Read Pahari, Kullu यूहन्ना 14 Bible Online

यूहन्ना 14 - Pahari, Kullu bible

यूहन्ना 14

¹“तुसरा मन उदास नी होला, तुसै परमेश्वरा पैंधै बशाह रखा सी होर मूँ पैंधै बी बशाह रखा।

²मेरै बापू रै घौरा न रौहणै री तैंईंयैं बोहू ज़ैगा सा, अगर नी होंदै ता मूँ तुसाबै बोलणा ती, किबैकि मूँ तुसरी तैंईंयैं ज़ैगा त्यार केरनै री तैंईंयैं जाँणा सा।

³होर अगर हांऊँ जाईया तुसरी तैंईंयैं ज़ैगा त्यार केरनु, ता तैबै एज़िया तुसा आपणै तौखै बै नेणै, कि ज़ौखै मूँ रौहणा, तौखै तुसा भी रौहणा।

⁴“ज़ौखै हांऊँ जा सा तुसै तौखली बौत जाँणा सी।”

⁵थौमे यीशु बै बोलू, “ओ प्रभु, आसै नैंई जाणदै कि तू कौखै बै जा सा, ता बौत कैण्ढै ज़ाणनी?”

⁶यीशुऐ तेइबै बोलू, “बौत होर सच़ाई होर ज़िन्दगी हांऊँ सा, बिना मेरै ज़रियै कोई बापू हागै बै नैंई जाई सकदा।

⁷अगर तुसै हांऊँ जाणु होन्दा ता मेरै बापू भी जाण न ती, होर ऐबै जाँणा सी होर हेरू भी सा।”

⁸फिलिप्पुसै यीशु बै बोलू, “ओ प्रभु, बापू बै आसा न रिहा सौहै आसरी तैंईंयैं रज़ सा।”

⁹यीशुऐ तिन्हां बै बोलू, “ओ फिलिप्पुस, हांऊँ ऐतरै रोजा न तुसा सैंघै रौहु सा होर कि तू मुँभै नी जाणदा? ज़ुणियै हांऊँ हेरू सा तेइयै बापू भी हेरू सा?

¹⁰कि तू बशाह नी केरदा कि हांऊँ बापू न सा होर बापू मूँ न सा? ऐ गैला ज़ो हांऊँ तुसाबै बोला सा आपणी धिरै न नैंई बोलदा लागा, पर बापू मूँ न रौहिया आपणै कोम केरा सा।

¹¹मेरा बशाह केरा कि हांऊँ बापू न सा होर बापू मूँ न सा, नैंई ता मेरै चमत्कारै रै कोमै री बजहा न मेरा बशाह केरा।

¹²“हांऊँ तौभै सच़-सच़ बोला सा ज़ो मूँ पैंधै बशाह रखा सा ऐ कोम ज़ो हांऊँ केरा सा तेई भी केरना, पर ऐथा न भी बड़े कोम केरनै किबैकि हांऊँ बापू आगै बै जा सा।

¹³ज़ो किछ़ तुसै मेरै अधिकारा न मौंगलै, सौहै मूँ केरना कि बेटै री बजहा न बापू री महिमा होली।

¹⁴अगर तुसै मूँ न मेरै नाँ न किछ़ मौंगलै, ता मूँ सौ केरना।

¹⁵“अगर तुसै मूँ सैंघै झ़ुरी डाहलै ता, मेरा हुक्म बी मनणा।

¹⁶मूँ बापू हागै अर्ज़ा केरनी, होर तेई तुसाबै एक सैंघी भेज़णा कि सौ तुसा सैंघै सदा री तैंईंयैं रौहला।

¹⁷मतलब सच़ाई री आत्मा, ज़ुणिबै दुनिया ग्रहण नैंई केरदा, किबैकि सौ तेइबै नैंई हेरदै, होर न तेइबै जाणदै, तुसै तेइबै जाँणा सी, किबैकि सौ तुसा सैंघै रौहा सा, होर तेई तुसा न होंणा सा।

¹⁸“मूँ तुसै अनाथ नी छ़ौड़णै, मूँ तुसा आगै बै ऐणा सा।

¹⁹होर थोड़ीऐ देर रौही सा कि फिरी दुनियां हांऊँ नी हेरणा, पर तुसा हांऊँ हेरणा किबैकि हांऊँ ज़िन्दा सा, तुसा भी ज़िन्दै रौहणा।

²⁰तेई रोज़ ज़ैबै मूँ वापस ऐणा, ता तुसा जाणना कि हांऊँ आपणै बापू न सा, होर तुसै मूँ न होर हांऊँ तुसा न।

²¹ज़ुणी हागै मेरा हुक्म सा होर सौ तिन्हां बै मना सा सौ मूँ सैंघै झ़ुरी डाआणी सा होर आपणै आपा बै मूँ तेई पैंधै हेरिणा सा।”

²²सौ यहूदा ज़ो इस्करियोती नी ती ऑथि, तेइयै बोलू, “ओ प्रभु, कि हुआ तुसै आपणै आपा बै आसा पैंधै रिहाणा चाहा सी होर दुनिया रै लोका पैंधै नैंई?”

²³यीशुऐ तेइबै ज़वाब धिना, “अगर कोई मूँ सैंघै झ़ुरी डाआला ता तेई मेरै वचना मनणै, होर मेरै बापू तेई सैंघै झ़ुरी डाआणी, होर आसा तेई हागै बै ऐणा होर तेई सैंघै रौहै केरना सा।

²⁴ज़ो मूँ सैंघै झ़ुरी नी डाआन्दा, सौ मेरै वचना बै नी मनदा, होर ज़ो वचन तुसै शुणा सी सौ मेरा नैंई पर मेरै बापू रा सा, ज़ुणियै हांऊँ भेज़ू सा।

²⁵“ऐ गैला मैं तुसा सैंघै रौहन्दी घेरै तुसाबै बोली।

²⁶पर मज़त केरनु आल़ा मतलब पवित्र आत्मा ज़ो बापू मेरै नाँ न भेजणा, तेई तुसाबै सारी गैला सिखाणी, होर ज़ो किछ़ हांऊँ तुसाबै बोला सा, तेई तुसाबै याद दिलाणा सा।”

²⁷हांऊँ तुसाबै शान्ति देआ सा, ज़ो शान्ति मूँ हागै सा। ऐ शान्ति सौ नी ऑथि ज़ो तुसाबै दुनिया रै लोका देआ सा। तुसरा मन उदास नी हुआ लोड़ी होर न डौरू लोड़ी।

²⁸तुसै शुणु सा, कि मैं तुसाबै बोलू सा, हांऊँ जा सा, होर तुसा आगै फिरी ऐणा अगर तुसै मूँ सैंघै झ़ुरी रखा सी, ता ऐसा गैला न खुश होआ सी, कि हांऊँ बापू हागै जा सा किबैकि बापू मूँ न बड़ा सा।

²⁹होर ऐ सैभ गैला होंणै न पैहलै तुसाबै बोलू सा कि ज़ैबै सौ होला ता, तैबै तुसा मूँ पैंधै बशाह केरना सा।

³⁰मूँ ऐबै तुसा सैंघै होर बोहू गैला नैंई केरनी, किबैकि दुनियां न राज़ केरनु आल़ा शैतान ऐणु आल़ा सा। मूँ पैंधै तेइरा कोई हक नैंई।

³¹पर ऐ तैबै होआ सा कि दुनियां जाणली कि हांऊँ बापू सैंघै झ़ुरी डाआ सा होर बापुए मुँभै हुक्म धिना सा हांऊँ तैण्ढाऐ केरा सा। उठा, औखै न जाँणा।