Read Pahari, Kullu प्रेरित 25 Bible Online

प्रेरित 25 - Pahari, Kullu bible

प्रेरित 25

¹फेस्तुस यहूदिया देशा रा राज़पाल बणनै त्रा रोज़ा बाद कैसरिया न यरूश्लेम शैहरा बै नौठा।

²तैबै मुख्यपुरोहिता होर यहूदी नेता तेई सामनै पौलुसै बै दोष लाऊ।

³होर तेई हागै पौलुसै रै खिलाफ़ अर्ज़ा केरी कि सौ तेइबै यरूश्लेम शैहरा बै शाधला किबैकि ते पौलुसा बै बौता मारनै री त्यारी न ती।

⁴फेस्तुसै ज़वाब धिना कि, पौलुस कैसरिया न पौहरै न सा होर मूँ आपु तौखै छेकै ऐणा।

⁵फेस्तुसै तुसै भी बोलू, तुसा मौंझ़ै ज़ुणी हागै हक सा तिन्हैं मूँ सैंघै च़ला होर अगर ऐई मांहणुऐ कोई बुरा कोम केरू सा ता तेई पैंधै दोष ला।

⁶फेस्तुस यरुश्लेमा न तिन्हरै बिच़ै कोई औठ-दस रोज़ रौहिया सौ कैसरिया बै वापस नौठा होर दूज़ै रोज़ै राज़गद्दी पैंधै बैशिया पौलुसा बै आंणनै रा हुक्मा धिना।

⁷ज़ैबै सौ आऊ ता यरूश्लेम शैहरा न आऐदै यहूदी नेतै खड़ै होईया तेई पैंधै बड़ै-भारी दोष लाऐ ज़ुणिरा सबूत ते देई नी ती सकदै।

⁸पर पौलुसै ज़वाब धिना कि, मैं न ता यहूदी री मूसै रै बिधान रा, न मन्दिरा रा, न महाराज़ै रा कोई अपराध केरू।

⁹तैबै फेस्तुसै यहूदी नेता बै खुश केरनै री तैंईंयैं पौलुसा बै पुछ़ु, “कि तू यरूश्लेम शैहरा बै जाँणा चाहा सा होर तौखै मूँ सामनै तेरा ऐ मुकदमा केरिला?”

¹⁰पौलुसै बोलू, हांऊँ महाराज़ै री राज़गद्दी सामनै खड़ा सा मेरै मुकदमै रा फैसला औखै होंणा चेहिऐ। ज़ैण्ढा कि तू जाँणा सा कि मैं यहूदी रा किछ़ अपराध नी केरू।

¹¹अगर अपराधी सा होर मारनै लायक कोई कोम केरू सा ता हांऊँ मौरनै न नी मुकरदा पर ज़ुणी गैला रा ऐ दोष मूँ पैंधै ला सी अगर ते सच़ नी हुई ता कोई मुँभै तिन्हरै हौथा न नी देई सकदा हांऊँ महाराज़ै री कसम देआ सा।

¹²तैबै फेस्तुसै तुसै मन्त्री री सभा सैंघै गैला केरिया ज़वाब धिना, तैं महाराज़ै री कसम धिनी सा, तौ महाराजै हागै जाँणा।

¹³होर किछ़ रोज़ा बाद अग्रिप्पा राज़ै होर तेइरी होछ़ी बैहण बिरनीकै कैसरिया शैहरा एज़िया फेस्तुसा सैंघै भेंट केरी।

¹⁴होर तिन्हरै बोहू रोज़ रौहणै न बाद फेस्तुसै पौलुसै री कथा शुणाई, एक मांहणु सा ज़ो फेलिक्सै बन्दी बणाऊ सा।

¹⁵ज़ैबै हांऊँ यरूश्लेम शैहरा न ती ता मुख्यपुरोहिते होर यहूदी रै स्याणै ऐ चाहू कि तेइबै सज़ा मिलली।

¹⁶पर मैं तिन्हां बै ज़वाब धिना, रोमी री ऐ रीत नी ऑथि कि कौसी मांहणु बै सज़ै री तैंईंयैं सौंपलै, ज़ैबै तैंईंयैं कि मुवकिला बै आपणै मुद्दई सामनै खड़ै होईया ज़वाब देणै रा मौका नी मिलदा।

¹⁷ज़ैबै यहूदी नेता कैसरिया न कठा हुऐ ता किछ़ देर नी केरी बल्कि दूज़ै रोज़ै मैं आपणी राज़गद्दी पैंधै बैशिया तेई पौलुसा बै अदालता बै आंणनै रा हुक्मा धिना।

¹⁸ज़ैबै तेइरै दोष लाणु आल़ै खड़ै हुऐ ता तिन्हैं ऐण्ढी बुरी गैला रा दोष नी लाऊ ज़ैण्ढा हांऊँ समझ़ा ती।

¹⁹तिन्हां बै आपणै धर्मा रै बिधाना रै बारै न मतभेद ती होर यीशु नाँ रै एकी मांहणु रै बारै न ज़ो कि मूँआ ती, पौलुस तेइबै ज़िन्दा दैसा ती, इन्हां गैलै रै बारै न दावा केरा ती।

²⁰होर हांऊँ उलझना न ती कि इन्हां गैला रा पैता हांऊँ कैण्ढै लानू। तैबै मैं पौलुसा न पुछ़ू, कि तौ यरूश्लेम शैहरा बै जाँणा कि तौखै तेरा मुकदमा होला?

²¹पर ज़ैबै पौलुसै कसम धिनी कि मेरै मुकदमै रा फैसला महाराज़ै रै औखै हुआ लोड़ी, ता मैं हुक्मा धिना कि ज़ैबै तैंईंयैं हांऊँ तेइबै महाराज़ै हागै नी भेज़नू तेइबै पौहरा।

²²तैबै अग्रिप्पै फेस्तुसा बै बोलू, हांऊँ बी तेई मांहणु री शुण न चाहा सा। तेइयै बोलू तौ काल शुणना।

²³दुज़ै रोज़ै ज़ैबै अग्रिप्पा होर बिरनीकै बड़ी धूमधामा सैंघै पलटनै रै अधिकारी होर नगरै रै बड़ै लोका सैंघै दरबारा न पुजै ता फेस्तुसै तुसै पौलुसा बै आंणनै रा हुक्मा धिना।

²⁴फेस्तुसै तुसै बोलू, हे महाराज़ अग्रिप्पा, हे आसा सैंघलै सैभी मांहणुओ, तुसै ऐई मांहणु बै हेरा सी ज़ौसरै बारै न सारै यहूदियै यरूश्लेम शैहरा न होर ऐबै औखै बी चिलाई-चिलाइया अर्ज़ केरी कि ऐईरा ज़िन्दा रौहणा ठीक नी ऑथि।

²⁵पर मैं ज़ाणू कि ऐईयै मारनै लायक ऐण्ढा किछ़ नी केरू होर ज़ैबै ऐईयै महाराज़ै री कसम धिनी ता मैं ऐईबै रोमियो शैहरा भेज़णै रा उपाय केरू।

²⁶पर मैं ऐईरी बारै न कोई ठीक गैल नी पाई कि हांऊँ आपणै मालक बै लिखनू। ऐबै मैं ऐ तुसा सामनै खास केरिया महाराज़ा अग्रिप्पा सामनै आंणु कि ज़ाँचणै न बाद मुँभै किछ़ लिखणै बै मिलला।

²⁷किबैकि बन्धुऐ बै भेज़णा होर ज़ो दोष तेई पैंधै लाऐ सी तिन्हां बै नी दैसणा, मेरी समझ़ा न सौ बेकार सा।