Read Pahari, Kullu लूका 5 Bible Online

लूका 5 - Pahari, Kullu bible

लूका 5

¹एक रोज़ परमेश्वरा रा वचन शुणनै री तैंईंयैं ज़ैबै लोकै री भीड़ कठा हुई ता यीशु गन्नेसरतै री समुन्द्रा रै बौढ़ा न खड़ै हुऐ ती।

²यीशुऐ समुन्द्रा रै बौढ़ा न दूई किश्ती लागीदी हेरी, होर मैच्छ़ी ढौकणु आल़ै आपणी किश्ती छ़ौड़िआ आपणै ज़ाला बै धोंदै लागैदै ती।

³तिन्हां मौंझ़ै एक किश्ती शमौनै री ती, होर यीशु तेसा किश्ती न च़ढ़िया लोका बै उपदेश देंदै लागै।

⁴उपदेश देणै न बाद यीशुऐ शमौना बै बोलू, “आपणी किश्ती डूगै पाणी बै च़ला होर मैच्छ़ी ढौकणै री तैंईंयैं ज़ाला शेट।”

⁵तैबै शमौनै यीशु बै बोलू, “ओ गुरू ज़ी, आसै सारी रात मेहनत केरी पर किछ़ भी नी ढौकी पर तुसै बोला सी ता हांऊँ ज़ाला शेटणू।”

⁶ज़ैबै पतरस होर तेइरै सैंघियै ज़ाला शेटू ता तिन्हैं ऐतरी बोहू मैच्छ़ी ढौकी कि तिन्हरै ज़ाल च़िरिदै लागै।

⁷तैबै तिन्हैं दुज़ी किश्ती रै सैंघी भी मज़ती केरनै री तैंईंयैं इशारै केरिया शाधै होर तिन्हैं दुऐ किश्ती ऐतरी भौरी कि ते डूबनू आल़ी ती।

⁸ऐई चमत्कार हेरिया शमौन पतरस यीशु री ज़ोंघा पैंधै पौऊ होर बोलू, “गुरू जी मूँ हागै न दूर ज़ाआत्, किबैकि हांऊँ पापी मांहणु सा।”

⁹किबैकि ऐतरी मैच्छ़ी ढौकणै री बजहा न तेइबै होर तेइरै सैंघी बै बड़ी हैरानी हुई।

¹⁰जब्दी रै बेटै याकूब होर यूहन्ना भी ज़ो शमौनै रै सैंघी ती, तिन्हां बै बी बड़ी हैरानी हुई होर तैबै यीशुऐ शमौना बै बोलू, “डौरदा मत, औज़ा न बाद मूँ तुसै मांहणु बै मेरा च़ेला बनाणा सिखाणै।”

¹¹तैबै तिन्हैं किश्ती बौढ़ा बै आंणी होर ते सैभ किछ़ छ़ौड़िआ यीशु पिछ़ै च़लै।

¹²ज़ैबै सौ कोई नगरा न ती, ता हेरा, तौखै कोढ़ा न भौरु हुन्दा एक मांहणु आऊ, होर सौ यीशु बै हेरिया टुँबड़ै पौड़ू, होर अर्ज़ा केरी, “हे प्रभु अगर तुसै च़ाहलै ता मुँभै ठीक केरी सका सी।”

¹³तैबै यीशुऐ कोढ़ी आपणै हौथा सैंघै छ़ुँगू होर बोलू, “हांऊँ च़ाहा सा कि तू ऐबरै ठीक लोड़ी हुआ।” तुरन्त तेइरा कोढ़ खत्म हुआ होर सौ ठीक हुआ।

¹⁴तैबै यीशुऐ तेइबै हुक्म धिना, “एसा गैल तू कौसी बै हेरेई दसदा। पर ज़ाइआ यहूदी पुरोहिता बै रिहा होर कोढ़ा न ठीक हुऐदै लोका बै मूसै ज़ो बलि च़ढ़ाणै बै बोलू सा तेसा बै च़ढा ताकि लोक ज़ाणलै कि तू ठीक हुआ सा।”

¹⁵पर यीशु रै बारै न केरीदी ऐ गैल औगी सांही फैलदी रौही होर लोकै री भीड़ यीशु री शिक्षा शुणनै री तैंईंयैं होर तिन्हरी बीमारी न ठीक होंणै री तैंईंयैं कठी होंदै रौही।

¹⁶पर यीशु तिन्हां न दूर सुनसान ज़ैगा न ज़ाइआ प्रार्थना केरा ती।

¹⁷एक रोज़ ज़ैबै यीशु उपदेश देंदै लागै ती, तैबै तौखै फरीसी पंथै रै किछ़ लोका होर यहूदी शास्त्री भी तौखै बेठैंदै ती ज़ो कि गलील होर यहूदिया देशा रै हरेक ग्राँ न होर यरूश्लेम शैहरा न आऐ ती। बीमारी न लोका बै ठीक केरनै तैंईंयैं प्रभु री शक्ति यीशु सैंघै ती।

¹⁸तेई बौगतै किछ़ लोकै एक ध्रँगा रा मरीज़ माँज़ै पैंधै आंणु। तिन्हैं लोकै मरीज़ा बै घौरा भीतरै नेहणै होर यीशु सामनै रखणै री बड़ी कोशिश केरी।

¹⁹पर लोकै री बड़ी भीड़ै री बजहा सैंघै ते मरीज़ा बै भीतरै नी नैंई सकै ता तिन्हैं घौरै रै छ़ापरा पैंधै च़ढ़िया किछ़ पौट पेच़ै होर सौ मरीज़ यीशु सामनै उतारू।

²⁰यीशुऐ तिन्हरा बशाह हेरिया तेई मरीज़ा बै बोलू, “ऐई बेटैआ तेरै पाप माफ हुऐ।”

²¹तैबै शास्त्री होर फरीसी लोक आपु न बैहस केरदै लागै, “ऐ कुण सा ज़ो परमेश्वरै री निन्दा केरा सा? परमेश्वरै रै सिवाए कोई बी पापा बै माफ नी केरी सकदा।”

²²यीशुऐ तिन्हरै मनै रै विचार ज़ाणिया तिन्हां बै बोलू, “तुसै आपणै मना न किबै वहस केरदै लागै सी?”

²³सान कि सा, “ऐण्ढा बोलणा कि तेरै पाप माफ हुऐ या ऐण्ढा बोलणा सान सा उठ होर औंढदा लाग।”

²⁴पर तुसै ज़ाणि लेआ कि हांऊँ मांहणु रै बेटै बै एसा धौरती पैंधै पापा बै माफ केरनै रा भी हक़ सा। तेथा न बाद यीशुऐ ध्रँगै रै मरीज़ा बै बोलू, “हांऊँ तौभै बोला सा उठ होर आपणै माँज़ै च़किआ घौरा बै ज़ा।”

²⁵तैबै सौ मरीज़ एकदम उठु होर ज़ुणी माँज़ै पैंधै सौ सुता ती तेई माँज़ै च़किआ परमेश्वरै री जय-जयकार केरदै-केरदै आपणै घौरा बै नौठा।

²⁶तौखै बेठैंदै लोका बड़ै हैरान हुऐ होर परमेश्वरै री जय-जयकार केरदै लागै होर बोलदै लागै, “औज़ आसै नौखी गैला हेरी।”

²⁷एथा न बाद यीशु शैहरा न बाहरै नौठै होर एक लेवी नाँ रा मांहणु च़ुँगी लेणै री च़ोऊकी हागै बेठादा हेरू होर तेइबै बोलू, “मूँ सैंघै च़ला होर मेरा च़ेला बैण।”

²⁸तैबै सौ सैभ किछ़ छ़ौड़िआ उठु होर यीशु पिछ़ै च़लू।

²⁹बादा न लेवियै आपणै घौरा न यीशु री तैंईंयैं एक बड़ी धाम रखी। सैभै च़ुँगी लेणू आऐ होर होरी लोकै री एक बोहू बड़ी भीड़ यीशु सैंघै रोटी खाँदी बेठी ती।

³⁰फरीसी होर शास्त्री यीशु रै च़ेले न पुछ़दै लागै, “तुसै च़ुँगी लेणू आल़ै सैंघै होर पापी लोका सैंघै किबै खा पीआ सी?”

³¹यीशुऐ तिन्हां बै ज़वाब धिना, “ठीक मांहणु बै बैदै री ज़रूरत नी होंदी पर बीमार मांहणु बै बैदै री ज़रूरत होआ सा।”

³²यीशुऐ बोलू, “तैण्ढाऐ हांऊँ धर्मी री तैंईंयैं नी, बल्कि पापी री तैंईंयैं आऊ सा ताकि ते आपणै पापा बै छ़ौड़लै।”

³³तिन्हैं यहूदी नेतै यीशु बै बोलू, “यूहन्नै रै च़ेले ता बार-बार ब्रत रैखा सी होर प्रार्थना केरा सी, फरीसी लोकै होर रै च़ेले भी कई बार ब्रत रखा सी, पर तेरै च़ेले ता खाँदै-पींदै रौहा सी।”

³⁴तैबै यीशुऐ तिन्हां बै बोलू, “ज़ाँ ढौई लाड़ा सैंघै सा कि तुसै बराती न ब्रत कराई सका सी?”

³⁵पर तिन्हां ध्याड़ै ऐणा ज़ैबै लाड़ा बराती न लग केरिना तैबै तिन्हां ब्रत केरना।

³⁶यीशुऐ तिन्हां बै एक होर उदाहरण बी दसू “कोई बी मांहणु नोंऊँऐं कपड़ै रा टौला पराणै झिकड़ै न कोई नी लाँदा। अगर तैण्ढा केरला ता नोंऊँऐं कपड़ै पैहलै न बी ज़ादा च़िरिना।

³⁷तैण्ढाऐ न कोई मांहणु नोंऊँआं अँगूरा रा रस च़ंबड़ै री पराणी खौलड़ी न भौरदा। अगर ऐण्ढा केरलै ता नोंऊँऐं अँगूरा रा रसा पराणी खौलड़ी भोनणी होर अँगूरा रा रस ता थैली दुऐ नष्ट होंणी।

³⁸पर नोंऊँआं अँगूरा रा रस च़ंबड़ै री नोऊँई थैली न भौर न पौड़ा सा।

³⁹होर ज़ुणियै पराणा अँगूरा रा रस पीऊ सा सौ नोंऊँआं अँगूरा रा रस नी पीणा च़ाँहदा। किबैकि सौ ऐण्ढा बोला सा, पराणा ऐ अँगूरा रा रस शोभला सा।”