Read Pahari, Kullu यूहन्ना 20 Bible Online

यूहन्ना 20 - Pahari, Kullu bible

यूहन्ना 20

¹तुआरा बै मरियम मगदलीनी दोथी निहारै न कब्रा न आई होर पात्थर कब्रा पैंधै लुढ़कुदा हेरू।

²तैबै सौ दौउड़ी होर शमौन पतरस होर तेई दुज़ै च़ेले हागै बै ज़ुणी सैंघै यीशु झ़ुरी डाआ ती, एज़िया बोलू, “तिन्हैं प्रभु रा शरीर कब्रा न खोलिया नेऊ सा, होर आसै नी जाणदी कि सौ कौखै डाऊ सा।”

³तैबै पतरस होर दुज़ा च़ेला निकल़िया कब्र धिरै बै नौठै।

⁴ते दुए सैंघै-सैंघै दौड़दै लागै ती, पर दुज़ा च़ेला पतरसा न हागै बढ़ीया कब्रा पैंधै पैहलै पुजू,

⁵होर टुँबड़ै होईया टौलै पौड़ै हौन्दे हेरै, तैबै बी सौ आँध्रै नी हेरू।

⁶तैबै शमौन पतरसै तेइरै पिछ़ै-पिछ़ै आऊ, होर कब्र आँध्रै नौठा होर टौलै पौड़ु हौन्दे हेरे।

⁷होर सौ टौला प्रभु यीशु री मुँडी न बौनु होन्दा ती, होरी तिन्हां टौलै सैंघै नैंई ती ऑथि, पर दुज़ी ज़ैगा पैंधै पलेटू होन्दा हेरू।

⁸तैबै दुज़ा च़ेला भी ज़ो कब्रा पैंधै पेहलै पुजू ती, आँध्रै नौठा होर हेरिया बशाह केरू कि यीशु मूँऐंदै न ज़िन्दै हुए।

⁹ते ता ऐबै तैंईंयैं पबित्र कताबै री सौ गैला नैंई समझे कि तेई मूँऐंदै न जीणा सा।

¹⁰तैबै तै च़ेले आपणै घौरा बै वापस आऐ।

¹¹पर मरियम मगदलीनी रौन्दीए कब्रा आगै बाहरै खड़ी रौही, होर रोंदै रौन्दै कब्रा धिरै बै झुकिया,

¹²दुई स्वर्गदूत प्याशै टौलै लाईया एक शरैइणा हागै होर दुज़ा टाँगा हागै बेठैंदै हेरै, ज़ौखै यीशु री लाश डाई ती।

¹³तिन्हैं तेसा बै बोलू, “ओ आमा, तू किबै रोआ सा?” तेसै तिन्हां बै बोलू, “तिन्हैं मेरै प्रभु रा शरीर च़किया नेऊ सा होर हांऊँ नैंई जाणदी कौखै सा।”

¹⁴ऐ बोलिया सौ पिछ़ै मुड़ी होर यीशु खड़ा हेरू, पर नैंई पछ़ियाणु कि ऐ प्रभु यीशु सा।

¹⁵यीशुऐ तेसा बै बोलू, “ओ आमा, तू किबै रोआ सा? कुणी बै तोपा सा?” तेसै बगीच़ै रा पौहरैदार समझीया तिन्हां बै बोलू, “ओ मालक, अगर तुसै तेइरा शरीर च़कू सा ता, मुँभै दस कि सौ कौखै डाऊ सा, होर मूँ सौ नेणा।”

¹⁶यीशुऐ तेसा बै बोलू, “मरियम!” तेसै पिछ़ै मुड़िया प्रभु बै इब्रानी न बोलू, “रब्बुनी!” मतलब ओ गुरू।

¹⁷यीशुऐ तेसा बै बोलू, “मुँभै मत छ़ुँगै, किबैकि हांऊँ हाज़ी तैंईंयैं बापू हागै बै ऊझै नैंई नौठा, पर मेरै भाई हागै बै जाईया तिन्हां बै बोल, कि हांऊँ आपणै बापू हागै बै होर तुसरै, बापू, होर आपणै परमेश्वरा आगै बै ऊझै जा सा।”

¹⁸मरियम मगदलीनीऐ जाईया च़ेले बै दसु, “मैं प्रभु हेरू होर तिन्हैं मूँ सैंघै ऐ गैला बोली।”

¹⁹तेई तुआरा बै सौंझ़की ज़ेही घेरै ज़ैबै तौखै रै दरुआजे ज़ौखै च़ेले ती। यहूदी नेता रै डौरै रै मारै बन्द ती तैबै यीशु आऊ, होर तिन्हां मौंझ़ै खड़ै होईया तेइयै बोलू, “तुसाबै शान्ति लोड़ी मिली।”

²⁰ऐ बोलिया यीशुऐ आपणा हौथ, आपणी पाशल़ी तिन्हां बै रिहाऐ। तैबै च़ेले प्रभु यीशु बै हेरिया खुश हुऐ।

²¹यीशुऐ ऐ भी बोलू, “तुसाबै शान्ति लोड़ी मिली; ज़ैण्ढा बापूऐ हांऊँ भेज़ू सा, तैण्ढै हांऊँ भी तुसाबै भेज़ा सा।”

²²ऐ बोलिया यीशुऐ तिन्हां पैंधै फुकरू होर तिन्हां बै बोलू, “पवित्र आत्मा लैआ।

²³ज़ुणिरै पाप तुसै माफ केरलै, तै तिन्हरी तैंईंयैं माफ होंणै सी ज़ुणिरै तुसै डाहलै, तै डाहणै सी।”

²⁴पर बारा च़ेले मौंझ़ै न एक मतलब थौमा ज़ो दिदमुस कलाईया ती, ज़ैबै यीशु आऊ ती, तिन्हां सैंघै नी ती ऑथि

²⁵ज़ैबै होरा च़ेले तेइबै बोलदै लागै, “आसै प्रभु हेरू सा,” तैबै तेइयै तिन्हां बै बोलू, “ज़ाँ तैंईंयैं हांऊँ तिन्हरै हौथा न कीलै रा छेद नैंई हेरणू, होर किलै रै छेदा न आपणी गुठी नी भौरनू, होर तिन्हरी पाशल़ी न आपणा हौथ नी भौरनू ताँ तैंईंयैं मूँ बशाह नैंई केरना।”

²⁶औठ रोजा बाद यीशु रै च़ेले भी घौरा आँध्रै ती, होर थौमा भी तिन्हां सैंघै ती, होर दरूवाजा बन्द ती तैबै यीशु आऊ होर तिन्हरै बिच़ा न खड़ै होईया बोलू, “तुसाबै शान्ति लोड़ी मिली।”

²⁷तैबै यीशुऐ थौमा बै बोलू, “आपणी गुठी आंणिआ मेरै हौथा बै हेर, होर आपणा हौथ आंणिआ मेरै जोंघा न भौर होर अविश्वासी नैंई पर विश्वासी बण।”

²⁸ऐ शूणीया थौमे ज़वाब धिना, “ओ मेरै प्रभु, ओ मेरै परमेश्वर!”

²⁹यीशुऐ बोलू, “तैं हांऊँ हेरू सा कि तैबै बशाह केरू सा? धन्य सी तै ज़ुणियै बिना हेरिया बशाह केरू सा।”

³⁰यीशुऐ होर भी बोहू नशाणी च़ेले रै सामने रिहाई, ज़ो ऐसा कताबा न नैंई लिखेदे सी।

³¹पर ऐ ऊँईरी तैंईंयैं लिखे सी कि तुसै बशाह केरा कि यीशु परमेश्वरा रा बेटा मसीह सा, होर बशाह केरिया तेई रै नाँ न हमेशा री ज़िन्दगी पाआ।