Read Pahari, Kullu प्रेरित 10 Bible Online

प्रेरित 10 - Pahari, Kullu bible

प्रेरित 10

¹कैसरिया नगर न कुरनेलियुस नाँ रा एक मांहणु ती, ज़ो इतालियानी पलटना रा सूबैदारा ती।

²सौ परमेश्वरा रा भक्त ती, होर आपणै सारै खानदाना समेत परमेश्वरा न डौरा ती, सौ गरीब यहूदी लोका बै बोहू दान देआ ती होर परमेश्वरा आगै लगातार प्रार्थना केरा ती।

³तेइयै ध्याड़ी रै त्रीज़ै पौहरै रै लगभग त्राई बज़ै एक दर्शन हेरू, कि परमेश्वरा रा एक स्वर्गदूत तेई हागै भीतरै एज़िया बोला सा, हे “कुरनेलियुस।”

⁴तेइयै सौ ध्याना सैंघै हेरू होर डौरदै-डौरदै बोलू, “हे प्रभु मुँभै दस कि गैल सा?” तेइयै बोलू, तेरी प्रार्थना होर दान यादगारी री तैंईंयैं परमेश्वरा सामनै पुजै सी।

⁵होर ऐबै याफा नगरा न मांहणु भेज़िआ शमौन ज़ुणिबै पतरस बोला सी, तेइबै शाध।

⁶सौ च़ंबड़ै रै धँधा केरनु आल़ै शमौनै रै घौरा न पाहुँणा सा, होर तेइरा घौर समुद्रै रै कनारै सा।

⁷ज़ैबै सौ स्वर्गदूत तेई हागै न भैगू ता तेइयै आपणै दूई सेवक होर ज़ो तेई सैंघै रौहा ती तिन्हां न एक परमेश्वरा रा भक्त सिपाही शाधु।

⁸होर तिन्हां बै सारी गैला दैसिआ ते याफा नगरा बै पतरसा बै आंणनै री तैंईंयैं भेज़ै।

⁹दुज़ै ध्याड़ी, ज़ैबै इन्हां त्राई बै ज़ुणिबै कुरनेलियुसै भेज़ै ती, ते च़लदै-च़लदै नगरा न लगभग बारा बाज़ै पुजै। तेई बौगता पतरस प्रार्थना केरदा छ़ापरा पैंधै च़ढ़ू ती।

¹⁰तेइबै भूख लागी होर सौ किछ़ खाँणा चाहा ती पर ज़ैबै ते रोटी त्यार केरदै लागै ती ता पतरसै दर्शन हेरू।

¹¹होर तेइयै हेरू, कि आसमान खुलू होर एक बड़ी च़ादरा सांही लटकाउआदा, धौरती बै उतरदा लागा सा।

¹²ज़ुणीन धौरती रै हर किस्मै रै पशु होर आसमाना रै च़ीड़ू-च़कारू ती, ज़ुणिबै मूसा रै बिधाना रै मुताबक यहूदी लोका री तैंईंयैं खाँणा नाँह ती।

¹³तेईन एक ऐण्ढी आवाज़ शुणुई कि हे पतरस, “उठ, मार होर खा।”

¹⁴पर पतरसै बोलू, नैंई प्रभु बिल्कुल नी, किबैकि मैं औज़ा तैंईंयैं छ़ोतली च़िज़ा नी खाई।

¹⁵तैबै दुज़ी बार तेईन भी शुणुआ, “कि ज़ो किछ़ परमेश्वरै च़ोखा ठहराऊ सा तू तेइबै छ़ोतली मत बोलदा।”

¹⁶त्रा बार ऐण्ढाऐ हुआ; तैबै सौ बड़ी चादर तुरन्त आसमाना बै च़ेकुआ।

¹⁷ज़ैबै पतरस आपणै मैना न दूई विचार केरदा लागा ती, कि ज़ो दर्शन तिन्हैं हेरू तेथा रा मतलब कि सा, तैबै तै मांहणु ज़ो कुरनेलियुसै भेज़ै ती ते शमौनै रै घौरा रा पैता लाइआ तेइरी डेवढ़ी हागै आई पुज़ै,

¹⁸होर पुछ़दै लागै, कि शमौन ज़ुणिबै पतरस बोला सी सौ औखै पाहुँणा सा?

¹⁹पतरस तेई दर्शनै रै बारै न सोच़दा लागा ती, कि प्रभु री पवित्र आत्मै तेइबै बोलू, हेर त्रा मांहणु तौभै तोपदै लागै सी।

²⁰तैबै तू उठिया बुनै धिरै बै ज़ा, होर बिना डौरै तू तिन्हां सैंघै ज़ा किबैकि ते मैं भेज़ै सी।

²¹तैबै पतरसै उतरिआ तिन्हां मांहणु बै बोलू, हेरा तुसै ज़ुणी तोपदै लागै सी सौ हांऊँ सा। तुसरै ऐणै री कि बजहा सा।

²²तिन्हैं बोलू, आसै कुरनेलियुस सुबैदारै भेज़ै सी ज़ो धर्मी होर परमेश्वरा न डौरनू आल़ा सा होर सारी यहूदी ज़ाति न खरा मांहणु सा, तेइयै एकी पवित्र स्वर्गदूता न च़िताऊणी पाई कि तौभै आपणै घौरा शाधिआ तौ न वचन शुणला।

²³तैबै तेइयै ते भीतरै शाधै होर तिन्हरी पाहुणच़ारी केरी, होर दुज़ै रोज़ै सौ तिन्हां सैंघै नौठा होर याफै शहरा रै विश्वासी भाई मौंझ़ै न कई तेई सैंघै नौठै।

²⁴त्रीज़ै रोज़ै ते कैसरिया नगरा न पुजै, होर कुरनेलियुस आपणै टबर होर सैंघी-साथी बै कठा केरिआ तिन्हरी गैला केरदा लागा ती।

²⁵ज़ैबै पतरस भीतरै ऐन्दा लागा ती, ता कुरनेलियुस तेई सैंघै मिलू, होर तेइरी ज़ोंघा पैंधै पौड़िआ प्रणाम केरू।

²⁶पर पतरसै तेइबै खड़ै च़किआ बोलू, खड़ा हो हांऊँ बी ता मांहणु सा।

²⁷होर तेई सैंघै गैल-बात केरदै-केरदै भीतरा बै नौठा, बोहू सारै लोक बै कठै हेरिआ तेइयै तिन्हां बोलू,

²⁸पतरसै तिन्हां बै बोलू, “तुसै जाँणा सी, कि होरी ज़ाति री सँगति केरना होर तिन्हां कौछ़ै जाँणा यहूदी बिधाना रै हिसाबा न पाप सा पर परमेश्वरै मुँभै दैसू सा, कि हांऊँ कौसी मांहणु बै छ़ोतला नी बोलणू।

²⁹एसा बजहा न हांऊँ बगैर बोलै आऊ। ऐबै हांऊँ पुछ़ा सा कि हांऊँ कौस कोमै री तैंईंयैं शाधु सा।”

³⁰कुरनेलियुसै बोलू, एसा घड़ी च़ार रोज़ पैहलै हांऊँ आपणै घौरा न त्रीज़ै पौहरै त्राई बाज़ै प्रार्थना केरदा लागा ती कि च़मकीलै झिकड़ै लाऊआ दा एक मर्द मूँ सामनै एज़िया खड़ा हुआ,

³¹होर बोलदा लागा, हे कुरनेलियुस तेरी प्रार्थना शुणुई सा होर तेरै दान परमेश्वरा सामनै याद केरूऐ सी।

³²ऐबै कौसी बै याफा बै भैज़िआ शमौन ज़ुणिबै पतरस बोला सी शाध। सौ समुद्रै रै कनारै च़ंबड़ै रै धँधा केरनु आल़ै शमौनै रै घौरा न रौहा सा, होर ज़ैबै तेई ऐणा तैबै तेई तुसाबै परमेश्वरा री गैला दसणी।

³³तैबै मैं तुरन्त तौ आगै मांहणु भेज़ै होर तैं भला केरू कि तू आऊ। ऐबै आसै सैभै औखै परमेश्वरा सामनै सी ताकि ज़ो किछ़ परमेश्वरै तौभै बोलू सा तेइबै शुणलै।

³⁴तैबै पतरसै बोलू, ऐबै मुँभै पक्का विश्वास हुआ कि परमेश्वर कौसी रा पक्षपात नी केरदा,

³⁵बल्कि हर एक ज़ाति ज़ो परमेश्वरा न डौरा सा होर धर्मै रै कोम केरा सा सौ तेइबै ग्रहण केरा सा।

³⁶ऐ सौहै शान्ति होर खुशी रा समाद सा ज़ो तेइयै इस्राइली लोका हागै यीशु मसीह रै द्वारा भेज़ू ज़ो सैभी रा प्रभु सा।

³⁷तेसा गैला बै तुसै जाँणा सी ज़ो यूहन्नै रै बपतिस्मै रै प्रचारा न बाद गलील ज़िलै न शुरू केरिआ सारै यहूदिया प्रदेशा न फैली।

³⁸तुसै नासरता रै यीशु नासरी रै बारै न जाँणा सी कि परमेश्वरै कौस रीतियै पवित्र आत्मा होर शक्ति सैंघै अभिषेक केरू। सौ हमेशा भलाई रै कोम केरदा रौहू होर ज़ुण शैताना रै सताउदै ती, तिन्हां बै ठीक केरदा रौहू किबैकि परमेश्वर तेई सैंघै ती,

³⁹होर आसै तिन्हां सैभी कोमै रै गुआही सी ज़ो तेइयै सारै यहूदिया देशा न केरै होर यरूश्लेम शैहरा न बी केरै होर तिन्हैं सौ क्रूसा पैंधै लटकाइआ मारू।

⁴⁰पर सौ परमेश्वरै त्रीज़ै रोज़ै मूँऐंदै न ज़िन्दा केरू होर प्रगट बी केरू सा।

⁴¹सैभी लोका बै नी पर तिन्हां गुआही बै ज़ो परमेश्वरै पैहलै न चुनै ती, मतलब आसाबै ज़ुणियै कि आसै मूँऐंदै न ज़िन्दै होंणै न बाद तेई सैंघै खाऊ-पीऊ।

⁴²तेइयै आसाबै हुक्म धिना कि सारै लोका बै प्रचार केरा; होर गुआही दैआत् कि यीशु ही एक सा ज़ो परमेश्वरै ज़िन्दै होर मूँऐंदै रा न्यायी ठहराऊ सा।

⁴³तेइरै बारै न सैभै भविष्यवाणी केरनु आल़ा गुआही देआ सी, कि ज़ो कोई तेई पैंधै विश्वास केरला तेइबै यीशु रै नाँ रै ज़रियै पापै री माफी मिलणी।

⁴⁴ज़ैबै पतरस इन्हां गैला केरदा लागा ती, ता पवित्र आत्मा वचन शुणनू आल़ै सैभी लोका पैंधै उतरु।

⁴⁵ज़ेतरै यहूदी विश्वासी पतरसा सैंघै आऐ ती, ते सारै हैरान हुऐ कि होरी ज़ाति रै लोका पैंधै ज़ो यहूदी नी ऑथि तिन्हां बै बी पवित्र आत्मा रा दान मिलू।

⁴⁶किबैकि तिन्हैं ते भाँति-भाँति री भाषा बोलदै होर परमेश्वरै री बड़ाई केरदै शुणै।

⁴⁷तैबै पतरसै बोलू, कि कोई पाणी बै रोकी सका सा कि ऐ बपतिस्मा नी पालै ज़ुणियै कि आसा सांही परमेश्वरा न पवित्र आत्मा पाऊ सा।

⁴⁸होर पतरसै इन्हां बै यीशु मसीह रै नाँ न बपतिस्मा देणै रा हुक्म धिना, तैबै तिन्हैं पतरसा हागै अर्ज़ा केरी कि सौ किछ़ रोज़ तिन्हां सैंघै रौहला।