Read Pahari, Kullu प्रेरित 13 Bible Online

प्रेरित 13 - Pahari, Kullu bible

प्रेरित 13

¹सिरिया देशा रै अन्ताकिया शैहरा री मण्डली न केतरै भविष्यवाणी केरनु आल़ा होर उपदेशक ती मतलब बरनबास, शमौन ज़ुणिबै कि नीगेर बोला सी, लुकियुस कुरेनी होर चौथाई देशै रै राज़ै हेरोदेसा रा दूध-भाई मनाहेम होर शाऊल।

²ज़ैबै ते ब्रत केरिआ प्रभु री आराधना केरदै लागैदै ती, ता पवित्र आत्मै बोलू, “मेरी तैंईंयैं बरनबास होर शाऊला बै तेई सेवा री तैंईंयैं अलग केरा ज़ुणी री तैंईंयैं मैं ते शाधै सी।”

³तैबै तिन्हैं ब्रत होर प्रार्थना केरिआ तिन्हां पैंधै हौथ रैखिआ परमेश्वरा रा कोम केरनै री तैंईंयैं ते विदा केरै।

⁴तैबै बरनबास होर शाऊल पवित्र आत्मै रै द्वारा भेज़ै, तै अन्ताकिया शैहरा न सिलूकिआ शैहरा रै बन्दरगाह बै नौठै होर तौखै न जहाज़ा न च़ढ़िया साइप्रसा शैहरा बै नौठै।

⁵होर सलमीसा शैहरा न पुजिआ परमेश्वरा रा वचन यहूदियै रै आराधनालय न शुणाऊ होर यूहन्ना ज़ुणिबै मरकुस बी बोला ती, सौ तिन्हरी सेवा केरनै री तैंईंयैं तिन्हां सैंघै ती।

⁶होर तेई सारै टापू न होईया पाफुस शैहरा न पुजै। तौखै तिन्हां बै बार-यीशु नाँ रा एक जादू-टोणै केरनु आल़ा झ़ूठा यहूदी भविष्यवाणी केरनु आल़ा मिलू।

⁷सौ सिरिगयुस पौलुस सुबैदारा रा सैंघै ती ज़ो कि बुद्धिमान मर्द ती। राज़पाल बरनबास होर शाऊला बै आपु हागै शाधिआ तिन्हां न परमेश्वरा रा वचन शुणना चाहा ती।

⁸पर इलीमास जादू-टोणै केरनु आल़ै (किबैकि ज़ुणिरै नाँ रा मतलब ही जादू-टोणै केरनु आल़ा सा) तिन्हरा सामना केरिआ हाकिमा बै यीशु पैंधै विश्वास केरनै न रोकणा चाहू।

⁹तैबै शाऊलै ज़ौसरा नाँ पौलुस भी सा, तेइयै पवित्र आत्मा न भौरूइया इलीमासा धिरै हेरिआ बोलू,

¹⁰“हे सारै कपट होर हर प्रकारै री चतुराई सैंघै भौरूइदी शैतानै री औलाद, धर्मै रै बैरी कि तौ प्रभु री सीधी बौता बै टेढा केरना नी छ़ौड़णा?

¹¹ऐबै हेर प्रभु तौभै सज़ा देणु आल़ा सा होर तौ किछ़ बौगता ढौई कांणै रौहणा होर तौ सूरज़ नी हेरना।” तैबै तुरन्त तेई सामनै धुँधला होर निहारा हुआ होर सौ औरै-पौरै तोपिदा लागा कि कोई तेइरै हौथा बै ढौकला।

¹²तैबै सूबैदारै ज़ो किछ़ हुआ ती, हेरिआ होर प्रभु रै उपदेशा न हैरान होईया पभु यीशु पैंधै विश्वास केरू।

¹³पौलुस होर तेइरै सैंघी पाफुसा रै ज़हाजा रै ज़रियै खोलिया पँफूलियै देशा रै पिरगा शैहरा बै आऐ होर तौखै यूहन्ना तिन्हां बै छ़ौड़िआ यरूश्लेम शैहरा बै वापस आऊ।

¹⁴होर पिरगा शैहरा न आगै बढ़िआ ते गलातिया प्रदेशा रै पिसिदिया ज़िला रै अन्ताकिया शैहरा न पुजै होर बशाँ रै ध्याड़ै री न आराधनालय न ज़ाइआ बेठै।

¹⁵मूसै रै बिधान होर भविष्यवक्तै री कताबा पौढ़ै न बाद आराधनालय रै स्याणै तिन्हां बै खबर भेज़ी, कि हे भाइयो अगर लोका बै उपदेश देणै री तैंईंयैं तुसरै मैना न कोई गैल सा ता बोला।

¹⁶तैबै पौलुसै खड़ै होईया तिन्हां बै चुप केरनै री तैंईंयैं हौथै लाइआ इशारा केरिआ बोलू, “हे इस्राइलीओ होर परमेश्वरा न डौरनू आल़ै, होरी जाति रै लोको शुणा।”

¹⁷इन्हां इस्राइली लोकै रै परमेश्वरै आसरै बुज़ुर्गै चुनै, होर ज़ैबै मिस्र देशा न परदेशी होईया रौहा ती ता तिन्हरी तरक्की केरी होर आपणी शक्ति सैंघै ते तौखै न कौढै।

¹⁸होर सौ कोई च़ाली बौर्षा ढौई बार-बार बोलणै पैंधै सुनसान ज़ैगा न तिन्हरी सौहंदा रौहू।

¹⁹कनान देशा न सौत ज़ाति रा नाश केरिआ तिन्हरा देश साढ़ै च़ार बौर्षा न तिन्हरा केरू।

²⁰एथा न बाद तेइयै शमुएल भविष्यवाणी केरनु आल़ा तैंईंयैं तिन्हां न न्यायी ठहराऐ।

²¹ज़ैबै शमुएल तिन्हरा नेता ती तिन्हैं एक राज़ा मुँगू। तैबै परमेश्वरै च़ाल़ी बौर्षै री तैंईंयैं बिन्यामीनै रै गोत्रा न कीशा रा बेटा शाऊल तिन्हां पैंधै राज़ा ठहराऊ। होर तैबै तिन्हैं चाल़ी बौर्षा तक इस्राइली लोका पैंधै राज़ केरू

²²तैबै परमेश्वरै शाऊला बै राज़गद्दी न हटाईया तेइरी ज़ैगा दाऊद तिन्हरा राज़ा बणाऊ, ज़ौसरै बारै न तेइयै गुआही धिनी, कि मुँभै यिशै रा बेटा दाऊद मेरै मनै रै मुताबक मिलू सा। तेई मेरी सारी इच्छा पूरी केरनी।

²³“ऐईरी वँशा न परमेश्वरै आपणी प्रतिज्ञा रै मुताबक इस्राइला आगै एक उद्धारकर्ता, मतलब यीशु भेज़ू।

²⁴ज़ौसरै ऐणै न पैहलै यूहन्नै सैभी इस्राइली लोका बै बोलू ती, मन बदला पाप केरना छ़ौड़ा होर बपतिस्मा लेआ होर परमेश्वरा तुसरै पाप माफ़ केरनै।

²⁵ज़ैबै यूहन्ना आपणा दौरा पूरा केरनु आल़ा ती, ता तेइयै बोलू, तुसै मुँभै कि समझ़ा सी? हांऊँ सौ मसीह नी ऑथि। पर हेरा, मूँ न बाद एक ऐणु आल़ा सा होर सौ मूँ न बोहू बड़ा सा ज़ौसरी ज़ोंघै रै बूट खोलणै रै लायक बी हांऊँ नैंई ऑथि।

²⁶“हे भाइयो, तुसै ज़ो अब्राहमै री औलाद सी; होर ज़ो तुसै परमेश्वरा न डौरा सी, परमेश्वरै तुसाबै यीशु रै बारै न ऐ सन्देश भेज़ू सा ज़ो लोका बै बचा सा।

²⁷यरूश्लेम शैहरा रै लोकै होर तिन्हरै स्याणै मसीह यीशु नी पछ़ियाणु, होर न भविष्यवक्तै री गैला समझ़ी ज़ो कि हर बशाँ रे ध्याड़ै न पौढ़िआ ती होर तेइबै दोषी ठहराइया तिन्हैं ते गैला पूरी केरी।

²⁸तिन्हां बै तेइबै मारनै लायक तेईन कोई दोष नी मिलू, तैबै बी तिन्हैं पिलातुस राज़पाला हागै तेइबै मारनै री तैंईंयैं अर्ज़ा केरी।

²⁹ज़ैबै तिन्हैं तेइरै बारै न लिखीदी सारी गैला पूरी केरी, ता सौ क्रूसा पैंधै न उतारिआ कब्रा न रैखू।

³⁰पर परमेश्वरै सौ मूँऐंदै न ज़िन्दा केरू।

³¹होर ज़ो लोका तेई सैंघै गलील ज़िलै न यरूश्लेम शैहरा बै आऐ ती, बोहू रोज़ा ढौई सौ च़ेले न हेरिदा रौहू, लोका सामनै ऐबै ते तेइरै गुआह सी।

³²“होर आसै तुसाबै तेई प्रतिज्ञा रै बारै न, ज़ो परमेश्वरै आसरै बुज़ुर्गा सैंघै केरू ती, ऐ खुशी रा समाद शुणा सी।

³³कि परमेश्वरै यीशु बै मूँऐंदै न ज़िन्दै केरिआ, सौ प्रतिज्ञा आसरी औलादै री तैंईंयैं पूरा केरू, ज़ैण्ढा कि दुज़ै भजन संहिता न लिखू सा, परमेश्वरै मसीह रै बारै न बोलू, कि “ ‘तू मेरा बेटा सा; मैं औज़ तू पैदा केरू सा।

³⁴तेइरै मूँऐंदै न ज़िन्दै होंणै रै बारै न बी, कि तेई कैधी नी चौकणा, परमेश्वरै ऐ बी बोलू सा; “ ‘मूँ दाऊदा पैंधली पवित्र आशीष तुसा पैंधै केरनी।’

³⁵तेइयै दाऊदै रै एकी होरी भजना न बी मसीह रै बारै न बोलू सा कि; “ ‘तौ आपणै पवित्र मांहणु री लाश चौकिणै नी देणी।’

³⁶“किबैकि दाऊद ता परमेश्वरै री इच्छै रै मुताबक सेवा केरिआ मूँआ होर आपणै बुज़ुर्गा सैंघै मिलू होर चौकू भी। होर ऐसा गैला न आसै जाँणा सी कि दाऊदै ऐण्ढा आपणै बारै न नी बोलू।

³⁷पर यीशु परमेश्वरै चौकणै नी धिना बल्कि सौ मूँऐंदै न ज़िन्दा केरू।

³⁸हे भाइयो तुसै ज़ाणि लेआ कि एही रै द्वारा तुसाबै पापै री माफी रा समाद देइया सा।

³⁹ज़ौस गैला न तुसै मूसै रै बिधाना रै मुताबक निर्दोष नी ती ठहरी सकदै हर एक सौ मांहणु ज़ो तेई पैंधै बशाह केरा सा यीशु रै ज़रियै निर्दोष ठहरा सा।

⁴⁰ऐबै होशियार रौहा, ऐण्ढा नी लोड़ी हुआ कि ज़ो भविष्यवक्तै रै कताबा न आऊ सा, तुसा पैंधै बी एला।

⁴¹“हे निन्दा केरनु आल़ै लोको, हेरा, हैरान होआ होर खत्म होआ; किबैकि मूँ तुसरै ध्याड़ै न एक ऐण्ढा कोम केरना कि अगर तुसा न कोई तेथै री चर्चा केरला, ता तुसा कैधी बशाह नी केरना।”

⁴²ज़ैबै बरनबास होर पौलुस यहूदी आराधनालय न बाहरै निकल़दै लागै ता लोका तिन्हां हागै अर्ज़ा केरदै लागै, कि आगलै बशाँ रे ध्याड़ै न आसाबै ऐ गैला भी शुणाइत्।

⁴³ज़ैबै आराधनालय पूरी हुई होर लोका उठै ता यहूदी होर यहूदी मता न आऐदै भक्त न बोहू सारै पौलुस होर बरनबासा पिछ़ै हुऐ होर तिन्हैं ते गैला केरिआ समझ़ाऐ कि परमेश्वरै रै अनुग्रह न बैणी रौहात्।

⁴⁴आगलै बशाँ रे ध्याड़ै नगरै रै सारै लोका परमेश्वरा रा वचन शुणनै री तैंईंयैं कठा हुऐ।

⁴⁵पर यहूदी नेतै बै लोकै री भीड़ हेरिआ जलन हुई, होर निन्दा केरिआ पौलुसै री गैलै रै खिलाफ़ बोलदै लागै।

⁴⁶तैबै पौलुस होर बरनबासै निडर होईया बोलू, ऐ ज़रूरी ती कि परमेश्वरा रा वचन पैहलै तुसाबै शुणाइदा, पर ज़ैबैकि तुसै तेइबै दूर केरा सी होर आपु बै हमेशा री ज़िन्दगी रै लायक नी ठहराँदै, ता हेरा आसै होरी ज़ाति धिराबै फिरा सी।

⁴⁷किबैकि प्रभुऐ आसाबै ऐ हुक्म केरू सा कि मैं तू होरी ज़ाति री तैंईंयैं प्याशै सांही ठहराऊ सा ताकि तू धौरती रै आखरी कनारै ढौई उद्धारा रा दुआर होला।

⁴⁸ऐ शुणिया होरी ज़ाति रै लोका खुश हुऐ होर परमेश्वरै रै वचनै री बड़ाई केरदै लागै होर ज़ेतरै हमेशा री ज़िन्दगी री तैंईंयैं ठहराऐ ती तिन्हैं विश्वास केरू।

⁴⁹तैबै प्रभु रा वचन तेई सारै देशा न फैलू।

⁵⁰पर यहूदी नेतै भक्त होर बेटड़ी होर नगरै रै बड़ै लोका बै उकसाइया, पौलुस होर बरनबास आपणै इलाकै न खोलै।

⁵¹तैबै बरनबास होर शाऊल तिन्हां सामनै आपणी ज़ोंघै रै धूड़ै ठुड़किआ इकुनियुमा शैहरा बै नौठै।

⁵²आन्तकिया शैहरा न च़ेले खुशी सैंघै पवित्र आत्मा न सिद्ध होंदै रौहै।