Read Pahari, Kullu लूका 24 Bible Online

लूका 24 - Pahari, Kullu bible

लूका 24

¹हफ्तै रै पैहलै ध्याड़ै दोथी-दोतियै ते बेटड़ी ज़ुणियै शोभली बासा आई च़ीज़ा त्यार केरी ती ते तिन्हां च़ीज़ा लेइया कब्रा हागै आई।

²तिन्हैं हेरू कि ज़ुणी पात्थरा सैंघै कब्रा रा द्वार बन्द केरू ती सौ एकी धिराबै लुढ़कुदा ती।

³होर आँध्रै जाईया, तिन्हां बै यीशु री लाश नी मिली।

⁴ते सोच़दी लागी कि यीशु री लाशा बै कि हुआ होला? तैबै तौखै एकदम च़मकदै झिकड़ै आल़ै दुई मर्द खड़ै हुऐ।

⁵ते बेटड़ी डौरी, होर ज़मीना धिरै टुँबड़ी मुँडी केरिया खड़ी रौही। तिन्हैं तिन्हां बेटड़ी बै बोलू, “तुसै ज़िन्दै बै मूँऐंदै न किबै तोपदी लागीदी सी?

⁶ते औखै नी ऑथि ते ज़िन्दै हुऐदै सी। याद केरा ज़ैबै ते गलीला न ती, तिन्हैं तुसाबै कि बोलू ती।”

⁷ऐ जरूरी सा, कि हांऊँ मांहणु रा बेटा पापी रै हौथै ढौकिणा, होर तिन्हां सौ क्रूसा पैंधै च़ढाणा, पर तेई त्रीज़ै ध्याड़ी मूँऐंदै न ज़िन्दै होंणा।

⁸तैबै तिन्हां बै ते सैभ गैला याद आई,

⁹तैबै ते कब्रा न हागै न वापस आई होर तिन्हैं ऐ सैभ गैला ग्यारा च़ेले बै, होर सैभी बै दसी।

¹⁰ज़ुणी बेटड़ियै प्रेरिता बै ऐ गैला दसी, ते मरियम मगदलीनी, योअन्ना, याकूबै री आमा मरियम होर तिन्हां सैंघै होरा बेटड़ी भी ती।

¹¹पर च़ेले बै तिन्हरी गैला बेकार कथा सांही लागी। तिन्हैं तिन्हरी गैला रा बशाह नी केरू।

¹²पर ऐ गैला शुणिया पतरस खड़ा हुआ होर ठोर देइया कब्रा पैंधै पुज़ू होर टुँबड़ै होईया तौखै झिकड़ै केल्ही हेरै होर ज़ो हुआ ती हैरान होईया आपणै घौरा बै नौठा।

¹³तेई ध्याड़ै यीशु रै दुई च़ेले इम्माऊस नाँ रै ग्राँ बै जाँदै लागै ती, ज़ो यरूश्लेम शैहरा न सौत मीलै री दुरी पैंधै ती।

¹⁴ते इन्हां सब गैला बै ज़ो हुईदी ती गैल बात केरदै-केरदै ज़ाँदै लागै ती।

¹⁵ज़ैबै ते आपु न गैल बात होर पुछ-ताछ केरदै लागै ती तैबै यीशु तौखै प्रगट हुऐ होर तिन्हां सैंघै औंढदै लागै।

¹⁶पर परमेश्वरै ज़ो यीशु बै मैना ती तिन्हरी औछ़ी ऐण्ढी बँद केरी कि ते यीशु बै नी पछ़ियाणी सकै।

¹⁷यीशुऐ तिन्हां बै बोलू, “मुँभै लागा सा कि तुसै कोई गूढ़ी गप्पा रा विच़ार केरदै लागैदै सी, ते उदास होईया च़ुपच़ाप खड़ै रौहै।”

¹⁸तिन्हां न कलियुपास नाँ रै मांहणुऐ बोलू, “शायद तुसै पैहलै मांहणु सी ज़ुणिबै यरूश्लेम शैहरा री ऐसा घटनै रै बारै न पता नी ऑथि।”

¹⁹यीशुऐ तिन्हां बै बोलू, “कुणा गैला?” तैबै तिन्हैं बोलू, “ऐ गैला यीशु नासरी रै बारै न सी। ज़ो परमेश्वर होर सैभ मांहणु री नज़री न होर कोमा होर वचना न सामर्थी भविष्यवाणी केरनु आल़ा ती।

²⁰होर मुख्यपुरोहिते होर आसरै अधिकारियै यीशु पकड़वाऊ, कि तेई पैंधै मौऊती रा हुक्म धिनु लोड़ी, हो सौ क्रूसा पैंधै च़ढ़ाऊ।

²¹आसाबै आश ती, कि ते मसीहा सी होर इस्राइली बै रोमियो न आज़ाद करांदै आऐ सी, इन्हां गैला बै बितिया औज़ त्रा ध्याड़ै हुऐ।

²²औज़ दोथी आसरी मण्डली री किछ़ बेटड़ी ज़ैबै कब्रा हागै पुजी ता तिन्हैं एक नोखी गैल हेरी, ज़ुण तिन्हैं एज़िया आसाबै दसी।

²³तिन्हैं बेटड़ियै बोलू कि यीशु री लाश कब्रा न नी ऑथि, होर तिन्हैं स्वर्गदुत भाल़ै, तिन्हैं स्वर्गदूतै बेटड़ी बै बोलू यीशु ज़िन्दै हुऐदै सी।

²⁴तैबै आसरै कई सैंघी ठोर देइया कब्रा हागै नौठै, होर ज़ैण्ढा तिन्हैं बेटड़ियै बोलू ती, तैण्ढाऐ तिन्हैं हेरू।”

²⁵तैबै यीशुऐ तिन्हां दुई च़ेले बै बोलू, “तुसै केतरै मूर्ख मांहणु सी, ज़ुणा गैला भविष्यवाणी केरनु आल़ै लिखी सी तिन्हां पैंधै बशाह केरना तुसाबै केतरा मुश्किल हुआ!

²⁶तुसै नी पौढ़ू कि मसीह रा दु:ख सौहणा होर आपणी महीमा न स्वर्गा बै जाँणा जरूरी ती।”

²⁷तैबै यीशुऐ मूसा न लेईया सारै भविष्यवाणी केरनु आल़ै न शुरू केरिया होर आपणै बारै न ज़ो पवित्र शास्त्रा न लिखु ती समझाऊ।

²⁸ज़ैबै ते तेई ग्राँ न पुजै ज़ौखै तिन्हां जाँणा ती, पर यीशुऐ तिन्हां सैंघै ऐण्ढा व्यवाहर केरू ज़ैण्ढै कि तिन्हां आगै जाँणा ती।

²⁹पर तिन्हैं यीशु बै बोलू, कि “औज़ औखै रौहा किबैकि ध्याड़ा ओउड़ू सा होर सौंझ़ हुई सा।” तैबै यीशु तिन्हां सैंघै भितरै नौठै।

³⁰ज़ैबै ते रोटी खाँदी बेठै ता यीशुऐ रोटी हौथा न लेईया परमेश्वरा रा धन्यवाद केरू होर रोटी चोड़िया तिन्हां बै धिनी।

³¹तैबै च़ानक तिन्हरी औछ़ी खुली होर तिन्हैं यीशु पछ़ियाणै, पर ते तिन्हरी नज़री न राहुऐ।

³²तैबै ते आपु न बोलदै लागै, “ज़ैबै यीशु आसाबै बौता न पवित्र शास्त्रा री गैला समझाँदै लागै ती, तैबै आसरै मना न उतेजना पैदा किबै नी हुई?”

³³तैबै ते तुरन्त उठिया वापस यरूश्लेम शैहरा बै च़ौलै होर तौखै तिन्हां बै ग्यारा च़ेले होर तिन्हरै सैंघी कठै मिलै।

³⁴ते बोलदै लागै, “यीशु सच़िऐ ज़िन्दै हुऐदै सी होर शमौन पतरसा बै हेरूऐ।”

³⁵तैबै तिन्हैं बौता न ज़ो किछ़ तिन्हां सैंघै हुआ ती ते सैभ गैला च़ेले बै दसी, होर बोलू कि ज़ैबै तिन्हैं रोटी च़ोड़ी ता कैण्ढै तिन्हैं यीशु पछ़ियाणै।

³⁶ते इन्हां गैला बै केरदै लागै ती, कि यीशु तिन्हां मौंझ़ै एज़िया खड़ै हुऐ, होर तिन्हां बै बोलू, “तुसाबै शान्ति मिलै।”

³⁷ते घबराऐ होर डौरै तिन्हैं बुझू ऐ ता कोई भूत सा।

³⁸तैबै यीशुऐ तिन्हां बै बोलू, “तुसै किबै घबरा सी होर तुसरै मना न शक किबै नी ऑथि।

³⁹मेरै हौथा-ज़ोंघा बै हेरा हांऊँ कोई भूत नी ऑथि, मुँभै छ़ुँगिया हेरा किबैकि भूतै रै हाड-मांस नी होंदा, ज़ैण्ढा तुसै मूँ न हेरा सी।”

⁴⁰ऐ बोलिया यीशुऐ आपणै हौथ-ज़ोंघा रिहाऐ।

⁴¹च़ेले बोहू ज़ादा खुश ती होर हैरान ती तिन्हां बै बशाह नी ती होंदा लागा कि प्रभु यीशु ज़िन्दै हुऐ सी, तैबै प्रभु यीशुऐ तिन्हां बै बोलू, “तुसा हागै खाँणै बै किछ़ सा?”

⁴²तिन्हैं प्रभु यीशु बै भुनूईंदी मैच्छ़ी रा एक टुकड़ा धिना।

⁴³यीशुऐ सौ मैच्छ़ी रा टुकड़ा च़ेले सामनै खाऊ, ज़ैबै सौ हेरदै लागै ती।

⁴⁴यीशुऐ बोलू, “ज़ैबै हांऊँ तुसा सैंघै ती तैबै मैं तुसाबै बोलू ती, कि मूसा होर भविष्यवाणी केरनु आल़ा मूसै रै बिधाना न ता भजन संहिता न ज़ो किछ़ मेरै बारै न लिखू सा ते सारी गैला सच़ी हौंणी।”

⁴⁵तैबै प्रभु यीशुऐ पवित्र शास्त्र समझणै री तैंईंयैं तिन्हरी मज़त केरी।

⁴⁶होर तिन्हां सैंघै बोलू, “ऐ गैला बोहू पैहलै पवित्र शास्त्रा न लिखीदी सा कि मसीह दु:ख सौहणा, होर त्रीज़ै ध्याड़ी मूँऐंदै न ज़िन्दै होंणा।

⁴⁷यरूश्लेम शैहरा न शुरू केरिया सारी ज़ाति न मन बदला होर पापै री माफी रा प्रचार, तेही रै नाँ न केरिना।

⁴⁸तुसै इन्हां सैभी गैला रै गुआह सी।

⁴⁹ऐबै ज़ुण प्रतिज्ञा परमेश्वरै मुँभै धिना सा सौ मूँ तुसा सैंघै पूरा केरना कि ज़ैबै तैंईंयैं स्वर्गा न शक्ति तुसा पैंधै नी उतरली ताँ तैंईंयैं तुसै यरूश्लेम शैहरा छ़ौड़िआ बाहरै मतेइत् ज़ाँदै।”

⁵⁰तैबै प्रभु यीशुऐ ते बैतनिय्याह ग्राँ न बाहरै नेऐ। होर आपणै हौथ च़किया तिन्हां सैभी बै आशीष धिनी।

⁵¹तिन्हां बै आशीष देंदै-देंदै प्रभु यीशु तिन्हां न अलग हुऐ, होर स्वर्गा बै च़कुआ।

⁵²च़ेले प्रभु यीशु री आराधना न केरिया यरूश्लेम शैहरा बै बापस आऐ।

⁵³ते लगातार परमेश्वरै री जय-जयकार केरदै रौहै होर आपणा सारा बौगत मन्दिरा न गुज़ारदै लागै।