Read Pahari, Kullu लूका 22 Bible Online

लूका 22 - Pahari, Kullu bible

लूका 22

¹यहूदी रा अखमीरी रोटी रा त्यौहार ज़ुणिबै फसह बोला सी सौ नेड़ ती।

²तेई बौगतै मुख्यपुरोहिता होर शास्त्रियै यीशु बै ढौकणै होर मारनै री सलाह केरदै लागैदै ती पर ते लोका न डौरा ती।

³तैबै यहूदा इस्करियोती ज़ो कि यीशु रा एक च़ेला ती तेई आँध्रै न शैतानी विच़ार ज़ागै।

⁴यहूदा इस्करियोती मुख्यपुरोहिते होर पौहरैदारै रै प्रधाना सैंघै मिलु होर बोलू हांऊँ तुसाबै दसा कि तुसै यीशु बै कैण्ढै ढौकी सका सी।

⁵यहूदै री मज़ती पाईआ ते बोहू खुश हुऐ होर तेइबै ईनाम देणै रा वायदा केरू।

⁶यहूदै तिन्हरी गैल मैनी होर सौ मौकै तोपदा लागा कि कैबै भीड़ै रै लोका कम होलै होर प्रभु यीशु बै ढौकणै द्याला।

⁷तैबै अखमीरी रोटी री साज़ै रा ध्याड़ा आऊ, होर तेई ध्याड़ै न एकी छ़ेलू री बलि जरूरी देणी पौड़ा ती।

⁸यीशुऐ पतरस होर यूहन्ना बै बोलू, “आगै जाईया आसरी तैंईंयैं फसह री रोटी खाँणै री तैंईंयैं त्यारी केरा कि आसै सैंघै बैशिया भोज खालै।”

⁹च़ेले यीशु न पुछ़ू, “तुसै आसाबै तेसा ज़ैगा दैसात् ज़ौखै आसै भोज त्यार केरी सका सी।”

¹⁰यीशुऐ च़ेले बै बोलू, “हेरा, ज़ैबै तुसै यरूश्लेम शैहरा न पुजलै, ता तौखै तुसाबै पाणी रै भाण्डै लेइया एक मांहणु मिलणा। ज़ुणी घौरा बै सौ ज़ाला तुसै बी तेई पिछ़ै तेही घौरा बै ज़ाईत्,

¹¹होर तौखै तेई घौरा रै मालका न पुछीत्, ‘गुरू जी ऐ तुसाबै बोलू सा; कि पाहुँणै रा कमरा कुण सा, ज़ौखै हांऊँ आपणै च़ेले सैंघै फसह रै साज़ै रा भोज़ केरनु?’

¹²तैबै तेई तुसाबै सज़ा-सज़ाऊदा होर त्यार केरूदा कमरा रिहाणा। तौखै तुसै फसह रा भोज त्यार केरेइत्।”

¹³तैबै च़ेले तेई शैहरा धिराबै नौठै, होर ज़ैण्ढा प्रभु यीशुऐ बोलू ती, तिन्हां बै सैभ किछ़ तैण्ढा मिलू, तैबै तिन्हैं फसह रा भोज त्यार केरू।

¹⁴“ज़ैबै ठीक बौगत आऊ, तैबै प्रभु यीशु आपणै बारा प्रेरिता सैंघै एकी मेज़ा पैंधै फसह रा भोज केरदै बेठै।

¹⁵होर यीशुऐ तिन्हां बै बोलू, कि मेरी बड़ी इच्छा ती कि दुःख सौहणै होर मौरनै न पैहलै हांऊँ तुसा सैंघै फसह रा ऐ भोज केरनु।

¹⁶किबैकि हांऊँ तुसाबै बोला सा कि ज़ाँ तैंईंयैं परमेश्वरै रै राज्य न फसह रै त्यौहारा रा मकसद पूरा नी होला, ताँ तैंईंयैं मूँ ऐ भोज कैधी नी खाँणा।”

¹⁷तैबै यीशुऐ अँगूरै रै रस्सा रा कटोरा च़कू होर परमेश्वरा बै धन्यवाद देइया च़ेले बै धिना होर बोलू, “ऐई कटोरै बै आपु न बोंडा।

¹⁸हांऊँ तुसाबै सच़ बोला सा, ज़ाँ तैंईंयैं परमेश्वरा रा राज्य नी ऐला ताँ तैंईंयैं मूँ कैधी बी ऐ अँगूरै रा रस्स नी पीणा।”

¹⁹तैबै यीशुऐ रोटी लेई होर परमेश्वरा रा धन्यवाद देइया रोटी चोड़ी होर च़ेले बै देंदी घेरै बोलू, “ऐ मेरी देह सा ज़ो तुसरी तैंईंयैं देणी लाई सा, मेरी यादी न ऐण्ढा केरदै रोईत्।”

²⁰तैबै यीशुऐ अँगूरै रै रसा रा कटोरा हौथा न च़कू होर बोलू, “ऐ कटोरा मेरै लोहू बहाणै रै नऊँई वायदा री निशाणी सा, ज़ुण तुसरी तैंईंयैं बहाईणा।

²¹पर हेरा, मुँभै धोखा दैणु आल़ा बी मूँ सैंघै फसह रा भोज केरदा लागा सा।

²²मांहणु रै बेटै रा मौरना ता परमेश्वरै री योजना न पक्का सा, पर हाय सा तेई मांहणु पैंधै ज़ौसरी बजहा न मांहणु रै बेटै ढौकिणा।”

²³एसा गैला बै शुणिया च़ेले आपु न स्वाल पुछदै लागै, “आसा मौंझ़ै ऐण्ढा कुण होई सका सा?”

²⁴च़ेले आपु न ऐसा गैला पिछ़ै बैहस केरदै लागै कि आसा मौंझ़ै बड़ा कुण सा।

²⁵पर यीशुऐ च़ेले बै बोलू, “एसा दुनियै रै राज़ा होर बड़ै-बड़ै यहूदी नेता लोका पैंधै आपणा अधिकार रखा सी होर बोला सी कि आसै तुसरै सैंघी होर तुसाबै बचाणु आल़ै सी।

²⁶पर तुसै ऐण्ढै नी ऑथि तुसा मौंझ़ै ज़ुण सैभी न बड़ा सा सौ सैभी न होछ़ा बणला होर ज़ुण प्रधान सा सौ सेवका सांही बणला।

²⁷किबैकि बड़ा कुण सा, सौ ज़ुण खाँदा लागा सा या ज़ुण बौण्डदा लागादा सा? बड़ा सौ सा ज़ुण खाँदा लागादा सा पर हांऊँ तुसा मौंझ़ै सेवका सांही सा।

²⁸“तुसै मेरी हर दुःख तकलीपा न मेरा साथ धिना।

²⁹हांऊँ बी तुसाबै एक राज्य देआ सा ज़ैण्ढा कि मेरै बापू परमेश्वरै मुँभै धिना सा।

³⁰कि तुसै मूँ सैंघै तेई राज्य न मेरी मेज़ा पैंधै खा-पिया होर तुसा सिंहासना पैंधै बैशिया इस्राइली रै बारा गोत्रा रै लोका रा न्याय केरना।”

³¹यीशुऐ शमौन-पतरसा बै बोलू, “शमौन, ओ शमौन, हेर शैतानै तुसा सैभी बै गेहूँ सांही आँगी केरनै री ती तैंईंयैं परमेश्वरा न हुक्म पाऊ सा।

³²यीशुऐ बोलू, ओ पतरस, मैं तेरी तैंईंयैं प्रार्थना केरी सा कि तेरा बशाह खत्म नी लोड़ी हुआ होर ज़ैबै तु वापस एला ता आपणै सैंघी भाई बै मज़बूत केरी।”

³³पर पतरसै बोलू, “ओ प्रभु जी, हांऊँ तुसा सैंघै ज़ेल ज़ाणै होर तुसा सैंघै मौरनै री तैंईंयैं त्यार सा।”

³⁴यीशुऐ तेइबै बोलू, “पतरस, हांऊँ तौभै बोला सा, कि ज़ैबै तैंईंयैं तू त्रा बार मेरा नाँह नी केरला कि हांऊँ तौभै नी ज़ाणदा, तैबै तैंईंयैं मुर्गै बांग नी देंणी।”

³⁵तैबै यीशुऐ च़ेले न पुछ़ू, “ज़ैबै मैं तुसै बगैर बटुऐ, बैगा बगैर होर बगैर ज़ूतै भेज़ै, कि तैबै तुसाबै कौसी च़ीज़ै री कमी हुई?” तिन्हैं बोलू, “आसाबै कौसी च़ीज़ै री कमी नी हुई।”

³⁶तैबै यीशुऐ बोलू, “पर ऐबै आपु सैंघै झोल़ा होर बटुऐ रैखा। होर अगर कोई हागै तलवार नी ऑथि ता सौ आपणै झिकड़ै बेच़िया आपणी तैंईंयैं तलवार लेला।

³⁷हांऊँ तुसाबै बोला सा, ज़ो पवित्र शास्त्रा न लिखू सा, कि सौ अपराधी सैंघै गिणुआ तेइरा, मूँ न पूरा होंणा ज़रूरी सा। भविष्यवक्तै मेरै बारै न ज़ो लिखुदा सा ते सब गैला सच़िऐ पूरी होणु आई सी।”

³⁸च़ेले बोलू, “ओ प्रभु जी, हेरा, औखै दुई तलवारी सी।” प्रभु यीशुऐ तिन्हां बै बोलू, “बोहू सी।”

³⁹यीशु तेई कमरै न बाहरै निकतै होर पैहलै सांही जैतून नाँ रै ढौगा पैंधै नौठै। तिन्हरै च़ेले बी तिन्हां पिछ़ै नौठै।

⁴⁰तौखै पुजिआ यीशुऐ च़ेले बै बोलू, “प्रार्थना केरदै रौहा, कि तुसै परीक्षा न नी पौऐ लोड़ी।”

⁴¹ते च़ेले न थोड़ी दूर नौठै, होर घुटनै टेकिआ प्रार्थना केरदै लागै।

⁴²“हे स्वर्गै रै बापु, अगर तुसै च़ाहा सी ता ऐई प्यालै बै मूँ न दूर केरात्, तैबै भी मेरी नी पर तुसरी इच्छा पुरी लोड़ी हुई।”

⁴³तैबै स्वर्गा न परमेश्वरा रा एक स्वर्गदूत प्रगट हुआ, होर तेइयै यीशु बै शक्ति धिनी।

⁴⁴यीशु बड़ै व्याकुल होईया प्रार्थना केरदै लागै। तिन्हरी आत्मै री बैदना ऐतरी बैढ़ी कि तिन्हरा पसीना धौरती पैंधै लोहू बैंणिया च़ुड़दा लागा।

⁴⁵तैबै ते प्रार्थना न उठै होर आपणै च़ेले हागै आऐ तिन्हैं आपणै च़ेले सुतैदै हेरै किबैकि ते थकै दै होर उदास ती।

⁴⁶यीशुऐ तिन्हां बै बोलू, “तुसै किबै सोंदै लागैदै सी? उठा होर प्रार्थना केरा, कोइँछ़ै ऐण्ढा नी लोड़ी हुआ कि तुसै परीक्षा न पौड़लै।”

⁴⁷ज़ैबै बौलदै लागै ती, तैबै लोकै री एक बड़ी भीड़ तौखै पुज़ी। तिन्हां बारा च़ेले न एक ज़ुणिरा न यहूदा इस्करियोती ती, सौ भीड़ा न आगै-आगै औंढदा लागा ती। यहूदा प्रभु बै माँकी दैणै री तैंईंयैं तिन्हां भेटी आऊ, ज़ो तेई सैंघै तिन्हां लोका बै इशारा केरदा लागा ती कि ऐई यीशु सा।

⁴⁸तैबै यीशुऐ तेइबै बोलू, “ओ यहूदा तू कि एक माँकी लेइया मांहणु रै बेटै ढौकणै द्या सा?”

⁴⁹ज़ैबै तेइरै सैंघियै हेरू कि किछ़ होंदा लागा सा ता तिन्हैं बोलू, “हे प्रभु जी कि आसा इन्हां सैंघै लड़ाई केरनी? आसै आपणी तलवारी सैंघै आंणी सी।”

⁵⁰तैबै तिन्हां मौंझ़ै न एकियै आपणी तलवार महापुरोहित रै नोकरा पैंधै च़लाई होर तेइरा दैंहीणा कोन काटू।

⁵¹पर प्रभु यीशुऐ बोलू, “बस केरा ऐबै” प्रभुऐ तेई मांहणु रा कोन छुँगु होर तेइरा कोन ठीक हुआ।

⁵²तैबै यीशुऐ मन्दिरै रै मुख्यपुरोहिता धर्मगुरू होर स्याणै ज़ुण प्रभु यीशु बै ढौकदै आऐ ती बोलू, “तुसाबै हांऊँ कि कोई डाकू लागा सा, ज़ो तुसै मुँभै तलवारी होर डँडै पाईआ ढौकदै आऐ सी?

⁵³तुसै हांऊँ मन्दिरा न किबै नी ढौकु, तौखै ता हांऊँ रोज़ एज़ा ती होर तुसै भी तौखै होआ ती! पर ऐ बौगत तुसरा सा, बल्कि निहारै रै राज्य रा बौगत सा।”

⁵⁴तैबै तिन्हैं यीशु ढौकिऐ महापुरोहिता हागै बै नेऐ, पतरस दूर-दूर तिन्हां पिछ़ै औंढदा लागा ती।

⁵⁵होर ते पौहरैदार खौल़ा न औग पकेईया च़ारै पासै बेठै होर पतरस भी तिन्हां मौंझ़ै बेठा।

⁵⁶ऐकी दासीऐ औगी रै प्याशै न पतरसा बै हेरिया बोलू, “ऐ मांहणु भी ता यीशु सैंघै ती।”

⁵⁷पतरसै तेसा बेटड़ी बै बोलू, “हांऊँ ता प्रभु यीशु बै पछ़ियाणदा बी नी ऑथि।”

⁵⁸थोड़ी देरी बाद कोई होरी मांहणुऐ पतरसा बै हेरिया बोलू, “तु बी ता प्रभु यीशु सैंघै ती!”

⁵⁹थोड़ी देर बाद होरी मांहणुऐ बोलू, “तु बी पक्का यीशु सैंघै ती, किबैकि तू बी गलीला रा रौहणु आल़ा सा।”

⁶⁰पर पतरसै बोलू, “ओ मांहणुआ, हांऊँ नी ज़ाणदा कि तू कुणी रै बारै न बोलदा लागा सा।” पतरसै ऐण्ढा बोलूऐ ती कि मुर्गै बाँग धिनी।

⁶¹तैबै यीशुऐ मुड़िया पतरसा धिरै हेरू, होर पतरसा बै याद आई कि यीशुऐ बोलू ती, कि “औज़ दोथी मुर्गै रै बाँग देणै न पैहलै, तौ त्रा बार मेरा नाँह केरना कि तू मुँभै नी ज़ाणदा।”

⁶²तैबै पतरस बाहरै नौठा होर ज़ोरै-ज़ोरै रोंदा लागा।

⁶³ज़ुणी मांहणुऐ यीशु ढौकै ती ते तिन्हरा ठठा केरदै लागै होर तिन्हां बै मारदै लागै।

⁶⁴तिन्हैं यीशु री औछ़ी पांधै पट्टी बोनी होर ते मारदै लागै होर तिन्हां न पुछ़ू, “भविष्यवाणी केरनु आल़ै ऐबै दस कि तेरै कुणिऐ बाही।”

⁶⁵तिन्हैं बोहू सारी होर भी निन्दा री गैला तिन्हरै बारै न बोली।

⁶⁶ज़ैबै ध्याड़ा आऊ तैबै यहूदी लोकै रै सभै स्याणै होर मुख्यपुरोहिता होर शास्त्री कठा हुऐ, होर यीशु सभा रै सामनै आंणै।

⁶⁷ते यीशु बै बोलदै लागै, “अगर तू मसीह सा, ता आसाबै बोल!” पर तिन्हैं उतर धिना, “अगर हांऊँ तुसाबै दैसनु ता तुसा बशाह नी केरना।

⁶⁸होर अगर हांऊँ तुसा न पुछनू, ता तुसरै ज़वाब नी देईणा।

⁶⁹पर ऐबै न बाद मांहणु रै बेटै सर्वशक्तिमान परमेश्वरा रै दैहिणी धिरै बैशिया रौहणा।”

⁷⁰एसा गैला पैंधै तिन्हैं बोलू, “तू कि आपणै आपा बै परमेश्वरा रा बेटा बोला सा?” यीशुऐ बोलू, “हाँ हांऊँ सा।”

⁷¹तैबै तिन्हैं बोलू, “ऐबै आसाबै गुआही दैणु आल़ै री कि जरूरत सा, किबैकि आसै आपु ऐईरै मुँहा न शुणू।”