Read Pahari, Kullu लूका 13 Bible Online

लूका 13 - Pahari, Kullu bible

लूका 13

¹तेई बौगतै किछ़ लोका तौखै आऐ, होर ते यीशु सैंघै तिन्हां गलीली ज़िलै रै लोकै रै बारै न चर्चा केरदै लागै ज़ौसरा लोहू राज़पाल पिलातुसै यरूश्लेम शैहरा मन्दिरा न बलि केरदी घेरै केरनै द्याऊ ती।

²इन्हां गैला शुणिया यीशुऐ बोलू, “तुसै कि समझ़ा सी कि ऐ गलीली लोका होरा सैभ गलीली लोका न ज़ादा पापी ती तैबै ते मारै?

³ऐण्ढा बिल्कुल बी नी ऑथि, अगर तुसै आपणै पापा न मन नी बदलदै ता तुसा सैभी बी ऐण्ढै मौरना।

⁴तिन्हां ठारा मांहणु रै बारै न तुसै कि समझ़ा सी ज़ुणी पैंधै शीलोह रा गुम्मट औल़ू होर ते पौथुइया मूँऐ; तुसै कि सोच़ा सी कि ते यरूश्लेम शैहरा न रौहणु आल़ै होरी लोका न ज़ादा पापी ती?

⁵हांऊँ तुसाबै बोला सा, ऐण्ढा नी ऑथि, अगर तुसै आपणै पापा बै नी छ़ौड़लै ता न तुसा बी ऐण्ढै मौरना।”

⁶यीशुऐ तिन्हां बै एक उदाहरण दैसू, “एकी मांहणुऐ आपणै अँगूरै रै बगीच़ै न एक फेगड़ा रा बुटा लाऊ ती: बगीच़ै रा मालक तेई बुटै हागै हर बौर्ष फ़ौल़ तोपदा आऊ, ज़ैबै तेई मालका बै तेई बुटै न कोई फ़ौल़ नी मिलू ता सौ बड़ा नराश हुआ।”

⁷“तैबै तेई मालकै आपणै बगीच़ै रै पौहरैदारा बै बोलू, ‘शुण हांऊँ त्राई साला न ऐई बुटै न फ़ौल़ तोपदा लागा सा, पर एक बी नी मिलदै।’ ऐई बुटै बगीच़ै री ज़ैगा बेकारा न रोकिया रखी सा ऐबै तू ऐई बुटै बै काट ताकि ऐ आगै बै ज़ैगा नी रोकला।”

⁸तेइयै तेइबै जवाब धिना, “ओ मालका,” ऐईबै ऐसा बौर्ष होर रौहणै दै कि हांऊँ एथा रै च़ोहू पासै कोतिया खाद शोटनू।

⁹आगै बै एथा न फ़ौल़ लागलै ता ठीक सा नैंई लागलै ता तुसै ऐई बुटै[3] बै काटी सका सी।

¹⁰यीशु बशाँ रै ध्याड़ै न आराधनालय न उपदेश देंदै लागैदै ती।

¹¹तौखै एक ऐण्ढी बेटड़ी ती ज़ो ठारा बौर्षा न बुरी आत्मा री बजहा न कुबड़ी हुई ती होर सौ कौसी बी ढैण्गै खड़ी नी ती होई सकदी।

¹²यीशुऐ सौ बेटड़ी आपु हागै शाधी, होर तेसा बै बोलू, “ओ बेटड़ियै, हेर तू आपणी सारी बीमारी होर कमज़ोरी न आज़ाद हुई।”

¹³तेथा न बाद यीशुऐ तेसा बेटड़ी पैंधै हौथ रखै होर सौ बेटड़ी एकदम सीधी हुई होर परमेश्वरै री स्तुति केरदी लागी।

¹⁴एसा गैल हेरिया कि यीशुऐ ऐ बेटड़ी बशाँ रै ध्याड़ै न ठीक केरी, आराधनालय रा मुखिया झ़िकुआ होर लोका बै बोलदा लागा, “आसा हागै कोमा केरनै री तैंईंयैं हफ्ते न छ़ौह ध्याड़ै सी तिन्हां ध्याड़ै न एज़िया ठीक होई सका सी पर बशाँ रै ध्याड़ै न नी।”

¹⁵प्रभु यीशुऐ ज़वाब धिना, “ओ कपटियो; तुसै बी ता बशाँ रै ध्याड़ै न कोम केरा सी कि तुसै बशाँ रै ध्याड़ै न आपणै बौल्द या गधै बै छ़ौड़िआ पाणी प्याणै बै नी नेंदै?

¹⁶तैबै ऐ सही नी ऑथि कि ऐ बेटड़ी ज़ो अब्राहमै रै खानदानै री सा होर ठारा बौर्षा न शैतानै रै वशा न ती बशाँ रै ध्याड़ै न ठीक हुई?”

¹⁷एसा गैल शुणिया यीशु रै सारै बरोधी शर्मिंदा हुऐ होर सारै लोकै री भीड़ यीशु रै नोखै कोम हेरिया खुशी मनाँदी लागी।

¹⁸तेथा न बाद यीशुऐ तिन्हां न पुछ़ू, “परमेश्वरा रा राज्य कुणी सांही सा? होर हांऊँ एथै री बराबरी किज़ी सैंघै केरनु?

¹⁹परमेश्वरा रा राज्य तेई राई रै दाणै सांही सा ज़ो कौसी मांहणुऐ नेइया आपणै छेता न बाहू होर सौ बड़ा होईया बूटा बैंणू होर ऐ ऐतरा बड़ा ती कि आसमाना रै च़िड़ूऐ तेथै री शांणी पैंधै कोल्ह बणाऊ।”

²⁰यीशुऐ भी बोलू, “परमेश्वरा रा राज्य कुणी सांही सा?

²¹परमेश्वरा रा राज्य तेई मलेड़े सांही सा ज़ो एकी बेटड़ियै लगभग बीह किलो गेहूँ रै पिठै न मलाऊ होर सारा पिठा मलेड़ुआ।”

²²यीशु आपणै च़ेले सैंघै शहर-शहर होर ग्राँ — ग्राँ न उपदेश देन्दैआ यरूश्लेम शैहरा धिराबै ज़ाँदै लागैदै ती।

²³तैबै एकी मांहणुऐ यीशु न पुछ़ू “ओ गुरू जी, मुक्ति पाणु आल़ै कि थोड़ै सी?”

²⁴यीशुऐ तिन्हां बै बोलू, “सौंगड़ै दुआरै आगै जाणै री कोशिश केरा किबैकि हांऊँ तुसाबै बोला सा बोहू सी ज़ो तेई दुआरै आगै ज़ा सी।

²⁵एक रोज़ परमेश्वर ज़ो घौरकै मालका सांही सा तेई उठिया दुआर बन्द केरना होर तुसा बाहरै खड़ै होईया दुआर खड़काइया अर्ज़ केरनी, ‘ओ प्रभु जी आसरी तैंईंयैं दुआर खोलात्, तैबै तेई भीतरै न ज़वाब देणा तुसै कौखलै सी हांऊँ तुसाबै नी ज़ाणदा?’

²⁶तैबै तुसा बोलणा, आसै तुसा सैंघै खाऊ-पीऊ होर तुसै आसरै बज़ारा न उपदेश धिनै।

²⁷पर तेई तुसाबै बोलणा, हांऊँ तुसाबै नी ज़ाणदा कि तुसै कौखलै सी। ओ बुरै कोम केरनु आल़ै लोको तुसै मूँ हागै न दूर होआ।

²⁸ज़ैबै तुसै अब्राहम, इसहाक, याकूब, होर सैभी भविष्यवाणी केरनु आल़ा बै परमेश्वरै रै राज्य न बेठैंदै हेरलै होर आपु बै तौखै न बाहरै खोलुऐदै हेरलै ता तुसा तौखै रोंणा होर दौंद पिशदै होंणा।

²⁹होर पूर्व होर पश्चिम सारी दुनियै रै लोका हर ज़ैगा न कठा होईया परमेश्वरै रै राज्य री धामा न शामिल होंणा।

³⁰ऐ ज़ाणी लेआ, पर ज़ो ऐबरै आपणै आपा बै बड़ै बणा सी, काल रोज़ ते होछ़ै केरिनै, होर ज़ो होछ़ै सी ते काल रोज़ बड़ै केरिनै।”

³¹तेई बौगतै किछ़ फरीसियै एज़िया यीशु बै बोलू, “तू औखै न ज़ा किबैकि हेरोदेस राज़ा तौभै मारना च़ाहा सा।”

³²यीशुऐ तिन्हां बै बोलू, “जाईया तेई मांहणु बै ज़ो गीदड़ी सांही च़लाक सा बोला, औज़ होर काल मूँ बीमार मांहणु बै ठीक केरदै रौहणा होर तिन्हरै बुरी आत्मा खोलदै रौहणा पर हांऊँ ज़ुणी कोमै री तैंईंयैं आऊ सा त्रीज़ै रोज़ मूँ सौ कोम पूरा केरना।

³³पर इन्हां रोज़ा न मेरा कोम केरदै रौहणा ज़रूरी सा किबैकि ऐण्ढा नैंई होई सकदा कि कोई भविष्यवाणी केरनु आल़ा यरूश्लेम शैहरा न बाहरै मारिला।

³⁴“ओ यरूश्लेम शैहरा रै लोको! ओ यरूश्लेम शैहरा रै लोको! तू ज़ो भविष्यवाणी केरनु आल़ा बै मारा सा होर तिन्हां बै पात्थरै लाइया मारा सा ज़ो तौ हागै भेज़िआ सी। केतरी बार मैं चाहू कि ज़ैण्ढै मुर्गी आपणै बच्च़ै बै आपणै पँखा हेठै सम्भाल़िया रखा सा, हांऊँ बी तेरै शोहरू बै कठा केरनु पर तैं नी चाहू।

³⁵हेरा, ऐबै तुसरा घौर तुसरी तैंईंयैं खाली छ़ौड़िआ सा होर हांऊँ तुसाबै बोला सा, ज़ैबै तैंईंयैं तुसै ऐण्ढा नी बोललै कि धन्य सा सौ ज़ो प्रभु रै अधिकारा न एज़ा सा तैबै तैंईंयैं तुसा हांऊँ कैदी भी नी हेरना।”