Read Pahari, Kullu लूका 7 Bible Online

लूका 7 - Pahari, Kullu bible

लूका 7

¹ज़ैबै यीशुऐ लोका सैंघै सारी गैला केरी ता सौ कफरनहूम शैहरा बै आऊ।

²तौखै रोमी सेनै रै मुखिया रा एक झ़ुरी नोकर बीमार ती होर मौरनु आल़ा ती।

³ज़ैबै सेनै रै मुखियै यीशु रै बारै न शुणू ता तेइयै कई यहूदी स्याणै यीशु हागै अर्ज़ा केरनै बै तेई आगै भेज़ै ताकि यीशु एज़िया तेइरै नोकरा बै ठीक केरलै।

⁴ज़ैबै ते यीशु हागै पुजै ता तिन्हैं सच़ै मना सैंघै यीशु हागै अर्ज़ा केरी “कि सौ एज़िया तेई मांहणु री मज़त केरला। तिन्हैं बोलू ऐ मुखिया तुसरी मज़ती पाणै रै लायक सा।

⁵किबैकि सौ आसरै लोका सैंघै झ़ुरी केरा सा, होर तेइयै आसरी तैंईंयैं आराधनालय घौर बणाणै री तैंईंयैं ढ़ैबुए धिनै सी।”

⁶तैबै यीशु तिन्हां सैंघै नौठै। यीशु हाज़ी घौरा रै नेड़ ती कि सेनै रै सूबैदारै आपणै सैंघी यीशु हागै ऐण्ढै बोलणै री तैंईंयैं भेज़ै कि, “ओ प्रभु जी, तुसै आपु बै ऐतरा कष्ट मता देंदै किबैकि हांऊँ एस काबिल नी ऑथि, कि तुसै मेरै घौरा बै एलै।

⁷तैण्ढाऐ हांऊँ तुसा सामनै ऐणै रै काबिल आपु बै नी समझ़दा, तुसै मेरै नोकरा बै ठीक होंणै री तैंईंयैं सिर्फ़ वचन बोललै ता तेई ठीक होंणा।

⁸किबैकि हांऊँ बी कौसी रै अधीन सा होर सपाई मेरै अधीन सी; ज़ैबै हांऊँ एकी बै ऐणै बै बोला सा, ता सौ ‘एज़ा,’ सा होर दुज़ै बै ज़ाणै बै बोला सा ता सौ ज़ा सा होर ज़ैबै हांऊँ आपणै नोकरा बै बोला सा ऐण्ढा केर ता सौ तेई कोम केरा सा।”

⁹ऐ शुणिया यीशु बै हैरानी हुई, होर पिछ़ै ऐन्दी लागीदी लोकै री भीड़ा धिराबै हेरिया बोलू, “हांऊँ तुसाबै बोला सा, कि ऐण्ढा बशाह केरनु आल़ै मुँभै इस्राइला न भी नी मिलै।”

¹⁰तैबै भेज़ेंदै तिन्हैं लोकै तेई मुखियै रै घौरा ज़ाइआ हेरू ता, सौ नोकर ठीक हुआ ती।

¹¹तैबै न बाद तुरन्त यीशु नाईन नाँ रै ग्राँ बै नौठै, तिन्हरै च़ेले होर लोकै री बोहू बड़ी भीड़ यीशु सैंघै ती।

¹²ज़ैबै यीशु ग्राँ बाहरै पुजै ता लोकै तिसै आगै ज़ुआन मांहणु रा एक मुर्दा नेणा लाऊदा ती। सौ एकी विधवा रा केल्हा बेटा ती, होर ग्राँ रै लोकै री बोहू बड़ी भीड़ तेसा विधवा सैंघै ती।

¹³तेसा विधवा हेरिया प्रभु बै तेसा पैंधै बड़ी दया आई, होर तेसा विधवा बेटड़ी बै बोलू, “रोंदी मत।”

¹⁴तेथा न बाद यीशु आगै नौठै होर तिन्हैं सौ धड़ छ़ुँगू ता ते अर्थी च़कणू आऐ रूकै। तैबै यीशुऐ बोलू, “ऐई ज़ुआना, हांऊँ तौभै बोला सा खड़ा उठ!”

¹⁵तैबै सौ मुँआन्दा मांहणु खड़ा उठु होर बोलदा लागा। तैबै यीशुऐ सौ तेइरी आमा हागै धिना।

¹⁶तैबै तौखलै सैभी लोका बै बड़ी डौर पौई, ते परमेश्वरै री जयकार केरिया बोलदै लागै, “आसरै बिच़ा न एक बड़ा भविष्यवाणी केरनु आल़ा आऊ सा, होर परमेश्वरै आपणै लोका पैंधै दया केरी सा।”

¹⁷यीशु रै बारै न ऐ गैल सारै यहूदिया देश होर औरलै-पौरलै सैभी ज़ैगा न फैली।

¹⁸इन्हां सैभी गैला रै बारै न यूहन्नै रै च़ेले यूहन्ना बै सैभ किछ़ दैसू।

¹⁹तैबै यूहन्नै आपणै दूई च़ेले शाधै होर प्रभु हागै ऐ पुछ़णै री तैंईंयैं भेज़ै, “ऐणु आल़ै मसीह तुसै सी कि आसै कौसी होरी रा इंतज़ार केरै?”

²⁰तिन्हैं मांहणुऐ यीशु हागै एज़िया बोलू, “आसै यूहन्नै बपतिस्मै देणु आऐ ऐ पुछ़णै री तैंईंयैं भेज़ै सी, कि ऐणु आल़ै मसीह तुसै सी या आसा कौसी होरी रा इंतज़ार केरना?”

²¹ठीक तेही बौगतै यीशुऐ बोहू सारै लोका बीमारी न, दु:खा न, होर बुरी आत्मा न ठीक केरै होर कांणै बै हेरनै री शक्ति धिनी;

²²तैबै यीशुऐ तिन्हां बै बोलू, “ज़ो किछ़ तुसै हेरू होर शुणू तेई ज़ाइआ यूहन्ना न बै दसा कि कांणै हेरा सी, लँगड़ै औंढा सी होर कोढ़ी ठीक केरिया सी, टाऊँणै शुणा सी होर मुर्दै ज़िंदै केरिया सी होर कंगाला बै परमेश्वरै रा खुशी रा समाद दसिआ सा।

²³धन्य सी ते ज़ुणा मूँ पैंधै हमेशा बशाह केरा सी।”

²⁴ज़ैबै यूहन्नै रै च़ेले वापस नौठै ता यीशु यूहन्नै रै बारै न लोका बै बोलदै लागै, “तुसै सुनसान ज़ैगा बै कैण्ढै मांहणु बै हेरदै नौठै ती? कि तुसै बागरियै लाइया हिलदै लागैदै नगाल़ी रै डँडै हेरदै आऐ सी?”

²⁵नी ता तुसै होरी कैण्ढै मांहणु बै हेरदै तौखै नौठै दै ती। कि तुसै मैंहगै झिकड़ै लाउऐंदै मांहणु हेरदै नौठै दै ती? शुणा, मैंहगै झिकड़ै लाणु आल़ै होर सुख चैना सैंघै रौहणु आऐ ता मैहला न मिला सी सुनसान ज़ैगा न नैंई।

²⁶ता तुसै फिरी कैण्ढै मांहणु बै हेरदै नौठै ती? तुसै कि कौसी भविष्यवाणी केरनु आल़ा बै हेरदै नौठै ती? हाँ, पर हांऊँ तुसाबै बोला सा, “सौ भविष्यवाणी केरनु आल़ा न भी बड़ा सा।”

²⁷यूहन्ना सौहै भविष्यवाणी केरनु आल़ा सा ज़ौसरै बारै न पवित्र शास्त्रा न लिखू सा: “‘हेरा, मूँ तौ न आगै-आगै आपणा दूत भेज़णा होर तेई तेरी तैंईंयैं बौत त्यार केरनी।’

²⁸हांऊँ तुसाबै सच़ बोला सा ज़ेतरै बी मांहणु दुनिया न रौहै सी, बपतिस्मा देणु आल़ै यूहन्ना न बड़ा कोई मांहणु पैदा नी हुआ। पर ज़ुण परमेश्वरै रै राज्य न सैभी न होछ़ा सा, सौ यूहन्ना न बड़ा सा।”

²⁹आम लोकै होर च़ुँगी लेणू आऐ ऐ शुणिया यूहन्ना न बपतिस्मा लेइया ऐ मैनू कि परमेश्वरा री बौत सच़ी सा।

³⁰पर फरीसी होर शास्त्री लोकै यूहन्ना न बपतिस्मा नी लेऊ होर ऐण्ढै तैरहै परमेश्वरै री इच्छा रा नाँह केरू।

³¹“औज़कै ज़ुगै रै लोकै री तुलना हांऊँ कुणी सैंघै केरनु कि तै कुणी सांही सी?

³²ते बज़ारा न बेठैंदै तिन्हां शोहरू सांही सी ज़ो एकी होरी बै पुकारिया बोलदै लागै सी ‘आसै तुसरी तैंईंयैं बैंउसरी बज़ाई, पर तुसै नी नौच़ै, आसै तुसरी तैंईंयैं दु:खै री गीत लायै; पर तुसै नी रूणै!’

³³किबैकि बपतिस्मै देणु आल़ै यूहन्नै कैधी भी रोटी नी खाई होर न अँगूरा रा रस पीऊ, पर तुसै बोला सी, तेईन बुरी आत्मा सा।

³⁴हांऊँ मांहणु रा बेटा आम लोका सांही खा-पिया सा; ता तुसै बोला सी, कि ‘हेरा, ऐ ता पेटू होर पियक्कड़ सा। होर ऐ ता च़ुँगी लेणू आऐ होर पापी रा सैंघी सा।’

³⁵पर तेइरै कोमै लाइया तेइरी बुद्धि रा पता च़ला सा कि सौ केतरा सच़ा सा।”

³⁶एक रोज़ शिमौन नाँ रे फरीसियै यीशु हागै अर्ज़ा केरी कि सौ तेई सैंघै रोटी खाला, ता यीशु तेई सैंघै तेइरै घौरा बै नौठै होर रोटी खाँणै री तैंईंयैं बेठै।

³⁷तेई ग्राँ न एक ऐण्ढी बेटड़ी ती ज़ो पापै री ज़िंदगी ज़िंदी लागीदी ती। ज़ैबै तेसा बै ऐ पता च़लू कि यीशु फरीसी रै घौरा न रोटी खाँदै लागै सी, ता सौ बेटड़ी सँगमरमरै रै भाँडै न खुशबूदार कीमती तेल लेइया आई,

³⁸सौ बेटड़ी यीशु री ज़ोंघा हागै खड़ी होईया रोंदी लागी। तेसै आपणै औछू लाइया यीशु री ज़ोंघा सिनी केरी होर आपणै च़ोहढ़ै लाइया टुशदी लागी, तेसै यीशु री ज़ोंघा न मांकी धिनी होर खुशबूदार तेल मौल़ू।

³⁹ऐसा बै हेरिया सौ फरीसी आपणै मना न सोच़दा लागा, “अगर ऐ भविष्यवाणी केरनु आल़ा होंदा ता ज़ाणदा कि ज़ुण बेटड़ी ऐईबै छ़ुँगदी लागी सा, ऐ कैण्ढी सा होर कैण्ढी पापै री ज़िंदगी ज़िंदी लागी सा।”

⁴⁰यीशुऐ तेई फरीसी बै बोलू, “ऐई शमौना, हांऊँ तौभै किछ़ बोलणा च़ाहा सा।” फरीसियै बोलू, “गुरू जी बोलात्।”

⁴¹यीशुऐ ऐ उदाहरणा न बोलू, “कौसी सेठै रै दूई कर्ज़दार ती, एक पौंज़ शौऊ च़ाँदी रै सिक्कै रा होर दुज़ा पज़ाह च़ाँदी रै सिक्कै रा कर्ज़दार ती।

⁴²ज़ैबै ते ऋण नी देई सकै ता तेई सेठै तिन्हां दुही रा ऋण माफ केरू। ऐबै तिन्हां दुई न सेठा सैंघै कुणी ज़ादा झ़ुरी केरनी?”

⁴³शमौनै बोलू, “मेरै ख्याल ता ज़ुणिरा बोहू ऋण माफ हुआ।” यीशुऐ तेइबै बोलू, “तैं ठीक बोलू।”

⁴⁴तेथा न बाद यीशुऐ तेसा बेटड़ी धिराबै फिरिया शमौना बै बोलू, “एसा बेटड़ियै ज़ो केरू कि तू हेरा सा? हांऊँ तेरै घौरा आऊ तैं मुँभै ज़ोंघा धोणै री तैंईंयैं पाणी तक नी धिना, पर एसै बेटड़ियै आपणै औछू सैंघै मेरी ज़ोंघा सिनी केरी होर आपणै च़ोहढ़ै सैंघै टुशी।”

⁴⁵तैं मुँभै माँकी नी धिनी पर ज़ैबै न लेइया हांऊँ आऊ सा एसै बेटड़ियै मेरी ज़ोंघा न मांकी देणी नी छ़ौड़ी।

⁴⁶तैं मेरै च़ोड़ै न तेल नी मौऊ, पर एसै बेटड़ियै मेरी ज़ोंघा पैंधै खुशबूदार तेल मौल़ू।

⁴⁷“ऐबै हांऊँ तौभै बोला सा; कि एसा बेटड़ी रै पाप ज़ो बोहू ती ते माफ हुऐ, किबैकि एसै बोहू झ़ुरी केरी, पर ज़ुणिरा थोड़ा माफ हुआ तेई झ़ुरी बी थोड़ी केरनी।”

⁴⁸तेथा न बाद यीशुऐ तेसा बेटड़ी बै बोलू, “तेरै पाप माफ हुऐ।”

⁴⁹तैबै ते लोका ज़ुणा यीशु सैंघै रोटी खाँदै बेठैंदै ती आपणै-आपणै मना न सोच़दै लागै, “ऐ कुण सा ज़ो पापा बै बी माफ केरा सा?”

⁵⁰पर यीशुऐ तेसा बेटड़ी बै बोलू, “तैं बशाह केरू तैबै तू बच़ी, परमेश्वरै री शान्ति पाईआ घौरा बै ज़ा।”