Read Pahari, Kullu यूहन्ना 1 Bible Online

यूहन्ना 1 - Pahari, Kullu bible

यूहन्ना 1

¹शुरुआती न वचन ती, होर वचन परमेश्वरा सैंघै ती, होर वचन परमेश्वर ती।

²ऐ शुरुआती न परमेश्वरा सैंघै ती।

³सारी सृष्टि तेई रै ज़रियै पैदा हुई, होर ज़ो किछ़ पैदा हुआ सा, तिन्हां न कोई भी चीज तेइरै बगैर पैदा नैंई हुई।

⁴तेइन ज़िन्दगी ती होर सौ ज़िन्दगी मांहणु रा प्याशा ती।

⁵प्याशा निहारै न च़मका सा; होर निहारै सौ ग्रहण नी केरू ऑथि।

⁶एक मांहणु परमेश्वरै री धिरै न एज़िया खड़ा हुआ, ज़ुणिरा नाँ यूहन्ना ती।

⁷सौ मांहणु बै प्याशै री गुआही देणै री तैंईंयैं आऊ ती, ताकि सैभ मांहणु तेइरा सन्देश शुणिया बशाह आंणलै।

⁸यूहन्ना आपु ता प्याशा नी ऑथि, तैबै भी सौ लोका बै तेई प्याशै री गुआही देणै री तैंईंयैं आऊ ती।

⁹सच़ा प्याशा ज़ो हर एक मांहणु बै प्याशा केरा सा, दुनिया न ऐणु आल़ा ती।

¹⁰सौ दुनिया न ती होर, दुनिया तेई रै ज़रियै पैदा हुई, होर दुनिया रै लोकै सौ नैंई पछ़ियाणु, कि सौ कुण ती।

¹¹सौ आपणै लोका (यहूदी) मौंझ़ै बै आऊ होर तिन्हैं आपणै लोकै सौ नैंई अपनाऊ।

¹²पर ज़ेतरै सौ अपनाऊ, होर बशाह केरू, तेइयै तिन्हां बै परमेश्वरै री औलाद होंणै रा अधिकार धिना, मतलब तिन्हां बै ज़ुण तेइरै नाँ पैंधै बशाह डाहा सी।

¹³ते न ता लोहू सैंघै, न शरीरा री इच्छा सैंघै, न मांहणु री इच्छा सैंघै, पर परमेश्वरा न पैदा हुऐ सी।

¹⁴होर बचनै एक मांहणु रा रूप लेऊ होर अनुग्रह होर सच़ाई न पूरै होईया आसरै बिच़ा न रौहै, होर आसै तिन्हरी ऐण्ढी महिमा हेरी, ज़ैण्ढी बापू रै एकलौते बेटै री महिमा।

¹⁵यूहन्नै यीशु रै बारै न गुआही धिनी, होर जौरे सैंघै बोलू, “ऐ सौऐ सा, ज़ुणिरै बारै न मैं दसु ती, ज़ो मूँ न बाद ऐन्दा लागा सा, सौ मूँ न बड़ा सा किबैकि सौ मूँ न पैहलै ती।”

¹⁶किबैकि तिन्हरा ज़ो अनुग्रह सा आसै सैभियै पाऊ सा मतलब आशीषा पैंधै आशीष।

¹⁷किबैकि बिधान ता मूसै रै ज़रियै धिनु सा, पर अनुग्रह होर सच़ाई यीशु मसीह रै ज़रियै पूजी।

¹⁸परमेश्वर कोइयै कैधी भी नैंई हेरू, एकलौता बेटा ज़ो सच़िऐ परमेश्वर सा, होर तेइरै सैभी न नेड़ सा, तेइयै आसाबै रिहाऊ कि परमेश्वर कैण्ढा सा।

¹⁹यूहन्ना री गुआही ऐ सा, कि ज़ैबै यहूदी नेतै यरूश्लेम शैहरा न पुरोहित होर लेवी तिन्हां न ऐ पुछ़णै री तैंईंयैं भेज़ै, “तू कुण सा?”

²⁰तैबै तिन्हैं ऐ मनू कि होर नाँह नैंई केरू, पर मनू कि, “हांऊँ मसीह नी ऑथि।”

²¹तैबै तिन्हैं यूहन्ना न पुछ़ु, “तैबै तू कुण सा? कि तू एलिय्याह सा?” तेइयै बोलू, “हांऊँ नी ऑथि।” “ता कि तू सौ भविष्यवाणी केरनु आल़ा सा?” तेइयै ज़वाब धिना, “नैंई।”

²²तैबै तिन्हैं यूहन्ना न पुछ़ु, “तैबै तू कुण सा? तैबै आसै आपणै भेजणु आल़ै ज़वाब देई सकलै, कि तू आपणै बारै न कि बोला सा?”

²³यूहन्नै बोलू, “ज़ैण्ढा यशायाह भविष्यवाणी केरनु आल़ै बोलू ती, ‘सुनसान ज़ैगा न एक मांहणु री हाक्क शुणदी लागी सा कि, प्रभु रा स्वागत केरनै री तैंईंयैं आपणै आपा बै त्यार केरा।’ ”

²⁴ते किछ़ फरीसियै रै धिरै न भेज़ेंदै ती।

²⁵तिन्हैं यूहन्ना न ऐ सवाल पुछ़ु, “तू न ता मसीह ऑथि, होर न एलिय्याह, होर न सौ भविष्यवाणी केरनु आल़ा, ता तैबै बपतिस्मा किबै देआ सा?”

²⁶यूहन्नै तिन्हां बै ज़वाब धिना, “हांऊँ ता पाणी लाईया बपतिस्मा देआ सा पर तुसरै बीचा न एक मांहणु खड़ा सा, ज़ुणिबै तुसै नैंई जाणदै।

²⁷मतलब मूँ न बाद ऐणु आल़ा सा, जौसरै बूटै रै तस्मै हांऊँ खोलणै रै लायक नैंई ऑथि।”

²⁸ऐ गैला यरदन नौई न पारै बैतनिय्याह नगरा न हुई, ज़ौखै यूहन्ना लोका बै बपतिस्मा देआ ती।

²⁹दुज़ै रोज़ यूहन्नै प्रभु यीशु आपु धिरै ऐन्दा हेरिया बोलू, “हेरा ऐ परमेश्वरा रा गौभू (मेम्णु) सा, ज़ो दुनिया रा पाप च़किया नेया सा।

³⁰ऐ सौऐ सा ज़ुणिरै बारै न मैं बोलू ती; एक मांहणु मूँ न पिछ़ै ऐणा सा, ज़ो मूँ न भी बड़ा सा, किबैकि सौ मूँ न पेहलै ती।

³¹हांऊँ ता तिन्हां बै नैंई ती पछ़ियाणदा, कि सौ मसीहा ती, पर तैबै हांऊँ पाणी न बपतिस्मा देंदेआ आऊ, कि सौ इस्राइला पैंधै जाहिर होला।”

³²होर यूहन्नै ऐ गुआही धिनी, “मैं आत्मा कबूतरै रै रूपा स्वर्गा न उतरदा हेरू सा, होर सौ तेई पैंधै बेठा।

³³हांऊँ ता तिन्हां बै पच्छियांणदा नी ती, कि सौ मसीहा ती, पर ज़ुणियै हांऊँ पाणी सैंघै बपतिस्मा देणै री तैंईंयैं भेज़ू सा, तिन्हैं मुँभै बोलू, ‘ज़ुणी पैंधै तू आत्मा बै उतरदा होर बैशदा हेरला, तेइयै पवित्र आत्मा लाईया बपतिस्मा देणा सा।’

³⁴होर मैं हेरू होर सच़ बोला सा, कि ऐही परमेश्वरा रा बेटा सा।”

³⁵दुज़ै रोज भिरी यूहन्ना होर तिन्हरै च़ेले न दुई मांहणु खड़ै हुऐ ती,

³⁶यूहन्नै प्रभु यीशु पैंधै ज़ो ज़ाँदै लागे ती, हेरू होर बोलू, “हेरा ऐ परमेश्वरा रा गौभू सा।”

³⁷तैबै ते दूऐ च़ेले यूहन्नै री ऐ शूणीऐ प्रभु रै पिछ़ै औंढदै लागे।

³⁸प्रभु यीशु पिछ़ै मुड़िया ते पिछ़ै ऐन्दै हेरे होर तिन्हां बै बोलू, “तुसै कुणी बै बोलदै लागेन्दे सी?” तिन्हैं प्रभु यीशु बै बोलू, “ओ गुरू जी, तुसै कौखै रौहा सी?”

³⁹प्रभु यीशुऐ तिन्हां बै बोलू, 9 “च़ला, ता हेरा।” तैबै तिन्हैं जाईया प्रभु री रौहणै री ज़ैगा हेरी, होर तेई रोज़ प्रभु यीशु सैंघै रौहै ऐ सैभ किछ़ लगभग च़ार बाज़ै मौंझ़ै हुआ ती।

⁴⁰तिन्हां दुई न, पिछ़ै यूहन्ना री गैला शूणीया प्रभु यीशु रै पिछ़ै च़लै ती। एक शमौन पतरसा रा भाई अन्द्रियास ती।

⁴¹तेइयै पैहलै आपणै सैंघै भाई शमौना बै मिलिया बोलू, आसाबै प्रभु मतलब मसीह मिलू।

⁴²अन्द्रियासै शमौन यीशु हागै बै आंणु, यीशुऐ तेई पैंधै हेरिया बोलू, “तू यूहन्ना रा बेटा शमौन सा, पतरस सा, मतलब पतरस बोलीणा सा।”

⁴³दुज़ै रोज प्रभु यीशुऐ गलील ज़िला बै जाँणा सोच्चु, प्रभु यीशु फिलिप्पुस सैंघै मिलू होर बोलू, “मूँ पिछ़ै न एज़ा।”

⁴⁴फिलिप्पुस, अन्द्रियास होर पतरसा रै बैतसैदा शैहरा रै रौहणु आल़ै ती।

⁴⁵फिलिप्पुस नतनऐल सैंघै मिलू होर तेइबै “ज़ुणिरी चर्चा मूसै रै बिधान न होर भविष्यवाणी केरनु आल़ै केरी ती, सौ आसाबै मिलू सा, सौ यूसुफा रा बेटा यीशु नासरी सा।”

⁴⁶नतनऐले तेइबै बोलू, “कि कोई शोभली चीज़ नासरता न मिली सका सा?” फिलिप्पुसै तेइबै बोलू, “चौलिया हेरा।”

⁴⁷यीशुऐ नतनऐल आपु धिरै बै ऐन्दा हेरू तेइरै बारै न बोलू, “हेरा, ऐ पक्का इस्राइली सा, ऐईन कोई भी बैर नी ऑथि।”

⁴⁸नतनऐल यीशु बै बोलू, “तुसै मुँभै कैण्ढै जाँणा सी?” प्रभु यीशुऐ तेइबै बोलू, “एथा न पैहलै कि फिलिप्पुस तौभै शाधदा ज़ैबै तू फेगड़े रै बुटै हेठै बेठा ती, तैबै मैं तू हेरू ती।”

⁴⁹नतनऐले प्रभु यीशु बै बोलू, “हे गुरू, तुसै परमेश्वरा रै बेटै सी; तू इस्राइला रा महान राज़ा सा।”

⁵⁰यीशुऐ तेइबै ज़वाब धिना, “मैं तौभै बोलू ती, कि मैं तू फेगड़े रै बुटै हेठै हेरू ती तू कि तैबै बशाह केरा सा? तो ता ऊँई न भी बड़ै-बड़ै कोम हेरणै।”

⁵¹तैबै प्रभु यीशुऐ तेइबै बोलू, “हांऊँ तुसाबै सच़-सच़ बोला सा तुसा स्वर्गा बै खुला, होर परमेश्वरा रै स्वर्गदूता बै हांऊँ मांहणु रै बेटै सैंघै ओसदै होर ऊझै ज़ाँदै हेरणा।”