Read Pahari, Kullu लूका 18 Bible Online

लूका 18 - Pahari, Kullu bible

लूका 18

¹एक रोज़ यीशुऐ आपणै च़ेले बै एक उदाहरण दैसू, ताकि ते लगातार प्रार्थना केरदै रौहलै होर नराश नी होलै।

²यीशुऐ बोलू, “कौसी शैहरा न एक न्यायी रौहा ती। सौ कौसी मांहणु री परवाह नी ती केरदा होर सौ परमेश्वरा न बी नीती डौरदा।

³तैई शैहरा न एक विधवा बी रौहा ती होर सौ तेई फैसला केरनु आल़ै हागै एज़िया बोला ती, मेरै फैसला केरिया मेरै बैइरी न मुँभै बच़ात्।

⁴बोहू रोज़ा ढौई सौ फैसलै केरनु आल़ा हिलै-भानै केरदा रौहू, पर एक रोज़ तेइयै सोच़ु कि हांऊँ न ता परमेश्वरा न डौरदा होर न लोकै री परवाह केरदा,

⁵पर ऐ विधवा मुँभै घड़ी-घड़ियै एज़िया तंग केरा सा, मूँ ऐबै पता लाइया एसरा फैसला केरना ताकि ऐ आगै बै मुँभै तंग नी केरली।”

⁶तैबै प्रभु यीशुऐ बोलू, “शुणा, ऐ अधर्मी न्यायी कि बोला सा?

⁷आखिरकार तेइयै बी एक सही फैसला लेऊ। ज़ो रात ध्याड़ परमेश्वरा हागै अर्ज़ा केरा सी कि परमेश्वरा तिन्हरा सही फैसला नी केरना? कि परमेश्वरा तिन्हरै बारै न देरी केरनी?

⁸हांऊँ तुसाबै बोला सा, परमेश्वरा तुरन्त तिन्हरा फैसला केरना। तैबै बी हांऊँ मांहणु रा बेटा ज़ैबै एला ता कि तेई धौरती पैंधै बशाह पाणा?”

⁹तैबै यीशुऐ किछ़ लोका बै ऐ उदाहरण दैसू ज़ो आपणै आपा बै बड़ा धर्मी होर दुज़ै बै तुच्छ समझ़ा ती।

¹⁰“एक बार मन्दिरा बै दूई मांहणु प्रार्थना केरदै नौठै। एक च़ुँगी लेणु आल़ा होर दुजा फरीसी लोक ती।

¹¹सौ फरीसी लोक दूर खड़ै होईया ऐण्ढी प्रार्थना केरदा लागा, ‘ओ परमेश्वर, हांऊँ तेरा धन्यवाद केरा सा, कि हांऊँ होरी सांही नी ऑथि, न हांऊँ कौसी बै धोखा देंदा, न हांऊँ व्यभिचारी ऑथि होर न हांऊँ ऐई च़ुँगी लेणू आऐ सांही ऑथि।

¹²हांऊँ हप्तै न दुई बारी ब्रत रखा सा होर आपणी सारी कमाई रा दसवाँ हिस्सा दान देआ सा।’

¹³“पर च़ुँगी लेणु आल़ा सौ मांहणु दूर खड़ै होईया, टुँबड़ी मुँडी केरिया होर स्वर्गा धिरै हेरिया होर छाती पिटी-पिटिया होर दु:खी मनै ऐण्ढी प्रार्थना केरदा लागा, हे परमेश्वर, हांऊँ ता पापी मांहणु सा मूँ पैंधै दया केर।”

¹⁴तैबै यीशुऐ बोलू, “हांऊँ तुसाबै बोला सा, सौ च़ुँगी लेणु आल़ा परमेश्वरै री नज़री न धर्मी ठैहरू, पर सौ यहूदी फरीसी परमेश्वरै री नज़री न पापी ठैहरू, किबैकि सौ आपणै-आपा बै धर्मी समझ़ा ती। किबैकि ज़ुण आपणै-आपा बै बड़ा बुझ़ा सा, तेई होछ़ै गिणिना होर ज़ुण आपु बै होछ़ा बुझ़ा सा तेई परमेश्वरै री नज़री न बड़ै गिणिना।”

¹⁵किछ़ लोका आमा-बापू आपणै शोहरू पाईआ यीशु हागै आऐ ताकि यीशु शोहरू पैंधै हौथ रखिया तिन्हां बै आर्शीवाद देलै पर च़ेले तिन्हां बै झ़िड़का ती।

¹⁶पर यीशुऐ शोहरू आपु हागै शाधै होर बोलू, “शोहरू बै मूँ हागै ऐणै दैआ इन्हां बै मता रोकदै किबैकि परमेश्वरा रा राज्य ऐण्ढै लोका रा सा ज़ो शोहरू सांही सी।

¹⁷यीशुऐ बोलू, हांऊँ तुसाबै सच़ बोला सा, कि ज़ो कोई परमेश्वरा रै राज्य बै शोहरू सांही नैंई अपनाला, ता तुसै स्वर्गा बै नैंई जाई सकदै।”

¹⁸कौसी धर्मी नेतै यीशु न पुछ़ू, “ओ शोभलै गुरू जी, हांऊँ हमेशा री ज़िन्दगी री तैंईंयैं कि केरनु?”

¹⁹यीशुऐ तेइबै बोलू, तू मुँभै शोभला किबै बोला सा, कोई शोभला नैंई ऑथि, ऐकै सा, परमेश्वरा रै अलावा कोई शोभला नी ऑथि।

²⁰यीशुऐ तेइबै भी बोलू, “तू हुक्मा बै ता जाँणा सा, व्यभिच़ार नी केरना, कौसी रा लोहू नी केरना, च़ोरी नी केरनी, कौसी रै खिलाफ़ झ़ूठी गुआही नी देणी, होर आपणै आमा-बापू रा आदर केरना।”

²¹तेइयै बोलू, “इन्हां गैला बै ता ज़ैबै हांऊँ शोहरू ती तैबै न ओरु मैनदा लागा सा।”

²²यीशुऐ बोलू, “हाज़ी बी तौ न एकी गैलै री कमी सा। ज़ो किछ़ तेरा सा तेइबै बैचिया गरीबा न बौंड, होर तौभै स्वर्गा न धन मिलणा, होर एज़िया मूँ पिछ़ै औंढ।”

²³सौ धर्मी नेता इन्हां गैला शुणियाँ दुःखी हुआ किबैकि तेई हागै बड़ी भारी ज़ायज़ाद ती होर सौ बड़ा सेठ ती।

²⁴तेई सेठा बै दु:खी हेरिया प्रभु यीशुऐ बोलू, “ज़ुणी मांहणु हागै बोहू धन-दौलत् सा तेइरा परमेश्वरै रै राज्य बै जाँणा केतरा मुश्किल सा!

²⁵हांऊँ तुसाबै बोला सा, कि ज़ैण्ढा एक ऊँटा रा सिऊँणियै फ़ेटै निकल़णा ऐतरा मुश्किल सा, तेथा न भी ज़ादा एक सेठ मांहणु रै स्वर्ग राज्य बै जाँणा मुश्किल सा।”

²⁶लोकै ज़ैबै ऐ गैला शूणी ता बोलदै लागै, तैबै कुण मुक्ति पाई सका सा?

²⁷यीशुऐ बोलू, “ज़ुणा कोम मांहणु री तैंईंयैं मुश्किल सी ते कोम परमेश्वरै री तैंईंयैं होई सका सा।”

²⁸तैबै यीशु रै च़ेले पतरसै बोलू, “हेरा, प्रभु जी आसै ता आपणा घौर-बार होर सैब किछ़ छ़ौड़िआ तुसा पिछ़ै च़लदै लागैदै सी।”

²⁹यीशुऐ तिन्हां बै बोलू, “तैं सही बोलू पर हांऊँ तुसाबै सच़ बोला सा ऐण्ढा कोई नी ऑथि ज़ुणियै आपणै घौर-बार, लाड़ी, बाल-बच्चै, भाई-बन्धु होर आमा-बापु परमेश्वरै रै राज्य री तैंईंयैं छ़ौड़ै दै होलै।”

³⁰अगर कोई ऐण्ढा केरा सा ता सौ एसा ज़िन्दगी न कई गुणा ज़ादा आशीष पाआ सा होर ऐणु आल़ै बौगता न तिन्हां बै हमेशा री ज़िन्दगी मिलणी।

³¹यीशुऐ आपणै बारा च़ेले आपु सैंघै नेऐ होर तिन्हां बै बोलू, “हेरा आसै यरूश्लेम शैहरा बै च़ौलै सी होर ज़ेतरी गैला मांहणु रै बेटै रै बारै न भविष्यवक्तै लिखी सी ते सैभ तौखै पुरी होंणी।

³²किबैकि सौ होरी ज़ाति रै हौथा न दैईणा। तौखै तिन्हां तेइरा मज़ाक उड़ाणा, तेइरी बेइज़ती केरनी होर तेई पैंधै थूकणा।

³³होर तेइबै कोड़ै मारणै, होर सौ मकाणा, पर तेई त्रीज़ै ध्याड़ी भी ज़िन्दै होंणा।”

³⁴पर यीशु ज़ो गैला तिन्हां बै दैसदै लागै ती तिन्हैं च़ेले ते नी समझ़ी होर ऐ सारी गैला तिन्हां न छुपी रौही।

³⁵ज़ैबै यीशु होर तिन्हरै च़ेले यरीहो नाँ री ज़ैगा न पुजै, ता तौखै एक कांणा भिखारी सड़का रै कनारै बेठा ती होर सौ भीख मुँगदा लागा दा ती।

³⁶लोकै रै हल्लै शुणिया तेई भिखारियै लोका न पुछ़ू, “औखै ऐ कि लागा सा होंदा?”

³⁷तिन्हैं लोकै तेई भिखारी बै दैसू, कि इसै धिरै यीशु नासरी ज़ाँदै लागै सी।

³⁸तैबै सौ भिखारी ज़ोरा सैंघै हक्का पाईआ बोलदा लागा, “ओ यीशु, दाऊदै रै बेटैआ मूँ पैंधै दया केर!”

³⁹ज़ुणा लोका आगै-आगै औंढदै लागै ती ते तेई भिखारी बै झ़िड़का देंदै लागै पर सौ होर बी ज़ोरा सैंघै चिल्लाँदा लागा, “ओ यीशु राज़ा दाऊदै री औलाद मूँ पैंधै दया केर!”

⁴⁰ज़ैबै यीशुऐ तैई भिखारी री हाक्क शूणी ता ते रूकै होर आपणै च़ेले बै बोलू ऐई मांहणु बै मूँ सामनै आंणा, ज़ैबै तिन्हैं च़ेले सौ भिखारी यीशु सामनै नेऊ ता यीशुऐ सौ भिखारी पुछ़ू,

⁴¹तू कि चाहा सा, कि “हांऊँ तेरी तैंईंयैं कि केरनु?” तैबै तैई भिखारीयै बोलू, “ओ प्रभु, हांऊँ हेरना चाहा सा।”

⁴²तैबै यीशुऐ तेई भिखारी बै बोलू, ठीक सा, “तू हेरी सका सा” किबैकि तेरै बशाहै तू ठीक केरू।

⁴³तैबै सौ भिखारी एकदम ठीक हुआ होर सौ हेरदा लागा, होर परमेश्वरै री जयजयकार केरदै-केरदै यीशु पिछ़ै च़लदा लागा। ज़ेतरै बी लोकै ऐ च़मत्कार हेरू ते सब परमेश्वरै री जय-जयकार केरदै लागै।