Read Pahari, Kullu यूहन्ना 21 Bible Online

यूहन्ना 21 - Pahari, Kullu bible

यूहन्ना 21

¹इन्हां गैला न बाद यीशु तिबिरियास झ़ीलै रै कनारै च़ेले रै सामनै आऊ, होर ऐण्ढी धिरै सामनै आऊ।

²शमौन पतरस, होर थौमा ज़ो दिदमुस बोलिया सा, गलीलै रै काना ग्राँ न नतनऐल, होर जब्दी रा बेटा होर तेइरै च़ेले न दुई होर मांहणु कठै हुऐ ती।

³शमौन पतरसै तिन्हां बै बोलू, “हांऊँ मैच्छ़ी डौकदा चौलू सा।” तिन्हैं तेइबै बोलू, “आसा भी तौ सैंघै ऐणा।” तैबै ते निकल़िया किश्ती पैंधै चढ़ै पर तेसा राती किछ़ भी नी ढौकु।

⁴आगलै रोज़ दोथ होन्देया यीशु कनारै पैंधै खड़ै हुऐ, तैबै भी च़ेले यीशु नी पछ़ियाणु कि ऐ यीशु सा।

⁵तैबै यीशुऐ तिन्हां बै बोलू, “ओ शोहरुओ कि तुसा हागै किछ़ खाँणै बै सा?” तिन्हैं ज़वाब धिना, “नैंई।”

⁶यीशुऐ तिन्हां बै बोलू, “किश्ती री दैईणी धिरै बै जाल शेटा ता, मिलणा।” तैबै तिन्हैं जाल शेटू, होर ऐबै मैच्छ़ी होंणै री बजहा सैंघै तिन्हरै जाल निसा खिंचुई।

⁷तैबै तेई च़ेले ज़ुणी सैंघै यीशु झ़ुरी डाआ ती, पतरसा बै बोलू, “ऐ ता प्रभु सा।” शमौन पतरसै ऐ शूणीया कि सौ प्रभु सा, चेकै न गाच़ी बौनी, किबैकि तेई बौगता तेइयै औधै टौलै लाये ती, होर नौई बै छलाँग धिनी।

⁸पर दुज़ै च़ेले किश्ती न मैच्छ़ी रा भौरुआन्दा जाल खिन्चदै लागै, किबैकि ते नौई रै कनारै न ज़ादा दुर नी ती ऑथि, पर लगभग दुई शौऊ हौथै री दुरी पैंधै ती।

⁹ज़ैबै ते कनारै पुज़ै ता तिन्हैं कोयलै री औगी पैंधै पकाइदी मैच्छ़ी डाई ती, होर रोटी हेरी।

¹⁰यीशुऐ तिन्हां बै बोलू, “ज़ो मैच्छ़ी तुसै ऐबै ढौकी सी तिन्हां न किछ़ आंणा।”

¹¹ता शमौन पतरसै ढौन्गी पैंधै च़ढ़िया एक शौऊ त्रिऊजां बड़ी मैच्छ़ी, न भोरु होन्दा जाल भौड़ा पैंधै बै खींच़ू, होर ऐतरी मैच्छ़ी होंदेआ भी जाल नैंई च़िरूआ।

¹²यीशुऐ तिन्हां बै बोलू, “एज़ा रोटी खा।” च़ेले न कोई बै हिम्मत नी हुई कि प्रभु न पुछ़ै, “तू कुण सा?” किबैकि ते जाँणा ती कि हो न हो ऐ प्रभु यीशु सा।

¹³यीशु आऊ होर रोटी आंणिआ तिन्हां बै धिनी, होर तैण्ढै मैच्छ़ी भी।

¹⁴ऐ त्रीजी घेरै ती कि प्रभु यीशु मौरू होंदै न जी उठणै न बाद च़ेले न हेरुआ।

¹⁵रोटी खाँणै न बाद यीशुऐ शमौन पतरसा बै बोलू, “ओ शमौन, यूहन्ना रै बेटै, कि तू इन्हां न ज़ादा झ़ुरी मूँ सैंघै डाआ सा?” तेइयै यीशु बै बोलू, “जी प्रभु; तुसै ता जाँणा सी कि हांऊँ तुसा सैंघै झ़ुरी डाहा सा।” यीशुऐ तैबै बोलू, “मेरै मेमणु बै च़ार।”

¹⁶यीशुऐ दुज़ी बार भी बोलू, “ओ शमौन, यूहन्ना रै बेटै, कि तू मूँ सैंघै झ़ुरी डाआ सा?” तेइयै प्रभु बै बोलू, जी प्रभु जी तुसै जाँणा सी कि हांऊँ तुसा सैंघै झ़ुरी डाहा सा। प्रभुऐ तेइबै बोलू, “मेरी भेड़ै री पौहरी केर।”

¹⁷यीशुऐ त्रीजी बार भी बोलू, “ओ शमौन, यूहन्ना रै बेटै, कि तू मूँ सैंघै झ़ुरी डाआ सा?” पतरस दुःखी हुआ, कि प्रभुऐ त्रीजी बार ऐण्ढा बोलू, “कि तू मूँ सैंघै झ़ुरी डाहा सा?” होर तेइबै बोलू, “ओ प्रभु, तू ता सैभ किछ़ जाँणा सा कि हांऊँ तौ सैंघै झ़ुरी डाआ सा।” यीशुऐ तेइबै बोलू, “मेरी भेड़ा बै च़ार।

¹⁸हांऊँ तौभै सच़-सच़ बोला सा, ज़ैबै तू जुआन ती, ता आपणा चेका बौनियाँ ज़ौखै चाहा ती तौखै फिरा ती, पर ज़ैबै तू खापरा होल्ला, ता आपणै हौथ फैलाणै, होर कोई दुज़ै तेरा चेका बौनियाँ ज़ौखै तू नैंई च़ाँहदा तौखै तू नेणा सा।”

¹⁹यीशुऐ इन्हां गैला लाईया इशारा केरू कि पतरस कैण्ढी मौउती न परमेश्वरै री महिमा केरनी, होर तैबै यीशुऐ तेइबै बोलू, “मूँ पिछ़ै एज़।”

²⁰पतरसै पिछ़ै हेरिया सौ च़ेला पिछ़ै ऐन्दा हेरू, ज़ुणी सैंघै यीशु झ़ुरी डाआ ती, होर ज़ुणियै फसह रै त्यौहारा री रोटी खाँदी घेरै यीशु री छाती धिरै टुँबड़ै होईया पुछ़ु ती, “ओ प्रभु तुसाबै ढौकणै धियाणु आल़ा कुण सा।”

²¹तेई हेरिया पतरसै यीशु बै बोलू, “ओ प्रभु, ऐईरा कि हाल होंणा सा?”

²²यीशुऐ तेइबै बोलू, “अगर हांऊँ चाहनु कि सौ मेरै ऐणै तैंईंयैं ज़िन्दा रौहला, ता तौभै ऐईन कि? तू मूँ पिछ़ै औंढ।”

²³तैबै ऐ गैल सैभी च़ेले न फैली कि तेई च़ेले नी मौरणा, तैबै भी यीशुऐ तेइबै ऐ नी बोलू कि ऐई नी मौरणा, पर ऐ भी कि, “अगर हांऊँ नी चाहनु कि ऐई मेरै ऐणै तैंईंयैं ज़िन्दा रौहणा, ता तौभै ऐईन कि?”

²⁴ऐ सौहै च़ेला ती, ज़ो इन्हां गैला री गुआही देआ सा, होर ज़ुणियै ऐ गैला लिखी सी, होर आसै जाँणा सी कि तेइरी गुआही सच़ी सा।

²⁵होर बी बोहू कोम सी, ज़ो यीशुऐ केरै सी, अगर ते एक-एक केरिया लिखदे, ता हांऊँ समझा सा कि कताबा ज़ो लिखीणी ती तिन्हां दुनिया न बी नैंई ती औपड़ना।