Read Pahari, Kullu लूका 2 Bible Online

लूका 2 - Pahari, Kullu bible

लूका 2

¹तिन्हां ध्याड़ै न अगस्तुस महाराज़ै रोमी देशै रै सैभी लोकै रै नाँ दर्ज़ केरनै रा हुकुम धिना।

²ऐ पैहला नाँ दर्ज़ तेई बौगतै हुआ, ज़ैबै कविरिनियुस सीरिया देशा रा राज़पाल ती।

³सैभ लोका राज़ै रै हुक्मै रै मुताबक आपणा-आपणा नाँ दर्ज़ केरनै री तैंईंयैं तेई शैहरा बै नौठै ज़ौखै तिन्हरै बुज़ुर्ग रौहा ती।

⁴तैबै यूसुफ भी ज़ो दाऊदै रै खानदाना रा ती, गलील ज़िलै रै नासरत शैहरा न यहूदिया ज़िलै रै बैतलैहम शैहरा बै नाँ दर्ज़ केरदा नौठा।

⁵सौ आपणी लाड़ी मरियमा सैंघै नौठा, ज़ो ऐबै सुज़दी ती, आपणा नाँ लिखान्दा नौठा।

⁶ज़ैबै तै बैतलहम पूज़ै, तिन्हरी तैंईंयैं रौहणु आल़ै घौरा न कोई ज़ैगा नी ती, तैबै तै खुड़ा न रौहै, ज़ैबै मरियमै रै शोहरू ज़ोंणनै रै ध्याड़ै पूरै हुऐ।

⁷होर तेसै आपणै पैहलै बेटै बै जन्म धिना होर सौ फालड़ू न लपेटिया खुरली भीतरै रखू। ज़ुणीन लोका गौरु बै च़ारा देआ ती, किबैकि सराय न तिन्हरी तैंईंयैं ज़ैगा नी ती ऑथि।

⁸तेई देशा न किछ़ फुआल तेसा राती न छेता न आपणै भेड़ै रै छ़ुण्डा री पौहरैदारी केरदै लागै ती।

⁹तैबै एकदम प्रभु रा एक स्वर्गदूत तिन्हां सामनै प्रकट हुआ होर प्रभु री महिमा रा प्याशा तिन्हरै च़ोहू पासै च़मकू होर ते फुआल बोहू डौरै।

¹⁰पर स्वर्गदूतै फुआला बै बोलू, “डौरदै मता; शुणा मूँ तुसाबै बड़ी खुशी रा समाद दैसणा ज़ो सभी लोकै री तैंईंयैं होंणी,

¹¹औज़ दाऊदै रै शैहर बैतलैहम नगरा न तुसरी तैंईंयैं एक मुक्ति देणु आल़ा पैदा हुआ सा होर ऐ मसीह प्रभु सा।

¹²तुसरी तैंईंयैं तुंई री ऐ पछ़ियाण सा कि तुसा एक शोहरू फालड़ू न लपेटुआदा खुरली भीतरै हेरना।”

¹³तैबै एकदम तेई स्वर्गदूता सैंघै बोहू सारै स्वर्गदूतै री मण्डली परमेश्वरै री स्तुति केरदी होर ऐण्ढी बोलदी हेरूई,

¹⁴“स्वर्गा न परमेश्वरै री महिमा होर परमेश्वर बै खुश केरनु आल़ै, हर कोई बै धौरती पैंधै शान्ति लोड़ी हुई।”

¹⁵ज़ैबै स्वर्गदूत तिन्हां हागै न स्वर्गा बै नौठै, ता ते फुआल आपु न ढुणुयै कि “एज़ा आसा बैतलैहम बै ज़ाइआ घैटीदी ऐ गैला हेरनी, ज़ो प्रभुऐ आसाबै दैसीदी सा।”

¹⁶तिन्हैं फुआलै छ़ेकै ज़ाइआ मरियम, यूसुफ होर खुरली न रैखूदा सौ शोहरू हेरू।

¹⁷इन्हां हेरिया फुआलै ज़ो गैला तेई शोहरू रै बारै न स्वर्गदूतै तिन्हां बै दसी ती सौ प्रकट केरी।

¹⁸फुआलै री इन्हां गैला शुणिया सैभी शुणनु आल़ै बै बड़ी हैरानी हुई।

¹⁹पर मरियमै ऐ सारी गैला आपणै मना न रैखी होर तिन्हरै बारै न सोच़दी रौही।

²⁰फुआलै ज़ो किछ़ शुणू होर हेरू तेथै री तैंईंयैं परमेश्वरै री जय-जयकार केरदै वापस नौठै। किबैकि स्वर्गदूतै तिन्हां बै ज़ैण्ढा बोलू ती सैभ किछ़ तैण्ढाऐ हुआ।

²¹ज़ैबै शोहरू औठ रोज़ा रा हुआ, तैबै पुरोहितै तेइरा खतना केरू होर तेइरै आमा-बापूऐ यीशु नाँ रखू। ऐ नाँ स्वर्गदूतै यीशु रै पैदा होंणै न पैहलै दैसू ती।

²²ज़ैबै मूसै रै बिधाना रै मुताबक मरियम होर यूसुफै रै च़ोखै होंणै रै ध्याड़ै पूरै हुऐ ता तिन्हैं यीशु यरूश्लेम शैहरा रै मन्दिरा बै परमेश्वरा सामनै आंणु।

²³ज़ैण्ढा कि मूसै रै बिधाना न लिखू सा, “हरेक ज़ेठा शोहरू प्रभु री तैंईंयैं च़ोखै ठहरिणा।” तिन्हैं तैण्ढाऐ केरू।

²⁴होर मूसै रै बिधाना न लिखू सा: “कबूतरै रै दूई बच्च़ै या तिन्हां सांही दूई च़िड़ू री बलि च़ढ़ा।” एथै रै मुताबक मरियम होर यूसुफ भी बलि च़ढ़ाँदै नौठै।

²⁵यरूश्लेम शैहरा न शमौन नाँ रा एक मांहणु रौहा ती। सौ धर्मी होर बड़ा भक्त ती। तेई आँध्रै पवित्र आत्मा ती। सौ तेई बौगता बै हेरदा लागा ती कि ज़ैबै इस्राइलै रै लोका बै तसल्ली देणु आल़ा मसीहा ऐणा।

²⁶पवित्र आत्मै तेइबै दसू ती कि ज़ैबै तैंईंयैं सौ परमेश्वरै भेज़ै दै मसीह बै नी हेरला तैबै तैंईंयैं तैई नी मौरना।

²⁷पवित्र आत्मै रै बोलणै सैंघै सौ मन्दिरा बै आऊ होर तेई ध्याड़ै न मरियम होर यूसुफै मूसै रै बिधाना न दैसीदी गैला बै पूरा केरनै री तैंईंयैं यीशु मन्दिरा बै आंणु।

²⁸तैबै शमौने यीशु आपणै फाह्ड़ै न च़कू, होर परमेश्वरा रा धन्यवाद केरिया बोलू:

²⁹“हे प्रभु, आपणै वायदै रै मुताबक, आपणै ऐई नोकरा बै शान्ति सैंघै मौरनै दैआ।

³⁰किबैकि मैं मुक्तिदाता हेरू सा, ज़ुणिबै तैं सैभी लोका बै बच़ाणै री तैंईंयैं भेज़ूदा सा।

³¹ज़ो कि तैं सैभी लोकै रै सामनै त्यार केरू सा।

³²तेई एक प्याशा सांही होंणा ज़ो परमेश्वरा री सच़ाई बै होरी ज़ाति सामनै प्रकट केरनी, होर तेई इस्राइली रा आदर केरना, होर तेरै इस्राइलै रै लोकै री तैंईंयैं महिमा री बजहा होंणा।”

³³शमौन यीशू रै बारै न ज़ो किछ़ बोलदा लागा ती तेई शुणिया यीशु रै आमा-बापू हैरान हुऐ।

³⁴शमौनै तिन्हां बै आशीष धिनी, होर तेइरी आमा मरियमा बै बोलू, “हेर परमेश्वरै ऐ निश्चय केरू सा कि ऐई शोहरू री बजहा न बोहू सारै इस्राइली लोका परमेश्वरा न दूर होंणै होर दुज़ै लोका परमेश्वरा धिराबै फिरना होर बोहू सारै लोका तेइरा बरोध केरना।

³⁵तैबै बोहू सारै लोकै रै दिला आँध्रै ज़ो विच़ार सी ते प्रकट होंणै। ज़ो बर्ताव लोका तेई सैंघै केरना तेतै री बजहा न तौभै बड़ा भारी दु:ख होंणा।”

³⁶भविष्यवाणी केरनु आई बेटड़ी हन्ना बी तेई बौगतै मन्दिरा न ती। सौ अशेरै रै गोत्रा न ती। तेसरै बापू रा न फनुएल ती होर सौ बूढ़ी ती। सौ विधवा ती किबैकि ब्याह रै सौत बौर्षा बाद तेसरा लाड़ा मुँआ ती।

³⁷तेसरी उम्र चौरासी बौर्ष ती होर सौ हाज़ी बी विधवा ती। सौ मन्दिरा बै छ़ौड़िआ कोइँछ़ै नी ती ज़ाँदी। सौ रात ध्याड़ व्रत रखिया होर प्रार्थना केरिया मन्दिरा न परमेश्वरै री पूजा केरा ती।

³⁸ज़ौस बौगतै शमौन मरियम होर यूसुफा सैंघै गैला केरदा लागा ती, हन्ना बी तेई बौगतै तौखै पुजी होर परमेश्वरै रा धन्यवाद केरदी लागी। तेसै एज़िया यीशू रै बारै न तिन्हां सैभी बै दैसू ज़ो यरूश्लेम शैहरा रै लोका बै छड़ाणू आल़ै मसीहा रा इंतज़ार केरदै लागै ती।

³⁹होर ज़ैबै ते प्रभु रै बिधाना रै सारै कोम-काज़ निबटाइया यूसुफ होर मरियम गलीली ज़िला न आपणै शैहर नासरता बै वापस नौठै।

⁴⁰शोहरू यीशू परमेश्वरै री दया सैंघै शरीर होर बुद्धि न बढ़दा रौहू किबैकि परमेश्वरा रा अनुग्रह तेई पैंधै ती।

⁴¹यीशू रै आमा-बापू हर साल फसह री जाच मनाँदै यरूश्लेम शैहरा बै ज़ा ती।

⁴²यीशू ज़ैबै बारा बौर्षा रा हुआ ता ते आपणी रीति रै मुताबक फसह री जाच मनाँणै री तैंईंयैं यरूश्लेम शैहरा बै नौठै।

⁴³जाच़ खत्म होईया ज़ैबै यीशु रै आमा-बापू वापस नासरता बै आऐ ता यीशू यरूश्लेम शैहरा न रुकु, पर यीशू रै आमा-बापू एसा गैल नी ति ज़ाणदै।

⁴⁴यीशू रै आमा-बापुयै ऐ सोच़ू कि यीशू होरी मांहणु सैंघै होला। सौंझ़की ढौई ज़ैबै यीशू तिन्हां न नी हेरूआ ता ते आपणै सैंघी होर रिश्तैदारा ज़ोंदरै यीशू बै तोपदै लागै।

⁴⁵ज़ैबै यीशू तिन्हां बै नी मिलू ता ते तेइबै तोपदै-तोपदै यरूश्लेम शैहरा बै वापस आऐ।

⁴⁶तिन्हां बै यीशू त्रा रोज़ा बाद मन्दिरा रै ब्राम्दै न धर्मगुरू री गैला शुणदा होर तिन्हां सैंघै स्वाल केरदा मिलू।

⁴⁷ज़ेतरै बी मांहणुयै यीशू री गैला शुणी ते तेइरी री समझ़दारी होर स्वालै रै ज़वाब देणै रै तरीकै हेरिया हैरान ती कि ऐ ऐतरी समझ़दारी री गैला कौखै न केरा सा।

⁴⁸यीशू रै आमा-बापूऐ ज़ैबै सौ हेरू ता ते हैरान हुऐ। तेइरी आमा मरियमै यीशू बै बोलू, “बेटैआ, तैं आसा सैंघै ऐण्ढा किबै केरू? तेरा बापू ता हांऊँ तौभै तोपदै-तोपदै केतरै परेशान ती।”

⁴⁹तैबै यीशुऐ तिन्हां बै बोलू, “तुसै मुँभै किबै तोपा सी, कि तुसै नी ज़ाणदै कि मुँभै आपणै बापू रै घौरा न होंणा चेहिऐ?”

⁵⁰पर ज़ो गैल यीशुऐ तिन्हां बै बोली सौ गैल तिन्हैं नी समझ़ी।

⁵¹तैबै न बाद यीशू आपणै आमा-बापू सैंघै नासरता बै वापस नौठा होर आपणै आमा-बापू री गैल मनदा रौहू। पर तेइरी आमै ऐ सारी गैला दिला न डाही।

⁵²यीशु बुद्धि होर शरीरा न बढ़दा रौहू। परमेश्वर होर लोका रा अनुग्रह तेई पैंधै ती।