Read Pahari, Kullu यूहन्ना 13 Bible Online

यूहन्ना 13 - Pahari, Kullu bible

यूहन्ना 13

¹फसह रै त्यौहारा न पैहलै, ज़ैबै यीशुऐ जाणु कि मेरा सही बौगत आऊ सा, कि दुनियां बै छ़ौड़िया बापू हागै वापस जाँणा, ता आपणै लोका ज़ो दुनियां न सी ज़ैण्ढी झ़ुरी सौ डाआ ती, आखरी रै रोजा न तैण्ढी झ़ुरी डाआन्दा रौहु।

²ज़ैबै यीशु होर तेइरै च़ेले राती रोटी खाँदै लागै ती। शैतानै पैहलै न ओरु यीशु बै धोखा देणैं री तैंईंयैं शमौना रै बेटै यहूदा इस्करियोती रै मना न ऐ भौरू ती।

³यीशुऐ ऐ जाँणा ती कि बापुए सैभ किछ़ तेइरै हौथा न धिना सा, होर ऐ कि परमेश्वर हागै न आऐ सी, होर परमेश्वरा हागै बै जाँदै लागै सी।

⁴रोटी खाँणै न उठिया आपणै बाहरलै टौलै खोलै, होर गाच़ी लाईया आपणा च़ेका बौनु।

⁵तैबै भाँडै न पाणी भौरिया च़ेले री ज़ोंघा धोणै री तैंईंयैं होर ज़ो गाच़ी चेकै न बौनी होन्दी ती, तेई लाईया तिन्हरी ज़ोंघा टूशदा लागा।

⁶ज़ैबै यीशु शमौन पतरसा हागै पुजू, ता पतरसै यीशु बै बोलू, “ओ प्रभु, कि तुसै मेरी ज़ोंघा धोआ सी?”

⁷यीशुऐ तेइबै ज़वाब धिना, “ज़ो हांऊँ केरा सा, तू तेइबै ऐबै नी जाणदा, पर एथा न बाद समझणा सा।”

⁸पतरसै यीशु बै बोलू, “तुसा मेरी ज़ोंघा कैधी भी नी धोणी सा।” ऐ शुणिया यीशुऐ तेइबै बोलू, “अगर हांऊँ तौभै नैंई धोनू ता तेरा मेरा कोई रिश्ता नैंई।”

⁹शमौन पतरसै यीशु बै बोलू, “ओ प्रभु, ता मेरी ज़ोंघा केल्ही नैंई, पर हौथ होर मुँडी भी धोइया दै।”

¹⁰यीशुऐ तेइबै बोलू, “ज़ुण नहांऊँदा सा तेइबै ज़ोंघै रै सिवाए होर किछ़ धोणै री जरूरी नैंई ऑथि, पर सौ बिलकुल च़ोखा सा, पर सैभी रै सैभ नैंई।”

¹¹यीशु ता आपणै ढौकणै धियाणु आल़ै बै जाँणा ती तैबै तेइबै बोलू, “तुसै सारै रै सारै च़ोखै नैंई ऑथि।”

¹²ज़ैबै यीशुऐ तिन्हरी ज़ोंघा धोई, होर आपणै टौलै लाईया फिरी बेशु, ता तिन्हां बै बोल्दा लागा, कि तुसै कि समझू कि मैं तुसा सैंघै कि केरू?

¹³तुसै मुँभै गुरू, होर प्रभु, बोला सी, होर ठीकै बोला सी, किबैकि हांऊँ सौहै सा।

¹⁴अगर मैं प्रभु होईया होर गुरू होईया तुसरी ज़ोंघा धोई, ता तुसाबै बी एकी होरी री ज़ोंघा धोणी चेहिऐ।

¹⁵किबैकि मैं तुसाबै नमूना रिहाऊ सा, कि ज़ैण्ढा मैं तुसा सैंघै केरू सा, तुसै भी तैण्ढा केरा।

¹⁶किबैकि हांऊँ तुसाबै सच़-सच़ बोला सा नोकर आपणै मालका न बड़ा नैंई ऑथि, होर न भेज़ू होन्दा प्रेरित आपणै भेजणु आल़ै न।

¹⁷तुसै ऐ गैला जाँणा सी होर अगर तिन्हां पैंधै चललै ता धन्य सी।

¹⁸हांऊँ तुसा सैभी रै बारै न नैंई बोली सकदा, ज़ुणा मैं चुनै सी, तिन्हां बै हांऊँ जाँणा सा, पर ऐ तैबै सा, कि पवित्र शास्त्रा रा ऐ बचन पूरा होला, ज़ुणियै मेरै सैंघी होईया मूँ सैंघै रोटी खाई सा, तेइयै मुँभै धोखा धिना।

¹⁹“ऐबै हांऊँ तेई रै होंणै न पैहलै जताईया देआ सा ज़ैबै ऐ होला ता तैबै तुसा बशाह केरना सा, कि हांऊँ सौहै सा।

²⁰हांऊँ तुसाबै सच़-सच़ दसा सा, सौ मुँभै ग्रहण केरा सा, होर ज़ो मुँभै ग्रहण केरा सा, सौ मेरै भेज़णु आल़ै बै ग्रहण केरा सा।”

²¹ऐ गैला बोलिया यीशु आत्मा न उदास होईया होर ऐ गुआही धिनी, “हांऊँ तुसाबै सच़ — सच़ बोला सा कि तुसा मौंझ़ै न एकी हांऊँ ढौकणै द्याणा सा।”

²²च़ेले शक्का न, कि यीशु कुणी रै बारै न बोल्दा लागा सा, तै एकी होरी बै हेरदै लागै।

²³यीशु रै च़ेले मौंझ़ै न एक यूहन्ना ज़ुणी सैंघै यीशु झ़ुरी डाहा ती, सौ यीशु री छाती धिरै बै टुँबड़ै होईया बेठा ती।

²⁴शमौन पतरसै तेई धिरै भाल़िया पुछ़ु, “दसा ता, सौ कुणी रै बारै न बोलदा लागा सा?”

²⁵तैबै तेइयै तैण्ढी तैरहा यीशु री छाती धिरै झुकिया यीशु न पुछ़ु, “ओ प्रभु, सौ कुण सा?”

²⁶यीशुऐ ज़वाब धिना, “ज़ुणिबै ऐ रोटी रा टुकड़ा च़ोकिया देला सौहै सा।” होर यीशुऐ टुकड़ा च़ोकिया शमौन इस्करियोती रै बेटै यहूदा बै धिना।

²⁷रोटी रा टुकड़ा लेन्देआ शैतान तेई रै आँध्रै तुरू। तैबै यीशुऐ तेइबै बोलू, “ज़ो तू केरा सा, छेकै केर।”

²⁸पर बेशू होंदै न कोइयै नी ज़ाणू कि यीशुऐ ऐ गैल किबै बोली।

²⁹यहूदा आगै थैली रौहा ती, तैबै कोई कोइयै बुझू कि यीशु तिन्हां बै बोल्दा लागा सा कि ज़ो किछ़ आसै जाचा बै लोड़ी तेई लेईया आंण नैंई ता ऐ कि किछ़ गरीबा बै दै।

³⁰यहूदा रोटी खाँणै न बाद छेकै बाहरै बै नौठा, होर ऐ राती रा बौगत ती।

³¹ज़ैबै यहूदा बाहरै नौठा ता यीशुऐ बोलू, ऐबै हांऊँ मांहणु रै बेटै री महिमा हुई सा, होर परमेश्वरै री महिमा तेथा न हुई।

³²अगर तेथा न परमेश्वरै री महिमा हुई सा, ता परमेशवर भी आपु न तेइरी महिमा केरनी होर, छेकै केरनी।

³³ओ शोहरूओ, हांऊँ होर थोड़ी देर तुसा सैंघै सा, फिरी तुसा हांऊँ तोपणा सा, होर ज़ैण्ढा मैं यहूदी नेतै बै बोलू ती, ज़ौखै हांऊँ जा सा, तौखै तुसै नैंई एज़ी सकदै, तैण्ढाऐ हांऊँ ऐबै तुसा हागै बी बोला सा।

³⁴“हांऊँ तुसाबै एक नोंऊँआं हुक्म देआ सा कि एकी दुज़ै न झ़ुरी डाआ, ज़ैण्ढी मैं तुसा सैंघै झ़ुरी डाई सा तैण्ढीऐ तुसै भी एकी होरी सैंघै झ़ुरी डाआ।

³⁵अगर आपु न झ़ुरी डाहलै ता, ऐथा न सैभी ज़ाणना सा कि तुसै मेरै च़ेले सी।”

³⁶शमौन पतरसै यीशु बै बोलू, “ओ प्रभु तुसै कौखै बै च़लै सी?” प्रभु यीशुऐ ज़वाब धिना “ज़ौखै हांऊँ जा सा तौखै तुसै ऐबै मेरै पिछ़ै नैंई एज़ी सकदै, पर ऐथा न बाद मेरै पिछ़ै ऐणा।”

³⁷पतरसै तेइबै बोलू, “ओ प्रभु, ऐबै हांऊँ तेरै पिछ़ै किबै नैंई एज़ी सकदा? मूँ ता तेरी तैंईंयैं आपणी जान भी देणी।”

³⁸यीशुऐ ज़वाब धिना, “कि तौ मेरी तैंईंयैं आपणी जान देणी? हांऊँ तौभै सच़-सच़ बोलदा लागा सा कि ज़ाँ तैंईंयैं मुर्गा नैंई बाशणा ताँ तैंईंयैं तू त्राई घेरै मेरा नाँह नैंई केरना।”