Read Pahari, Kullu प्रेरित 1 Bible Online

प्रेरित 1 - Pahari, Kullu bible

प्रेरित 1

¹हे थियुफिलुस, मैं पैहली कताब तिन्हां सैभी गैलै रै बारै न लिखी, ज़ो यीशु शुरू न लेइया केरदा होर सिखाँदा रौहू,

²तेई बौगता तैंईंयैं ज़ैबै तैंईंयैं कि सौ तेइरै प्रेरिता बै ज़ो तेइयै चुनै ती, पवित्र आत्मा री मज़ती द्वारा हुक्म देइया स्वर्गा बै नैंई च़कू,

³तेइयै बड़े दुःख सौहणै होर मौरनै न बाद बोहू पक्के सबूता सैंघै आपणै आपा बै ज़िन्दा रिहाऊ, होर च़ाली रोजा तैंईंयैं सौ तिन्हां न हेरुआ, होर परमेश्वरा रै राज्य री गैला केरदा रौहु।

⁴होर तेइयै च़ेले सैंघै मिलिया हुक्म धिना, “यरूश्लेम शैहरा बै मता छ़ौड़ा, पर बापू री तेई भेंटा री प्रतिज्ञा रै पूरै होंणै रा इंतज़ार केरदै रौहा, ज़ुणिरी चर्चा तुसै मूँ न शुणी सा।

⁵किबैकि यूहन्नै ता पाणी न बपतिस्मा धिना ती, पर थोड़ै रोजा बाद तुसै पवित्र आत्मा न बपतिस्मा पाणा।”

⁶तिन्हैं प्रेरितै कठै होईया यीशु न पुछ़ू, “ओ प्रभु, कि तौ एही बौगतै इस्राइला रा राज्य दबारा फेरना?”

⁷यीशुऐ तिन्हां बै बोलू, “तेई बौगतै रै बारै न ज़ाणना तुसरी तैंईंयैं जरूरी नैंई ऑथि। सिर्फ़ तिन्हां गैला रै बारै न बापू जाँणा सा कि तै कैबै होली।

⁸पर ज़ैबै पवित्र आत्मा तुसा पैंधै एला तैबै तुसाबै शक्ति मिलणी; होर फिरी तुसै मेरै बारै न, यरूश्लेम शैहरा न लेइया सारै यहूदिया ज़िलै होर सामरिया ज़िलै होर सारै दुनिया रै हर ज़ैगा मेरै गवाह होंणा।”

⁹ऐण्ढा बोलै न बाद यीशु तिन्हरै हेरदै-हेरदै स्वर्गा बै च़कुआ होर बादलै री बजहा सैंघै तै तेइबै हेरी नी सकै।

¹⁰प्रेरित ज़ैबै तेइबै स्वर्गा धिरै हेरदै लागै ती ता शुणा, च़ानक दूई मर्द च़मकणु आल़ै शेतै झिकड़ै लाइया तिन्हां सामनै एज़िया खड़ै हुऐ।

¹¹होर बोलदै लागै, “ओ गलीली मर्दो, तुसै किबै खड़ै होईया आसमाना धिरै भाल्दै लागै सी? ऐ यीशु ज़ो तुसा हागै न स्वर्गा बै च़कुआ ज़ौस रीतियै तुसै ऐ ज़ाँदा हेरू तेसा रीतियै ऐई दबारा ऐणा।”

¹²तैबै प्रेरित ज़ैतून नाँ रै ढौगा न ज़ो यरूश्लेम शैहरा रै नेड़े बशाँ रै एक किलो मिटरा री दूरी पैंधै ती यरूश्लेम शैहरा बै आऐ।

¹³ज़ैबै ते नगरा न पुजै ता ते तेई टाल़ै पैंधै नौठै ज़ौखै पतरस, यूहन्ना न, याकूब, अन्द्रियास, फिलिप्पुस, थौमा, बरतुलमई, मती, हलफई रा बेटा याकूब होर शमौन ज़िलौती होर याकूबा रा बेटा यहूदा रौहा ती।

¹⁴ऐ सारै कई बेटड़ी होर यीशु री आमा मरियम होर यीशु रै भाई सैंघै एक मन होईया प्रार्थना न लागी रौहै।

¹⁵तिन्हां ध्याड़ै न पतरस भाई बिच़ै ज़ो कि लगभग एक शौऊ बीह बिश्वासी मांहणु ती, खड़ै होईया बोलदा लागा,

¹⁶“ओ भाइयो बैहणियो, पवित्र शास्त्रा न लिखुदा पूरा होंणा ज़रूरी ती। ज़ो पवित्र आत्मै दाऊदै रै मुँहै लाइया यहूदै रै बारै न ज़ो यीशु बै ढौकणु आल़ै रा अगुवा ती पैहलै न बोलू ती।

¹⁷किबैकि सौ आसा बिच़ै न एक ती, होर सैभै रै कोमा न आसा सैंघै शामिल ती।”

¹⁸तेइयै पापै री कमाई न एक छेत लेऊ होर उल्टा पौड़ू होर तेइरा पेट फुटू होर तेइरी सारी आँजा निकती।

¹⁹एसा गैला बै यरूश्लेम शैहरा न रौहणु आल़ै सारै लोका जाँणा सी। तिन्हैं तेई छेता रा नाँ बी तिन्हरी भाषा न “हकलदमा” मतलब लोहू रा छेत रखू।

²⁰किबैकि दाऊद भजन सँहितै री कताबा न लिखू सा, तेइरा घौर उजड़ू लोड़ी; होर तौखै कोई नी रौहला; “ ‘होर तेइरा अध्यक्षा रा औह्दा कोई होर लेला।’

²¹यूहन्नै रै बपतिस्मै न लेइया स्वर्गा बै च़किणै तैंईंयैं ज़ेतरै बी रोज़ा तैंईंयैं यीशु आसा सैंघै ऐन्दा-ज़ाँदा रौहू होर ज़ो लोका आसा सैंघै रौहै,

²²ऐ ज़रूरी सा कि तिन्हां न एक मांहणु आसा सैंघै यीशु रै ज़िन्दै होंणै रा गुआह बणला।”

²³तैबै तिन्हैं दूई मांहणु खड़ै केरै। एक यूसुफ ज़ुणिबै बरसब्बास बोला सी होर तेइरा आपणा नाँ यूस्तुस सा होर दुजा मत्तित्याह खड़ा केरू।

²⁴तैबै तिन्हैं प्रार्थना केरी; हे “प्रभु, तू ज़ो सैभी रै मना बै जाँणा सा ऐ प्रगट केर कि तैं इन्हां दूई न कुण चुनू?

²⁵कि सेवै रै कोमा न प्रेरिताई रै तेई औह्दै बै लेला ज़ुणिबै छ़ौड़िआ यहूदा आपणी ज़ैगा बै नौठा।”

²⁶तैबै तिन्हैं तेइरै बारै न चिट्ठी पाई होर चिट्ठी मत्तित्याह रै नाँ री निकती होर सौ तिन्हां ग्यारा प्रेरित च़ेले सैंघै गिणुआ।