Read Pahari, Kullu यूहन्ना 6 Bible Online

यूहन्ना 6 - Pahari, Kullu bible

यूहन्ना 6

¹इन्हां गैला न बाद प्रभु यीशु गलीलै री मतलब तिबिरियास री झ़ीला रै पारै नौठै।

²होर बोहू लोका यीशु रै पिछ़ै ती, किबैकि ज़ो चमत्कारा कोम यीशु बीमारा पैंधै रिहा ती, ते तिन्हां बै हेरा ती।

³तैबै यीशु उथड़ी धारा पैंधै च़ढ़िया आपणै च़ेले सैंघै तौखै बेठै।

⁴यहूदियै री फसह री साजा नेड़ ती ज़ो कि साला न एकी बार एज़ा सा।

⁵ज़ैबै यीशुऐ आपणी औछ़ी फेरिया बोहू बड़ी भीड़ आपु नेड़ ऐन्दै हेरै, फिलिप्पुसा बै बोलू, “आसै इन्हरै खाँणै री तैंईंयैं कौखै न रोटी आंणनी?”

⁶तेइयै सौ तेइबै परखणै री तैंईंयैं बोलू किबैकि सौ आपु जाँणा ती कि सौ कि केरला?

⁷फिलिप्पुसै यीशु बै ज़वाब धिना, “दुई शौऊ रोजै़ री ध्याड़ी री रोटी भी तिन्हां बै पूरी नैंई होंणी कि सैभी बै थोड़ी-थोड़ी मिलली।”

⁸तेइरै च़ेले मौंझ़ै शमौन पतरसा रै भाई अन्द्रियासै प्रभु यीशु बै बोलू,

⁹“औखै एक शोहरू सा ज़ुणी आगै जौऊ री पौंज़ रोटी होर पकाइदी दुई मैच्छ़ी सा मगर ऐतरै मांहणु बै सौ कि सा?”

¹⁰यीशुऐ बोलू, “लोका बै बशात्।” तौखै बोहू गाह ती तैबै लोका जिन्हा मौंझ़ै मर्दे री गिणती लगभग पौंज़ झ़ार ती खाँणै री तैंईंयैं बेठै।

¹¹तैबै यीशुऐ रोटी लेई, होर धन्यवाद केरिया बैशणु आल़ै बै बौंडी होर तैण्ढी मैच्छ़ी भी, जेत्री तिन्हैं लोड़ी ती बौंडी।

¹²ज़ैबै लोका रोटी खाईया रोज़ै ता यीशुऐ आपणै च़ेले सैंघै बोलू, “बच़ीदी रोटी कठै केरा होर किछ़ शौटे नैंई लोड़ी।”

¹³तैबै तिन्हैं सौ टुकड़ै कठै केरै, होर जौऊ री पौंज़ रोटी रै टुकड़ै सैंघै ज़ुण खाँणै आल़ै न बचुन्दा ती बारा टोकरी भौरी।

¹⁴ज़ैबै ज़ुण चमत्कारा रै कोम प्रभु यीशुऐ रिहाऐ तैबै तिन्हां हेरिया लोका बोलदै लागे, “सौ भविष्यवाणी केरनु आल़ा ज़ुण दुनिया न ऐणु आल़ा ती पक्का ऐसा।”

¹⁵यीशुऐ ज़ाणिया कि ते मुँभै राज़ा बनाणै री तैंईंयैं ढौकणा चाहा सी तैबै जौता पैंधै केल्हा नौठा।

¹⁶ज़ैबै सौंझ़ हुई ता प्रभु यीशु रै च़ेले नौई पारै नौठै।

¹⁷होर किश्ती पैंधै बशाइया झ़ीला पारै कफरनहूम शहरा बै ज़ाँदै लागे। तेई बौगतै निहारा हुआ ती, होर प्रभु यीशु हाज़ी तैंईंयैं तिन्हां आगै नैंई आऐ ती।

¹⁸बागर बियाने री बजहा सैंघै किश्ती हिलदी लागी।

¹⁹ज़ैबै ते हिल्दै हिल्दैआ त्राई च़ार मील आगै निकतै, ता तिन्हैं यीशु झ़ीला पान्दै औंढदा होर किश्ती रै नेड़ ऐन्दा हेरू होर ते डौरै।

²⁰पर प्रभु यीशुऐ तिन्हां वै बोलू, “हांऊँ सा डौरै मौता।”

²¹तैबै ते प्रभु यीशु बै किश्ती पैंधै च़ढ़ाइया लेणै री तैंईंयैं त्यार हुऐ होर छ़ेकै सौ किश्ती तेसा ज़ैगा पैंधै पूजी ज़ौखै ते ज़ाँदै लागे ती।

²²दुज़ै रोज लोकै रै भीड़ै, ज़ो समुन्द्रा पारै खड़ी ती, ऐ हेरू, कि औखै एकी बै छ़ौड़िआ होर कोई दुज़ी किश्ती नी ऑथि, होर यीशु आपणै च़ेले सैंघै तेसा किश्ती पैंधै नैंई ती चढ़ै, पर यीशु रै च़ेले केल्है नौठै ती।

²³तैबै बाकि किश्ती तिबिरियासै रै तेसा ज़ैगा रै नेड़ आई, ज़ौखै तिन्हैं यीशु रै धन्यवाद केरनै न बाद रोटी खाई ती।

²⁴तैबै ज़ैबै तिन्हैं मांहणुऐ हेरू, औखै न ता यीशु सा होर न तिन्हरै च़ेले, तैबै ते बी किश्ती पैंधै च़ढ़िया यीशु बै तोपदै कफरनहूम शैहरा बै नौठै।

²⁵झ़ीला पारै ज़ैबै ते प्रभु यीशु सैंघै मिले ता बोलू, “ओ गुरू, तुसै औखै कैबै?”

²⁶यीशुऐ तिन्हां बै बोलू, “हांऊँ तुसाबै सच़-सच़ बोला सा, तुसै मुँभै तैबै नी तोपदै कि तुसै चमत्कारा रै कोम हेरे पर तैबै कि तुसै रोटी खाईया रोज़ै।

²⁷नाश होंणै रै खाँणै री तैंईंयैं खेऊ मता केरदै पर तेई खाँणै री तैंईंयैं ज़ो हमेशा री ज़िन्दगी ठहराई सा, ज़ुणियै हांऊँ मांहणु रै बेटै तुसाबै देणा, किबैकि बापू मतलब परमेश्वरै तेई पैंधै मोहर लाई सा।”

²⁸तिन्हैं प्रभु यीशु बै बोलू, “परमेश्वरा रा कोम केरनै री तैंईंयैं आसा कि केरना?”

²⁹यीशुऐ तिन्हां बै ज़वाब धिना, “परमेश्वरा रा कोम ऐ सा कि तुसै तेई पैंधै बशाह केरा ज़ुण तिन्हैं भेज़ू सा।”

³⁰तैबै तिन्हैं यीशु बै बोलू, “फिरी तैबै तुसै कुण ज़ेही नशाण रिहा सी कि तिन्हां हेरिया आसै तेरा बशाह केरना? तुसै कुण जेई कोम रिहा सी?

³¹आसरै बुज़ुर्गै बौणा न मन्ना खाऊ, ज़ैण्ढा पवित्र शास्त्रा न लिखू सा, ‘परमेश्वरै तिन्हां बै खाँणै री तैंईंयैं स्वर्गा न रोटी धिनी’।”

³²यीशुऐ तिन्हां बै बोलू, “हांऊँ तुसाबै सच़-सच़ बोला सा कि मूसा ऐ तुसाबै सौ रोटी नेंई धिनी, पर मेरा बापू तुसाबै सच़ी रोटी स्वर्गा न देआ सा।

³³किबैकि परमेश्वरै री रोटी सौऐ सा ज़ो स्वर्गा न उतरिआ दुनिया रै लोका बै ज़िन्दगी देआ सा।”

³⁴तैबै तिन्हैं प्रभु यीशु बै बोलू, “ओ प्रभु, ऐ रोटी आसाबै रोजै देआ केरा।”

³⁵यीशुऐ तिन्हां बै बोलू, “ज़िन्दगी री रोटी हांऊँ सा ज़ो मूँ हागै बै एज़ा सा सौ कैधी भी भूखा नी रौंहदा, होर ज़ो मूँ पैंधै बशाह केरा सा सौ कैधी भी शोखा नी रौंहदा।

³⁶पर मैं तुसाबै बोलू ती, कि तुसै हांऊँ हेरू, तैबै भी बशाह नैंई केरदै।

³⁷ज़ो किछ़ बापू मुँभै देआ सा, सौ सैभ किछ़ मूँ हागै ऐणा सा, होर ज़ो कोई मूँ हागै एला सौ मूँ कैधी भी नी खोलणा।

³⁸किबैकि हांऊँ आपणी मर्जी नैंई पर मेरै भेजणु आल़ै बापू री इच्छा पूरी केरनै री तैंईंयैं स्वर्गा न उतरु सा।

³⁹होर मेरै भेजणु आल़ै री, मर्जी ऐ सा कि ज़ो किछ़ तिन्हैं मुँभै धिनु सा, तेथा न हांऊँ किछ़ भी नैंई खोनु, पर तेइबै हांऊँ आखरी रोजा न होरी घेरै ज़िन्दा केरनु।

⁴⁰किबैकि मेरै बापू री ऐ इच्छा सा कि ज़े कोई बेटै बै हेरला होर तेई पैंधै बशाह केरला, तेई हमेशा री ज़िन्दगी पाणी सा, मूँ सौ आखरी रोजा न होरी घेरै जियाणा (ज़िन्दा केरना) सा।”

⁴¹तैबै यहूदी यीशु बै कुड़कुड़ांदै लागै, किबैकि यीशुऐ बोलू ती कि “ज़े रोटी स्वर्गा न आईदी, सौ हांऊँ सा।”

⁴²होर तिन्हैं बोलू, “कि ऐ यूसुफ रा बेटा यीशु नी ज़ुणिरै आमा बापू बै आसै जाँणा सी? तैबै सौ कैण्ढै बोला सा कि हांऊँ स्वर्गा न उतरु सा?”

⁴³यीशुऐ तिन्हां बै ज़वाब धिना, “आपु न कुड़कुड़ांदै।

⁴⁴कोई मूँ हागै तैबै तैंईंयैं नी एज़ी सकदा, ज़ैबै तैंईंयैं कि बापू परमेश्वर मूँ हागै नी भेज़ला, होर मूँ सौ आखरी रोज होरी घेरै जियाणा (ज़िन्दा केरना) सा।

⁴⁵एक भविष्यवाणी केरनु आल़ै पवित्र शास्त्रा न लिखू सा, ‘तिन्हां सारै परमेश्वरै री धिरै न सिखाऊंदे होंणा।’ ज़ुणियै बापू न शुणु होर सिखु सा, सौ मूँ हागै एज़ा सा।

⁴⁶ऐ नी ऑथि कि कोइयै बापू हेरू सा पर ज़ो परमेश्वरै री धिरै न सा सिर्फ़ तिन्हैं बापू हेरू सा।

⁴⁷हांऊँ तुसाबै सच़-सच़ बोला सा कि ज़ो कोई बशाह केरा सा, हमेशा रा ज़िन्दगी तेइरा सा।

⁴⁸ज़िन्दगी री रोटी हांऊँ सा।

⁴⁹तुसरै बुज़ुर्गै बौणा न मन्ना खाऊ होर मूँऐ।

⁵⁰ऐ सौ रोटी सा ज़ो स्वर्गा न ओसा फिरी मांहणु तेथा न खालै होर नी मौरदै।

⁵¹ज़िन्दगी री रोटी ज़ो स्वर्गा न उतरा सा, सौ हांऊँ सा अगर कोई ऐसा रोटी न खाला ता तेई हमेशा री तैंईंयैं ज़िन्दै रोहणा सा, होर ज़ो रोटी मूँ दुनिया रै ज़िन्दगी री तैंईंयैं देणी सा सौ मेरा मांस सा।”

⁵²ऐसा गैला पैंधै यहूदी लोका ऐण्ढा बोलिया आपु न झौटीदै लागै, “ऐ मांहणु कैण्ढै आसाबै आपणा मांस खाँणै बै देई सका सा?”

⁵³यीशुऐ तिन्हां बै बोलू, “हांऊँ तुसाबै सच़-सच़ बोला सा कि ज़ैबै तैंईंयैं तुसै हांऊँ मांहणु रै बेटै रा मांस नी खालै होर तेइरा लोहू नी पीलै, ता तुसा न हमेशा री ज़िन्दगी नी ऑथि।

⁵⁴ज़ुण मेरा मांस खा होर मेरा लोहू पीया सी हमेशा री ज़िन्दगी तेइरी सा, होर मूँ सौ आखरी रौजा न होरी घेरै जिन्दा केरना सा।

⁵⁵किबैकि मेरा मांस सच़ी न खाँणै री चीज़ सा, होर मेरा लोहू सच़ी न पीणै री चीज़ सा।

⁵⁶ज़े मेरा मांस खा सा होर मेरा लोहू पीया सा सौ मूँ न सदा बणिया रौहा सा, होर हांऊँ तेईन।

⁵⁷ज़ैण्ढा ज़िन्दै बापुए हांऊँ भेज़ू सा, होर हांऊँ बापू री बजहा सैंघै ज़िन्दा सा, तैण्ढाऐ सौ भी ज़ो मुँभै खाला तेई मेरी बजहा न ज़िन्दै रौहणा सा।

⁵⁸ज़ो रोटी स्वर्गा न उतरी सा, सौ रोटी मन्ना सांही नी ऑथि पर ज़ो बुज़ुर्गै खाई होर मूँऐ, ज़ुण कोई ऐ रोटी खाला तेई मेरी बजहा ज़िन्दै रौहणा सा।”

⁵⁹ऐ गैला यीशुऐ कफरनहूम नगरा रै एकी आराधनालय न उपदेश देंदी घेरै बोली ती।

⁶⁰यीशु सैंघै च़लणु आल़ै च़ेले मौंझ़ै न बोहूऐ ऐ शुणिया बोलू, “ऐ बड़ी मुश्किल गैल सा, ऐसा गैला बै कुण शुणी सका सा?”

⁶¹यीशुऐ आपणै मना न ऐ ज़ाणिया कि च़ेले आपु न ऐसा गैला पैंधै कुड़कुड़ा सी, यीशुऐ पुछ़ु, “कि ऐ गैला तुसाबै मूँ पैंधै बशाह केरनै न रोका सा?

⁶²अगर तुसै हांऊँ मांहणु रै बेटै बै ज़ौखै हांऊँ पैहलै ती, तौखै स्वर्ग ज़ाँदै हेरणा, तैबै कि होंणा?

⁶³परमेश्वरा री आत्मा ता ज़िन्दगी देणु आई सा, मांहणु री शक्ति न किछ़ लाभ नी ऑथि। ज़ो गैला मैं तुसाबै बोली सी सौ आत्मा धिरै न एज़ा सा, होर ज़िन्दगी देणु आल़ी सा।

⁶⁴पर तुसा न किछ़ ऐण्ढै भी सी ज़ो बशाह नी केरदै।” किबैकि यीशु पैहलै जाँणा ती कि ज़ो बशाह नैंई केरदै, ते कुण सी; होर कुणी हांऊँ ढोकणा सा।

⁶⁵यीशुऐ बोलू, “तैबै मैं तुसाबै बोलू ती कि ज़ाँ तैंईंयैं कोई बै बापू मूँ हागै नी भेज़ला ताँ तैंईंयैं सौ मूँ हागै बै नी एज़ी सकदा।”

⁶⁶एथा बजहा न यीशु सैंघै च़लणु आल़ै कई लोका वापिस (पिछ़ै) फिरै होर तेथा न बाद तिन्हां सैंघै नी औंढै।

⁶⁷तैबै यीशुऐ तिन्हां बारा च़ेले बै बोलू, “कि तुसै भी जाँणा चाहा सी?”

⁶⁸शमौन पतरसै ज़वाब धिना, “ओ गुरू, आसा कुणी आगै बै जाँणा? हमेशा री ज़िन्दगी री गैला ता तौ हागै सी;

⁶⁹होर आसै तौ पैंधै बशाह केरू, होर जाणु सा, कि परमेश्वरा रै पवित्र मांहणु तुसै सी।”

⁷⁰यीशुऐ तिन्हां बै ज़वाब धिना, “मैं तुसै बारा च़ेले चुनै सी, पर तुसा न एक मांहणु शैताना रै वशा न सा।”

⁷¹ऐ यीशुऐ शमौन इस्करियोती रै बेटै यहूदा रै बारै न बोलू ती, किबैकि सौऐ ज़ो बारा न एक ती, ज़ो यीशु बै ढौकणु आल़ा ती।