Read Pahari, Kullu प्रेरित 26 Bible Online

प्रेरित 26 - Pahari, Kullu bible

प्रेरित 26

¹अग्रिप्पै पौलुसा बै बोलू, तौभै आपणै बारै न बोलणै री इज़ाज़त सा। तैबै पौलुस हौथ बढ़ाइया ज़वाब देंदा लागा कि,

²“हे राज़ा अग्रिप्पा ज़ेतरी गैला रा यहूदी नेता मूँ पैंधै दोष ला सी, औज़ तेरै सामनै तिन्हरा ज़वाब देणै बै हांऊँ आपु बै धन्य समझ़ा सा।

³खास केरिया कि तू यहूदी रै सैभी व्यवहार होर बकवासा बै जाँणा सा, तैबै हांऊँ अर्ज़ केरा सा कि मेरी ध्याना सैंघै शुणलै।

⁴“कई यहूदी लोक जाँणा सी कि बचपना न मैं आपणी ज़िन्दगी कैण्ढी तैरहा ज़ी, सौ जाँणा सी कि कुणी शैहरा हांऊँ पैदा हुआ, तौखै हांऊँ कैण्ढै रौहु होर तै ऐ बी जाँणा सी कि आपणी जुआनी न ज़ैबै हांऊँ यरूश्लेम शैहरा न ती ता तैबै मेरी ज़िन्दगी कैण्ढी ती।

⁵ते मुँभै बचपना न जाँणा ती, अगर ते चाहा सी ता एसा गैला री गुआही देई सका ती कि हांऊँ एक फरीसी मौंझ़ै न होईया आपणै धर्मा रै सैभी न खरै पन्थै रै मुताबक च़लू।

⁶होर ऐबै तेई वायदै रै पूरै होंणै री आशै री बजहा न ज़ो परमेश्वरै आसरै बुज़ुर्गा सैंघै केरू ती तेथै री बजहा न ऐ मुकदमा मूँ पैंधै च़लू सा।

⁷तेई वायदै रै पूरै होंणै री आशा लाइया आसरै बारा गोत्र आपणै सारै मनै रात-ध्याड़ परमेश्वरै री आराधना न केरदै आऐ। एसा आशै रै बारै न यहूदी मूँ पैंधै दोष ला सी।

⁸हे राजा, कि तुसै हकीकता न सोच़ा सी कि परमेश्वर मूँऐंदै बै ज़िन्दा नी केरी सकदा? तुसै एस गैला पैंधै बशाह किबै नी केरदै तिन्हैं यीशु बै मूँऐंदै न ज़िन्दा केरू।

⁹मैं भी समझ़ू ती कि यीशु नासरी रै खिलाफ़ मुँभै बोहू किछ़ केरना चेहिऐ।

¹⁰होर मैं यरूश्लेम शैहरा मौंझ़ै ऐण्ढा केरू, होर मुख्यपुरोहिता न अधिकार पाईआ बोहू सारै पवित्र लोका बै बन्दी घौरा न पाईआ ती होर मारिया ती, होर हांऊँ बी तिन्हरै खिलाफ़ आपणी सहमति देआ ती।

¹¹होर हर आराधनालय न तिन्हां बै ताड़ना दिलाई-दिलाइया यीशु री निन्दा करा ती होर झ़िकै लाइया ऐतरा पागल हुआ कि दुज़ै नगरा ज़ाइआ बी तिन्हां बै सता ती।

¹²“एसा धुना न ज़ैबै हांऊँ मुख्यपुरोहिता न अधिकार पाईआ दमिश्का शैहरा बै ज़ाँदा लागा ती,

¹³ता हे राज़ा, बौता न ध्याड़ी दपौहरै मैं आसमाना न सूरज़ा न भी तेज़ प्याशा आपणै होर आपु सैंघै च़लणू आल़ै रै च़ोहू पासै च़मकदा हेरू।

¹⁴होर ज़ैबै आसै सैभै ज़मीना न लोमै पौऐ ता मैं इब्रानी भाषा न ऐण्ढा बोलदै ऐ आवाज़ शुणी, ‘हे शाऊल, हे शाऊल तू मुँभै किबै सता सा? मेरै खिलाफ़ लड़ना तेरी तैंईंयैं मुश्किल सा।’

¹⁵“मैं बोलू, ‘हे प्रभु तू कुण सा?’ प्रभुऐ बोलू, ‘हांऊँ यीशु सा ज़ुणिबै तू सता सा,

¹⁶पर तू उठ, आपणी ज़ोंघा पैंधै खड़ा हो, किबैकि मैं तौभै एथै री तैंईंयैं दर्शन धिना सा कि तौभै तिन्हां गैला रा बी सेवक होर गुआह ठहरानू ज़ो तैं हेरी सी होर तिन्हरा बी ज़ुणी री तैंईंयैं मूँ तौभै दर्शन देणा।

¹⁷होर मूँ तौभै तेरै लोका न होर होरी ज़ाति रै लोका न बच़ाँदै रौहणा ज़ुणी हागै ऐबै मूँ तू भेज़णा।

¹⁸कि तू तिन्हरी औछ़ी खोलला तैबै ते निहारै न प्याशै धिरै बै होर शैतानै रै अधिकारा न परमेश्वरा धिराबै फिरलै ताकि तिन्हां बै पापै री माफी मिलली होर ज़ो लोका मूँ पैंधै बशाह केरिया पवित्र केरूऐ सी तिन्हां सैंघै मीरास पालै।’

¹⁹“तैबै हे राज़ा अग्रिप्पा मैं तेई स्वर्गीय दर्शनै री गैल मैनी।

²⁰पर पैहलै दमिश्क शैहर रै, तेथा न बाद यरूश्लेम शैहरा न रौहणु आल़ै होर तैबै सारै यहूदियै रै सारै देशा न होर होरी ज़ाति रै लोका बै प्रचार केरदा रौहू कि पापा न मन बदला होर परमेश्वरै धिराबै फिरनै लायक कोई भलै कोम केरा।

²¹इन्हां गैलै री बजहा न किछ़ यहूदी मुँभै मन्दिरा न ढौकिया मारनै री कोशिश केरा ती।

²²परमेश्वरै री मज़ती सैंघै हांऊँ औज़ा तैंईंयैं बणी रौहू होर होछ़ै ब़डै सैभी सामनै गुआही देआ सा होर तिन्हां गैला बै बोला सा ज़ो भविष्यवक्तै होर मूसै बोली सी कि ऐ पूरी होणू आल़ी सी।

²³कि मसीह बै दु:ख च़कणा पौऊ होर तेही सैभी न पैहलै मूँऐंदै न ज़िन्दै होईया आसरै लोका न होर होरी ज़ाति रै लोका न परमेश्वरै रै राज्य रा प्रचार केरना।”

²⁴ज़ैबै पौलुस एसा रीतिऐ ज़वाब देंदा लागा ती, ता फेस्तुसै ज़ोरा सैंघै बोलू, “हे पौलुस तू पागल सा, बोहू ज्ञानै तू पागल केरू सा।”

²⁵पर पौलुसै बोलू, “हे महाप्रतापी फेस्तुस, हांऊँ पागल नी ऑथि पर सच़ाई होर बुद्धि री गैला बोला सा।

²⁶राज़ा भी ज़ुणी सामनै हांऊँ बै धड़क बोलदा लागा सा इन्हां गैला बै जाँणा सा होर मुँभै याद सा कि इन्हां गैला न कोई भी गैल तेईन छुपीदी नी ऑथि किबैकि ऐ घटना ता कुणै न नी हुई।

²⁷हे राज़ा अग्रिप्पा, कि तू भविष्यवाणी केरनु आल़ा बै बशाह केरा सा? हाँ हांऊँ जाँणा सा कि तू बशाह केरा सा।”

²⁸अग्रिप्पै पौलुसा बै बोलू, “तू थोड़ै ज़ेही समझ़ाइया मुँभै मसीही बणाणा चाहा सा?”

²⁹पौलुसै बोलू, “परमेश्वरा आगै मेरी प्रार्थना सा, कि थोड़ै, कि बोहू सिर्फ़ तू नी बल्कि ज़ेतरै लोका औज़ मेरी शुणा सी ते इन्हां बन्धन छ़ौड़िआ मूँ सांही होलै।”

³⁰तैबै राज़ा, हाकिम होर बिरनीकै होर तिन्हां सैंघै बैशणू आल़ै उठिया खड़ै हुऐ, होर नौठै।

³¹होर तै जाँदै-जाँदै आपु न बोलदै लागै, ऐ मांहणु ता मौऊत होर बन्धना लायक ऐण्ढा किछ़ नी केरदा।

³²अग्रिप्पै फेस्तुसा बै बोलू, “अगर ऐई मांहणुऐ महाराज़ै री कसम नी ती धिनी ता छ़ुटी सका ती।”