Read Pahari, Kullu यूहन्ना 19 Bible Online

यूहन्ना 19 - Pahari, Kullu bible

यूहन्ना 19

¹ऊँई पैंधै पिलातुसै यीशु बै कोड़ै लाणै धियाऐ।

²सिपाईयै कौन्डै रा मुकट बणाईया यीशु री मुँडी न लाऊ, होर बैंजनी टौला लाऊ,

³होर यीशु हागै एज़ी एज़िया बोल्दै लागै, “हे यहूदियै रै राज़ा, नमस्कार!” होर प्रभु बै थप्पड़ भी मारै।

⁴तैबै पिलातुसै भी बाहरै निकल़िया लोका बै बोलू, “हेरा, हांऊँ तेइबै तुसा हागै फिरी आंणा सा, कि तुसै जाणलै कि हांऊँ ऐईन किछ़ भी दोष नैंई पान्दा।”

⁵तैबै यीशु कौन्डै रा मुकुट होर बैंजनी रंगा रा टौला लाऊ होन्दा बाहरै आंणु, होर पीलातुसै तेइबै बोलू, “हेरा, ऐई मर्दा बै।”

⁶ज़ैबै मुख्यपुरोहिते होर पौहरैदारै सौ हेरू ता लेरा पाईआ बोलू, “ऐईबै क्रूसा पैंधै चढ़ा क्रूसा पैंधै!” पिलातुसै तिन्हां बै बोलू, “तुसै ऐईबै नेइया क्रूसा पैंधै च़ढ़ा, किबैकि हांऊँ ऐईन किछ़ भी दोष नैंई पांदा।”

⁷यहूदी नेतै तेइबै बोलू, “आसरा बी कनून सा होर तेस कनूनै रै मुताबक ऐ मारणै रै बराबर सा, किबैकि ऐईयै आपु बै परमेश्वरा रा बेटा बोलू सा”

⁸ज़ैबै पिलातुसै ऐ गैला शूणी ता सौ होर बी बोहू डौरू।

⁹होर फिरी गढ़ा आँध्रै बै नौठु, होर यीशु बै बोलू, “तू कौखला सा?” पर यीशुऐ तेइबै किछ़ भी ज़वाब नैंई धिना।

¹⁰तैबै पिलातुसै यीशु बै बोलू, “मुँभै किबै नैंई दसदा? कि तू नैंई जाणदा, कि तौभै छ़ौड़नै रा अधिकार मुँभै सा, होर तौभै क्रूसा पैंधै च़ढ़ाणै रा अधिकार भी मुँभै सा।”

¹¹यीशुऐ बोलू, “अगर तौभै परमेश्वरा री तरफा न नैंई धिनु होन्दा, ता तेरा मूँ पैंधै किछ़ भी अधिकार नैंई ती होंणा, तैबै ज़ुणियै हांऊँ तेरै हौथा न धिना सा तेइरा पाप तौ न ज़ादा सा।”

¹²तैबै पिलातुसै यीशु छ़ौड़ी देणा चाहू, पर यहूदियै ज़ोरै-ज़ोरै सैंघै बोलू, “अगर तू ऐईबै छ़ौड़ी देला, ता तू महाराज़ै रा सैंघी नी ऑथि, ज़ो कोई आपणै आपा बै राज़ा बणा सा सौ महाराज़ै रा बरोध केरा सा।”

¹³ऐ गैला शूणीया पिलातुसै यीशु बाहरै आंणु होर तेस ज़ैगा न एक चबूतरा ती ज़ो इब्रानी न गब्बता बोलिया ती होर तौखै न्याय री ज़ैगा पैंधै बेठा।

¹⁴ऐ फसह री त्यारी रा रोज ती, होर ऐ लगभग धयाडी ती। तैबै तेइयै यहूदियै बै बोलू, “हेरा तुसरा राज़ा।”

¹⁵पर ते लेरा पाईआ, “नेया! नेया! ऐईबै क्रूसा पैंधै च़ढ़ा!” पिलातुसै तिन्हां बै बोलू, “कि मूँ तुसरा राज़ा क्रूसा पैंधै च़ढ़ाणा?” मुख्यपुरोहिते बोलू, “महाराज़ै बै छ़ौड़िआ आसरा होर कोई राज़ा नी ऑथि।”

¹⁶तैबै तेइयै यीशु तिन्हरै हौथा न धिना कि सौ क्रूसा पैंधै च़ढ़ाई जाला।

¹⁷तैबै तिन्हैं यीशु नेये, होर यीशु आपणा क्रूस च़किया तेस ज़ैगा तैंईंयैं बाहरै नौठै ज़ो खोपड़ी री ज़ैगा बोलिया ती होर इब्रानी न गुलगुता।

¹⁸तौखै तिन्हैं प्रभु यीशु सैंघै होर दुई मांहणु भी क्रूसा पैंधै च़ढ़ाऐ, एक एकी धिरै होर दुज़ी धिरै, होर बिच़ा न प्रभु यीशु।

¹⁹पिलातुसै एक दोषा री चिट्ठी लिखिया क्रूसा पैंधै लाऊ, होर तेथा न ऐ लिखू होन्दा ती, “यीशु नासरी यहूदियै रा राज़ा।”

²⁰ऐ दोष चिट्ठी बोहू यहूदियै पौढु किबैकि सौ ज़ैगा ज़ौखै यीशु क्रूसा च़ढ़ाऊ ती यरूश्लेम शैहरा रै नेड़ ती, होर चिट्ठी इब्रानी होर लतीनी होर यूनानी न लिखू होन्दी ती।

²¹तैबै यहूदियै रै मुख्यपुरोहिते पिलातुसा बै बोलू, “यहूदियै रा राज़ा, मत लिख पर ऐ लिख कि तेइयै बोलू, हांऊँ यहूदियै रा राज़ा सा।”

²²पिलातुसै जवाब धिना, “मैं ज़ो लिखू सा, सौ लिखू सा।”

²³ज़ैबै सपाईये यीशु क्रूसा पैंधै च़ढ़ाऊ ती, यीशु रै टौलै लेईया च़ार हिस्से केरै, सैभी सपाई री तैंईंयैं एक हिस्सा, होर कुरता भी नेऊ, पर कुरता बिना सिउं होन्दा ती ऊझै न पोर हेठै तैंईंयैं बुणु होन्दा ती।

²⁴तैबै तिन्हैं आपु न बोलू, “आसा ऐ नी चिरणा पर एथा पैंधै चिट्ठी भौरनी कि ऐई कुणी रा होंणा।” ऐ तैबै हुआ कि पबित्र शास्त्रा न ज़ो बोलू ती, सौ पूरा होला, “तिन्हैं मेरै टौलै आपु न बौन्डै होर मेरै टौलै पैंधै चिट्ठी भौरी।”

²⁵तैबै सपाईये तैण्ढाऐ केरू, यीशु रै क्रूसा हागै तिन्हरी आमा होर तिन्हरी आमै री बैहण मरियम, क्लोपासे री लाड़ी होर मरियम मगदलीनी खड़ी ती।

²⁶ज़ैबै यीशुऐ आपणी आमा होर सौ च़ेला ज़ो ज़ुणी सैंघै यीशु झ़ुरी डाआ ती नेड़ खड़ा हेरू ता आपणी आमा बै बोलू, “आमा हेर, ऐ तेरा बेटा सा।”

²⁷तैबै तेइयै च़ेले बै बोलू, “हेरा, ऐ तेरी आमा सा।” होर तेई बौगतै च़ेला सौ आपणै घौरा बै नेयी।

²⁸तेथा न बाद यीशुऐ ऐ ज़ाणिया कि ऐबै सैभ किछ़ पूरा हुआ सा, तैबै कि पबित्र शास्त्रा न ज़ो बोलू ती सौ पूरा होला, बोलू, “हांऊँ शौखा सा।”

²⁹तौखै सिरकै सैंघै भोरू होन्दा एक भाँडा डाऊ ती, तैबै तिन्हैं सिरकै न शौगु होन्दा स्पंज डँडै न रखिया तेइबै चुसाऊ।

³⁰ज़ैबै यीशुऐ सौ सिरका लेऊ ता बोलू, “पूरा हुआ।” होर मुँडी टुँबड़ी केरिया प्राण छ़ौड़ै।

³¹तैबै कि सौ त्यारी रा रोज ती, यहूदियै पिलातुस आगै अर्ज़ा केरी, कि तिन्हरी टाँगा चोड़ा होर हेठै खोला, किबैकि बशाँ रै ध्याड़ै ते क्रूसा पैंधै नी डाहणै किबैकि सौ बशाँ रा ध्याड़ा बड़ा ध्याड़ा ती।

³²तैबै सैनिकै सपाईये एज़िया तिन्हां मांहणु न पैहलै री टाँगा चोड़ी, तैबै दुज़ै री भी, ज़ो यीशु सैंघै क्रूसा पैंधै च़ढ़ाई ती।

³³पर ज़ैबै यीशु आगै एज़िया हेरू कि सौ मुँआन्दा सा, प्रभु री टाँगा नी चोड़ी।

³⁴पर सैनिका न एकियै बरछै लाइया प्रभु यीशु रा पेट बिन्नू, होर तेथा न तैबै लोहू होर पाणी निकतु।

³⁵ज़ुणियै ऐ हेरू तेइयै गुआही धिनी, होर तेइरी गुआही सच़ी ती, होर सौ जाँणा ती कि सौ सच़ बोला सा तुसा भी बशाह केरा।

³⁶ऐ गैला तैबै हुई कि पबित्र शास्त्रा न ज़ो लिखू ती कि सौ पूरा होल्ला, “तेइरा कोई भी हाड़का नी सा चोड़ना।”

³⁷तैबै पवित्र शास्त्रै री एकी होरी ज़ैगा पैंधै लिखू सा, “ज़ुण तिन्हैं बिन्हू सा, तेई पैंधै तिन्हां हेरणा सा।”

³⁸इन्हां गैला न बाद अरिमतियाह ग्राँ रा रौहणु आल़ा ज़ो यीशु रा च़ेला ती, पर यहूदियै रै डौरा न सौ ऐसा गैला बै गज़ेईया रखा ती, पिलातुस हागै अर्ज़ा केरी कि-कि सौ यीशु री लाशा बै नैंई सका सा। पिलातुस तेइरी शूणी अर्ज़ा होर तेइयै एज़िया यीशु री लाश नेयी।

³⁹निकुदेमुस भी, ज़ो पैहलै यीशु हागै राती बै नौठा ती, पजाह सेरा रै (लगभग तीह किलो) बराबर, मिलाऊ होन्दा गन्धरस होर एलुवीरा रा खुशबूदार तेल होर धूप आंणु।

⁴⁰तैबै तिन्हैं यीशु री लाश आंणी, होर यहूदियै रै पौथणै री कनूनै रै मुताबक यीशु खुशबूदार तेला लाइया कफना न लपेटू।

⁴¹तेसा ज़ैगा पैंधै ज़ौखै यीशु क्रूसा पैंधै च़ढ़ाऊ ती, एक बगीच़ा ती, होर तेई बगीच़ै न एक नौंऊँईं कब्र ती, ज़ुणीन कैधी भी कोई नी ती रखु।

⁴²तिन्हैं यीशु री लाश तेई कब्रा री गुफा न रखी, किबैकि सौ कब्र नेड़ ती, होर यहूदियै री बशाँ री ध्याड़ी रा त्यारी रा रोज़ ती।