Read Pahari, Kullu यूहन्ना 11 Bible Online

यूहन्ना 11 - Pahari, Kullu bible

यूहन्ना 11

¹तिन्हां ध्याड़ै न मरियम होर तेसरी बैहण मार्था रा भाई लाज़र बीमार ती ज़ो बैतनिय्याह ग्राँ रा रौहणु आल़ा ती।

²ऐ सौहै मरियम ती ज़ुणियै बादा न कीमती खुशबूदार तेल मौल़िया, यीशु रै ज़ौघा न आपणै चौड़े लाईया टुशु ती, तेसा रा भाई लाज़र बीमार ती।

³तैबै तेसरी बैहणिये तिन्हां बै समाद भेज़ू, “ओ प्रभु हेर, ज़ुणी सैंघै तू झ़ुरी डाहा सा, सौ बीमार सा।”

⁴ऐ शूणीया प्रभु यीशुऐ बोलू, “ऐ बीमारी री मौऊत नैंई पर परमेश्वर रै बेटै महिमा री तैंईंयैं सा, ता तेई रै ज़रियै परमेश्वरै रै बेटै री महिमा होली।”

⁵यीशु, मार्था होर तेसरी बैहण होर भाई लाज़रा सैंघै झ़ुरी डाहा ती।

⁶तैबै भी ज़ैबै यीशुऐ शूणु कि लाज़र बीमार सा, ता ज़ुणी ज़ैगा पैंधै सौ ती, तौखै दुई रोज़ होर रुके।

⁷दुई रोज़ा बाद यीशुऐ च़ेले बै बोलू “एज़ा, आसा होरी घेरै यहूदिया ज़िलै बै जाँणा (किबैकि लाज़र रा ग्राँ बैतनिय्याह रै यहूदी ज़िलै न ती)।”

⁸च़ेले यीशु बै बोलू, “ओ गुरू, ऐबै ता यहूदी लोका तुसा पैंधै पात्थरै लाईया ‍‌‌‌बाँहणा चाहा ती, होर कि तुसै फिरी तौखै बै जाँणा सा?”

⁹यीशुऐ ज़वाब धिना, “कि ध्याड़ी रै बाराह घँटै नी होंदै?” अगर कोई ध्याड़ी च़ला सा ता ठोकर नैंई खाँदा, किबैकि सौ सूर्य रा प्याशा हेरा सा।

¹⁰पर अगर कोई राती बै च़ला सा, ता सौ ठोकर खा सा, किबैकि तेई बौगत प्याशा नैंई होंदा।

¹¹यीशुऐ ऐ गैला बोली होर तेथा न बाद तिन्हां बै बोल्दै लागै, “आसरा सैंघी लाज़र सुता सा, हांऊँ तेइबै जगाणै री तैंईंयैं च़लू सा।”

¹²तैबै च़ेले यीशु बै बोलू, “ओ गुरू, अगर सौ मूआँ सा, ता तेई बच़णा।”

¹³यीशुऐ ता तेइरी मौउती रै बारै न बोलू ती, पर तिन्हैं समझू कि तिन्हैं निंजा न सोणै रै बारै न बोलू।

¹⁴तैबै यीशुऐ तिन्हां बै साफ-साफ बोलू, “लाज़र मुँआ सा;

¹⁵होर तुसरी तैंईंयैं तुसरी खरा हुआ कि हांऊँ तौखै नी ती, ताकि तुसै बशाह केरी सकलै। पर ऐबै एज़ा, आसा तेई आगै बै जाँणा।”

¹⁶तैबै थौमा ज़ो तेइबै दिदमुस बोलिया ती, आपणै सैंघी च़ेले बै बोलू, “एज़ा, आसा भी इन्हां सैंघै मौरणै री तैंईंयैं जाँणा।”

¹⁷यीशु होर तेइरै च़ेले बैतनिय्याह ग्राँ न पूज़ै तौखै यीशु बै पता लागा कि लाज़रा री लाशा बै कब्रा न डाईया च़ार रोज़ हुऐ ती।

¹⁸बैतनिय्याह ग्राँ यरूश्लेम शैहरा रै नेड़ कोई लगभग त्रा किलोमीटरा री दूरी पैंधै ती।

¹⁹बोहूऐ यहूदी मार्था होर मरियम रै नेड़ तेसरै भाई री मौऊती पैंधै शान्ति देणै री तैंईंयैं आऐ ती।

²⁰ज़ैबै मार्थे यीशु रै ऐणै री खबर शूणी ता तिन्हां सैंघै मिलणै री तैंईंयैं नौठी, पर मरियम घौरा बैशिया रौही।

²¹मार्थे यीशु बै बोलू, “ओ प्रभु अगर तुसै औखै हौन्दे ता, मेरै भाई कैधी नी ती मौरणा।

²²पर ऐबै हांऊँ भी जाँणा सा कि ज़ो किछ़ तुसै परमेश्वरा न मौंगलै, परमेश्वर तुसाबै देणा।”

²³यीशुऐ तेसा बै बोलू, “तेरा भाई जी उठणा सा।”

²⁴मार्थे तेइबै बोलू, “हांऊँ जाँणा सा कि आखरी रोज़ा न होरी घेरै जीणै री तैंईंयैं रै बौगता न मेरा भाई ज़ी उठणा।”

²⁵यीशुऐ तिन्हां बै बोलू, “हांऊँ सौ सा ज़ो मूँऐंदै बै ज़िन्दा केरा सा, ज़ो कोई मूँ पैंधै बशाह केरा सा अगर सौ मौरला भी ता तैबै भी तेई ज़िन्दै होंणा।

²⁶होर ज़ो कोई ज़िन्दा सा, मूँ पैंधै बशाह केरा सा, तेई कैधी बी नैंई मौरणा। कि तू ऐई गैला पैंधै बशाह केरा सा?”

²⁷तेसै बोलू, “हाँ, हे प्रभु, हांऊँ बशाह केरा सा कि परमेश्वरा रा बेटा मसीह ज़ो दुनिया न ऐणु आल़ा ती, सौ तुसै सी।”

²⁸ऐ बोलिया सौ नौठी, होर आपणी बैहण मरियम शधाई होर चु़पचाप बोलू, “गुरू, औखै सी होर तुसाबै शाधदा लागु सा।”

²⁹ऐ शुणदै सौ फट उठी होर यीशु आगै बै नौठी।

³⁰यीशु हाज़ी ग्राँ रै बाहरै ती, ज़ौखै तेइबै मार्था मिली ती।

³¹तैबै ज़ो यहूदी तेसा सैंघै घौरा न ती, होर तेसा बै बशाह देन्दै लागै ती ऐ हेरिया कि मरियम फट उठिया बाहरै बै नौठी सा। तिन्हैं ऐ समझू कि सौ कब्र हागै बै रौणै री तैंईंयैं चौली सा। तैबै ते बी तेसरै पिछ़ै न नौठै।

³²ज़ैबै मरियम तौखै पूजी ज़ौखै प्रभु ती ता तिन्हां बै हेरिया यीशु रै ज़ोंघा पैंधै पौड़ी, होर बोलू, “ओ गुरू, अगर तुसै औखै होंदै ता मेरा भाई नी ती मौरणा।”

³³ज़ैबै यीशु होर तिन्हां सैंघै यहूदियै लोक ज़ो तिन्हां सैंघै आऐ ती रोंदै हेरे ता यीशु आत्मा न होर भी बोहू दुःखी हुऐ, होर उदास हुऐ।

³⁴होर बोलू, तुसै तेइरी लाश कौखै रखी सा? तिन्हैं यीशु बै बोलू, “ओ गुरू, च़लिया हेरी लेआ।”

³⁵यीशु रूणै।

³⁶तैबै यहूदी लोका बोल्दै लागै, “हेरा सौ लाज़रा सैंघै केतरी झ़ुरी डाहा सा।”

³⁷पर तिन्हां मौंझ़ै किछ़ बोल्दै लागै, “ऐई मांहणुऐ कांणै री औछ़ी ठीक केरी। कि ऐ लाज़रा बै मौरनै न नैंई बच़ाई सका ती?”

³⁸यीशु आपणी आत्मा न बोहू दुःखी होईया कब्रा पैंधै नौठै। सौ एक गुफा ती, होर एक पात्थर तुंई पैंधै रखु ती।

³⁹यीशुऐ बोलू, “पात्थरा बै फेटे केरा।” तेई लाज़रै री बैहण मार्था यीशु बै बोल्दी लागी, “ओ गुरू, ऐथा न ता ऐबै गंदी बास एज़ा सा, किबैकि तेइबै मोरिया च़ार रोज हुऐ सी।”

⁴⁰यीशुऐ तेसा बै बोलू, “कि मैं तुसाबै नी ती बोलू कि अगर तू बशाह केरली, ता परमेश्वरै री महिमा हेरणी।”

⁴¹तैबै तिन्हैं सौ पात्थर फ़ेटै केरू। यीशुऐ स्वर्गा धिरै हेरिया बोलू, “ओ बापू हांऊँ तेरा धन्यवाद केरा सा, कि तुसै मेरी प्रार्थना शुणी सी।

⁴²हांऊँ जाँणा ती, कि तुसै हमेशा मेरी शुणा सी पर ज़ो भीड़ ओरै — पौरै खड़ी सी तिन्हरी बजहा सैंघै मैं ऐ ज़ोरा न बोलू, ज़ुणी सैंघै कि बशाह केरलै कि तुसै हांऊँ भेज़ू सा।”

⁴³ऐ बोलिया यीशुऐ, बड़ी ज़ोरा सैंघै बोलू, “ओ लाज़र, बाहरै एज़।”

⁴⁴ज़े मूँआ ती, सौ कफना सैंघै हौथ ज़ौघा बौनु हौन्दा बाहरै निकतु, होर तेइरा मूँ टौलै सैंघै पलेटू होन्दा ती, यीशु तिन्हां बै बोलू, “ऐईबै खोला होर जाँणै देआ।”

⁴⁵तैबै ज़ो यहूदी लोका मरियम सैंघै आऐ ती, होर यीशु रा कोम हेरू ती, तिन्हां न बोहूऐ बशाह केरू।

⁴⁶पर तिन्हां न कोइयै फरीसी हागै जाईया यीशु रै कोमा रा समाचार धिना।

⁴⁷इन्हां गैला न मुख्यपुरोहिते होर फरीसियै लोकै बड़ी सभा शाधी होर बोलू, “आसै कि केरा सी? ऐ मांहणु ता बोहू नशाण रिहा सा।

⁴⁸अगर आसै तेइबै ऐण्ढै छ़ौड़ी देले, ता सैभी तेई पैंधै बशाह आंणना सा, होर रोमी देशा रै लोका एज़िया आसरी मन्दिर होर देश, दुई पैंधै आपणा अधिकार केरना सा।”

⁴⁹तैबै तिन्हां न कैफा नाँ रै एकी मांहणुऐ ज़ो तेई बौर्षा रा महापुरोहित ती। तिन्हां बै बोलू, “तुसै ता किछ़ भी नी जाणदै,

⁵⁰होर ऐ नैंई समझदै कि तुसरी तैंईंयैं ऐ खरा सा, कि आसरै मांहणु री तैंईंयैं एक मांहणु मौरला, होर पूरै देशा रै लोक मौरलै।”

⁵¹ऐ गैला तेइयै आपु धिरै न नैंई बोली, (यीशु आपणै मौरनै रै बारै न कई बार बोला ती।) पर तेसा बोर्षा रा महापुरोहित होईया तेइयै भविष्यवाणी केरी। कि यीशु इस्राइली लोका री तैंईंयैं मौरणा;

⁵²होर न सिर्फ़ तिन्हां री तैंईंयैं, पर तिन्हां री तैंईंयैं बी कि परमेश्वरै रै सैभ औलादा बै एक केरी देला।

⁵³तैबै तेई रोजा न लेइया यहूदी नेता यीशु बै मारणै री तरकीब बणान्दे लागै।

⁵⁴तैबै यीशु तेई बौगता न होर यहूदी लोका मौंझ़ै सैभी रै सामने नैंई घूँमदा ती। पर तौखै न बौणा रै नेड़ देशा न इफ्राइम नाँ रै एक नगरा बै नौठै, होर आपणै च़ेले सैंघै तौखै रौंहदै लागै।

⁵⁵यहूदियै री फसह रा त्यौहार नेड़ ती, होर बोहू लोका फसह रै पैहलै रोजा न यरूश्लेम शैहरा बै नौठै कि आपणै आपा बै रुआज़ा रै मुताबक च़ोखै केरी सकलै।

⁵⁶तैबै ते यीशु बै तोपदै लागै, होर मन्दिरा न खड़ै होईया आपु न बोलदै लागे, “तुसै कि सोच़ा सी? कि तेई त्यौहारा न नैंई ऐणा।”

⁵⁷प्रधानै होर मुख्यपुरोहिते होर फरीसियै ऐ हुक्म धिना ती कि अगर कोई ऐ जाणलै कि यीशु कौखै सा ता दसलै, फिरी तेइबै ढोकलै।