Read Pahari, Kullu प्रेरित 16 Bible Online

प्रेरित 16 - Pahari, Kullu bible

प्रेरित 16

¹तैबै सौ दिरबै होर लुस्त्रा शैहरा बै भी नौठा होर हेरा, तौखै तीमुथियुस नाँ रा एक च़ेला ती, ज़ो कि एक विश्वासी यहूदिनी रा बेटा ती पर तेइरा पिता यूनानी ती।

²होर तेइरा नाँ लुस्त्रा शैहर होर इकुनियुमै रै बिश्वासी मौंझ़ै खरा ती।

³पौलुस चाहा ती, कि सौ तेई सैंघै च़लला; होर ज़ो यहूदी लोका तिन्हां ज़ैगा न ती तिन्हरी बजहा न तेइरा खतना केरू; किबैकि ते सैभै जाँणा ती, कि तेइरा पिता यूनानी ती।

⁴पौलुस होर तेइरै सैंघी ते नगरा-नगरा न ज़ाइआ तिन्हैं तौखलै बिश्वासी बै तिन्हां नियमा रै बारै न दसू, ज़ो यरूश्लेम शैहरा रै प्रेरित होर स्याणै मनणै री तैंईंयैं ठहराई ती।

⁵ऐण्ढै तैरहै मण्डली विश्वासा न स्थिर होंदै रौही होर गिणती न बढ़दी रौही।

⁶ते फ्रूगिया प्रदेश होर गलातिया प्रदेशा न होईया नौठै, होर पवित्र आत्मै तिन्हां बै आसिया इलाकै न वचन शुणाणै री तैंईंयैं नाँह केरू।

⁷तिन्हैं मूसियै इलाकै रै नेड़ पुजिआ, बितूनिया इलाकै बै जाँणा चाहू पर यीशु री पवित्र आत्मै ते ज़ाणै नी धिनै।

⁸तैबै ते मूसिया इलाकै न होईया त्रोआसा शैहरा रै बन्दरगाह बै नौठै।

⁹पौलुसै राती एक दर्शन हेरू कि एक मकिदुनिया इलाकै रा रौहणु आल़ा मर्द खड़ै होईया, तेई हागै अर्ज़ा केरिया बोला सा, समुन्द्रा बै पार केरिया मकिदुनिया इलाकै बै “एज़ होर आसरी मज़त केर।”

¹⁰तेइरै दर्शन हेरै न बाद आसै तुरन्त ऐ सोच़िया मकिदुनिया इलाकै बै जाँणा चाहू, कि परमेश्वरै आसै बै तौखलै लोका बै खुशी रा समाद शुणाणै री तैंईंयैं शाधै सी।

¹¹तैबै त्रोआसा शैहरा न ज़हाज खोलिया आसै सीधै सुमात्राकै टापू होर दुज़ै रोज़ै नियापुलिसा शैहरा बै आऐ।

¹²तौखै न आसै फिलिप्पी शैहरा पुजै, ज़ो मकिदुनिया इलाकै रा एक खास शैहर ती, होर रोमी लोकै री बस्ती सा; आसै तेई शैहरा न किछ़ रोज़ा तैंईंयैं रौहै।

¹³बशाँ रै ध्याड़ै न आसै नगरा बाहरै ऐ सोच़िया नौठै, कि तौखै यहूदी लोका बै प्रार्थना केरनै री तैंईंयैं कोई ज़ैगा होली होर तिन्हां बेटड़ी सैंघै गैला केरदै लागै ज़ो तौखै कठा हुई ती।

¹⁴लुदिया नाँ री आराधना केरनु आल़ी एक बेटड़ी ती, ज़ो थुआतीरा नगरै ती ज़ो बैंजनी रंगा रै कपड़ै बेच़णू आल़ी ती, सौ बी शुणदी लागी ती। परमेश्वरै तेसरा मन केरु तयार कि सौ पौलुसै री गैला पैंधै ध्यान लाली।

¹⁵ज़ैबै तेसै आपणै घरानै समेत बपतिस्मा लेऊ, ता बिनती केरी, कि अगर तुसै मुँभै प्रभु री विश्वासिनी समझा सी, ता मेरै घौरा न रौहा होर तेसै आसै मनाइया नेऐ।

¹⁶ज़ैबै आसै प्रार्थना केरनै री ज़ैगा बै ज़ाँदै लागै ती, ता आसाबै एक दासी मिली ज़ुणीन भविष्य दैसणू आल़ी बुरी आत्मा ती, सौ भविष्य दैसिआ आपणै मालक री तैंईंयैं बोहू किछ़ कमौआ ती।

¹⁷सौ पौलुस होर आसा पिछ़ै एज़िया चिलाँदी लागी कि, “ऐ मांहणु परमप्रधान परमेश्वरै रै दास सी, ज़ो आसाबै उद्धार पाणै री बौत दैसा सी।”

¹⁸सौ बोहू रोज़ा तैंईंयैं ऐण्ढा केरदी रौही, पर पौलुस दु:खी हुआ होर मुँह फेरिया तेसा बुरी आत्मा बै बोलू, “हांऊँ तौभै यीशु मसीह रै नाँ न हुक्म केरा सा कि एसा बेटड़ी न फ़ेटै निकल़ होर बुरी आत्मा तेसा बेटड़ी न तेसा घड़ियै निकती।”

¹⁹ज़ैबै तेसरै मालकै हेरू, कि आसरी कमाई री आशा नौठी ता तिन्हैं पौलुस होर सीलास ढौकिया आपणै प्रधाना हागै नेऐ।

²⁰होर फौज़दारी रै हाकिमा हागै नेइया बोलू, “ऐ लोका यहूदी सी, होर आसरै नगरा न ऐ बड़ी हलचल मच़ाँदै लागै सी।

²¹होर ऐण्ढै व्यवहार दैसदै लागै सी, ज़ौसरा ग्रहण केरना होर मनणा आसा रोमा न रौहणु आल़ै री तैंईंयैं ठीक नी ऑथि।”

²²तैबै भीड़ै लोका पौलुस होर सिलासा रै खिलाफ़ कठा हुऐ होर हाकिमै तिन्हरै झिकड़ै च़िरिया उतारै, होर तिन्हां बै बैंइतै लाइया मारनै रा हुक्म केरू।

²³तैबै तिन्हैं ते बैंइतै लाइया मारिया बन्दी घौरा न बन्द केरै होर सिपाही बै हुक्म केरू, कि तिन्हरा ध्यान रखला।

²⁴सिपाहियै ते आँध्रली कोठरी न रैखै होर तिन्हरी ज़ोंघा लकड़ी री बेड़ी सैंघै कशी होर ते हिलणै बै नी डाहे।

²⁵औधा रातियै पौलुस होर सीलास प्रार्थना केरदै परमेश्वरा रा भजन गाँदै लागै ती, होर कैदी शुणदै लागै ती।

²⁶ऐतरै न एकदम बड़ी ज़ौज़री हुई औखै तक कि बन्दी घौरै री मनियाद तक हिली, तैबै तुरन्त सैभै दुआर खुलै होर सैभी रै बन्धन खुलै।

²⁷ज़ैबै सिपाही उठु ता तेइयै खुलै दुआर हेरिया सोच़ू कि सैभै कैदी भैगै, होर तलवार कौढिआ आपु बै मारना चाहू।

²⁸पर पौलुसै ज़ोरा सैंघै बोलू, “आपु बै किछ़ नुकसान मत केरदा, किबैकि आसै सैभै औखै सी।”

²⁹तैबै सौ दीऐ मँगाइया आँध्रै बै नौठा होर कोमदै-कोमदै पौलुस होर सीलासा आगै धिरै पौड़ू।

³⁰होर तिन्हां बै बाहरै आंणिआ बोलू, “ओ परमेश्वरै रै भलै मांहणुओ, मुक्ति पाणै री तैंईंयैं मूँ कि केरना?”

³¹तिन्हैं बोलू, “प्रभु यीशु मसीह पैंधै विश्वास केर, ता तौ होर तेरै घरानै मुक्ति पाणी।”

³²होर तिन्हैं तेइरै घौरै रै सैभी लोका बै प्रभु रा वचन शुणाऊ।

³³तैबै रातियै तेसा घड़ियै तेइयै नेइया तिन्हरै घाव धोऐ, होर तुरन्त आपणै घौरै रै सैभी लोका समेत बपतिस्मा लेऊ।

³⁴तेइयै आपणै घौरा नेइया तिन्हां सामनै खाँणा रैखू होर सारै घरानै समेत परमेश्वरा पैंधै विश्वास केरिया तै सैभ बड़ै खुशी ती।

³⁵आगलै रोज़ ज़ैबै ध्याड़ हुई तैबै हाकिमै आपणै सपाई आगै खबर भेज़ी कि तिन्हां मांहणु बै छ़ौड़ि दैआ।

³⁶सिपाहियै ऐ गैला पौलुसा बै दसी कि “हाकिमै तुसाबै छ़ौड़नै रा हुक्मा केरू सा, ऐबै तुसै शान्ति सैंघै ज़ात।”

³⁷पर पौलुसै ज़ोरा सैंघै बोलू, “तिन्हैं आसाबै ज़ो रोम देशा न रौहणु आल़ै मांहणुऐ दोष साबित केरै बगैर आसै लोका सामनै मारै होर जेला न पाऐ होर ऐबै आसाबै च़ुप-च़ाप खोला सी? पर ऐण्ढा नी ऑथि पर ते आपु एज़िया आसाबै बाहरै नेलै।”

³⁸सिपाहियै ऐ गैला हाकिमा बै दसी होर ते ऐ शुणिया डौरै कि ते रोमी सी, ते डौरै।

³⁹होर तिन्हैं एज़िया तिन्हां सैंघै माफ़ी मुँगी, होर बाहरै नेइया अर्ज़ केरी कि तै एई शैहरा बै छ़ौड़िया जाऐ।

⁴⁰ते जेला न निकल़िया लुदियै री हागै नौठै होर भाई सैंघै मिलिया तिन्हां बै शान्ति मिली।