Read Pahari, Kullu लूका 20 Bible Online

लूका 20 - Pahari, Kullu bible

लूका 20

¹यीशु एक रोज़ मन्दिरा न परमेश्वरै रै बारै खुशी रा समाद दसदै लागै ती, ता मुख्यपुरोहिते, शास्त्री होर स्याणै यहूदी तिन्हां हागै आऐ।

²ते यीशु न पुछदै लागै, “तू आसाबै एसा गैल दस, कि तू इन्हां कोम कुणी हका सैंघै केरा सा, ऐ सैभ किछ़ केरनै रा हक तौभै कुणिऐ धिना?”

³यीशुऐ तिन्हां बै ज़वाब धिना, “हांऊँ बी तुसा न एक स्वाल पुछा सा पैहलै मुँभै तैई स्वाला रा ज़वाब दसा,

⁴यूहन्ना बै बपतिस्मा देणै रा हक स्वर्गा न मिलू ती कि मांहणु न?”

⁵यीशु री ऐ गैल शुणिया ते आपु न सोच-विचार केरदै लागै, “अगर आसै बोला सी कि परमेश्वरा न मिलू तै ऐई आसा ऐ बोलणा कि तुसै तेइरा विश्वास किबै नी केरदै?

⁶होर अगर आसै बोलू, कि मांहणु री धिरै न, ता लोका आसा पैंधै पात्थरै बाहणी किबैकि ते यूहन्ना बै सच़िऐ भविष्यवाणी केरनु आल़ा मना ती।”

⁷तैबै तिन्हैं यीशु बै ज़वाब धिना, “आसै नी ज़ाणदै, कि सौ कुणी धिरै न सा।”

⁸यीशुऐ बी तिन्हां बै बोलू, “ज़ाआत् हांऊँ बी तुसाबै नी दसदा कि हांऊँ इन्हां कोमा कुणी हका सैंघै केरा सा।”

⁹तैबै यीशु लोका बै एक कथा दैसदै लागै, “एकी मांहणुऐ अँगूरा रा बगीच़ा लाऊ, होर किसाना बै ठेके पैंधै देइया प्रदेशा बै नौठा।

¹⁰ज़ैबै अँगूरा बै कठा केरनै रा बौगत आऊ ता किसानै आपणा एक नोकर तिन्हां अँगूरा रा हिस्सा मुँगणै री तैंईंयैं भेज़ू पर तिन्हैं सौ नोकर मारी पिटिया खाली हौथ वापस भेज़ू।

¹¹तैबै तेई मांहणुऐ आपणा दुजा नोकर भेज़ू पर तिन्हैं सौ बी मारी पिटिया खाली हौथ वापस भेज़ू।

¹²किछ़ रोज़ा बाद तेई मांहणुऐ आपणा एक होर नोकर भेज़ू कि सौ ज़ाइआ मालका रा हिस्सा आंणला पर तिन्हैं सौ बी घायल केरिया वापस भेज़ू।

¹³तैबै सौ अँगूरा रै बगीच़ै रा मालक सोच़दा लागा कि ऐबै हांऊँ कि केरनु? मूँ ऐबै आपणा प्यारा बेटा भेज़णा, शायद ते ऐईरी आदर केरलै।

¹⁴पर ते ठेकैदार तेई रै बेटै बै हेरिया ऐण्ढा बोलदै लागै, ‘हेरा ऐ ता ऐई बगीच़ै रा वारिस सा; एज़ा आसा ऐ मारना होर आसा वारिस होंणा।’

¹⁵तैबै तिन्हैं सौ मालका रा शोहरू शगीटिया तैई अँगूरा रै बगीच़ै न बाहरै नेऊ होर मकाऊ। यीशुऐ बोलू, तुसै कि सोच़ा सी, ऐबै तेई बगीच़ै रै मालका तिन्हां सैंघै कि केरना?

¹⁶ऐबै तेई मालका ऐणा होर ते ठेकैदार मकाणै होर ठेका छ़ुड़ाइया होरी बै देणा।” तैबै शुणनु आऐ लोकै बोलू, “ओ परमेश्वरा ऐण्ढा कैदी नी लोड़ी हुआ।”

¹⁷यीशुऐ तिन्हां धिराबै हेरिया बोलू, “पवित्र शास्त्रा न ऐ कि लिखू सा: कि ‘ज़ुणी पात्थरा बै राज़मिस्त्रिऐ नक्कमा बोलू ती, सौहै पात्थर ऐबै कुणै रा पात्थर बैणू।’

¹⁸ज़ुण कोई ऐई पात्थरा पैंधै पौड़ला तेई रै टुकड़ै-टुकड़ै होंणै होर ज़ुणी पैंधै ऐ पात्थर औल़ला तेई पिठै सांही पिशिणा।”

¹⁹मुख्यपुरोहिता होर शास्त्रियै ज़ैबै ऐ उदाहरण शुणू ता ते यीशु बै ढौकणा चाहा ती, किबैकि तिन्हां बै पता लागा कि ज़ो गैला प्रभु यीशु केरदै लागै सी ते तिन्हरै बारै न सी पर ते लोका न डौरा ती; होर तेइबै छ़ौड़िआ नौठै।

²⁰तैबै ते यीशु बै ढौकणै रा मौका तोपदै लागै, होर तिन्हैं आपणै जासूस यीशु हागै भेज़ै, ताकि ते यीशु बै तेइरी गैला न फ़सालै होर तेइरी शिकायत रोमी सरकारै रै शासका हागै केरलै ताकि सौ प्रभु यीशु बै ढौकिया जेला न पाला।

²¹तिन्हैं यीशु बै बोलू, “ओ गुरू, आसै जाँणा सी कि तुसै ठीक-ठीक बोला सी, होर सिखा सी होर कौसी री तरफदारी नी केरदै। परमेश्वर रै बारै न सच़ी शिक्षा देआ सा।

²²आसाबै दैसा कि महाराज़ै बै कर देणा सही सा कि नी?”

²³यीशुऐ तिन्हरी च़लाकी ज़ाणी होर तिन्हां न एक च़ाँदी रा एक सिक्का मुँगू,

²⁴होर पूछू “एथा पैंधै कौसरा नाँ होर फोटू सा?” तिन्हें बोलू, “महाराज़ै रा।”

²⁵तेइयै तिन्हां बै बोलू, “ज़ो महाराज़ै रा सा, सौ महाराज़ै बै देआ होर ज़ो परमेश्वरा रा सा, सौ परमेश्वरा बै दैआत्।”

²⁶ते लोका रै सामनै तेसा गैला बै ढौकी नी सकै, बल्कि ते तेइरै जवाब शुणिया हैरान हुऐ होर चुप रौहै।

²⁷तैबै किछ़ सदूकी ज़ो बोला सी, कि मूँऐंदै रा ज़िन्दै होंणा नी ऑथि, तौखै एज़िया पुछदै लागै।

²⁸“ओ गुरू जी, मूसै आसाबै ऐ विधि दसी, सा कि अगर कोई मांहणु मौरला होर तेइरी लाड़ी ज़िंदी सा पर तेइरी कोई लुआद नी होली ता तेइरा भाई तेसा विधवा सैंघै ब्याह केरिया तेसा सैंघै लुआद पैदा केरला होर पहला बच्च़ा तेइरै भाई रा वारिस होंणा।

²⁹ऐण्ढै सौत भाई ती। सैभी न बैड़ै भाई रा ब्याह हुआ होर बगैर लुआदी रै मुँआ।

³⁰तैबै तेइरै होछ़ै भाइयै तेसा विधवा सैंघै ब्याह केरू होर सौ भी बगैर लुआदी रै मुँआ।

³¹एकी न बाद एक, एकी न बाद एक ऐण्ढै तैरहै तिन्हैं सौत भाइयै तेसा विधवा सैंघै ब्याह केरू पर ते सैभै बगैर लुआदी रै मूँऐ।

³²किछ़ बौगता बाद सौ विधवा भी मूँई।

³³ऐबै आसाबै एसा गैल दसा कि ज़ैबै ते सारै भी ज़िन्दै होलै ता सौ कौसरी लाड़ी होली? ज़िन्दै होंणै पैंधै सौ तिन्हां मौंझ़ै आसाबै दैसा कि सौ बेटड़ी कौसरी लाड़ी होंणी, किबैकि तिन्हैं सौतै भाइयै सौ आपणी लाड़ी रखी ती?”

³⁴तैबै यीशुऐ तिन्हां बै बोलू, “ब्याह शादी ता ऐसा धौरती पैंधलै मांहणु री तैंईंयैं सा।

³⁵पर तेई बौगतै ज़ो मूँऐंदै न ज़िन्दै होलै तिन्हां न कोई शादी-ब्याह नी होंणा होर न कोई तौखै ब्याह न देईणा।

³⁶न तिन्हां मौरना किबैकि तिन्हां स्वर्गदूता सांही होंणा। दोबारा ज़िन्दै होंणै सैंघै ते परमेश्वरै रै बेटै सी।

³⁷मूँऐंदै रै ज़िन्दै होंणै री गैला मूसै रै बिधाना न लिखी सा तेइयै बोलू, ‘प्रभु अब्राहमा रा, इसहाकै रा होर याकूबा रा परमेश्वर सा’

³⁸परमेश्वर मूँऐंदै रा नी पर ज़िन्दै मांहणु रा परमेश्वर सा। परमेश्वरा सामनै सैभ मांहणु ज़िन्दै सी।”

³⁹किछ़ यहूदी शास्त्रियै बोलू, “गुरू जी तुसै सही बोलू।”

⁴⁰तैथा न बाद कोई बी मांहणुऐ प्रभु यीशु न स्वाल पुछ़णै री हिम्मत नी केरी।

⁴¹यीशुऐ तिन्हां न पुछ़ू, “मसीह बै दाऊदा रा बेटा किबै बोला सी?

⁴²किबैकि भजन संहिता री कताबा न दाऊदै आपु बोलू, ‘प्रभुऐ मेरै प्रभु बै बोलू, मेरी दैहिणी धिरै बेश,

⁴³ज़ैबै तेंई हांऊँ तेरै दुश्मना बै तेरी ज़ौघा हेठै नी केरनु।’

⁴⁴अगर दाऊद मसीहा बै प्रभु बोला सा; ता मसीह दाऊदै री औलाद कैण्ढै होई सका सा?”

⁴⁵ज़ैबै लोका इन्हां गैला बै शुणदै लागै ती तैबै यीशुऐ आपणै च़ेले बै बोलू,

⁴⁶“इन्हां शास्त्री लौका न साबधान रौहा, ज़ुण लोमे झिकड़ै लाईया घुमा सी। होर बजारा न नमस्कार, होर आराधनालय न खास-खास ज़ैगा होर धामा न भी खास-खास ज़ैगा तौपा सी।

⁴⁷ते बड़ी बैशर्मी सैंघै विधवै रै घौरा बै लूटा सी होर रिहाणै री तैंईंयैं बड़ी लोमी-लोमी प्रार्थना केरा सी। एसा बजहा न तिन्हां बै ज़ादा सज़ा मिलणी।”