Read Pahari, Kullu लूका 21 Bible Online

लूका 21 - Pahari, Kullu bible

लूका 21

¹फिरी तेइयै औछ़ी फेरिया सेठ मांहणु बै आपणा-आपणा दान भण्डारा न भौरदै हेरै।

²तेई बौगतै तौखै एक कंगाल विधवा आई होर तेसै ताँबै रै दूई सिक्कै दान धिनै।

³तैबै यीशुऐ बोलू, “हांऊँ तुसाबै सच़ बोला सा कि एसा गरीब विधवा रा होछ़ा ज़ेहि दान सेठा रै बड़ै दाना न भी ज़ादा कीमती सा।

⁴किबैकि इन्हैं सैभियै आपणी बोहू कमाई न दान धिना पर एसै विधवै आपणी गरीबी न भी आपणी सारी कमाई धिनी।”

⁵ज़ैबै किछ़ लोका मन्दिरै रै बारै न गैला केरदै लागैदै ती कि ऐ मन्दिर कैण्ढै शोभलै-शोभलै पात्थर होर दान केरूईदी चिज़ा सैंघै सज़ाऊदा सा तैबै यीशुऐ बोलू,

⁶“ते ध्याड़ै ऐणु आल़ै सी, ज़ैबै सैभ च़ीज़ा खत्म होंणी होर ऐई मन्दिरा रा एक बी पात्थर दुज़ै पात्थरा पैंधै नी रौहणा।”

⁷च़ेले यीशु न पुछ़ू, “ओ प्रभु जी, इन्हां सैभी गैला कैबै होंणा? होर तेई बौगतै री कि नशाणी होंणी?”

⁸यीशुऐ तिन्हां बै बोलू, “होशियार रौहात् किबैकि बोहू लोका मेरै नाँ न ऐणा, होर बोलणा कि हांऊँ मसीह सा, सैंघै ऐ बी बोलणा कि बौगत आऊ सा। पर तुसै तिन्हरी गैला पैंधै बशाह हेरीत् केरदै।

⁹तुसै लड़ाई-झ़गड़ै री अफवाहै रै बारै न शुणलै ता तुसै घबराँदै हेरीत् किबैकि इन्हां गैला रा होंणा ज़रूरी सा पर तेई बौगतै एकदम दुनिया खत्म नी होंणी।”

¹⁰यीशुऐ बोलू, “देशा-देशा न होर ज़ाति-ज़ाति न लड़ाई होंणी।

¹¹ज़ैगा-ज़ैगा ज़ौज़री होंणी, होर रूड़ पौड़नी होर कई किस्मै री बीमारी फैल़णी, स्वर्गा न डराणु आऐ चिन्ह चमत्कार होंणै।

¹²पर इन्हां सैभी गैला न पैहलै तिन्हां मेरै नाँ री बजहा सैंघै तुसै ढौकणै होर तुसा पैंधै ज़ुल्म केरनै होर आराधनालय रै हवालै केरनै, तुसै ढौकिया जेला न पांणै होर राज्यपाला होर राज़ै सामनै खड़ै केरनै।

¹³तैबै तुसाबै मेरै बारै न गुआही देणै रा मौका मिलणा।

¹⁴ज़ो दोष ते तुसा पैंधै लालै तिन्हां दोषा न बच़णै री तैंईंयैं तुसै पैहलै न फ़िक्र हेरित् केरदै।

¹⁵किबैकि मूँ तुसाबै ऐण्ढी बुद्धि होर समझ़ देणी कि कोई बी बरोधी तुसरी गैला बै नी काटी सकदा।

¹⁶तुसरै आमा-बापू, भाई-बैहण, रिश्तैदार होर तुसरै सैंघी तुसै ढौकणै द्याणै होर तुसा मोंझ़ै न किछ़ मकाणै।

¹⁷मेरी बजहा न बोहू लोका तुसा सैंघै बैर रखणा।

¹⁸पर ते तुसरा किछ़ नी बिगाड़ी सकदै।

¹⁹इन्हां सैभी गैला बै तुसै धीरजा सैंघै सौहिया तुसै आपणै प्राणा बै बच़ाई सका सी।”

²⁰“ज़ैबै तुसै यरूश्लेम शैहरा बै फोऊज़ियै लाइया घिरूदा हेरलै ता समझ़ेईत कि ऐईरा नाश नेड़ सा।

²¹अगर तुसै तेई बौगता यहूदिया प्रदेशा न रौहंदै लागै सी, ता ढौगा बै भैगा, होर ज़ो तुसै यरूश्लेम शैहरा न सी तौखै न भैगेईत् होर ज़ो तुसै ग्राँ न बाहरै सी ग्राँ आँध्रै हेरीत् ऐन्दै।

²²किबैकि ते बदला लेणै रै ऐण्ढै ध्याड़ै सी, ज़ुणी बौगतै धर्म शास्त्रा न लिखुईदी सारी गैला पूरी होंणी।

²³तिन्हां ध्याड़ै न ज़ो बेटड़ी सुज़दी होली होर ज़ुणिरै शोहरू दूधा पीणू आल़ै होलै, तिन्हां पैंधै बोहू दु:ख ऐणु आल़ा सा किबैकि ते ढौगा बै नी भैगी सकदी। एसा धौरती पैंधै होर यहूदी लोका पैंधै बड़ी मुसीबत ऐणु आई सा होर इन्हां लोका पैंधै परमेश्वरै री झ़िक होंणी।

²⁴ते बड़ी बैरहमी सैंघै तलवारियै लाइया मारिनै होर यरूश्लेम शैहरा न दुज़ै कई देशै रै लोका ज़ीतणा होर सौ ताँ तैंईंयैं गुलामी न रखणा ज़ाँ तैंईंयैं होरी ज़ाति रा बौगत पूरा नी होला।

²⁵“सर्गा न नोखै-नोखै चिन्ह चमत्कार होंणै। ज़ोथ, सूरज़ होर चाँद होर तारै न कई किस्मै रै चिन्ह चमत्कार हेरिनै होर धौरती पैंधलै सैभी देशै रै लोका पैंधै मुसीबता ऐणी होर तिन्हां समुद्रै री छ़ेड़ी न डौरना।

²⁶दुनिया न ऐणु आई सैभी विपता हेरिया लोका आपणी हिम्मत हारनी किबैकि तेई बौगतै आसमानै री सारी शक्ति हिलाइणी।

²⁷तैबै लोका न मांहणु रा बेटा बड़ी शक्ति होर महिमा सैंघै बादाला न ऐन्दै हेरिना।

²⁸ज़ैबै ऐ सारी गैला होंदी लागली ता तुसै सीधै खड़ै होईया सर्गा धिराबै हेरीत्, किबैकि तेई बौगतै तुसरा छुटकारा नेड़ सा।”

²⁹यीशुऐ तिन्हां बै एक उदाहरण दसू, “फेगड़ा रै बूटै बै होर दुज़ै इन्हां बुटै बै हेरा।

³⁰ज़ैबै तिन्हरै नोंऊँऐं पौचा निकल़ा सी तैबै ता तुसै जाँणा सी कि गर्मी रै ध्याड़ै नेड़ सी।

³¹ऐण्ढी तैरहा ज़ैबै तुसै इन्हां गैला बै होंदै हेरलै ता तुसै बुझीत् कि परमेश्वरा रा राज्य नेड़ सा।

³²हांऊँ तुसाबै सच़ बोला सा ज़ैबै तैंईंयैं ऐ सारी गैला पुरी नी होली तैबै तैंईंयैं ऐई ज़ुगा रा अंत नी होंणा।

³³आसमान होर धौरती नाश होंणै, पर मेरी गैला कैधी भी नाश नी होंणी।

³⁴“आपणा ध्यान रखा, तुसरा ध्यान दुनियै रै खाँणै पिणै होर ज़िन्दगी री मौज़ मस्ति न नी लोड़ी भटकु, होर ज़िन्दगी री चिन्ता न पौड़िया सुस्त नैंई लोड़ी हुऐ कि सौ ध्याड़ा तुसा पैंधै च़ानक फाँसी रै फन्दै सांही ऐला।

³⁵ज़ेतरै भी एसा धौरती पैंधै सी तिन्हां पैंधै तेई ध्याड़ै ज़रूरी ऐणा।

³⁶हमेशा ज़ागदै होर प्रार्थना केरदै रौहा। अगर होई सका सा ता आपणै आपु बै ऐतरा मज़बूत बणात् कि तुसै इन्हां डराणु आई गैला न बची सकलै होर मांहणु रै बेटै सामनै खड़ै होंणै लायक बणी सकलै।”

³⁷यीशु ध्याड़ी ता मन्दिरा न उपदेश देआ ती पर सौंझ़ा जैतून ढौगा पैंधै प्रार्थना केरदै जा ती।

³⁸हर रोज दोथी-दोथी बोहू सारै लोका प्रभु यीशु री गैला शुणनै री तैंईंयैं मन्दिरा न कठा होआ ती।