Read Pahari, Kullu लूका 9 Bible Online

लूका 9 - Pahari, Kullu bible

लूका 9

¹एक रोज़ यीशुऐ आपणै बारा च़ेले आपु हागै शाधै होर तिन्हां बै सैभ बुरी आत्मा होर हर किस्मै री बीमारी बै दूर केरनै री शक्ति होर हक धिना।

²होर तिन्हैं परमेश्वरै रै राज्य रा प्रचार केरनै, होर बीमारा बै ठीक केरदै भेज़ै।

³तिन्हां बै भेज़दी घेरै यीशुऐ तिन्हां बै बोलू, “बौतै री तैंईंयैं किछ़ मतेइत् नेंदै, न शोठा, न रोटी, न झोल़ा न ढैबुऐ होर न दुई-दुई कुरतै।

⁴ज़ुणी बी घौरा बै तुसै ज़ालै, ज़ाँ ढौई तुसै तेई ग्राँ न प्रचार केरलै ता तेही घौरा न रौहित्।

⁵ज़ुँणी ग्राँ न लोका तुसाबै ग्रहण नी केरलै ता, तेई ग्राँ न निकलदी घेरै आपणी ज़ोंघै रै धुड़ै बै ठुड़केइत् ताकि सौ धुड़ा तिन्हां बै च़िताऊणी देला कि परमेश्वरा तिन्हां बै सज़ा देणी।”

⁶तैबै तिन्हैं च़ेले ग्राँ-ग्राँ न जाईया परमेश्वरै रै राज्य रै बारै न खुशी रा समाद दैसू होर कई बीमार लोका तिन्हरी बीमारी न ठीक केरै।

⁷गलील ज़िलै रै राज़ा हेरोदेसै ज़ैबै यीशु रै इन्हां सैभी कोमै रै बारै न शुणू ता सौ डौरू, किबैकि किछ़ लौकै बोलू कि बपतिस्मै देणु आल़ा यूहन्ना न मूँऐंदै न ज़िन्दा हुआ सा।

⁸किछ़ होरी लोकै बोलू, ऐ एलिय्याह भविष्यवाणी केरनु आल़ा सा, किछ़ होरी लौकै बोलू, कि पराणै भविष्यवाणी केरनु आल़ा न कोई ज़िन्दा हुआ सा।

⁹पर हेरोदेस राज़ै बोलू, “यूहन्नै री ता मैं मुँडी काटणै द्याई ती, ऐबै ऐ कुण सा, ज़ुणिरै बारै न हांऊँ ऐण्ढी गैला शुणदा लागा सा?” होर हेरोदेस तेइबै हेरना चाहा ती।

¹⁰तैबै ते बारा प्रेरित वापस आऐ होर ज़ो किछ़ तिन्हैं केरू ती, सौ यीशु बै दसू होर ते यीशुऐ लग केरिया बैतसैदा शैहरा बै नेऐ।

¹¹पर ऐ ज़ाणिया लोकै री भीड़ यीशु पिछ़ै हुई होर यीशु खुशी-खुशी तिन्हां सैंघै मिलै, होर तिन्हां बै परमेश्वरै रै राज्य रै बारै न दसदै लागै होर ज़ो ठीक होंणा च़ाहा ती ते ठीक केरै।

¹²ज़ैबै ध्याड़ा ऊड़दा लागा ता ते बारा च़ेले आऐ होर यीशु बै बोलू, “गुरू जी, लोकै री भीड़ा बै बिदा केरात् ताकि ऐ औरलै-पौरैलै ग्राँ न ज़ाइआ आपणै खाँणै होर रौहणै रा इंतज़ाम केरलै, किबैकि आसै औखै सुनसान ज़ैगा न सी।”

¹³तैबै यीशुऐ तिन्हां बै बोलू, “तुसै इन्हरै खाँणै रा इंतज़ाम केरा।” च़ेले बोलू, “आसा हागै पौंज़ रोटी होर दूई मैच्छ़ी केल्ही सी; अगर आसै ज़ाइआ इन्हां सैभी बै रोटी लेइया आंणलै ता होई सका सा।” पर ऐ लोका ता लगभग पौंज़ हज़ार मर्द सी।

¹⁴(किबैकि तौखै लगभग पौंज़ हज़ार मर्द ती) तैबै यीशुऐ आपणै च़ेले बै बोलू, “इन्हां बै पज़ाह-पज़ाह री लाईणी न बशात्।”

¹⁵तिन्हैं ते सारै मांहणु गिढ़ी न बशाऐ।

¹⁶तैबै यीशुऐ ते पौंज़ रोटी होर दुई मैच्छ़ी मुँगी होर स्वर्गा धिराबै हेरीया धन्यवाद केरू होर रोटी चोड़ी-चोड़िया च़ेले बै देंदै लागै होर च़ेले लोका बै लाईणी न बोंडदै लागै।

¹⁷तैबै सैभै लोका रोटी खाईया रोज़ै होर च़ेले बच़ीदी रोटी री बारा टोकरी भौरिया च़की।

¹⁸ज़ैबै यीशु एकान्त ज़ैगा न प्रार्थना केरदै लागैदै ती होर तिन्हरै च़ेले भी सैंघै ती ता यीशुऐ च़ेले न पुछ़ू, “लोका कि बोला सी कि हांऊँ कुण सा?”

¹⁹तिन्हैं ज़वाब धिना, “यूहन्ना बपतिस्मा देणु आल़ा होर कोई बोला सी एलिय्याह, होर किछ़ बोला सी कोई पराणै भविष्यवाणी केरनु आल़ै मौंझ़ै न कोई एक ज़िन्दा हुआ सा।”

²⁰यीशुऐ तिन्हां बै बोलू, “पर तुसै कि बोला सी कि हांऊँ कुण सा?” पतरसै ज़वाब धिना, “तुसै परमेश्वरै रै मसीह सी।”

²¹तैबै यीशुऐ तिन्हां बै बोलू, “च़िताऊणी धिनी, एसा गैला कौसी बै हेरेइत दसदै।”

²²तैबै यीशुऐ बोलू, “मांहणु रै बेटै यीशु बै बोहू दु:ख सौहणा पौड़ू होर स्याणै, मुख्यपुरोहित होर शास्त्रियै सौ नकारना होर तेइरी बेइज़ती केरनी होर सौ पक्का मारिना होर तेई त्रीज़ै ध्याड़ी मूँऐंदै न ज़िन्दै होंणा।”

²³तैबै यीशुऐ सैभी बै बोलू, “अगर कोई मूँ पिछ़ै ऐणा चाहा सा ता सौ आपणा सैभ किछ़ छ़ौड़ला होर आपणै दु:ख सौहणै री तैंईंयैं त्यार रौहला।

²⁴किबैकि ज़ुण आपणा प्राण बच़ाणा च़ाहला तेई सौ गँवाणा, पर ज़ुण मेरी तैंईंयैं आपणी जान गवाला ता तेई सौ बच़ाणी।”

²⁵अगर कोई मांहणु दुनिया न सैभ किछ़ हासिल केरा सा, ज़ो सौ चाहा ती होर फिरी आपणै प्राणा बै नाश केरा सा ता तेथा रा कि फायदा? किबैकि कोई बी मांहणु आपणै प्राणा रै बदलै हमेशा री ज़िन्दगी नी पाई सकदा।

²⁶ज़ुण मांहणु मूँ न होर मेरी गैला न शर्मिया सा, ता मांहणु रा बेटा मतलब हांऊँ ज़ैबै बी आपणी होर आपणै बापू री होर पवित्र स्वर्गदूतै री महिमा न ऐनु ता मूँ बी तेई मांहणु न शर्मिणा।

²⁷“हांऊँ तुसाबै सच़ बोला सा, औखै ज़ो खड़ै सी, तिन्हां न किछ़ ऐण्ढै सी तिन्हां परमेश्वरै रै राज्य री शक्ति बै ऐन्दा नी हेरलै तैबै तक तिन्हां नी मौरना।”

²⁸यीशु री इन्हां गैलै रै औठ रोज़ा बाद यीशु, पतरस याकूब होर यूहन्ना सैंघै प्रार्थना केरदै एकी उथड़ै ढौगा पैंधै नौठै।

²⁹ज़ैबै यीशु प्रार्थना केरदै लागै ती, ता तौखै तिन्हां सामनै यीशुऐ आपणा रूप बदलू होर झिकड़ै शेतै होईया च़मकदै लागै।

³⁰होर च़ानक मूसा होर एलिय्याह दुई मांहणु तौखै तिन्हां सैंघै गैला केरदै लागै ती।

³¹ते दूऐ आपणी पूरी महिमा सैंघै हेरूऐ होर यीशु रै मौरनै रै बारै न चर्चा केरदै लागैदै ती, ज़ो यरूश्लेम शैहरा न होणु आई ती।

³²तेई बौगतै पतरस होर तेइरै सैंघी नींज़ा न ती पर ज़ैबै ते पुरी तैरहा विउदै ता तिन्हैं यीशु री महिमा तिन्हां दुई मांहणु सैंघै हेरी ज़ो तेई सैंघै खड़ै ती।

³³ज़ैबै मूसा होर एलिय्याह यीशु हागै न ज़ाँदै लागै ता पतरसै बोलू, “ओ गुरू, आसरा औखै रौहणा केतरा शोभला सा, आसाबै त्रा तोम्बू बनाणै दै, एक तेरी तैंईंयैं, एक मूसै री तैंईंयैं होर एक एलिय्याह री तैंईंयैं।” सौ नी ती ज़ाणदा कि सौ कि बोलदा लागा सा।

³⁴पतरस हाज़ी बोलदा लागा ती कि ते एकी बादलै घेरै होर ते डौरदै लागै।

³⁵तैबै बादला मौंझ़ै न ऐ आवाज़ हुई, “ऐ मेरा प्यारा बेटा सा, तुसै ऐईरी शुणा, किबैकि ऐ मैं चुनूदा सा।”

³⁶एसा आवाज़ होंणै न बाद यीशु केल्हा ती, च़ेले च़ुप रौहै, होर ज़ो किछ़ तिन्हैं हेरू ती सौ तिन्हैं तिन्हां ध्याड़ै न कौसी बै नी दैसू।

³⁷दुज़ै ध्याड़ी ज़ैबै यीशु ढौगा पैंधै न भ्याँऊ आऐ ता लोकै री एक बड़ी भीड़ तिन्हां सैंघै मिली।

³⁸तैबै भीड़ा मौंझ़ै न एकी मांणहुऐ ज़ोरा सैंघै बोलू, “ओ गुरू जी, हांऊँ तुसा हागै अर्ज़ा केरा सा, मेरै बेटै पैंधै दया केरा किबैकि सौ मेरा, केल्हा बेटा सा।

³⁹तेइबै एक बुरी आत्मा ढौका सा होर सौ एकदम क्रींजा मारा सा। सौ बुरी आत्मा तेइबै ऐतरा मरोड़ा सा कि तेई रै मुँहा न झाग भौरिया सा होर सौ बड़ी मुशकिला सैंघै तेइबै छ़ौड़ा सा।

⁴⁰मैं तेरै च़ेले हागै अर्ज़ा केरी ती कि ते तेई बुरी आत्मा बै खोललै पर ते खोली नी सकै।”

⁴¹यीशुऐ ज़वाब धिना, “हे अविश्वासी होर हठी लोको, मूँ कैधी तैंईंयैं तुसा सैंघै रौहणा, होर तुसरी सौहणी? आपणै बेटै वे औखै आंण।”

⁴²सौ शोहरू ऐन्दा लागा ती कि बुरी आत्मै सौ पटकिया मरोड़ू पर यीशुऐ बुरी आत्मा डाँटी होर सौ शोहरू ठीक केरिया तेई रै बापू रै हवालै केरू।

⁴³तैबै सैबै लोका परमेश्वरै री महाशक्ति न हैरान हुऐ। पर ज़ैबै यीशु रै इन्हां कोमा न सारै लोका हैरान ती ता यीशुऐ आपणै च़ेले बै बोलू:

⁴⁴“तुसै इन्हां गैला बै ध्याना सैंघै शुणीत्, किबैकि मांहणु रा बेटा, दुश्मनै रै हौथा ढौकिणा।”

⁴⁵पर ऐ गैला च़ेले नी समझी किबैकि परमेश्वरै ऐ गैला तिन्हां न गुप्त रखी होर तै तेईन पुछ़णै न डौरा ती।

⁴⁶तैबै च़ेले एसा गैला पैंधै बहस केरदै लागै, कि सैभी न बड़ा कुण सा?

⁴⁷यीशु तिन्हरी मनै री गैल जाणी होर एक शोहरू आपु हागै खड़ा केरू।

⁴⁸तैबै यीशुऐ आपणै च़ेले बै बोलू, “ज़ुण ऐई शोहरू बै मेरी तैंईंयैं ग्रहण केरा सा सौ मुँभै ग्रहण केरा सा, होर ज़ुँण मुँभै ग्रहण केरा सा सौ ज़ुणियै हांऊँ भेज़ू सा तेइबै ग्रहण केरा सा, तुसा मौंझ़ै ज़ुण सैभी न होछा सा सौ सैभी न बड़ा सा।”

⁴⁹तैबै यूहन्नै यीशु बै बोलू, “ओ गुरू, आसै एक मांहणु तेरै नाँ न बुरी आत्मा खोलदा हेरू, आसै तेइबै नाँह केरू किबैकि सौ आसा पिछ़ै नैंई ऐन्दा लागा ती।”

⁵⁰पर यीशुऐ बोलू, “तेइबै नाँह मता केरदै, किबैकि ज़ुण तुसरा बरोधी नी ऑथि, सौ तुसा सैंघै सा।”

⁵¹ज़ैबै यीशु रै स्वर्गा बै ज़ाणै रा बौगत नेड़ आऊ ता तिन्हैं यरूश्लेम शैहरा बै ज़ाणै रा पक्का फैसला केरू।

⁵²यीशुऐ आपु न आगै दूत सामरी रै ग्राँ बै ज़ैगा त्यार केरदै भेज़ै।

⁵³पर तेई ग्राँ रै लोकै यीशु तौखै रूकणै नी धिनै, किबैकि सौ यरूश्लेम ज़ाँदा लागा सा।

⁵⁴एसा गैल हेरिया यीशु रै च़ेले याकूब होर यूहन्नै बोलू, “ओ गुरू जी, कि तुसै चाहा सी कि आसै हुकुम देइया स्वर्गा न औग औल़ीया इन्हां बै फुकलै?”

⁵⁵पर यीशुऐ तिन्हां धिराबै बै फिरिया बोलू, “तुसै नी ज़ाणदै कि तुसै कैण्ढी आत्मै रै सी, किबैकि मांहणु रा बेटा लोकै रै प्राणा बै नाश केरदा नी आऊदा, बल्कि बच़ाणै री तैंईंयैं आऊ सा।”

⁵⁶तैबै ते कौसी होरी ग्राँ बै नौठै।

⁵⁷ज़ैबै ते बौतै आगै ज़ाँदै लागैदै ती ता कौसियै तेइबै बोलू, “तुसै ज़ौखै-ज़ौखै ज़ालै, मूँ तुसा पिछ़ै-पिछ़ै ऐणा।”

⁵⁸यीशुऐ तेइबै बोलू, “गीदड़ै रै रौहणै री ज़ैगा होर आसमाना रै च़ीड़ू री बी ज़ैगा होआ सा; पर मांहणु रै बेटै होईया भी मूँ हागै सोणै री तैंईंयैं आपणा घौर नी ऑथि।”

⁵⁹यीशुऐ दुज़ै मांहणु बै बोलू, “मूँ पिछ़ै एज़” होर मेरा च़ेला बैंण। सौ राज़ी हुआ, होर यीशु बै बोलू, “ओ गुरू जी, मुँभै पैहलै घौरा ज़ाणै दैआत् मेरा बापू मौरनै न बाद हांऊँ तेइबै पौथिया एनु होर फिरी तुसा पिछ़ै च़लनु।”

⁶⁰यीशुऐ तेइबै बोलू, “तिन्हां लोका बै मुर्दै पौथणै दै ज़ुणा परमेश्वरै री नज़री न आत्मिक रूपा न मूँऐंदै सी। पर तू ज़ाइआ परमेश्वरै रै राज्य रै बारै न लोका बै समाद दै।”

⁶¹एकी होरी मांहणुऐ यीशु बै बोलू, “ओ प्रभु जी, मूँ तुसा पिछ़ै ऐणा होर तुसरै च़ेले बैणना पर पैहलै मुँभै आपणै परिवारा न विदा लेणै दैआ।”

⁶²यीशुऐ तेइबै बोलू, “ज़ुण मांहणु छेता बांहदेआ पिछ़ै हेरा सा सौ परमेश्वरै रै राज्य रै लायक नी ऑथि।”