Read Pahari, Kullu यूहन्ना 15 Bible Online

यूहन्ना 15 - Pahari, Kullu bible

यूहन्ना 15

¹सच़ी अँगूरै री लूड़ हांऊँ सा; मेरा बापू किसान सा।

²ज़ो डाल़ी मूँ न सा, होर नैंई फ़ौल्दी, तेसा बै सौ काटा सा होर ज़ो फौल़ा सा, तेइबै सौ छाँटा सा ताकि होर फौल़ै।

³तुसै ता तेई बचने री बजहा न ज़ो मैं तुसाबै बोलू सा, च़ोखै होआ।

⁴तुसै मूँ न बणीया रौहा, होर मूँ तुसा न ज़ैण्ढै शांणी मतलब अँगूरै री लूड़ी न बणीया नैंई रौहली ता आपणै आपा न नैंई फ़ौल़ी सकदी, तैण्ढै तुसै भी अगर मूँ न बणीया नी रौहलै ता नैंई फ़ौल़ी सकलै।

⁵हांऊँ अँगूरा री लूड़ी सा तुसै डाई सी ज़ो मूँ न बणीया रोआ सा हांऊँ तेईन सौ बोहू फ़ोल़ा सा, किबैकि मूँ न अलग होईया तुसै किछ़ भी नी केरी सकदै।

⁶अगर कोई मूँ न बणीया नी रौहन्दा ता सौ शांणी सांही काटिया शेटणा सा, होर शुका सा होर मांहणु तिन्हां बै कठा केरिया औगी न शेटा सी, होर ते फुकिया सी।

⁷अगर तुसै मूँ न बणीया रौहलै होर मेरा बचन तुसा न बणीया रौहला ता ज़ो चाहे मौंगा, होर तेई तुसरी तैंईंयैं होंणा सा।

⁸मेरै बापू री महिमा ऊँई लाइया होआ सा कि तुसै बोहू फ़ौल़ आंणा, तैबै तुसै मेरै च़ेले ठहरिणा सा।

⁹ज़ैण्ढी बापूऐ मूँ सैंघै झ़ुरी डाई, तैण्ढीऐ मैं तुसा सैंघै झ़ुरी डाई मेरी झ़ुरी न बणीया रोहा।

¹⁰अगर तुसै मेरी हुक्म बै मनलै, ता मेरी झ़ुरी न बणीया रौहलै, ज़ैण्ढी कि मैं आपणै बापू री हुक्म मनी सा, होर तेइरी झ़ुरी न बणीया रौहा सा।

¹¹मैं ऐ गैला तुसाबै तैबै बोली, कि मेरी खुशी तुसा न बणीया रौहली, होर तुसरी खुशी पूरी होली।

¹²मेरा हुक्म ऐ सा कि, ज़ैण्ढी झ़ुरी मैं तुसा सैंघै डाई तैण्ढीऐ तुसै भी एकी दुज़ै सैंघै झ़ुरी डाआ।

¹³ऊँई न बड़ी झ़ुरी कोईरी नी ऑथि कि आपणै सैंघी री तैंईंयैं आपणी जान देला।

¹⁴ज़ो हुक्म हांऊँ तुसाबै देआ सा, अगर तेसा बै मनलै ता तुसै मेरै सैंघी सी।

¹⁵ऐबै न बाद मूँ तुसाबै आपणा दास नी बोलणा, किबैकि नोकर नी जाणदा कि तेइरा मालक कि केरा सा, पर मैं तुसाबै आपणा सैंघी बोलू सा, किबैकि मैं ज़ो गैला आपणै बापू न शूणी ते सारी तुसाबै दसी सी।

¹⁶तुसै हांऊँ नी चुनु सा, पर मैं तुसै चुनै सी होर तुसै ठहराऐन्दे सी ताकि तुसै जाईया फ़ौल़ आंणलै होर तुसरा फ़ौल़ बणीया रौहला, कि तुसै मेरै अधिकारा न ज़ो किछ़ मौंगलै, सौ तुसाबै देला।

¹⁷इन्हां गैला रा हुक्म हांऊँ तुसाबै तैबै देआ सा कि तुसै एकी दुज़ै सैंघै झ़ुरी डाआ।

¹⁸“अगर दुनिया रै लोका तुसा सैंघै बैर डाआ सी, ता तुसै जाँणा सी कि तेइयै तुसा न पेहलै, मूँ सैंघै भी बैर रखु।

¹⁹अगर तुसै दुनिया रै लोका हौन्दे, ता दुनिया रै लोका तुसा सैंघै झ़ुरी डाआणी, पर ऐई बजहा न तुसै दुनिया रै लोका मौंझ़ै नैंई पर मैं तुसै दुनिया रै लोका मौंझ़ै न चुनै सी, तैबै ता दुनिया रै लोक तुसा सैंघै बैर डाआ सी।

²⁰ज़ो गैला मैं तुसाबै दसी ती, ‘नोकर आपणै मालका न बड़ा नैंई होन्दा,’ तेथा बै याद डाआ अगर तिन्हैं हांऊँ सताऊ, ता तुसै भी सताणे, अगर तिन्हैं मेरी गैला मनी ता तुसरी भी मनणी।

²¹लोका ऐ सारी गैला तुसा सैंघै केरनी, किबैकि तुसै मेरै च़ेले सी, किबैकि ते परमेश्वरा बै नी ज़ाणदै ज़ुणियै हांऊँ भेज़ू सा।

²²अगर हांऊँ नैंई ऐन्दा होर तिन्हां सैंघै गैला नैंई केरदा, ता ते पापी नैंई बणदै पर ऐबै तिन्हां बै तिन्हां रै पापा री तैंईंयैं कोई बहाना नैंई ऑथि।

²³ज़ो मूँ सैंघै बै डाआ सा, सौ मेरै बापू सैंघै भी बैर डाआ सा।

²⁴अगर हांऊँ तिन्हां मौंझ़ै तैण्ढा चमत्कारा रा कोम नैंई केरदा, ज़ो होर कोइयै नैंई केरै ता तिन्हां पापी नैंई बणना ती, पर ऐबै ता तिन्हैं हांऊँ होर मेरा बापू दुऐ हेरे सी होर दुई सैंघै बैर डाआ सी।

²⁵ऐ तैबै हुआ कि सौ वचन पूरा हुआ ज़ो तिन्हैं रै बिधाना न लिखू सा, ‘तिन्हैं मूँ सैंघै बिना मतलबै रा बैर रखु।’

²⁶“पर ज़ैबै ऐ मज़द केरनु आल़ा ऐला, ज़ो मूँ तुसा हागै बै बापू री धिरै न भेजणा, मतलब सच़ाई री आत्मा ज़ो बापू री धिरै न निकल़ा सा, ता सौ मेरी गुआही देला।

²⁷होर तुसै भी मेरै गुआह सी किबैकि तुसै शुरू न मूँ सैंघै रोहै सी।