Read Pahari, Kullu प्रेरित 21 Bible Online

प्रेरित 21 - Pahari, Kullu bible

प्रेरित 21

¹ज़ैबै आसै तिन्हां न विदा होईया ज़हाज़ा न रवाना हुए ता आसै सीधै कौस टापू न पुजै, होर दुज़ै रोज़ै आसा रूदुसा टापू पुजै, होर तौखै न आसै पतरा टापू न पुजै,

²होर आसाबै तौखै न एक ज़हाज़ फीनीकै इलाकै बै ज़ाँदा मिलू, होर तेई ज़हाज़ा न च़ढ़िया आसै आपणा सफर शुरू केरू।

³आसाबै बाँऊई धिरै साइप्रस टापू हेरूआ, आसै तेइबै छ़ौड़िया सीरिया देशा बै च़लै, ज़हाज़ा बै सूर शैहरा न समान उतारना ती, तैबै आसै बी तौखै उतरै।

⁴च़ेले बै मिलिया आसै तौखै सौत रोज़ा तैंईंयैं रौहै। तिन्हैं पवित्र आत्मा न होईया पौलुसा बै अर्ज़ा केरिया बोलू कि यरूश्लेम शैहरा हेरी ज़ाँदा।

⁵सौत रोज़ा बाद ज़ैबै तौखै न आसरै जाणै रा बौगत आऊ ता आसै तौखै न च़लै होर तिन्हैं सैभी बेटड़ियै होर शोहरूऐ आसै बाहरै तैंईंयैं छ़ौड़ै होर आसै समुन्द्रा रै कनारै पैंधै घुटनै टेकिआ प्रार्थना केरी।

⁶तैबै एकी होरी न विदा होईया आसै ज़हाज़ा न च़ढ़ै होर आपणै-आपणै घौरा बै नौठै।

⁷सूर शैहरा न ज़हाज़ा रा सफर पूरा केरिया आसै पतुलिमियस शैहरा न पुजै होर विश्वासी न मिलिया तौखै तिन्हां सैंघै एक रोज़ रौहै।

⁸दुज़ै रोज़ै आसै तौखै न च़लिया कैसरिया शैहरा बै आऐ, होर फिलिप्पुस ज़ो कि एक खुशी रै समादा रा प्रचारक सौत दासा मौंझ़ै न एक ती, ज़ुणिबै यरूश्लेम शैहरा न विधवा री सेवा केरनै री तैंईंयैं चुनु ती, आसै तेइरै घौरा ज़ाइआ तेई सैंघै रौहै।

⁹तेइरी च़ार कुँआरी बेटी ती ज़ो कि भविष्यवाणी केरा ती।

¹⁰ज़ैबै आसै तौखै बोहू रोज़ा तैंईंयैं रौहै ता अगबुस नाँ रा एक भविष्यवाणी केरनु आल़ा यहूदिया देशा न आऊ।

¹¹तेइयै आसा हागै एज़िया पौलुसा रा पटा लेऊ होर आपणै हौथ ज़ोंघा बोनिआ बोलू, पवित्र आत्मा ऐ बोला सा कि ज़ुणी मांहणु रा ऐ पटा सा सौ यरूश्लेम शैहरा न यहूदी एसा रीतियै बोनणा होर होरी ज़ाति रै हौथा न देणा।

¹²ज़ैबै ऐ गैला शुणी ता आसै होर तौखलै लोकै पौलुसा हागै यरूश्लेम शैहरा बै नी ज़ाणै री तैंईंयैं अर्ज़ा केरी।

¹³पर पौलुसै ज़वाब धिना, कि तुसै कि केरा सी कि तुसै रोइया मेरा मन चोड़ा सी। हांऊँ प्रभु यीशु रै नाँ न यरूश्लेम शैहरा न बोनिणै री तैंईंयैं नी बल्कि मौरनै बै बी त्यार सा।

¹⁴ज़ैबै तेइयै नी मैनी ता आसै च़ुप हुऐ कि प्रभु री इच्छा पूरी होली।

¹⁵किछ़ रोज़ा बाद आसै त्यार होईया यरूश्लेम शैहरा बै च़लै।

¹⁶कैसरिया शैहरा रै भी किछ़ च़ेले आसा सैंघै च़लै होर मनासोन नाँ रा साइप्रस टापू रा पराणा च़ेला बी सैंघै नेऊ ताकि आसै तेइरै घौरा रूकी सकलै।

¹⁷ज़ैबै आसै यरूश्लेम शैहरा पुजै ता विश्वासी आसा सैंघै बड़ी खुशी सैंघै मिलै।

¹⁸दुज़ै रोज़ै पौलुसै आसै याकूबा आगै नेऐ ज़ौखै सारै स्याणै कठा ती।

¹⁹तैबै तेइयै तिन्हां बै नमस्कार केरिया ज़ो-ज़ो कोम परमेश्वरै तेइरी सेविकाई न होरी ज़ाति रै लोका बिच़ै केरै ती एक-एक केरिया दैसै।

²⁰तिन्हैं ऐ शुणिया परमेश्वरै री महिमा केरी होर तेइबै बोलू, हे भाई, तू जाँणा सा कि यहूदी लोका मौंझ़ै न कई हज़ार यहूदियै विश्वास केरू होर सैभै मूसा रै बिधाना बै बड़ी बफदारी सैंघै मना सी।

²¹होर इन्हां यहूदी बिश्वासी बै ज़ो तेरै बारै न ऐ दसा सी कि तू होरी ज़ाति न रौहणु आल़ै यहूदी बै मूसै रै बिधाना बै नी मनणै री शिक्षा देआ सा होर तिन्हां सैंघै बोला सा, तै न ता आपणै बच्च़ै रा खतना केरदै होर न रीति-रिवाज़ै रै मुताबक च़लदै,

²²ता फिरी कि केरना? लोका ऐ ज़रूर शुणना कि तू औखै आऊ सा।

²³ऐबै ज़ो आसै तौभै बोला सी तेई केर। आसरै औखै च़ार मांहणु सी ज़ुणियै परमेश्वरा री मन्नत मैनी सा।

²⁴तिन्हां लेइया आपणै आपु बै च़ोखा केरनै रै रुआज़ा बै पूरा केर होर तिन्हरी तैंईंयैं खर्च़ा दै कि ते सिर मुँडालै। तैबै सैभी ज़ाणना कि तेरै बारै न ज़ो गैला तिन्हां बै सिखाई सी तिन्हरी कोई जड़ नी ऑथि पर तू आपु बी मूसा रै बिधाना रै मुताबक च़ला सा।

²⁵पर तिन्हां होरी ज़ाति रै विश्वासी लोका बै आसै ऐ लिखिया भेज़ू सा कि ते मूरती सामनै बलि केरेदै माँस होर लोहू न, गौल़ा घुटिया बलि केरूऐदै पशु रै माँसा न होर व्यभिचारा न दूर रौहा।

²⁶तैबै पौलुस तिन्हां मांहणु लेइया दुज़ै रोज़ै च़ोखै होईया मन्दिरा बै नौठा होर समाद धिना कि च़ोखै होंणै रै ध्याड़ै मतलब तिन्हां हर एकी री तैंईंयैं च़ढ़ावा च़ढ़ाइणै तैंईंयैं रै रोज़ कैधी पूरै होंणै।

²⁷ज़ैबै ते सौत रोज़ पूरै होणू आल़ै ती ता आसिया प्रदेशा रै यहूदियै पौलुसा बै मन्दिरा न हेरिया सैभै लोका उकसाऐ होर चिलाइया पौलुस ढौकू।

²⁸होर बोलू, हे इस्राइलीओ मज़त केरा, ऐ सौहै मांहणु सा ज़ो कि लोकै रै, बिधानै रै होर एसा ज़ैगा रै खिलाफ़ सैभी लोका बै सिखा सा औखै तैंईंयैं कि यूनानी बै बी मन्दिरा न आंणिआ ऐ पवित्र ज़ैगा अपवित्र केरी सा।

²⁹तिन्हैं ऐ तैबै बोलू कि तिन्हैं ता एथा न पैहलै इफिसुस शैहरा न रौहणु आल़ै त्रुफिमुस ज़ो पौलुसा सैंघै शैहरा न हेरू ती होर समझ़ा ती कि पौलुसै ऐ मन्दिरा बै आंणु सा।

³⁰तैबै सारै नगरा न हला मच़ू होर लोका ठोर मारिया कठा हुऐ होर पौलुस ढौकिया मन्दिरा बाहरै घसीटू होर तुरन्त दुआर बन्द केरू।

³¹ज़ैबै ते पौलुसा बै मारना चाहा ती ता पलटनै रै अधिकारी बै सँदेश मिलू कि यरूश्लेम शैहरा न बोहू लोका बड़ा हला मच़ाँदै लागै सी।

³²तैबै सौ तुरन्त किछ़ सिपाही होर सूबैदारा सैंघै पौलुसा पैंधै हमला केरनु आल़ै यहूदी लोका हागै बै दौड़ू होर ज़ैबै लोकै अधिकारी होर सिपाही हेरै ता तिन्हैं पौलुसा बै मारना पीटणा बन्द केरू।

³³तैबै पलटनै रै अधिकारी भेटी एज़िया पौलुस ढौकु होर दूई शाँगल़ी सैंघै बोनणै रा हुक्म देइया पुछ़दा लागा, ऐ कुण सा होर ऐईयै कि केरू सा?

³⁴पर भीड़ा न कोई किछ़ होर कोई किछ़ चलांदै रौहै पर ज़ैबै हुलड़ै री बजहा ठीक तैरहा सच़ाई नी ज़ाणी सकू ता तेइबै किलै बै नेणै रा हुक्म धिना।

³⁵ज़ैबै सौ शीढ़ी पैंधै पुजू ता ऐण्ढा हुआ कि भीड़ा रा दवाब बोहू होंणै री बजहा न सपाई बै सौ च़किआ नेणा पौऊ।

³⁶किबैकि लोकै री भीड़ चिलाँदै-चिलाँदै तेई पिछ़ै पौई कि तेइबै मकात्।

³⁷ज़ैबै ते पौलुसा बै किलै बै नेणू आल़ै ती ता तेइयै पलटनै रै अधिकारी बै बोलू, “कि मुँभै हुक्म सा कि हांऊँ तौभै किछ़ बोलणू?” तेइयै बोलू कि तू यूनानी भाषा जाँणा सा,

³⁸कि “तू सौ मिस्री देशा रा नी, ज़ुणियै कि औज़ा न पैहलै च़ार हज़ार खतरनाक हथियारबंद बै लोका बन्दी बणाईया बौणा बै नेऐ?”

³⁹पौलुसै बोलू, “हांऊँ ता तरसुसा शैहरा रा यहूदी मांहणु सा, किलिकियै प्रदेशा रै प्रसिद्ध नगरा रा रौहणु आल़ा सा होर हांऊँ तौ हागै अर्ज़ केरा सा कि मुँभै लोका सैंघै गैला केरनै दै।”

⁴⁰ज़ैबै तेइयै हुक्म धिना ता पौलुसै शीढ़ी पैंधै खड़ै होईया लोका बै हौथा सैंघै इशारा केरू। ज़ैबै ते च़ुप हुऐ ता सौ इब्रानी भाषा न बोलदा लागा।