Read Pahari, Kullu यूहन्ना 2 Bible Online

यूहन्ना 2 - Pahari, Kullu bible

यूहन्ना 2

¹फिरी त्रीज़ै रोज गलीलै रै काना शैहरा न कोई रा ब्याह ती, होर प्रभु यीशु री आमा भी तौखै ती।

²प्रभु यीशु होर तिन्हरै च़ेले भी तेई ब्याह न शाधै ती।

³ज़ैबै अँगूरा रा रस घटु ता, प्रभु यीशु री आमै तिन्हां बै बोलू, “तिन्हां हागै अँगूरा रा रस नैंई रौहु।”

⁴प्रभु यीशुऐ तेसा बै बोलू, “आमा हाज़ी मेरा बौगत नैंई आऊ! तुसाबै मुँभै ऐ नी बोलणा चेहिऐ कि केरना?”

⁵पर तेइरी आमै नोकरा बै बोलू, “ज़ो किछ़ सौ तुसाबै बोलला सौऐ केरीत्।”

⁶तौखै यहूदियै रै च़ोखै केरनै रै रिवाज़ा रै दुआरा पात्थरा रै छौ घड़ै डाये ती, ज़ुणीन दुई-दुई, त्रा-त्रा मूंण औपड़ा ती।

⁷यीशुऐ तिन्हां बै बोलू, “घड़ै न पाणी भौरा।” तैबै तिन्हैं फूल-फूल भौरै।

⁸तैबै प्रभु यीशुऐ नोकरा बै बोलू, “ऐबै ऐई पाणी न थोड़ा पाणी खोलिया भोजे रै भण्डारी हागै बै नेया।” होर तिन्हैं सौ नैऊ।

⁹ज़ैबै भोजे रै भण्डारीऐ सौ पाणी स्वादु, ज़ुण अँगूरा रा रस बणुदा ती होर तेइबै पता नी ती ऑथि कि सौ कौखै न आऊ, पर ज़ुणा पाणी खोलणु आऐ मांहणु ती तिन्हां वै पता ती कि सौ कौखै न आऊ, तैबै भोजा रै भण्डारीऐ लाड़ा शाधिया च़ेले न तेइबै बोलू,

¹⁰“सैभ मांहणु पैहलै शोभला अँगूरा रा रस्स देआ सी होर ज़ैबै लोका पिया मताए होआ सी तैबै ते माड़ा अँगूरा रा रस देआ सी; पर तैं ता शोभला अँगूरा रा रस ऐबै तैंई रखु ती!”

¹¹प्रभु यीशुऐ गलीलै ज़िलै रै काना नगरा न आपणा ऐ पैहला चमत्कार केरू होर आपणी महिमा प्रकट केरी होर तेई रै च़ेले तेई पैंधै बशाह केरू कि सौहै मसीहा सा।

¹²तेथा न बाद प्रभु यीशु होर तेइरी आमा, भाई होर तेइरै च़ेले कफरनहूम शैहरा बै नौठै होर किछ़ रोज तौखै रौहै!

¹³यहूदी रै फसला रै त्यौहारा रा बौगत नेड़े ती, होर प्रभु यीशु यरूश्लेम शैहरा बै नौठै!

¹⁴प्रभु यीशुऐ मन्दिरा न बौल्द, भेड़ होर कबूतरा रै बेच़णू आल़ै होर ढैबुऐ रा लेन-देण केरनु आल़ै बैशु हौन्दे हेरे।

¹⁵तैबै प्रभु यीशुऐ रौशी रा कोड़ा बणाईया, लोका समेत सैभ भेड़ा होर बौल्द मन्दिरा न बाहरै खोलै, होर ढैबुऐ रा लेन-देण केरनु आल़ै रै ढैबुऐ खलारिया शेटे होर मेज़ पलटाये।

¹⁶होर कबूतर बेच़णू आऐ बै बोलू, “इन्हां बै औखै न नेआ। मेरै बापू रै मन्दिरा बै लेन-देण केरनु आऐ रा घौर मता बणा।”

¹⁷तैबै प्रभु यीशु रै च़ेले बै याद आऊ कि पवित्र शास्त्रा न लिखुदा सा, “तेरै मन्दिरा री तैंईंयैं मेरा प्यार मेरै आँध्रै औगी सांही भौक्का सा।”

¹⁸ऐसा गैला पैंधै यहूदी नेतै यीशु बै बोलू, “तुसै ज़ुण ऐ कोम केरा सी ता आसाबै कुण ज़ेही नशाण रिहा सी?”

¹⁹यीशुऐ तिन्हां बै ज़वाब धिना, “ऐई मन्दिरा बै ढाआत, होर मूँ ऐ मन्दिर त्रीजै ध्याड़ै न खड़ा केरना।”

²⁰यहूदी नेतै बोलू, “ऐई मन्दिरा बै बनाणै न छेताली बौर्ष लागेंदे सी, होर तुसा कि ऐ त्रा रोजा न खड़ा केरना?”

²¹पर यीशुऐ आपणै शरीरा रै मन्दिरा रै बारै न बोलू ती!

²²पर ज़ैबै प्रभु यीशु मूँऐंदै न ज़िन्दै हुऐ तैबै तिन्हां रै च़ेले बै याद आई कि यीशुऐ ऐण्ढा बोलू ती; होर तिन्हैं पवित्र शास्त्र ता तेई वचना पैंधै ज़ुण यीशुऐ बोले ती बशाह केरू!

²³ज़ैबै प्रभु यीशु फसह रै त्यौहारा न, यरूश्लेम शैहरा न ती ता, बोहू लोके तिन्हरै चमत्कार हेरिया तिन्हां पैंधै बशाह केरू!

²⁴पर यीशुऐ आपणै आपा बै तिन्हां रै बशाह पैंधै नैंई रखु, किबैकि ते तिन्हां सैभी बै जाँणा ती,

²⁵होर यीशु बै जरूरत नैंई ती कि मांहणु रै बारै न कोई गुआही दै, किबैकि सौ आपुऐ जाँणा ती कि मांहणु रै मना न कि सा?