Read Pahari, Kullu यूहन्ना 7 Bible Online

यूहन्ना 7 - Pahari, Kullu bible

यूहन्ना 7

¹इन्हां गैला न बाद यीशु गलील ज़िलै न फिरदै रौहै; होर सौ यहूदिया देशा न जाँणा नी ती च़ाँहदै। किबैकि तौखै यहूदी नेता यीशु बै मारनै रा तरकीब सोच़दै लागे ती, तैबै यीशु यहूदिया देशा न जाँणा नी ती च़ाँहदै।

²होर यहूदी लोकै रै तोम्बू रा त्यौहार[3] नेड़े ती।

³तैबै यीशु रै भाइयै तिन्हां बै बोलू, “औखै मता रुका, यहूदिया देशा रै त्यौहारा बै जा, कि ज़ो चमत्कारा रै कोम तू केरा सा तिन्हां बै तेरै च़ेले भी तौखै हेरलै।

⁴किबैकि ऐण्ढा कोई नी ऑथि ज़े मशहूर होंणा चाहा सा, होर गोजुईया कोम केरला। अगर तू ऐ कोम केरा सा, ता आपणै आपा बै दुनिया रै लोका बै रिहा।”

⁵किबैकि यीशु रै भाई भी तिन्हां पैंधै बशाह नी ती केरदै।

⁶तैबै यीशुऐ तिन्हां बै बोलू, “मेरा जाणै रा सही बौगत हाज़ी तैंईंयैं नैंई आऊ, पर तुसै ता कैधी भी जाई सका सी।

⁷ऐ दुनिया रै लोका तुसा सैंघै बैर नैंई केरी सकदै, पर सौ मूँ सैंघै बैर डाआ सा किबैकि हांऊँ तिन्हां बै दसा सा तै बुरै कोम केरा सी।

⁸तुसै त्यौहारा न ज़ाआत्; मूँ ऐबै त्यौहारा बै नी जाँणा, किबैकि हाज़ी तैंईंयैं मेरै जाणै रा सही बौगत नी हुआ।”

⁹यीशुऐ तिन्हां बै ऐ गैला बोलिया गलील ज़िला न रौहै।

¹⁰पर ज़ैबै तेइरै भाई त्यौहारा न नौठै ता यीशु भी, सामने नैंई पर गोजुईया नौठै।

¹¹यहूदी नेता त्यौहारा न यीशु बै ऐ बोलिया तोपदै लागे, “सौ कौखै सा?”

¹²होर मांहणु मौंझ़ै यीशु रै बारै न शुड्क बोहू गैला हुई, किछ़ बोलदै लागे, “सौ खरा मांहणु सा।” होर किछ़ बोलदै लागे, “नैंई सौ ता मांहणु बै भरमा सा।”

¹³तैबै भी यहूदी नेतै री डौरे रै मारै कोई मांहणु यीशु रै बारै न शोभली गैला खुलिया नैंई ती बोलदै।

¹⁴त्यौहारा रै रोज़ा मौंझ़ै नौठा; ता यीशु मन्दिरा रै ब्राम्दै न जाईया वचन शूणान्दै लागे।

¹⁵तैबै यहूदी नेतै हैरान होईया बोलू, “ऐईबै बिना पौढ़िआ ऐ पवित्र शास्त्रा री ज्ञान बिद्या कौखै न आई?”

¹⁶तैबै यीशुऐ तिन्हां बै ज़वाब धिना, “मेरा उपदेश नैंई, पर मेरै भेजणु आल़ै री सा।

¹⁷अगर कोई तेइरी इच्छा पैंधै च़लणा चाहला, ता सौ ऐई उपदेशा रै बारै न जाणला कि ऐ परमेश्वरा री तरफा न सा या हांऊँ आपु धिरै न बोला सा।

¹⁸ज़ो आपु धिरै न किछ़ बोला सा, सौ आपणी सराउथी केरा सा; पर ज़ो आपणै भेजणु आल़ै री सराउथी केरा सा सौ मांहणु सच़ा सा, होर तेईन कोई पाप नी ऑथि।

¹⁹मूसै तुसाबै बिधान धिनु सा, तैबै बी तुसा न कोई बी तेई बिधाना पैंधै नैंई च़लदै। बल्कि तुसै मुँभै मारणा चाहा सी।”

²⁰लोकै ज़वाब धिना, “तौ न कोई बुरी आत्मा सा! कुण तुसाबै मारणा चाहा सी?”

²¹यीशुऐ तिन्हां बै बोलू, “मैं एक कोम केरू, होर तुसै सारै हैरान होआ सी।

²²तैबै मूसै बै खतना केरनै री हुक्म धिनी सा (ऐ न कि सौ मूसा री धिरै न सा, पर ऐ हुक्म पिछ़ै न आऊ सा), होर तुसै बशाँ रै ध्याड़ै मांहणु रा खतना केरा सी।

²³ज़ैबै बशाँ रै ध्याड़ै न मांहणु रा खतना केरा सी, तैबै मूसै रै बिधाना रा हुक्म खत्म नी होली, ता तुसै मूँ पैंधै किबै तैबै मिश केरा सी कि मैं बशाँ रै ध्याड़ै एक मांहणु खरी तैरहै ठीक केरू?

²⁴मुँह हेरी न्याय मता केरा, पर ठीक — ठीक न्याय केरा।”

²⁵तैबै किछ़ यरूश्लेम शैहरा न रौहणु आल़ै लोका बोल्दै लागै, “कि ऐ सौऐ नी ऑथि ज़ुणिबै मारणै री कोशिश केरनी लाई सा?

²⁶पर हेरा, सौ ता सैभी रै सामने गैला केरदा लागा सा होर कोई अधिकारी तेइबै किछ़ निसी रै बोली कि तिन्हें सच़-सच़ जाणु सा कि ऐही मसीह सा?

²⁷ऐ मसीह कैण्ढै होई सका सा? किबैकि आसै जाँणा सी कि सौ कौखला सा, पर मसीह ज़ैबै एला ता कोई नी जाणना कि सौ कौखला सा।”

²⁸तैबै यीशु मन्दिरा रै ब्राम्दै न उपदेश देंदी घेरै ज़ोरै सैंघै बोलू, “तुसै मुँभै जाँणा सी कि हांऊँ कौखला सा? हांऊँ आपुऐ नैंई आऊ, पर मेरा भेजणु आल़ा सच़ा सा, तेइबै तुसै नी जाणदै।

²⁹पर हांऊँ तेइबै जाँणा सा किबैकि हांऊँ तेइरी धिरै न सा होर तेइयै हांऊँ भेजु सा।”

³⁰यहूदी नेता यीशु बै ढौकणा चाहा ती, पर कोई यीशु बै ढौकि नी सके किबैकि तेइरै मौरनै रा बौगत हाज़ी नी ती आऊ ऑथि

³¹तैबै भी भिड़ा न बोहू मांहणुऐ यीशु पैंधै बशाह केरू, होर बोल्दै लागे, “मसीह ज़ैबै एला, ता कि ऐईन भी चमत्कारा रै कोम रिहाणै ज़ो ऐईयै रिहाऐ?”

³²फरीसियै लोका यीशु रै बारै न ऐ गैला चु़पचाप केरदै शुणै, होर मुख्यपुरोहिते होर फरीसियै यीशु बै ढौकणै री तैंईंयैं सपाई भेज़ै।

³³तैबै यीशुऐ बोलू, “हांऊँ थोड़ी देरी तैंईंयैं तुसा सैंघै सा फिरी आपणै भेजणु आल़ै हागै बै वापस जाँणा।

³⁴तुसा हांऊँ तोपणा, पर नी पाणा, होर ज़ौखै हांऊँ सा, तौखै तुसै नी एज़ी सकदै।”

³⁵यहूदी नेतै आपु न एकी दूज़ै सैंघै ढूणिदै लागे, “ऐई कौखै जाँणा कि आसा वै नैंई मिलणा? कि सौ तिन्हां यहूदी लोका हागै बै जाला ज़ो यूनानी शैहरा न लग-लग होईया रौहा सी, होर तिन्हां बै बी सिखाणा चाहा सा?

³⁶एथा रा कि मतलब सा ज़ो गैला तेइयै बोली, कि तुसा हांऊँ तोपणा पर नी पाणा, होर ज़ौखै हांऊँ सा, तौखै तुसै नी एज़ी सकदै?”

³⁷त्यौहारा रा आखरी रोज ज़ो खास रोज़ होआ ती। तेई रोज़ यीशु खड़ा हुआ होर जौरे सैंघै बोलू, “अगर कोई शौखा सा ता मूँ हागै एज़िया पिया।

³⁸ज़ो मूँ पैंधै बशाह केरला, ज़ैण्ढा पवित्र शास्त्रा न लिखुंदा सा, तेई रै दिला न ज़िन्दगी देणु आल़ी पाणी री नोई बौहन्दी रौहणा।”

³⁹यीशुऐ ऐ गैला पवित्र आत्मा रै बारै न बोलू ती, ज़ो तेई पैंधै बशाह केरनु आल़ै पाणु आल़ै ती। किबैकि आत्मा हाज़ी तैंईंयैं कोई पैंधै नी उतरी ती, किबैकि यीशु हाज़ी तैंईंयैं आपणी महिमा तैंईंयैं नी पूज़ै ती।

⁴⁰तैबै भिड़ा न कोई-कोइयै ऐ गैला शुणिया बोलू, “सच़िऐ ऐ मांहणु सौ भविष्यवाणी केरनु आल़ा सा।” ज़ुणिरै ऐणै रा आसै इंतज़ार केरदै लागै सी।

⁴¹होरी लोकै बोलू, “ऐ ता मसीह सा।” पर कोइयै बोलू, “मसीह कि गलील ज़िलै न ऐणा?”

⁴²कि पबित्र शास्त्रा न लिखुन्दा सा, कि मसीह दाऊदै रै खानदाना न होर बैतलैहम नगरा ग्राँ न ऐणा, ज़ौखै दाऊद रौहा ती?

⁴³इन्हां गैला री बजहा सैंघै लोका मौंझ़ै लड़ाई पौई।

⁴⁴तिन्हां न किछ़ यीशु बै ढौकणा चाहा ती, पर कोइयै तिन्हां बै हौथ नी लाऊ।

⁴⁵तैबै सपाई मुख्यपुरोहिते होर फरीसी आगै बै बापस आऐ तिन्हैं सपाई बै बोलू “तुसै सौ किबै नी ढौकु?”

⁴⁶सपाईए ज़वाब धिना, “कोई मांहणुऐ कैधी ऐण्ढी नौखी गैला नी केरी।”

⁴⁷फरीसियै तिन्हां बै ज़वाब धिना, “कि तुसै भी भरमाउन्दै सी।

⁴⁸कि यहूदी मुखिया होर फरीसी अधिकारी मौंझ़ै न कोई ऐ तेई पैंधै बशाह केरू सा?

⁴⁹पर ऐ लोका ज़ो मूसै रा बिधान नी जाणदै, सौहै यीशु पैंधै बशाह केरा सी। परमेश्वरा रा श्राप इन्हां लोका पैंधै सा।”

⁵⁰निकुदेमुसऐ, ज़ो पैहलै तेई हागै आऊ ती होर ज़ो फरीसी मौंझ़ै एक ती, तेइयै बोलू,

⁵¹“कि आसरा यहूदी बिधान कोई मांहणु बै, ज़ाँ तैंईंयैं पैहलै तेइरी शुणीयां जाणी नी लेंन्दे कि सौ कि केरा सा, सज़ा देआ सा?”

⁵²तिन्हैं तेइबै ज़वाब धिनु, “कि तू भी गलील ज़िलै रा सा? पवित्र शास्त्रा न जाइया तोप होर तैबै तौभै लागणा कि गलील ज़िलै न कोई भविष्यवाणी केरनु आल़ा प्रकट नैंई होंणा।”

⁵³तैबै सैभ कोई आपणै-आपणै घौरा बै नौठै।