Read Pahari, Kullu यूहन्ना 3 Bible Online

यूहन्ना 3 - Pahari, Kullu bible

यूहन्ना 3

¹एक यहूदी धार्मिक नेता फरीसियै मौंझ़ै न निकुदेमुस नाँ रा एक मांहणु ती, ज़ो एक नेता नेतै मौंझ़ै न एक नेता ती।

²तेइयै राती बै यीशु हागै एज़िया मसीह यीशु बै बोलू, “ओ गुरू, आसै जाँणा सी कि तुसै परमेश्वरै री धिरै न गुरू होईया आऐ सी, किबैकि कोई इन्हां चमत्कारा बै ज़ो तुसै रिहा सी, अगर परमेश्वर तेई सैंघै नी होला ता नी रिहाई सकदा।”

³मसीह यीशुऐ तेइबै बोलू, “हांऊँ तौभै सच़-सच़ बोला सा, ज़ो कोई नौंऊँईं धिरै न नी जन्मला ता परमेश्वरा रा राज्य नैंई हेरी सकदा।”

⁴निकुदेमुसऐ तेइबै बोलू, “मांहणु ज़ैबै खापरा होआ सा, ता कैण्ढै जन्म लेई सका सा? कि सौ आपणी आमा रै फाह्ड़ै न जाईया जन्म लेई सका सा? कि सौ आपणी आमा रै पेटा न जाईया दुज़ी घेरै जन्म लेई सका सा?”

⁵मसीह यीशुऐ ज़वाब धिना, “हांऊँ तौ हागै सच़ — सच़ बोला सा ज़ैबै तैंईंयैं कोई मांहणु पाणी होर आत्मा न नी जन्मला ता सौ परमेश्वर रै राज्य न नैंई जाई सकदा।

⁶किबैकि ज़ो शरीरा न जन्मा सा, सौ शरीर सा; होर ज़ो आत्मा न जन्मा सा, सौ आत्मा सा।

⁷हैरान मत हो, कि मैं तौभै बोलू, ‘तेरा नौंऊँईं धिरै न जन्म लेणा जरूरी सा।’

⁸बागर ज़ौखै चाहा सा तौखै जा सा होर तू तेसरी छेड़ शुणा सा, पर नी जाणदा कि सौ कौखै न एज़ा सा होर कौखै बै जा सा? ज़ो कोई पवित्र आत्मा न जन्मा सा सौ ऐण्ढा सा।”

⁹निकुदेमुसऐ मसीह यीशु बै ज़वाब धिना, “ऐ गैला कैण्ढै होई सका सा?”

¹⁰ऐ शुणिया मसीह यीशुऐ तेइबै जवाब धिना, “तू इस्राइली रा गुरू होईया भी कि इन्हां गैला बै नी जाणदा?”

¹¹हांऊँ तुसाबै सच़-सच़ बोला सा कि आसै ज़ो जाँणा सी सौ बोला सी, होर ज़ो आसै हेरू सा तेथा री गुआही देआ सी। होर तुसै आसरी गुआही पैंधै बशाह नैंई केरदै?

¹²ज़ैबै मैं तुसा सैंघैं धौरती री गैला केरी, होर तुसै बशाह नी केरदै, अगर हांऊँ तुसा सैंघै स्वर्गै री गैला केरनु ता फिरी कैण्ढा बशाह केरना?

¹³कोई बी स्वर्गा पैंधै नैंई नौठा, सिर्फ़ सौहै ज़ुण स्वर्गा न उतरु मतलब हांऊँ मांहणु रा बेटा ज़ुण स्वर्गा न सा।

¹⁴होर ज़ुणी रीति न मूसै बौणा न कीड़ै (साँपा) बै उथड़ै पैंधै च़ढ़ाऊ, तैण्ढी रीति सैंघै जरूरी सा कि हांऊँ मांहणु रा बेटा भी उथड़ै पैंधै चड़ाईणा।[1]

¹⁵किबैकि ज़ुण कोई मूँ पैंधै बशाह केरला तेई हमेशा री ज़िन्दगी पाणी।

¹⁶“किबैकि परमेश्वरै दुनिया रै लोका सैंघै ऐण्ढी झ़ुरी रखी कि तेइयै आपणा इकलौता बेटा धिना ताकि ज़ो कोई तेई पैंधै बशाह केरला तेई नाश नैंई होंणा पर हमेशा री ज़िन्दगी पाणी।

¹⁷परमेश्वरै आपणा बेटा एक दुनिया न तैबै नैंई भेज़ू, किबैकि दुनिया पैंधै सज़ा रा हुक्कम देला पर तैबै कि दुनिया तेई रै ज़रियै मुक्ति पाऐ।

¹⁸ज़ुण कोई यीशु पैंधै बशाह केरा सा, तेई पैंधै सज़ा रा हुक्कम नैंई होन्दा, पर ज़ो कोई तेई पैंधै बशाह नेंई केरदा, सौ दोषी बणा सा, तैबै कि तेइयै परमेश्वरै रै इकलौते बेटै रै नाँ पैंधै बशाह नैंई केरू।

¹⁹होर सज़ा री हुक्कमे रा मतलव ऐसा कि प्याशा दुनिया न आऊ सा, होर मांहणुऐ निहारै बै प्याशे न ज़ादा खरा बुझू किबैकि तिन्हां रै कोम बुरै सी।

²⁰किबैकि ज़ो कोई बुरा केरा सा सौ प्याशे सैंघै वैर डाह सा, होर प्याशे रै नेड़े नेंई ऐन्दा, ऐण्ढा नी हुआ लोड़ी कि तेई रै कोमा पैंधै दोष लागला।

²¹पर ज़ुण सच़ा पैंधै चला सा, सौ प्याशे रै नेड़े एज़ा सा, किबैकि तेई रै कोम सामनै होंणै कि ऐ परमेश्वरा रै धिरै न हुऐदें सी।”

²²तैबै इन्हां गैला न बाद प्रभु यीशु होर तिन्हां रै च़ेले यहूदिया देशा न आऐ; होर प्रभु यीशु तौखै तिन्हां सैंघै रौहिया बपतिस्मा देंदै लागे।

²³यूहन्ना भी शालेम नगर रै नेड़े ऐनोन ग्राँ न बपतिस्मा देआ ती, किबैकि तौखै बोहू पाणी ती, होर लोका तौखै एज़िया बपतिस्मा लेआ ती

²⁴किबैकि यूहन्ना तेई बोक्ते जेला न बंद नैंई केरू ती।

²⁵तौखै यूहन्ना रै च़ेले री यहूदी लोका सैंघै च़ोखै केरनै रै बारै न बैंहस हुई।

²⁶होर तिन्हैं यूहन्ना हागै एज़िया बोलू, “ओ गुरू, ज़ुण मांहणु यरदन नौई रै पौरलै धिरै तौ सैंघै ती, होर ज़ुणिरी तुसै गुआही धिनी सा; हेर सौ बपतिस्मा देआ सा, सैभ तेई आगै एज़ा सा।”

²⁷यूहन्नै ज़वाब धिना, “ज़ाँ तैंईंयैं मांहणु बै स्वर्गा न नी धिना, ताँ तैंईंयैं तेइबै किछ़ नैंई मीलणा।

²⁸तुसै ता आपु मेरै गुआह सी, कि मैं बोलू, ‘हांऊँ मसीह नैंई,’ पर तेईन पहले भेजुन्दा सा।

²⁹ज़ुणिरी लाड़ी सा, सौहै लाड़ा सा, पर लाड़ै रा सैंघी ज़ुण खड़ा होईया तेइरी शुणा सा, लाड़ै री गैला शुणीऐ बोहू खुश होआ सी: ऐबै मेरी ऐ खुशी पूरी हुई सा।

³⁰जरूरी ऐसा कि सौ बढ़ला होर हांऊँ घटनू।”

³¹“ज़ुण स्वर्गा न एज़ा सा सौ सैभी न बड़ा सा, ज़ो दुनिया न एज़ा सा सौ दुनिया रा सा, होर ज़ो स्वर्गा न एज़ा सा, सौ सैभी न ऊझै सा।

³²ज़ो किछ़ तैईऐ हेरू, होर शुणू सा, तेसा गैला री गुआही देआ सा, पर बोहू कम लोका तेई पैंधै बशाह केरा सी।

³³पर ज़ुणियै तेइरी गैला मनी तेइयै ऐसा गैला पैंधै मोहर लाई कि परमेश्वर सच़ा सा।

³⁴किबैकि ज़ो परमेश्वरै भेजुन्दा ती, सौ परमेशरे री गैला बोला सा, किबैकि पवित्र आत्मा बै नापी नापिया नी देंदा।

³⁵बापू परमेश्वर बेटै सैंघै झ़ुरी डाहा सा, होर तेइयै सैभ च़ीज़ा तेइरै हौथा न धिना सा।

³⁶ज़ो परमेश्वरा रै बेटै पैंधै बशाह केरा सा, हमेशा री ज़िन्दगी तेइरी सा; पर ज़ो बेटै री नी मनदा, तेइयै ज़िन्दगी भी नैंई हेरणी, पर परमेश्वरा री सज़ा तेई पैंधै रौहा सा।”