Read Pahari, Kullu यूहन्ना 4 Bible Online

यूहन्ना 4 - Pahari, Kullu bible

यूहन्ना 4

¹फिरी ज़ैबै प्रभु बै पता लागा, कि फरीसियै शुणु सा कि यीशुऐ यूहन्ना न बोहू च़ेले बणा सा होर तिन्हां बै बपतिस्मा देआ सा।

²अगर यीशु आपु नैंई पर प्रभु यीशु रै च़ेले बपतिस्मा देआ ती।

³तैबै यीशु आपणै च़ेले सैंघै यहूदिया देशा बै छ़ौड़िआ फिरी गलीला ज़िला बै वापस आऐ,

⁴होर यीशु बै सामरिया इलाकै न होईया जाँणा जरूरी ती।

⁵तैबै यीशु सुखार नगर सामरिया इलाकै तैंईंयैं आऊ, ज़ो तेसा ज़मीना रै नेड़ ती, ज़ुण याकूबै आपणै बेटै यूसुफा बै धिनी ती।

⁶होर याकूबा रा कुँआ भी तौखै ती, ज़ो तेइयै कोतू ती, यीशु बौता रा थकू होन्दा तेई कुँऐ हागै ऐण्ढै बेठा, ऐ गैल लगभग धयाडी हुई।

⁷ऐतरै न एक सामरी बेटड़ी पाणी भौरदी आई। प्रभु यीशुऐ तेसा बै बोलू, “मुँभै पाणी पिया।”

⁸किबैकि प्रभु यीशु रै च़ेले ता नगरा बै रोटी लेंदे नौठै ती।

⁹तेसै सामरी बेटड़ियै यीशु बै बोलू, “तुसै यहूदी होईया मूँ सामरी बेटड़ी न पाणी किबै मौंगा सी?” (किबैकि यहूदी सामरी सैंघै कैण्ढै भी तैरहै रा मेल ज़ोल नैंई डांहदे।)

¹⁰यीशुऐ ज़वाब धिना, “अगर तू परमेश्वरै रै वरदाना बै जाँणा सा, होर ऐ भी जाँणा सा कि सौ कुण सा ज़ुण तौभै बोलदा लागा सा, मुँभै पाणी पीया, ऐ तू तेईन मौंग होर तेई तौभै ज़िन्दगी रा ज़िन्दा पाणी देणा, ज़ो ज़िन्दगी देआ सा।”

¹¹बेटड़ी ऐ यीशु बै बोलू, “ओ प्रभु, तुसा हागै पाणी भौरनै री तैंईंयैं किछ़ भी नी ऑथि, होर कुँआ डूग्घा सा; तैबै भी सौ ज़िन्दगी रा पाणी तुसा हागै कौखै न आऊ?

¹²कि तुसै आसरै बुज़ुर्ग याकूबा न बडे सी, ज़ुणियै आसाबै ऐ कुँआ धिना सौ; होर आपु आपणै बाल बच्चे, होर आपणै गोरु समेत एथा न पिऊ?”

¹³यीशुऐ तेसा बै ज़वाब धिना, “ज़ो कोई ऐई पाणी बै पिला तेई होरी घेरै शोखिणा सा।

¹⁴पर ज़ो कोई तेई पाणी बै पिला ज़ो मूँ तिन्हां बै देणा, तेई फिरी होरी घेरै हमेशे रै ज़िन्दगी तैंईंयैं नी शोखिणा सा, बल्कि ज़े पाणी मूँ तेइबै देणा, तेइयै तौईंन एक जाईरू बनाणा सा, होर तेई हमेशा रै ज़िन्दगी तैंईंयैं निकल़दै रोहणा सा।”

¹⁵बेटड़ियै प्रभु यीशु बै बोलू, “ओ प्रभु, तेई पाणी मुँभै दै ताकि हांऊँ शोखि नी बणनु होर न पाणी भौरनै री तैंईंयैं ऐतरी दूर ऐनु।”

¹⁶मसीह यीशुऐ तेसा बै बोलू, “जा, आपणै लाड़ै बै औखै शाधा।”

¹⁷बेटड़ियै ज़वाब धिना, “हांऊँ बिना लाड़ै री सा।” मसीह यीशुऐ तेसा बै बोलू, “तू सच़ बोला सा, हांऊँ बिना लाड़ै री सा।”

¹⁸किबैकि तैं पौंज़ लाड़ै पूरै केरै सी, होर ज़ुणी हागै तू ऐबै सा सौ भी तेरा लाड़ा नी ऑथि; ऐ तैं सच़ै बोलू।

¹⁹बेटड़ियै मसीह यीशु बै बोलू, “ओ गुरू, मुँभै लागा सा कि तुसै भविष्यवाणी केरनु आल़ै सी।

²⁰आसरै बुज़ुर्गै ऐई ढौगा पैंधै परमेश्वरा री आराधना नैंई केरनी, होर तुसै बोला सी कि ऐ ज़ैगा ज़ौखै आराधना न केरनी जरूरी सा बोला सी सौ ज़ैगा यरूश्लेम शैहरा न सा।”

²¹यीशुऐ तेसा बै बोलू, “ऐ बेटड़ियै, मेरी गैला रा बशाह केर कि तेई बोक्त ऐणा सा कि तुसा न ता ऐई ढौगा पैंधै बापू री आराधना केरनी न ता यरूश्लेम शैहरा न।

²²तुसै सामरी लोक ज़ुणिबै नी जाणदै, तेइरी आराधना केरा सी; होर आसै यहूदी ज़ुणिबै जाँणा सी, तेइरी महिमा केरा सी, किबैकि उद्धार यहूदी मौंझ़ै न सा।

²³पर तेई बौगत ऐणा सा, ज़ुण ऐबै भी सा, ज़ुणीन सच़ै भक्त बापू री आराधना आत्मा होर सच़ाई सैंघै केरनी, किबैकि बापू आपणी तैंईंयैं ऐण्ढै सच़ै भक्ता बै तोपा सा।

²⁴परमेश्वर आत्मा सा, होर जरूरी सा कि तेइरी आराधना केरनु आल़ै आत्मा होर सच़ाई सैंघै तेइरी आराधना केरलै।”

²⁵बेटड़ियै प्रभु यीशु बै बोलू, “हांऊँ जाँणा सा कि मसीह ज़ुण प्रभु ज़ाणिया सा, ऐणु आल़ा सा, ज़ैबै सौ ऐला, ता आसाबै सारी गैला दसणी।”

²⁶प्रभु यीशुऐ तेसा बै बोलू, “हांऊँ तोबै बोलदा लागादा सा, हांऊँ सौऐ सा।”

²⁷ऐतरै न यीशु रै च़ेले आऐ, होर बड़े हेरान हौन्दे लागे कि यीशु बेटड़ी सैंघै गैला केरदै लागेदें सी; तैबै भी कोइयै नी पुछ़ु, “कि तुसै कि चाहा सी?” होर “किज़ी री तैंईंयैं तेसा सैंघै ढुणिदै लागै सी?”

²⁸तैबै सौ बेटड़ी आपणा गड़ोलू छ़ौड़िआ ग्राँ बै नौठी, होर लोका बै बोलदी लागी,

²⁹“एज़ा एकी मांहणु बै हेरा, ज़ुणियै सैभ किछ़ ज़ो मैं केरू मुँभै दसु सा: कोइँछ़ै ऐ ता मसीह नी ऑथि?”

³⁰तैबै ते ग्राँ न निकल्लिया यीशु बै हेरदे ऐन्दै लागै।

³¹ऐसा मौंझ़ै तेइरै च़ेले प्रभु यीशु बै ऐ विनती केरी, “ओ गुरू, किछ़ ता खा।”

³²पर यीशुऐ तिन्हां बै बोलू, “मूँ आगै खाँणै री तैंईंयैं ऐण्ढा खाँणा सा, ज़ुणिबै तुसै नी जाणदै।”

³³तैबै च़ेले आपु न बोलू, “कि कोइयै इन्हरी तैंईंयैं किछ़ खाँणै बै आंणु सा?”

³⁴यीशुऐ तिन्हां बै बोलू, “मेरा खाँणा,” परमेश्वरा री इच्छा बै मनणा सा, ज़ुणियै हांऊँ भेज़ू सा, होर सौ कोम पूरा केरनै री तैंईंयैं ज़ो तेइयै मुँभै धिनुदा सा।

³⁵कि तुसै नी बोलदै, लुणने री तैंईंयैं हाज़ी च़ार मीहने सी? हेरा हांऊँ तुसाबै बोला सा, आपणी औछ़ी फेरिया छेता पैंधै हेरा कि तेआ काटणै री तैंईंयैं पोकेंदे सी।

³⁶काटणू आल़ा ध्याड़ी पा सा होर हमेशा री ज़िन्दगी री तैंईंयैं फ़ौल़ कठा केरा सा; किबैकि वाहणु आल़ा होर काटणू आल़ा दुहे मिलिया खुशी मनालै।

³⁷किबैकि औखै ऐ पड़ाउण खरी बैशा सा: “वाहणु आल़ा होर सा होर काटणू आल़ा कोई होर सा।

³⁸मैं तुसाबै सौ छेत काटणै री तैंईंयैं भेज़ै, ज़ुणीन तुसै खेऊ नी केरू होरिये खेऊ केरू होर तुसै तिन्हरै खेऊ रै फ़ौल़ा न भागी हुऐ।”

³⁹तेई नगरा रै बोहू सारै सामरी लोकै तेसा बेटड़ी रै बोलणै न यीशु पैंधै बशाह केरू; किबैकि तेसै ऐ गुआही धिनी ती, यीशुऐ सैभ किछ़ ज़ो मैं केरू ती, मुँभै दसु।

⁴⁰तैबै ज़ैबै ऐ सामरी प्रभु यीशु आगै बै आऐ, ता प्रभु यीशु हागै अर्ज़ा केरदै लागे, कि आसरै औखै रौहा। तैबै प्रभु यीशु दुई रोज तौखै रौहै।

⁴¹तेई रै सन्देशा री बजहा सैंघै बोहू लोकै बशाह केरू।

⁴²होर तेसा बेटड़ी बै बोलू, “ऐबै आसै सिर्फ़ तेरै बोलणै पैंधै बशाह नैंई केरदै; किबैकि आसै आपुऐ शूणु, होर जाँणा सी कि ऐ मांहणु सच़िऐ दुनिया रा मुक्तिदाता सा।”

⁴³तिन्हां दुई रोजा न बाद प्रभु यीशु तौखै न गलील ज़िलै बै नौठै।

⁴⁴किबैकि प्रभु यीशुऐ आपुऐ गुआही धिनी कि भविष्यवाणी केरनु आल़ै री आपणै देशा न इज्ज़त नी होन्दी।

⁴⁵ज़ैबै प्रभु यीशु गलीला न आऊ, ता गलीला रै लोका खुशी सैंघै प्रभु न मिले; किबैकि ज़ेतरै कोम प्रभु यीशुऐ जाचा ध्याड़ी यरूश्लेम शैहरा मौंझ़ै केरै ती, तिन्हैं सौ सारै भाल़ै ती, किबैकि ते आपुऐ भी जाचा बै नौठै दै ती।

⁴⁶तैबै प्रभु यीशु भी गलीला रै काना ग्राँ न आऊ, ज़ौखै तिन्हैं पाणी रा अँगूरा रा रस बणाऊ ती। तौखै एक राज़ा रा नोकर ती ज़ुणिरा शोहरू कफरनहूम शैहरा न बीमार ती।

⁴⁷तेइयै ऐ शुणिया कि प्रभु यीशु यहूदिया रै गलीला न आऊदा सा, प्रभु यीशु हागै नौठा होर तिन्हां आगै अर्ज़ा केरदा लागा कि मूँ सैंघै एज़िया मेरा शोहरू बै ठीक केरा किबैकि सौ मौरनु आल़ा ती।

⁴⁸यीशुऐ तेइबै बोलू, “तुसै मेरै सन्देशा पैंधै तैबै बशाह केरना ज़ाँ तैंईंयैं तुसै कोई नशाणी होर चमत्कारा कोम नी हेरले।”

⁴⁹राज़ा रै नोकरै प्रभु यीशु बै बोलू, “ओ प्रभु मेरै शोहरू रै मौरने न पैहलै चौला।”

⁵⁰यीशुऐ तेइबै बोलू, “जा, तेरा शोहरू ज़िन्दा सा।” तेई मांहणुऐ प्रभु यीशु री गैला पैंधै बशाह केरू, होर नौठा।

⁵¹सौ हाज़ी बोता न ती, कि तेइरै नोकर तेई हागै आऐ होर बोलदै लागे, “तेरा शोहरू ज़िन्दा सा।”

⁵²तेइयै तिन्हां न पुछु, “कुणी बौगता न सौ ठीक होन्दा लागा?” ती तिन्हैं तेइबै बोलू, “हिज़ लगभग धयाडी एक बज़ै तेइरा जौर उतरु।”

⁵³तैबै बापुए जाणु कि ऐ तेई बोगता न हुआ, ज़ुणी बौगता न यीशुऐ तेइबै बोलू, “तेरा शोहरू ज़िन्दा सा,” तैबै तेइयै होर तेइरै सारै घौरा आल़ै बशाह केरू।

⁵⁴ऐ दुज़ा चमत्कारा रा कोम ती ज़ो यीशुऐ यहूदियै देशा वापस एज़िया गलील ज़िलै बै नौठा।