”

⁴²प्रभुऐ बोलू, “सौ विश्वासयोग्य होर बुद्धिमान भण्डारी कुण सा, ज़ुणिरा मालक तेइबै नोकर चाकरा पैंधै अधिकारी ठहराला कि तिन्हां बै बौगता पैंधै खाँणै री च़ीज़ा दै।

⁴³धन्य सा सौ नोकर ज़ुणिबै तेइरा मालक ऐण्ढा केरदा हेरा सा।

⁴⁴हांऊँ तुसाबै भरोसा दिला सा कि मालका आपणै तिन्हां नोकरा बै आपणी सारी सँपति री निगरानी रा अधिकार देणा।

⁴⁵अगर सौ नोकर सोच़ला कि मेरै मालका बोहू रोज़ा बाद वापस ऐणा, होर दुज़ै नोकरा बै कष्ट देआ सा, खाँणै होर शराब पीणैं न मस्त रौहा सा,

⁴⁶ता तेई नोकरा रा मालक ऐण्ढै बोक्तै एला ज़ुणी बौगता बै सौ नोकर ज़ाणदा बी नी। तैबै तेई मालका सज़ा देइया तिन्हां लोका सैंघै ज़ुणियै बफदारी सैंघै तिन्हरी सेवा नी केरी ते एकी ज़ैगा रैखणै।

⁴⁷“किबैकि तेइयै आपणी ज़िम्मैबारी शोभली ढैंघै नी निभाई होर तेइबै कड़ी सज़ा देणी।

⁴⁸पर तै नोकर ज़ुणा नी ज़ाँणदै कि ते गलत केरदै लागै सी तिन्हां बै थोड़ी सज़ा हौणी। किबैकि ज़ुणिबै बोहू धिना सा तिन्हां न बोहू मुँगिणा होर ज़ुणिबै बोहू ज़िम्मैबारी धिनी सा तिन्हां बै बोहू लेणा पौऊ।

⁴⁹“हांऊँ धौरती पैंधै औगी लाँदा आऊ सा होर च़ाहा सा कि ऐ ऐबरै लागी लोड़ी।

⁵⁰मुँभै ता हाज़ी बोहू दुःख सौहणा पौड़ना। हांऊँ बड़ा परेशान सा, ज़ाँ ढौई मेरा दुःख खत्म नी होला तैबै तक मूँ परेशान रौहणा।

⁵¹तुसै कि समझ़ा सी हांऊँ धौरती पैंधै मेल करांदा आऊ सा? नैंई, हांऊँ तुसाबै बोला सा हांऊँ अलग करांदा आऊ सा।

⁵²किबैकि ऐबै न बाद अगर एकी घौरा न पौंज़ लोका सी तिन्हां बोंडिणा होर त्राई लोका ज़ो मूँ पैंधै बशाह नी केरदै तिन्हां मूँ पैंधै बशाह रखणू आल़ै दुई लोका रा बरोध होर केरना। होर अगर दुई लोका ज़ो मूँ पैंधै बशाह नी केरदै तिन्हां त्राई लोका रा बरोध केरना ज़ो मूँ पैंधै केरा सी।

⁵³बापू बेटै न होर बेटै बापू सैंघै बरोध रखणा, आमा बेटी आपु न बरोध रखणा, शौशू नूशा आपु न एकी होरी सैंघै बरोध रखणा।”

⁵⁴यीशुऐ लोका बै बोलू, ज़ैबै तुसै पश्चिमा धिरै न बादला बै ऐन्दै हेरा सी ता तुसै फट केरदै बोला सी गाश ऐणा होर तैण्ढाऐ होआ सा।

⁵⁵होर ज़ैबै दक्षिणा धिरै न बागर च़ला सा तैबै तुसै बोला सी कि गर्मी होणू आई सा होर तैण्ढाऐ होआ सा।

⁵⁶हे कपटियो, तुसै धौरती होर आसमाना रै रूपा न भेद केरी सका सी, पर ऐई जुगा न परमेश्वर ज़ो केरदा लागा सा तेथै रै बारै न भेद केरना किबै नी ज़ाणदै?

⁵⁷“तुसै आपुऐ किबै नी फैसला केरदै कि सही कि सा?

⁵⁸आपणै मुद्दई सैंघै बौता न ज़ाँदी घेरै समौझता केरा। कोइँछ़ै ऐण्ढा नी लोड़ी हुआ कि न्याय केरनु आल़ा तौभै खिंच़िया नेला होर तौभै सपाई हागै देला होर सपाई तौभै कैदखानै न पालै।

⁵⁹हांऊँ तौभै बोला सा, ज़ाँ ढौई तू पाई-पाई नी चुकाला ताँ ढौई तौ तौखै न नी छ़ुटणा।”