Read Pahari, Kullu यूहन्ना 16 Bible Online

यूहन्ना 16 - Pahari, Kullu bible

यूहन्ना 16

¹“ऐ गैला मैं तुसाबै तैबै बोली कि ताकि तुसै विश्वास नी खोलै।

²तिन्हां तुसै यहूदी आराधनालय न खोलणै सी। पर ऐ बौगत एज़ा सा, कि ज़ो कोई तुसाबै मारलै तेई समझणा कि हांऊँ परमेश्वर री सेवा केरदा लागा सा।

³होर तै तिन्हां कोमा बै तैबै केरा सी कि न ता बापू ज़ाणदा होर न ता हांऊँ।

⁴पर ऐ गैला मैं तैबै तुसाबै बोली, कि ज़ैबै इन्हरा बौगत एला ता तुसाबै याद ऐणा। कि मैं शुरू न ओरु तुसाबै ऐ गैला नैंई दसी किबैकि हांऊँ तुसा सैंघै ती।

⁵“पर ऐबै हांऊँ आपणै भेजणु आल़ै हागै बै ज़ा सा होर तुसा न कोई मुँभै नी पुछदै, ‘तू कौखै बै जा सा?’

⁶मैं ज़ो ऐ गैला तुसाबै बोली सा, ऐई बजहा न तुसरा दिल दुःखी सा।

⁷तैबै भी हांऊँ तुसाबै सच़ बोला सा, कि मेरा जाँणा तुसरी तैंईंयैं खरा सा, किबैकि हांऊँ नी जाला ता तेई मज़द केरनु आल़ै तुसा हागै बै नी ऐणा। पर अगर हांऊँ जाला ता, सौ मज़द केरनु आल़ै तुसा आगै बै भेजणु।

⁸तेई एज़िया पापा री सच़ाई होर परमेश्वरा रै धर्म होर न्याय रै बारै न ऐई दुनियां रै लोका बै रिहाणा।

⁹पापै रै बारै न कि ते मूँ पैंधै बशाह नी केरदै।

¹⁰होर धर्मै रै बारै न किबैकि हांऊँ बापू हागै बै जा सा, होर तुसै मुँभै फिरी नैंई हेरणा।

¹¹न्याय रै बारै न किबैकि परमेश्वरै पैहलै न ऐई दुनियां रै अधिकारी मतलब शैताना रा न्याय केरू सा।

¹²“मूँ तुसाबै होर भी बोहू गैला बोलणा चाहा सा, पर ऐबै तुसै तिन्हां गैला बै नैंई समझ़दै।

¹³पर ज़ैबै सौ मतलब सच़ाई री आत्मा एली, ता तुसाबै सारी सच़ाई री बौत दसणी, किबैकि तेइयै आपु धिरै न नैंई बोलणा होर ज़े किछ़ शुणा सा सौऐ बोलणा होर ऐणु आल़ी गैला तुसाबै दसणी।

¹⁴तेई मेरी महिमा केरनी, किबैकि तेई मेरी गैला शुणिया तुसाबै दसणी।

¹⁵ज़ो किछ़ बापू रा सा, सौ सैभ मेरा सा, तैबै मैं बोलू कि मेरी गैला न शूणीया तुसाबै दसला।

¹⁶“थोड़ी देरा न तुसा हांऊँ नी हेरणा; होर फिरी थोड़ी देरा न हांऊँ हेरणा।”

¹⁷तैबै यीशु रै च़ेले आपु न बोलदै लागै, “ऐ कि सा ज़ो सौ आसाबै बोल्दा लागा सा, थोड़ी देरा न तुसा हांऊँ नैंई हेरणा, होर फिरी थोड़ी देरा न हांऊँ हेरणा? होर ऐ तैबै कि हांऊँ बापू हागै बै जा सा?”

¹⁸तैबै तिन्हैं बोलू, “ऐ, ‘थोड़ी देर ज़ो सौ बोला सा कि गैल सा?’ आसै नैंई जाणदै कि ऐ कि बोल्दा लागा सा।”

¹⁹यीशुऐ ज़ाणिया कि ऐ इन्हां गैला रै बारै न मुँभै पुछ़णा चाहा सी, तिन्हां बै बोलू, “कि तुसै आपु न मेरी इन्हां गैला रै बारै न पूछ़ताछ़ केरदै लागे सी, थोड़ी देरा न तुसा हांऊँ नैंई हेरणा, होर भिरी थोड़ी देरा न हांऊँ हेरणा?”

²⁰हांऊँ तुसाबै सच़-सच़ बोला सा; कि मेरै मौरनै न बाद तुसा रोणां होर लेरा मारै केरनी सा, पर दुनिया रै लोका खुशी मनाणी, तुसाबै दुःख होंणा सा, पर तुसरा दुःख सुखा न बदलीणा सा, ज़ैबै मूँ ज़िन्दा वापस ऐणा।

²¹सुज़णै रै बौगता न बेटड़ी बै दुःख हुआ सा, किबैकि तेसरा दुःखा रा बौगत पुजिआ आऊ सा, पर ज़ैबै सौ शोहरू बै जन्म देआ सा ता आपणी ऐसा खुशी सैंघै कि दुनिया न एक मांहणुऐ जन्म लेऊ, तेई दुःखा बै होरी घेरै याद नैंई केरदी।

²²तैण्ढी धिरै तुसाबै ऐबै दुःख होंणा, पर मूँ तुसा सैंघै होरी घेरै मिलणा होर तूसरा मन खुशी सैंघै भौरीणा सा, होर तुसरी खुशी कोई भी तुसा न नैंई छीनणी सा

²³तेई रोज तुसा मूँ न किछ़ नैंई पुछ़णा। हांऊँ तुसाबै सच़-सच़ बोला सा अगर बापू न तुसै मेरै अधिकारा न किछ़ मौंगलै, ता तेई तुसा देणा।

²⁴ऐबै तैंईंयैं तुसै मेरै अधिकारा न किछ़ भी नैंई मौंगु, मुँगलै ता पाणा, तैबै तुसरी खुशी पूरी होंणी सा।

²⁵“मैं ऐ गैला तुसाबै उदाहरण न दसी सी, पर तेई बौगत ऐणा सा कि मूँ तुसाबै होरी घेरै उदाहरणा न नैंई बोलणा, पर खुलिया तुसाबै बापू रै बारै न दैसणा।

²⁶तेई बौगता न तुसा मेरै अधिकारा न मौंगणा, होर हांऊँ तुसाबै ऐ नैंई बोल्दा कि मूँ तुसरी तैंईंयैं बापू हागै प्रार्थना केरनी सा।

²⁷किबैकि बापू परमेश्वर ता आपुऐ तुसा सैंघै झ़ुरी डाआ सा, किबैकि, तुसै मूँ सैंघै झ़ुरी डाई सा ऐ कि भी कि बशाह केरू सा कि बापू री धिरै न सा।

²⁸हांऊँ बापू रै धिरै न दुनिया न आऊ सा, मुँबी दुनिया बै छ़ौड़िया जाँणा सा।”

²⁹यीशु रै च़ेले बोलू, “हेर, ऐबै ता तुसै साफ़ बोला सी, होर कोई उदाहरण नैंई बोल्दा।

³⁰ऐबै आसै जाँणा सी कि तुसै सैभ किछ़ जाँणा सी होर ऐ जरूरी भी नैंई ऑथि कि कोई तुसा न किछ़ पुछ़लै, ऐथा न आसै बशाह केरा सी कि तुसै परमेश्वरै री धिरै न आऐ सी।”

³¹ऐ शुणिया यीशुऐ तिन्हां बै बोलू, “कि तुसै ऐबै बशाह केरा सी?”

³²हेरा, सौ बौगत एज़ा सा, पर ऐ सा कि तुसा सैभ अलग होईया आपणी-आपणी बौत लेणी, होर हांऊँ केल्हाऐ छ़ौड़णा सा, तैबै भी हांऊँ केल्हाऐ नैंई किबैकि बापू मूँ सैंघै सा।

³³“मैं ऐ गैला तुसाबै तैबै बोली कि तुसाबै मेरी बजहा न शान्ति मिलली। ऐसा दुनिया न तुसाबै दुःख होआ सा, पर मजबूत बणीया रौहा, मैं ता दुनिया रा अधिकारी मतलब शैतान न ज़ीत पाई सा।”