Read Pahari, Kullu यूहन्ना 8 Bible Online

यूहन्ना 8 - Pahari, Kullu bible

यूहन्ना 8

¹पर यीशु होर तेइरै च़ेले जैतूनै री उथड़ी ज़ैगा पैंधै नौठै।

²आगलै रोज़ दोथी ज़ैबै यीशु वापस मन्दिरा न आऐ, बोहू सारै मांहणु यीशु हागै आऐ होर यीशु बैशिया तिन्हां बै उपदेश शूणादै लागै।

³तैबै शास्त्री होर फरीसियै लोकै एक बेटड़ी आंणी ज़ो बूरै कोमा न ढौकी ती। होर तैसा बै बिच़ा न खड़ी केरिया यीशु बै बोलू,

⁴“ओ गुरू, ऐ बेटड़ी आसै होरी मर्दा सैंघै बुरै कोम केरदी ढौकी सा।

⁵मूसै रै बिधाना न मूसै आसाबै हुक्म धिना सा कि ऐण्ढी बेटड़ी बै पात्थरै लाईया बाहणी; तैबै तुसै ऐसा बेटड़ी रै बारै न कि बोला सी?”

⁶तिन्हैं यीशु बै परखणै री तैंईंयैं ऐ गैल बोली ती ताकि तेसा पैंधै दोष लागणै री तैंईंयैं कोई गलती पालै, पर यीशु टुँबड़ै होईया गुठी लाईया ज़मीना पैंधै लिखदै लागै।

⁷ज़ैबै ते तिन्हां न पुच्छदे रौहै, ता यीशुऐ सीधा होईया ऐ ज़वाब धिना, “तुसा मौन्झा न ज़ुण पापी नी होला, सौहै पैहलै पात्थर मारला।”

⁸होर फिरी टुँबड़ै होईया ज़मीना पैंधै गुठी लाइया लिखदै लागै।

⁹पर तैआ ऐ शुणिया बड़ै न लेइया होछ़ै तैंईंयैं एक-एक केरिया निकतै, किबैकि तै जाँणा ती कि तै पापी सी, तैबै यीशु तौखै केल्है रौहै, होर बेटड़ी बिच़ा न खड़ी रौही।

¹⁰यीशुऐ खड़ै होईया तेसा बै बोलू, “ओ बेटड़ियै, सैभ कौखै बै नौठै? कि कोइयै तौ पैंधै सज़ै री हुक्म नी धिना।”

¹¹तेसै बेटड़ी बोलू, “ओ गुरू, कोइयै नैंई धिनी” यीशुऐ बोलू, “हांऊँ भी तौ पैंधै सज़ा रा हुक्म नी देंदा, जा होर दुजिये पाप हेरी केरदी।”

¹²यीशुऐ लोका बै बोलू, “दुनिया रा प्याशा हांऊँ सा, ज़ुण मूँ पिछ़ै औंढा सा सौ निहारै न नी होन्दा, पर तेई ज़िन्दगी देणु आल़ा प्याशा पाणा।”

¹³फरीसियै यीशु बै बोलू, “तू आपणी गुआही आपु देआ सा, तेरी गुआही सच़ी नैंई ऑथि।”

¹⁴यीशुऐ तिन्हां बै ज़वाब धिना, “चाऐ हांऊँ आपणी गुआही आपुऐ देआ सा, तैबै भी मेरी गुआही सच़ी सा। किबैकि हांऊँ जाँणा सा कि हांऊँ कौखै न आऊ सा होर कौखै बै जा सा? पर तुसै नी जाणदै कि हांऊँ कौखै न एज़ा सा होर कौखै बै जा सा?

¹⁵मुँह हेरी न्याय मता केरा, पर ठीक — ठीक न्याय केरा।

¹⁶होर अगर हांऊँ न्याय केरनु भी, ता मेरा न्याय सच़ा सा किबैकि हांऊँ केल्हा नैंई होर ज़ुणियै हांऊँ भेजुन्दा सा।

¹⁷तुसा रै मूसै रै बिधाना न भी लिखू सा कि दुई मांहणु री गुआही मिलिया सच़ी होआ सा;

¹⁸एक ता हांऊँ आपुऐ आपणी गुआही देआ सा, होर बापू परमेश्वर बी मेरी गुआही देआ सा ज़ुणियै हांऊँ भेज़ू सा।”

¹⁹तिन्हैं यीशु न पुछ़ु, “तेरा बापू कौखै सा?” यीशुऐ उतर धिना, “न तुसै मुँभै जाणदै ता न मेरै बापू बै अगर तुसै जाणदै ता मेरै बापू बै भी जाणदै।”

²⁰ऐ गैला यीशुऐ मन्दिरा रै ब्राम्दै न उपदेश देंदी घेरै भण्डार घौरा न बोली, होर कोइयै यीशु नैंई ढौकू, किबैकि तिन्हरा दुःख सौहिया मौरनै रा सही बौगत हाज़ी तैंईंयैं नी ती आऊ ऑथि।

²¹यीशुऐ तिन्हां बै भी बोलू, “हांऊँ जा, सा, होर तुसा हांऊँ तोपणा होर आपणै पापा न मौरणा; ज़ौखै हांऊँ जा सा, तौखै तुसै नी एज़ी सकदै।”

²²तुंई पैंधै यहूदी नेतै बोलू, “कोइँछ़ै सौ आपु बै ता नैंई मारला, ज़ौखै हांऊँ जा सा तौखै तुसै नी एज़ी सकदै।”

²³यीशुऐ तिन्हां बै बोलू, “तुसै एसा धौरती रै सी, पर हांऊँ स्वर्गा न आऊ सा। तुसै दुनिया रै सी, हांऊँ दुनिया रा नी ऑथि।

²⁴तैबै मैं तुसाबै बोलू ती, कि तुसै आपणै पापा न मौरणा, किबैकि अगर तुसै बशाह नी केरदै कि हांऊँ सौहै सा ता आपणै पापा न मौरणा।”

²⁵यहूदी नेतै यीशु बै पुछ़ू, “तू कुण सा?” यीशुऐ तिन्हां बै बोलू, सौहै ज़ो शुरू न तुसाबै बोलदा लागा सा।

²⁶“तुसरै बारै न मुँभै बोहू किछ़ बोलणा सा, होर न्याय केरना सा, फिरी बी मेरा भेजणु आल़ा सच़ा सा, होर ज़ो मैं तिन्हां न शुणु सा सौहै दुनिया रै लोका बै बोला सा।”

²⁷तिन्हैं ऐ नी बुझू यीशु तिन्हां सैंघै बापू परमेश्वरा रै बारै न बोला सा।

²⁸तैबै यीशुऐ बोलू, “ज़ैबै तुसै हांऊँ मांहणु रै बेटै बै उथड़ै पैंधै चढ़ालै, ता तुसा जाणना सा कि हांऊँ सौऐ सा, हांऊँ आपणै आपा न किछ़ नी केरदा, पर ज़ैण्ढै मेरै बापुए मुँभै सिखाऊंदा सा, तैण्ढै हांऊँ ऐ गैला बोला सा।

²⁹मुँभै भेजणु आल़ा मूँ सैंघै सा, तिन्हैं हांऊँ केल्है नी छ़ौड़ु, किबैकि हांऊँ हमेशा सौऐ केरा सा ज़ुणीन मेरा भेजणु आल़ा खुश होआ सा।”

³⁰ज़ैण्ढै यीशु ऐ गैला बोलदै लागै ती कि कई मांहणुऐ यीशु पैंधै बशाह केरू।

³¹तैबै यीशुऐ ज़ुणियै पैंधै बशाह केरू ती, तिन्हां यहूदी बै बोलू, “अगर तुसै मेरै बचना रै मुताबक चललै, ता सच़ीऐ तुसै मेरै च़ेले बैणना।

³²तुसा सच़ जाण न, होर सच़ा तुसाबै आज़ादी देणी।”

³³तिन्हैं यीशु बै बोलू, “आसै ता अब्राहमै रै खानदाना रै सी, होर कैधी भी कोई रै दास नी हुऐ तैबै तू कैण्ढै बोला सा कि तुसै आज़ाद होंणा सा?”

³⁴यीशुऐ तिन्हां बै बोलू, “हांऊँ तुसाबै सच़-सच़ बोला सा कि ज़ो कोई पाप केरा सा सौऐ पापा रा गुलाम सा।

³⁵नोकर हमेशा घौरा नी रौंहदै; बेटा हमेशा रौहा सा।

³⁶तैबै अगर बेटा तुसाबै आज़ाद केरला, ता सच़ा न तुसा आज़ाद होंणा सा।

³⁷हांऊँ जाँणा सा कि तुसै अब्राहमा रै खानदाना रै सी, तैबै भी मेरा वचन तुसरै दिला न ज़ैगा नी पाँदा, तैबै तुसै मुँभै मारणा चाहा सी।

³⁸हांऊँ सौहै बोला सा, ज़ैबै हांऊँ आपणै बापू हागै ती, ज़ो गैला मैं हेरी ती, होर तुसै भी सौ ऐ केरा सी ज़ो तुसै आपणै बापू न शुणु सा।”

³⁹तिन्हैं यीशु बै ज़वाब धिना, “आसरा बापू ता अब्राहम सा।” यीशुऐ तिन्हां बै बोलू, “अगर तुसै अब्राहमै री औलाद होंदै, तैबै अब्राहमै रै बराबरा कोम केरदै,

⁴⁰पर ऐबै तुसै मुँभै मारणा चाहा सी, मैं तुसाबै सच़ा वचन दसु ज़ो मैं परमेश्वरा न शुणु ती। ऐण्ढा ता अब्राहमै नी केरू ती।

⁴¹तुसै आपणै बापू रै बराबर कोम केरा सी।” तिन्हैं यीशु बै बोलू, “आसै व्यभिचारा न पैदा नैंई हुऐ सी, आसरा ऐकै बापू सा मतलब परमेश्वर।”

⁴²यीशुऐ तिन्हां बै बोलू, “अगर परमेश्वर तुसरा बापू होन्दा ता तुसा मूँ सैंघै झ़ुरी डाहणी ती; किबैकि हांऊँ परमेश्वरै री धिरै न आऊ सा। हांऊँ आपु धिरै न नी आऊ सा, पर तिन्हैं हांऊँ भेज़ू सा।

⁴³तुसै मेरी गैला किबै नैंई बूझदै? किबैकि तुसै मेरै गैला शुणी नैंई सकदै।

⁴⁴तुसै आपणै बापू शैताना री धिरै न सी, होर आपणै बापू री लालसा बै पूरा केरना चाहा सी। सौ ता पैहलै न ओरै खूनी सा होर सच़ा पैंधै नी टिकू, किबैकि सच़ तेईन नैंई ऑथि। ज़ैबै सौ झूठ बोला सा, ता आपणै आदता सैंघै बोला सा, किबैकि सौ झूठा सा, मतलब झूठा रा बापू सा।

⁴⁵हांऊँ सच़ बोला सा, तैबै तुसै मूँ पैंधै बशाह नी केरदै।

⁴⁶तुसा मौंझ़ै कुण मुँभै पापी ठहरा सा? अगर हांऊँ सच़ बोला सा, ता तुसै मेरा बशाह किबै नी केरदै?

⁴⁷ज़ो कोई परमेश्वरा रा होआ सा, सौ परमेश्वरै री गैला शुणा सा; होर तुसै तैबै नी शुणदै कि तुसै परमेश्वरै री धिरै न नैंई ऑथि।”

⁴⁸ऐ शुणिया यहूदी नेतै यीशु बै बोलू, “आसै ठीक बोला सी कि तू सामरी शैहरा रा सा, होर तौ न बुरी आत्मा सा?”

⁴⁹यीशुऐ ज़वाब धिना, “मूँ न बुरी आत्मा नैंई ऑथि, पर हांऊँ आपणै बापू रा आदर केरा सा।

⁵⁰पर हांऊँ आपणी सराउथी नैंई च़ाँहदा, हाँ पर एक सा ज़ो मेरी सराउथी चाहा सा, होर सौहै न्याय केरा सा।

⁵¹हांऊँ तुसाबै सच़-सच़ बोला सा अगर कोई मांहणु मेरै वचना पैंधै चला सा, ता तेइबै हमेशे री तैंईंयैं मौऊत भी नैंई हेरणी।”

⁵²यहूदियै नेतै यीशु बै बोलू, “ऐबै आसै जाणु कि तौ न बुरी आत्मा सा, अब्राहम मौरूदा सा, होर भविष्यवाणी केरनु आल़ै भी मौरे सी, होर तू बोला सा, ज़ुण मेरै वचना पैंधै च़लला ता तेई कैधी नी मौरना।

⁵³आसरा बापू अब्राहम ता मौरू सा कि तू तेईन भी बड़ा सा? होर भविष्यवाणी केरनु आल़ै भी मौरै सी तू आपणै आपा बै कि बुझा सा?”

⁵⁴यीशुऐ ज़वाब धिना, “अगर हांऊँ आपणी सराउथी आपुऐ केरनु ता, मेरी किछ़ सराउथी नी ऑथि, पर ज़ो मेरी सराउथी केरनु आल़ै मेरा बापू सा। ज़ौसबै तुसै बोला सी कि सौ तुसरा परमेश्वर सा।

⁵⁵तुसै ता सौ जाणु नी। पर हांऊँ तेइबै जाँणा सा, अगर हांऊँ बोलनू कि हांऊँ तेइबै नी जाणदा ता मुँबी तुसा सांही झ़ूठै बणना, हांऊँ तेइबै जाँणा सा होर तेई रै बचना पैंधै चला सा।

⁵⁶तुसरा बुज़ुर्ग अब्राहम मुँभै हेरणै री आशा न बोहू खुश ती, तेइयै हेरू होर खुशी मनाई।”

⁵⁷यहूदी नेतै यीशु बै बोलू, “हाज़ी तैंईंयैं तू पजाह बौर्षा रा नैंई तैबै भी तैं अब्राहम हेरू सा?”

⁵⁸यीशुऐ तिन्हां बै बोलू, “हांऊँ तुसाबै सच़-सच़ बोला सा, कि अब्राहम न पैहलै पैदा हुआ हांऊँ ती।”

⁵⁹तैबै तिन्हैं यीशु बै मारणै री तैंईंयैं पात्थर च़कै, पर यीशु तिन्हरी नज़री न गोजुईया मन्दिरा न निकतै।